Na̱ Ruu̱t 1
1
Bi̱ kamá nga kijí Elimelee̱k ko̱jo xota̱ ndiꞌaa̱ nangii̱ xota̱ Moaa̱b
1Kui ni̱xtjin jàn kjiꞌanga atíxoma xota̱ xi tsꞌaxiéꞌá xotaa̱, ki̱a̱ na̱xi̱ńdá Israee̱l, kisꞌie ngo kjindiá ngayeje na̱xi̱ńdaá.
Kó ngo nda̱ xi chji̱a̱ni na̱xi̱ńdáꞌniú Belee̱n, ngi̱ndie xi tikón ki̱a̱ nangi Jundáa̱, kijíkꞌíjñá ngotjón ki̱a̱ tꞌanangii̱ nangi Moaa̱b, kui ko̱jo chjo̱ón, ko̱jo ngajó ndí xíꞌiín. 2Elimelee̱k kiꞌmí kui nda̱, kó chjo̱ón na̱ Noemi̱ kiꞌmí, kó Majloo̱n ko̱jo Kelioo̱n kiꞌmí ngajó ndií, na̱xi̱ńdáꞌniú Belee̱n boá nínga chji̱a̱ni, ngi̱ndie xi tikón ki̱a̱ nangi Jundáa̱, kó ki̱a̱ kijíkꞌíndo nangi Moaa̱b. Ngayejee̱ nga xota̱ tji̱e̱e̱ Efraii̱n kjindibáni.
3Ti̱chaa̱n jachó ni̱xtjin nga kꞌien Elimelee̱k, xi̱ꞌii̱n na̱ Noemii̱, kó kui xota̱chjo̱on ko̱jo ndií, kisꞌińdo soboá.
4Ngije jaꞌa ni̱xtjin Majloo̱n, ko̱jo Kelioo̱n kisꞌiee̱ chjo̱on, kó ínchjín xí chji̱a̱ni nangi Moaa̱b kisꞌińdojo̱. Ngo xi na̱ Orfa̱ kiꞌmí, ko̱jo ngo xi na̱ Ruu̱t kiꞌmí, kó mara̱ ngi tie nó kisꞌińdo kui ngi̱ndiee̱. 5Jaskan jesón Majloo̱n ko̱jo Kelioo̱n nga, kó kisꞌijña soboá na̱ Noemii̱, ngiti̱ jmí xi̱ꞌin, ko̱jo ngiti̱ jmí ndí kisꞌiejiín.
Bi̱ tsꞌén kijí na̱ Noemii̱ ko̱jo na̱ Ruu̱t na̱xi̱ńdáꞌniú Belee̱n
6Kósꞌe̱ na̱ Noemii̱ ko̱jo ínchjín kja̱ndaa̱ jastjíe̱n, kó jatjoni nangi Moaa̱b, ngatꞌa̱ tsintꞌié nga Néná katsꞌénchikonñé xota̱ na̱xi̱ńdaá ki̱a̱ nangi Jundáa̱ nga katsjaá nichinie. 7Kósꞌe̱ na̱ Noemii̱, ko̱jo nga jó ínchjín kja̱ndaa̱, jatjoni kui ngi̱ndie nínga kisꞌińdoo̱, kó iskjíbendi̱yà nga kijíꞌoyá nginí nangi Jundáa̱. 8Kósꞌe̱ na̱ Noemii̱, bi̱ katsoó nga jó ínchjín kja̱ndaa̱:
—Yàjnú, ta̱sá tangín nginíjnú ndiꞌaa̱ na̱anjnú nga ngo nga ngojnú. ¡Ja̱ be Néná kꞌuieé kjo̱a̱ni̱ma̱takón, tsi̱ꞌe̱ nga nda sa̱ꞌínjo̱jnú jún, xikó tsꞌén nda kiniꞌánjo̱jnúꞌun an, ko̱jo ndína xi je jesoón! 9Míꞌáa̱ Néná tsi̱ꞌe̱ nga tsja̱ajnú, nga ka̱ma kꞌuiéjnú ngi̱ndie nga si̱ꞌankjaꞌyájnú, ki̱a̱ ndiꞌa nínga ku̱i̱ndyionjo̱jnú xi̱ꞌin xi sa̱kójnú.
Sꞌe̱ na̱ Noemii̱ katsꞌénkixotꞌa nga katsjaá ngo ndsó tꞌanijon, ta̱nga kui íchjiín, ítsꞌi̱yanii̱ nga askjandá, 10kó bi̱ kiꞌmií na̱ Noemii̱:
—Jmí, nga jójne̱ kongínjo̱ nginíjne̱ ji nangìi̱.
