Xota̱ Roma̱ 8

Bi̱ tsꞌén íni̱jmì Pabloo̱ kjo̱a̱a̱ nga ku̱i̱ndyión xikótsꞌèn mejeén A̱si̱énni̱xtjii̱n Néná

1Kósꞌe̱ ngotꞌe̱ ꞌne̱, Néná ngiti̱ ko̱tíjéjiín xota̱ xi je katsꞌéngojo̱ yojoo̱ Kristo̱ Kjisoo̱, kui xi tjimá xikótsꞌèn mejeén A̱si̱énni̱xtjii̱n Néná, jmí tsi xikótsꞌèn mejeén yojoo̱. 2Ngatꞌa̱ ngije kiniꞌángojo̱ yojoná Kristo̱ Kjisoo̱, A̱si̱énni̱xtjii̱n Néná xi tsjáná kjo̱a̱mindyioo̱n, katsjáná ngo kjo̱a̱kiti xi sa̱ꞌíndéná kjo̱a̱a̱ kjo̱a̱kitii̱ jeé ko̱jo kjo̱a̱bo̱yaa̱. 3Ngatꞌa̱ Néná xí kamaá katsꞌén ni xi kamájiín katsꞌén kjo̱a̱kitii̱ Moisee̱, ngatꞌa̱ kjo̱a̱kitii̱ jmí ngaꞌniú kisꞌiejiín nga tsꞌaxiéꞌá xota̱ nga̱sondiee̱ ngatꞌa̱ inda kamá xotaa̱. Ta̱nga Néná katsangiya ndií nga xikoó ñá kamá, kó nga ta̱ngatꞌanii̱ jéná nga kꞌien, kó kui íchjí tsi̱ꞌe̱ nga Néná sa̱ꞌínkjié jeé xota̱ nga̱sondiee̱. 4Kuíni nga tsi tindyión xikótsꞌèn mejeén A̱si̱énni̱xtjii̱n, kó tsi ngiti̱ bo̱a̱jín tsꞌén tindyión xikótsꞌèn síndo xotaa̱ kui nga̱sondie, ka̱máná si̱ꞌankjatjosóo̱n kjo̱a̱kixi̱ xi míꞌá kjo̱a̱kitii̱ Néná.

5Ngatꞌa̱ xota̱ nga̱sondie xi májiín ꞌbíꞌniuú ni xi ndajín xi tsꞌén, ta̱kuítsí ni xi ndajiín xi tsꞌénkjó, ta̱nga xota̱ xi chji̱a̱ni A̱si̱énni̱xtjii̱n, ni xi tsi̱ꞌe̱ A̱si̱énni̱xtjii̱n xi tjíjinkon. 6Ngatꞌa̱ tsi ku̱i̱ndyión nga si̱ꞌankjó ngayeje ni xi ndajín xi mejeén sa̱ꞌín yojoná, ko̱yà ñá ngindyi̱ko̱n Néná, ta̱nga tsi ta̱kuítsí ni xi tsi̱ꞌe̱ A̱si̱énni̱xtjii̱n Néná xi si̱ꞌankjó, kjiꞌá boá nga kꞌuiéná kjo̱a̱mindyion ngatsjéni̱xtjin ko̱jo kjo̱a̱xió. 7Ngatꞌa̱ kjo̱a̱niꞌánkjoó xota̱ nga̱sondiee̱, kondraa̱ Néná tikón, ngatꞌa̱ mejénjiín ti̱nde ka̱májiín sa̱ꞌínkjatjosón kjo̱a̱kitii̱ Néná. 8Kó kui xota̱ xi síndo xikoó xota̱ nga̱sondiee̱, kuí boá xi ka̱májiín sa̱ꞌíntsjaà Néná.

9Ta̱nga jún je ngiti̱ bo̱a̱jín tsꞌén tindyiónjnú xikoó xotaa̱ kui nga̱sondiee̱, tindyiónjnú xikoó ni xi tsi̱ꞌe̱ A̱si̱énni̱xtjii̱n, ngatꞌa̱ A̱si̱énni̱xtjii̱n Néná tikónjinjnú. Ta̱nga tsi tjín xota̱ xi jmíjiín A̱si̱énni̱xtjii̱n Kristoo̱, Kristoo̱jín chji̱a̱ni. 10Ta̱nga tsi Kristoo̱ tikónjinjnú, jeé ja̱koxi̱ nga je katsꞌénkꞌién yojojnú, ta̱nga A̱si̱énni̱xtjii̱n kuí xí tsjá kjo̱a̱mindyion ta̱ngatꞌanii̱ kjo̱a̱kixi̱i̱. 11Kó tsi kui A̱siénni̱xtjin xi katsꞌénkjaꞌáꞌyaá Kjisoo̱ ngi̱jii̱n xota̱ xi je jesoón xi tikónjinjnú, ja̱ kui xi katsꞌénkjaꞌáꞌyaá Kristo̱ Kjisoo̱ ngi̱jii̱n xota̱ xi jesoón ngatsꞌénkꞌíjñá nginíjnú ngindyi̱ko̱n Néná. Néná boá xi sa̱ꞌín kui nii̱ ta̱ngatꞌanii̱ A̱siénni̱xtjin xi tikónjinjnú.

