Xota̱ Roma̱ 7

Bi̱ tsꞌén íni̱jmì Pabloo̱ kjo̱a̱a̱ ngo chi̱bo̱a̱ xi chji̱a̱ni kjo̱a̱a̱ kjo̱a̱bixaa̱n

1Jún ntsꞌie, xi be kjo̱a̱kitii̱ xí tsꞌénchji̱a̱jo an. A yàjínjnú nga tji̱e̱nga síndo xotaa̱, kjo̱a̱kitii̱ kuí xí botixómaá. 2Kuíni nga kui xota̱chjo̱on xí je ixaán, chjiéngá kꞌuijñájo̱ xi̱ꞌii̱n xikótsꞌèn tjítꞌa kjo̱a̱kitii̱, tji̱e̱nga tikón xi̱ꞌii̱n, ta̱nga tsi ko̱yà, jè sꞌi̱jñandétꞌaa̱ xi̱ꞌii̱n, xikó tsó kjo̱a̱kitii̱ kjo̱a̱bixaa̱n. 3Kuíni nga tsi kui xota̱chjo̱on kje̱ꞌe xíꞌín ku̱i̱xanjo̱ tji̱e̱nga tikón xi̱ꞌin xi ixánjo̱, tjítsꞌéntꞌariíkjo̱a̱ xi̱ꞌii̱n, ta̱nga tsi ko̱yà xi̱ꞌii̱n, ngiti̱ kuijín kjo̱a̱kitii̱ kjo̱a̱bixaa̱n ko̱tíxomaa̱, kó ka̱ma ku̱i̱xanjo̱ kje̱ꞌe xíꞌín, kó jmí tsi tjítsꞌéntꞌaa̱kjo̱a̱ xi̱ꞌii̱n.

4Ti̱ bo̱a̱ ti̱ tsꞌén jún ntsꞌie, nga je kiniꞌángojo̱jnú yojojnú Kristoo̱, jè jesónjnú ngi̱yaa̱ kjo̱a̱kitii̱. Tsi̱ꞌe̱ nga ka̱mangojo̱jnú kui xi jaꞌáꞌyaá ngi̱jii̱n xota̱ xi je jesoón, kó nga ni xi nda xi tsi̱ꞌe̱ Néná xí si̱ꞌánjnú. 5Ngatꞌa̱ kjiꞌanga kixindyión nga kiniꞌán ni xi mejeén yojoná, kjiꞌanga ni xi ndajín xi kamámejénná kiniꞌán, kjo̱a̱kitii̱ xí katsꞌén nga ta̱sá má ꞌniú ngase kiniꞌánjé, kó ni xi kijíjo̱na kjo̱a̱bo̱yaa̱ kiniꞌán. 6Ta̱nga ngotꞌe̱ ꞌne̱ jè jesón ñá kjo̱a̱a̱ kui kjo̱a̱kiti xi atíxománá, kó ka̱ma si̱ꞌansée̱n Néná. Ta̱nga jmí tsi xikoó ngasꞌe̱ nga bo̱a̱ kiniꞌán ta̱ngatꞌanii̱ kjo̱a̱kiti xchaá, ta̱sá kjo̱a̱a̱ nga ki̱a̱ ndyi̱mongíntji̱ngí A̱si̱énni̱xtjii̱n Néná.

Bi̱ tsꞌén íni̱jmì Pabloo̱ kjo̱a̱a̱ jé xi tikónjinná

7Mí xí kꞌuín tsobo̱a̱. Kjo̱a̱kitii̱ a jé boá. ¡Jmí! Ta̱nga tsi ta̱ngatꞌajiín kjo̱a̱kitii̱ kamábejín an jeé, ti̱nde kamábejín an kjo̱a̱ndikonkoón ngo ni, tsi bi̱jín tsó kjo̱a̱kitii̱: “Ngata̱ niꞌínmejénjín ji ni xi tse̱jín.” 8Ta̱nga jeé ta̱ ni xi mejénrií katsꞌénjo̱ kjo̱a̱kitii̱, kó katsꞌénkjién kuí kjo̱a̱botíxomaa̱ tsi̱ꞌe̱ nga sa̱ꞌin an ngayeje to̱ko̱ya kjo̱a̱ndikonkón, ngatꞌa̱ tsi jmíjín kjo̱a̱kitii̱, jeé jmí ngaꞌniújiín. 9Ngatꞌa̱ jmí kjo̱a̱kiti kisꞌiejínna ngasꞌe̱ nga kisꞌijña an, ta̱nga nga kamábe an kjo̱a̱botíxomaa̱ kjo̱a̱kitii̱, jeé kisꞌijñajinna, kó aya an. 10Kó kamábe an nga kuí kjo̱a̱botíxoma xi tjiín, xi tsja̱ana kjo̱a̱mindyion katsaki, kó ta̱sá kui xi katsꞌénkjína kjo̱a̱bo̱yaa̱. 11Ngatꞌa̱ ta̱ngatꞌanii̱ ni xi tjítꞌa kjo̱a̱botíxomaa̱ nga jeé tsꞌenṉcha̱jona, kó katsꞌénkꞌienjo̱na ni xi tjítꞌa kjo̱a̱botíxomaa̱.

