Ni xi akakoo̱ 10

Ndítsjiee̱ ko̱jo ndí xo̱jo̱o̱n

1Kó kamábe an ingo ndítsjie xi tjiín ngaꞌniú, xi tsꞌéndibájèn ndiꞌakꞌajmii̱ nga tikónjin ngo ṉdi̱, kó ngo ndi̱ꞌya̱ tikoón nga̱són to̱ko̱, kó kje̱n ꞌna̱ kamá xikó maá tsꞌueé, kó ti̱ꞌmi̱í ja̱ kon yásé xi tjítí má kón, 2kó ngi̱ya tsja tsꞌényaꞌa ngo ndí chꞌo̱ xo̱jo̱n xi kjiꞌitie, kó se xi kixi̱i̱ asién són nga̱soón ndáchíkoón, sꞌe̱ se xi skoón asién són nga̱soón tꞌanangii̱, 3kó ꞌniú askjandáyà, xikó maá ngo xandi̱je̱ xi kjandayà, kó nga askjandáyà, yito cho̱ꞌo̱n katsꞌénkjanie nda̱a̱. 4Kó ngije kandaꞌyá nda̱a̱ kui cho̱ꞌo̱o̱n, je kuitꞌa an xo̱jo̱n katsaki, ta̱nga ngo nda̱ tsintꞌie an xi chji̱a̱ni ndiꞌakꞌajmi jàn, xi bi̱ katsóna:

–Chje̱ꞌétjéꞌma ji ni xi katsó nga yito cho̱ꞌo̱o̱n, kó ngata̱ ꞌbítꞌejín ji xo̱jo̱n.

5Kó kui ndítsjie xi kamábe an nga sikónsón ndáchíkoón ko̱jo tꞌanangii̱, iskjininkꞌa tsja kixi̱ xtji̱e̱e̱n ndiꞌakꞌajmii̱, 6kó ngiboanéná katsó nga katsꞌénkjién jaꞌeén kui Néná xi tikón ngatsjéni̱xtjii̱n, kui xi katsꞌénda ndiꞌakꞌajmii̱, ko̱jo tꞌanangii̱, ko̱jo ndáchíkoón, ko̱jo ngayeje ni xi tjín ngi̱jii̱n, kó bi̱ katsó:

–Jè ngiti̱ jmíjín ngase ni̱xtjin, 7ngije kjo̱chó chi̱bo̱a̱ nga kui ndítsjie xi ma yitoo̱ sa̱ꞌínkjanie tjioo̱, kjo̱tjosón kui ni xi tjiꞌmaá Néná, xi katsóyàtjoón jáchji̱ni̱e̱ꞌe̱én, kui xi mosoo̱.

8Kui nda̱ xi tsintꞌie an kui xi kjindibáni ndiꞌakꞌajmi jàn, ti̱ tsíchji̱a̱jo nginína, kó bi̱ katsóna:

–Tꞌen ji, kó chjábé kui ndí chꞌo̱ xo̱jo̱n xi kjiꞌitiee̱ kui xi tjiyátsjà ndítsjie xi sikónkixi̱ nga̱soón ndáchíkoón, ko̱jo nga̱soón tꞌanangii̱.

9Kijíkóo̱n kui ndítsjiee̱, kó tsíꞌáa̱ tsi̱ꞌe̱ nga tsja̱ana kui ndí chꞌo̱ xo̱jo̱o̱n, kó bi̱ katsóna:

–Chjábé, kó chi̱ni ji, ngi̱ya ndso̱ꞌbe ixi ka̱ma xikoó ntsjieén, ta̱nga ngi̱ya nga̱ntsꞌoe sa ka̱ma.

10Kó iskjíbé an kui ndí chꞌo̱ xo̱jo̱o̱n nga tjiyátsjà kui ndítsjiee̱, kó iskjinie an, kó ngi̱ya ndso̱ꞌba án, ixi kamá xikoó ntsjieén, ta̱nga ngije iskjíni̱e̱ an, kamása ngi̱ya nga̱tsꞌo̱a̱ án. 11Kó bi̱ katsóna:

–Chjiéngá kꞌuiyé nginíi̱ ingo ndi̱yà xotaa̱ kjo̱a̱a̱ ni xi ka̱tso̱yaa̱ ji Néná, ni xi sa̱ꞌínjo̱ ta̱jñà nanginí, ko̱jo ta̱jñà ngi̱ndiení, ko̱jo ta̱jñà énní, ko̱jo já ree̱.

Currently Selected:

Ni xi akakoo̱ 10: MAIX

Highlight

Compare

Copy