11Ta̱nga na̱ Noemii̱, bi̱ katsoó kui ínchjiín:
—Tangínjnú, ndí ínchjín. Mí tsjá nga an kongínjo̱jnúꞌun. A ka̱má kꞌuié ngasena ndí xíꞌín xi ka̱ma ku̱i̱xanjo̱jnú. 12Tangínjnú, ndí ínchjín, tangínrajnú, ngatꞌa̱ je kamáxchá án, tsi̱ꞌe̱ nga kꞌuié nginína xi̱ꞌin, kó nda tsi bi̱ xian án: Tjínna kjo̱a̱chiyá, kó tsi kui ni̱xtji̱e̱e̱n kjojñajo̱ an ngo xi̱ꞌin, kó tsi kꞌuié ngasena ndí, 13a xchiyàjnúu̱ ngaskande nga ka̱maxchá kuí ndií. Jmí ndí ínchjiín. Achichí tsie ngase kjo̱a̱ni̱ma̱ tsꞌénfoaꞌatio an, ta̱bo̱a̱jiín jún, ngatꞌa̱ tsja Néná kondra̱na tikónni ngotꞌe̱.
14Kósꞌe̱ kui ínchjiín ꞌniú askjandáyà, kó ti̱ askjandá nginí, sꞌe̱ na̱ Orfaa̱ katsjaá ngo ndsó tꞌanijon ṉchiꞌyaá nga katsꞌénkixotꞌa, ta̱nga na̱ Ruu̱t, to̱kó ki̱a̱ kisꞌijñajo̱ra na̱ Noemii̱. 15Kósꞌe̱ na̱ Noemii̱, bi̱ katsoó na̱ Ruu̱t:
—Ngotꞌe̱ ꞌne̱, xo̱ngòo̱, jè kijíꞌoyá nginí nangii̱, kó ki̱a̱ kijítji̱ngi nginií ne xi tsꞌéndíkón, tꞌentji̱ngíi̱ kui nga.
16Ta̱nga na̱ Ruu̱t, bi̱ katsó:
Ngata̱ ꞌniújín chjiéꞌéjínní, tsi̱ꞌe̱ nga kꞌuijñámasiee̱n, ko̱jo nga sa̱ꞌinkjiin yojona,
ngatꞌa̱ ta̱ nínga kꞌuin ji, ki̱a̱ kjuín an nga,
kó ta̱ nínga ku̱i̱ndyin ji, ti̱ ki̱a̱ kotíjña̱ an nga.
Nangìi̱, nangina ka̱ma, kó Nèe̱, Ne tsa̱ꞌa̱n ka̱ma nga.
17Nínga ko̱yè jí, ti̱ ki̱a̱ ko̱yà an nga,
kó ti̱ ki̱a̱ kjónijínna nga.
Bo̱a̱ kjiꞌi ni xi ngatsꞌénjo̱na Néná,
kó ngaskande ngatásón ngasee̱ ni, tsi kꞌuijñámasiee̱n,
ngototo kjo̱a̱bo̱yaa̱ xi ka̱maa̱ kꞌo̱xiékjoná ñá.
18Kó na̱ Noemii̱, ngiti̱ jmí ni katsójín ngasee̱ na̱ Ruu̱t, nga kamábe nga je katsjaákon nga nijan ko̱e̱je̱jo.
19Kó kijíyise ngajó kui ínchjiín, ngaskande nga jachó na̱xi̱ńdáꞌniú Belee̱n, kó ngije tsꞌasꞌien kui na̱xi̱ńdáꞌniuú, ngayeje xotaa̱, kijíndikoón nga kamábe, kó simónié simóꞌón kamá. Ínchjín xí kamábee̱, bi̱ katsoó xkjín: ¡A kuijín kui xota̱chjo̱on xi ꞌmí na̱ Noemii̱, xi na̱ ixii̱ ꞌmií nga!
20Kó na̱ Noemii̱, bi̱ katsoó:
Ngo kjo̱a̱nda kuíꞌájnúꞌun, ngata̱ na̱ ixijín ꞌmíjnúꞌun, ta̱sá na̱ xi sa tꞌínjnúꞌun, ngatꞌa̱ Néná xí tjiín ngaꞌniuú, jè katsꞌén sa kjo̱a̱mindyionna. 21Nga jatjo an na̱xi̱ńdáꞌniú Belee̱n, ngayeje nii̱ xi kisꞌiena, ta̱nga ngotꞌe̱ ꞌne̱, nga kjoéꞌe̱ꞌoya nginí an, ta̱ kjiꞌitiya tsí ndsa̱ an nga katsangiyana Néná. Ánní nga na̱ ixi ꞌmíjnúꞌun, xi Kui Néná xí tjiín ngaꞌniuú, kondra̱na je tikónni, kó achichí kjo̱a̱ni̱ma̱ tjítsꞌénkꞌátiona.
22Kó bo̱a̱ tsꞌén na̱ Noemii̱ ko̱jo kja̱ndaa̱, kui xi na̱ Ruu̱t, na̱ xi chji̱a̱ni nangi Moaa̱b, ngije jachó ki̱a̱a̱ nga jatjoni nangii̱ xota̱ Moaa̱b, jachó na̱xi̱ńdáꞌniú Belee̱n, kó kjiꞌá má nga je tsꞌén ꞌbítsꞌi̱yanii̱ nga bichá sebandaa̱.
Currently Selected:
Na̱ Ruu̱t 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014