12Kuíni já ntsꞌie, tikónná ngo kjo̱a̱ꞌniú, ta̱nga jmí tsi tsi̱ꞌe̱ nga ku̱i̱ndyión xikótsꞌèn tsꞌénkjó ngo xotaa̱ kui nga̱sondiee̱. 13Ngatꞌa̱ tsi tindyiónjnú xikótsꞌèn tsꞌénkjó ngo xotaa̱ kui nga̱sondiee̱, ko̱yàjnú. Ta̱nga tsi si̱ꞌankjiénjnú A̱si̱énni̱xtjii̱n tsi̱ꞌe̱ nga ngiti̱ si̱ꞌánjínjnú ni xi ndajiín, ku̱i̱ndyionjnú.

14Ngatꞌa̱ ngayeje xota̱ xi A̱si̱énni̱xtjii̱n Néná bokoó ndi̱yà xí tjimá, kuí boá xi ndií Néná. 15Ngatꞌa̱ jmí tsi a̱siénni̱xtjin xi moso̱ tsꞌénná xi katseꞌéjnú tsi̱ꞌe̱ nga ko̱nda̱kon nginíjnú, ngo a̱siénni̱xtjin xi ndií Néná tsꞌénná xí katseꞌéjnú, kuíni nga bi̱ ꞌmí: “¡Abba! ¡Na̱ꞌmi!” 16Ti̱ kuíní A̱si̱énni̱xtjii̱n Néná xi nijan majo̱ a̱si̱énni̱xtjinná kó kuí boá xi tsóyà kixi̱ nga ñá boá xi ndií Néná. 17Kó tsi ñá xí ndií Néná, ja̱ ti̱ sa̱kóná ni xi tsi̱ꞌe̱, kó nijan sa̱kóná kui nii̱ ko̱jo Kristoo̱, ta̱nga chjiéngá ku̱i̱tja̱tiójo̱ kjo̱a̱ni̱ma̱a̱ Kristoo̱, tsi̱ꞌe̱ nga nijan sa̱kóná kjo̱a̱jee̱ Néná.

18Ta̱nga bee̱ko̱n an nga kui kjo̱a̱ni̱ma̱ xi ndyi̱bitjatió ngotꞌe̱, kjo̱chótji̱ngíjín ngayeje kjo̱a̱je xi jaskan sa̱kóná. 19Ngatꞌa̱ ngayeje ni xi katsꞌénda Néná, achichí ni xi kjimaa̱ nga ndyi̱koya nga ko̱kó cha̱n cha̱n Néná nga ñá boá xi ndií. 20Ngatꞌa̱ ngayeje ni xi kamándaa̱ ngiti̱ jmíjiín ngaꞌniú tsi sa̱ꞌínkjatjosón ni xi tjiín nga sa̱ꞌín, jmí tsi kjo̱a̱a̱ nga bo̱a̱ tsꞌén kamámejeén, ta̱ngatꞌanií kjo̱a̱a̱ nga Néná íjñá kui kjo̱a̱chiyaá. 21Ngatꞌa̱ ni xi katsꞌénda Néná ndyi̱koyaa̱ nga xtjo̱ꞌóxín chꞌià xí yaꞌanijín, ni̱xtjin kjiꞌanga xota̱ xi ndií Néná ka̱mandé kó sa̱ko̱ó kjo̱a̱jee̱. 22Ngatꞌa̱ jè ya ñá nga ngayeje ni xi katsꞌénda Néná ndyi̱foaꞌatio kjo̱a̱ni̱ma̱ nga on kjimaa̱ ko̱jo nga xikó maá tsi̱ndi̱o̱o̱ ngo xota̱chjo̱on xí ndí stse̱én kjimaa̱. 23Kó jmí tsi ta̱kuítsí ni xi katsꞌénda Néná xí bo̱a̱ kjimaa̱, ko̱jo ñá xi je tikónná A̱si̱énni̱xtjii̱n Néná xikoó ngo ni xi tsjatjónná kjo̱a̱a̱ ni xi jaskan tsja̱aná. Tji̱e̱nga ndyi̱chiyá nga Néná tsja̱aná ngayeje kjo̱a̱nda xikoó ngo ndií ngije kisꞌijñandé yojoná. 24Ngatꞌa̱ ta̱ngatꞌanií kjo̱a̱chiyaá nga kaꞌnaxiéꞌáná, ta̱nga jmí tsi ndyi̱chiyáa̱ ni xi yaa̱, ta̱sá ni xi yàjiín, ngatꞌa̱ ni xi yaa̱, mí tsjá xchiyàa̱. 25Ta̱nga tsi ngo ni xi yà jàn xí xchiyá, xchiyá sakon sakoo̱n.

