Ni xi akakoo̱ 9

1Ndítsjie xi ma uún katsꞌénkjanie tjioo̱, kó kamábe an ngo ńño xi kjindibáni ndiꞌakꞌajmi jàn, kó tsꞌáka tꞌanangii̱, kó kuí xí katseꞌeé yibii̱ ti̱xa̱na̱nga̱a̱ tꞌanangii̱. 2Kó iskjíxꞌá kuí ti̱xa̱na̱nga̱a̱ tꞌanangii̱, kó ki̱a̱ jatjoni ngo ṉdi̱ xi xikó maá ṉdi̱i̱ ngo orjno̱ xi ta̱nisién je, kó ṉdi̱i̱ kui ti̱xa̱a̱ xi katsꞌénjñó tsꞌueé ko̱jo tjo̱o̱. 3Kó ngi̱jii̱n kui ṉdi̱i̱ jatjoni chjo̱bo̱a̱ xi kisꞌikitsieni nga̱són tꞌanangii̱, kó kuí katseꞌeé ngaꞌniú xikoó cho̱ndáyaá. 4Kó akatíxomaa̱ tsi̱ꞌe̱ nga sa̱ꞌínꞌonjiín ngayeje xka̱ xi tjín tꞌanangii̱, ti̱nde jmí ni sa̱ꞌínjiín ngayeje ni xi sa̱si̱e̱ ko̱jo yá, ta̱kuítsí xota̱ xi ndyi̱yaꞌajín xtjien chi̱bo̱a̱a̱ seyoo̱ Néná. 5Ta̱nga katseꞌéndièjiín nga sa̱ꞌínkꞌién xotaa̱, ta̱ sa̱ꞌínkjaꞌatio tsí kjo̱a̱ni̱ma̱ nga sa̱ꞌínꞌoón ún sá, kó kuí kjo̱a̱ni̱ma̱ xi katseꞌeé, xikó maá nga kjiniéná cho̱ndáyaá. 6Kó kui ni̱xtjin jàn, xotaa̱ ko̱ngase kjo̱a̱bo̱yaa̱, ta̱nga sa̱kójiín, ka̱mamejeén ko̱yà, ta̱nga kjo̱a̱bo̱yaa̱ ko̱ngatꞌaxiín.

7Kui chjo̱bo̱a̱a̱ kuí xí xikó maá ndi̱je̱ xi je síndonda nga ko̱e̱je̱ kjo̱a̱xchán, to̱ko̱ kui cho̱o̱ tjiꞌá ngo ni xi xikó maá ngo korona̱ to̱nsinié, kó kje̱n mején xi kókón kje̱n xota̱ kon, 8kó tsja̱ xi tjiín, xikó maá tsja̱a̱ ínchjín, kó ṉꞌni̱u̱ xikó má kón ṉꞌni̱u̱ xandi̱je̱e̱ bo̱a̱ má kón, 9kó yojoo̱ kjijon ngo ni xi xikoó tsi ki̱cha̱, kó nga janie nga̱a̱ kui cho̱o̱, bo̱a̱ má tsꞌén fonie xikótsꞌèn fonie kjín karreta̱ xi ndyi̱kjien ndi̱je̱e̱ kjiꞌanga fí kjo̱a̱xchán. 10Ńtsꞌen bo̱a̱ má kón kamá xikoó tsi̱ꞌe̱ cho̱ndáyaá, kó ndaꞌyá kisꞌiee̱, kó ndaꞌyá ńtsꞌen kisꞌiee̱ ngaꞌniú tsi̱ꞌe̱ nga ún sá sa̱ꞌínꞌoón xotaa̱. 11Ngito̱ko̱o̱ chjo̱bo̱a̱a̱, kuí boá xi ndítsjiee̱ ti̱xa̱na̱nga̱a̱ tꞌanangii̱, kó kuí boá xi ꞌmí Abando̱n nga én ebreo̱, kó Apolio̱n ꞌmí nga én ngriengo̱.