12Kó bo̱a̱ tsꞌén nga ja̱koxi̱ boá nga kjo̱a̱kitii̱ tsjie, kó kui kjo̱a̱botíxoma tsjiee̱, kixi̱ ko̱jo nda. 13Kuíni nga, a ni xi ndaa̱ xí katsjána kjo̱a̱bo̱ya. ¡Jmí! Ta̱sá jeé katsꞌénkjién ngo ni xi nda, kó kuí xí jeꞌejo̱na kjo̱a̱bo̱ya, tsi̱ꞌe̱ nga kjo̱a̱botíxomaa̱ ko̱kó cha̱n cha̱n nga ta̱nisién ꞌniú ndajín jeé.

14Ngatꞌa̱ jè ya nga kjo̱a̱kitii̱ A̱si̱énni̱xtjii̱n, Néná jatjoni. Ta̱nga an xota̱ nga̱sondie án, kó xikoó tsi jeé je tsꞌatsiena. 15Ngatꞌa̱ ni xi tsꞌen an makjínjínna, ngatꞌa̱ jmí tsi ni xi mejénna xi tsꞌen an, ta̱sá ni xi sasiénjínna xi tsꞌen an. 16Kó tsi ni xi mejénjínna xi tsꞌen an, tsi tsꞌenjo̱ꞌo an nga nda kjo̱a̱kitii̱. 17Ta̱nga ngotꞌe̱ jè ngiti̱ ánjín xi tsꞌen an kui nii̱ nga bo̱a̱ tsꞌen an, kuí jé xí tikónjinna xi bo̱a̱ tsꞌén. 18Kó jè be an nga ngi̱jinna, ngi̱jin yojona, jmíjiín ni xi nda, ngatꞌa̱ ndatsi mejénna nga ni xi nda sa̱ꞌin an, ta̱nga tsꞌénjín an. 19Ngatꞌa̱ jmí tsi ni nda xi mejénna xi tsꞌen an, kuí ni xi ndajín xi mejénjínna sa̱ꞌin an xi tsꞌen an. 20Ta̱nga tsi ni xi mejénjínna sa̱ꞌin an xi tsꞌen an, jè ngiti̱ ánjín xi tsꞌen an ni xi ndajiín, kuí jé xí tikónjinna xi tsꞌén kuí nii̱.

21Kó kuíni nga, nga ndatsi mejénna ni xi nda sa̱ꞌin an, kꞌi̱e̱ be an kui kjo̱a̱kitii̱, nga ni xi ndajiín an tikónjinna. 22Ngatꞌa̱ ngi̱jii̱n ini̱ma̱na tsja mana kjo̱a̱kitii̱ Néná. 23Ta̱nga be an nga ngi̱jin yojona tikón kje̱ꞌe kjo̱a̱kiti xi kjánjo̱ kjo̱a̱kitii̱ kjo̱a̱kjíntakónna, kó kuí boá xi fíjo̱na ngi̱yaa̱ kjo̱a̱kitii̱ jeé xi tikónjinna.

24¡Ni̱ma̱ xò án! ꞌYá xí ko̱síko̱jona nga ku̱i̱ꞌíjñandéna kui yojo xi̱ꞌbi̱ xi tsꞌéntsjána kjo̱a̱bo̱yaa̱. 25Ndokꞌóchjì tsjàa̱ Néná ngatꞌaa̱ Ndi̱a̱ná Jesukristoo̱. Ja̱ kuíni nga ngayeje ko̱n an nga tsꞌensée̱n kjo̱a̱kitii̱ Néná, ta̱nga nga yojo an, mosoo̱ jeé kjima an.

Currently Selected:

Xota̱ Roma̱ 7: MAIX

Highlight

Copy