26Ti̱ bo̱a̱ ti̱ tsꞌén A̱si̱énni̱xtjii̱n bosikójoná ngatꞌa̱ inda tindyión. Xikoó nga yà jàn mí ni xi kꞌuín nga ko̱ndókjoáa̱ Néná, kó ti̱kuíní A̱si̱énni̱xtjii̱n xi chji̱a̱tjená. A̱si̱énni̱xtjii̱n foeꞌetsiéꞌoón nga chji̱a̱a̱ Néná, kó májín ndaꞌyaá nga én kuí nii̱. 27Néná xí be ini̱ma̱a̱ xotaa̱, jè be ni xi mejeén sa̱ꞌín A̱si̱énni̱xtjii̱n, ngatꞌa̱ xikótsꞌèn mejeén Néná, bo̱a̱ tsꞌén A̱si̱énni̱xtjii̱n, ꞌbítsꞌoaá Néná ta̱ngatꞌanii̱ xota̱ tsjiee̱.

Bi̱ tsꞌén íni̱jmì Pabloo̱ kjo̱a̱a̱ nga tsie ngase ni xi je kiniꞌán, ta̱bo̱a̱jiín ni xi kichajá

28Kó jè ya nga xota̱ xi tsꞌéntjó Néná, Néná tsꞌeén ni xi nda nganda tsi̱ꞌe̱, xota̱ xi Néná jaꞌájin xikótsꞌèn kamámejeén kui. 29Ngatꞌa̱ xota̱ xi Néná ja̱bo̱a̱ je be, índa nga kui xi xikoó tsi ndií kui ka̱ma, tsi̱ꞌe̱ nga ndií kui, kui xi tjón ka̱maa̱ ngayeje ntsꞌiee̱. 30Kó kui xota̱ xi tjón jaꞌájin Néná, kuí boá xi tsíchji̱a̱a̱, kó xi tsíchji̱a̱a̱, kuí xí xota̱ kixi̱ katsꞌén, kó xi xota̱ kixi̱ katsꞌeén, kuí boá xi katsjaá kjo̱a̱je.

31Mí ni xi kꞌuín kjo̱a̱a̱ kui nii̱. Tsi Néná tikónjo̱ná, ꞌyá xi ka̱maa̱ kondra̱ná kꞌuijñá. 32Néná íxꞌi̱a̱njín ndií, kó ta̱sá katsjandiè nga kiniꞌánkꞌién ndií ta̱ngatꞌanii̱ ñá, kó kótsꞌèn nga ka̱májín ta̱ tsja̱aná ñá ngayeje nii̱. 33ꞌYání xi ka̱maa̱ ko̱óngítaꞌin xota̱ xi Néná jè jaꞌájin. Néná xí bo̱a̱ katsó nga kixi̱ ka̱ma xota̱ xi tsi̱ꞌe̱. 34ꞌYá xí ko̱tíjéná. ¡Ta̱ ꞌyàjín ni! Ngatꞌa̱ Kristoo̱ boá xi kꞌien ta̱ngatꞌanii̱ ñá, kó jaꞌáꞌyaá, kó ngotꞌe̱ ꞌne̱ ki̱a̱ tikón xtji̱e̱e̱n nga fojnií Néná, kó tsꞌénmíꞌatjeé Néná ta̱ngatꞌanii̱ ñá. 35ꞌYá xi ka̱maa̱ kjo̱a̱ꞌáxínná kjo̱a̱tjoó Kristoo̱. A kjo̱a̱ni̱ma̱a̱. A kjo̱a̱boaa̱. A kjo̱a̱miyotji̱ngii̱. A kjo̱a̱bojoó. A kjo̱a̱kjiꞌixtií. A kjo̱a̱a̱ nga ni xi chꞌokjiꞌi ka̱mataꞌin. A kjo̱a̱bo̱yaa̱. 36Bi̱ tsꞌén kjitꞌa xo̱jo̱n eén Néná:

Ta̱ngatꞌanii̱ ji nga tjíniꞌánkꞌiénjne̱,

tjíꞌbíxki̱jne̱ xikó maá cho̱tsa̱nga̱ xi tjífíniꞌánkꞌién.

37Ta̱nga ngi̱jii̱n ngayeje ni xi̱ꞌbi̱, jè kiniꞌán, kó tsie ngase ni xi si̱ꞌán ngatꞌaa̱ kui xi katsꞌéntjóná. 38Ngatꞌa̱ jè be kixi̱ kixi̱ an nga nde ngojín ni, ti̱nde kjo̱a̱bo̱yaa̱, ti̱nde kjo̱a̱mindyioo̱n, ti̱nde ndítsjiee̱, ti̱nde ngaꞌniuú xindajín, ti̱nde ni xi tjín ngotꞌe̱, ti̱nde ni xi sꞌe̱ ka̱ma, 39ti̱nde ni xi ꞌniú nkꞌa, ti̱nde ni xi ꞌniú na̱nga̱, ti̱nde ngojín ni xi je kamándaa̱ xi ka̱maa̱ kjo̱a̱ꞌáxínná kjo̱a̱tjó xi akó Néná nga katsjáná Kristo̱ Kjisoo̱, kui xi Ndi̱a̱ná.

Currently Selected:

Xota̱ Roma̱ 8: MAIX

Highlight

Copy