12Je jaꞌa kui ni xi ndajín xi tjoón, ta̱nga chaja ngi jó.

13Ndítsjie xi ma juu̱n katsꞌénkjanie tjioo̱, kó tsintꞌie an ngo nda̱ xi kjindibáni ngamasiee̱n nga nijón ndi̱ja̱ xi síndotꞌa ṉchandikón xí to̱nsinié xi tikón kje̱n nínga tikón Néná, 14kó bi̱ katsoó xi ma jun ndítsjie xi tikoón tjioo̱:

–Chjándé ji nga nijón ndítsjie xi síndotaꞌniú tꞌa ndejèꞌ je xi ꞌmí Éufratee̱.

15Kó kachjándó nga nijón ndítsjiee̱, tsi̱ꞌe̱ nga sa̱ꞌínkꞌién ngo nga ján tjiín ngayeje xota̱ xi tjín nga̱sondiee̱, ngatꞌa̱ kuí xá ikꞌíndondani nga kjo̱chó kui chi̱bo̱a̱a̱, ko̱jo kui ni̱xtjii̱n, ko̱jo kui saá, ko̱jo kui noó. 16Kó tsintꞌie an kótjín má kui jájún ndi̱je̱e̱: Jó úchán miyo̱n ma.

17Kó bi̱ tsꞌén kamábe an kui ndi̱je̱e̱, ko̱jo xi síndosoón nga akakona: Ni xi kjijon yojoo̱ iní xikó maá ndiꞌií, ko̱jo aso xikó maá ndi̱jo̱ safiroo̱, ko̱jo sinié xikó maá ndso̱ko̱a̱n asufree̱, kó to̱ko̱ ndi̱je̱e̱ bo̱a̱ má kón xikoó to̱ko̱ xandi̱je̱e̱, kó tsꞌoa kui cho̱o̱ jatjoni ndiꞌí, ko̱jo ṉdi̱, ko̱jo asufre̱. 18Kó ngo nga ján tjiín xota̱ xi tjín nga̱sondiee̱ jesón ta̱ngatꞌanii̱ kui ndiꞌií, ko̱jo kui ṉdi̱i̱, ko̱jo kui asufree̱ xi jatjoni tsꞌoa kui cho̱o̱. 19Ngatꞌa̱ tsꞌoa ko̱jo ńtsꞌen kui ndi̱je̱e̱ boá nínga kisꞌijñaa̱ ngaꞌniú, ngatꞌa̱ ńtsꞌen xikó má kón ye̱e̱, bo̱a̱ má kón kamá, kó to̱ko̱ boá xi katsꞌénꞌónnii̱ xotaa̱.

20Kó xota̱ xi ngasee̱, kui xi jesónjínni kjo̱a̱a̱ kui kjo̱a̱ni̱ma̱a̱, kui xi ti̱nde bo̱a̱ tsꞌén katsꞌénkꞌoyájín yojoo̱, kó ti̱nde íjñámasienjín nga katsꞌéndikón xindajín, ko̱jo a̱sie̱én ne xi tsꞌénda xotaa̱ xi to̱nsinié, ko̱jo xi to̱ntiboa, ko̱jo xi ki̱cha̱, ko̱jo xi ndi̱jo̱, ko̱jo xi yá, kui ni xi nde májiín be, ko̱jo nde májiín fií, 21kó kui xotaa̱ ti̱nde katsꞌénkꞌoyájín yojoo̱ kjo̱a̱a̱ nga katsꞌénkꞌién xota̱, ti̱nde íjñámasienjín nga katsꞌén kjo̱a̱tjiꞌe, ti̱nde íjñámasienjín kjo̱a̱tondo̱, ti̱nde íjñámasienjín nga katsꞌénchejé.

Currently Selected:

Ni xi akakoo̱ 9: MAIX

Highlight

Compare

Copy