Xo̱jo̱n Salmoo̱ 94
94
Néná kixi̱ tsꞌén kotsijee̱n xotaa̱
1¡Ji Ne, Jí boá ngo Ne xi tsꞌéngojo!
¡Ji Ne, take ji yojòo̱, Ne xi tsꞌéngojo!
2¡Ye ꞌne̱ nendiꞌamasien xi botíjeé kui nga̱sondiee̱,
te̱ꞌéchjíi̱ kui xota̱ xi nkꞌakoo̱n!
3Ngaskande kjiꞌání Ji Ne,
ngaskande kjiꞌání, nga tsja ka̱maa̱ xota̱ xi ndajiín.
4Ngaskande kjiꞌání nga to̱kó ku̱i̱chji̱a̱ én nkꞌakon,
ko̱jo nga to̱kó achichí yiꞌi ka̱maa̱ yojoo̱, ngayeje xota̱ xi tsꞌén ni xi ꞌniú ndajiín.
5Ndyi̱tsjánié xota̱ na̱xi̱ńdáa̱ Ji Ne,
ko̱jo kjo̱a̱ni̱ma̱ ndyi̱tsꞌènkjáꞌa xota̱ xi je tse̱ Ji.
6Ndyi̱tsꞌènkꞌién ínchjín kꞌán xi je jesón xi̱ꞌii̱n,
ko̱jo xota̱ xi xín nangi chji̱a̱ni, ko̱jo xota̱ xi je síndo xꞌi̱a̱n.
7Kó bi̱ ndyi̱tsó: Sku̱i̱e̱jín kui nii̱ Néná,
Nee̱ Jakoo̱b nde koaꞌaxki̱jín kui nii̱.
8Ngatamakjínjnú kui nii̱, jún xota̱ chi̱ni xi chji̱a̱ni na̱xi̱ńdaá, kó jún xota̱ xi kitikjo̱a̱.
Ngaskande kjiꞌání nga xota̱ xi kjínkón je ka̱majnú jún.
9Kui xi katsꞌénda tji̱bo̱a̱nijoo̱n, a ku̱i̱ntꞌièjín.
Kó Kui xi katsꞌénda ndyikoo̱n, a sku̱i̱e̱jín.
10Kui xi tsꞌénchjíni̱e̱ xota̱ na̱xi̱ńdaá, a ko̱tíjéjín.
Kui xi bokoyaá kjo̱a̱kjíntakón xota̱ nga̱sondiee̱, a sku̱i̱e̱jín.
11Néná be boá kjo̱a̱niꞌánkjoó xota̱ nga̱sondiee̱,
kó ni xi ta̱kjo̱a̱ndaní bo̱a̱.
12¡Ji Ne, achichíra̱ tsjaa̱ kui nda̱ xi niꞌínchji̱ni̱ ji,
ko̱jo bokoyée̱ kjo̱a̱kitìi̱!
13Tsi̱ꞌe̱ nga kꞌuieé kjo̱a̱xió ni̱xtjin xi ndajiín,
tji̱e̱nga kjimanda ti̱xa̱nga̱tsjo̱ó xota̱ xi ꞌniú ndajiín.
14Ngatꞌa̱ Néná ku̱i̱ꞌíjñámasienjín xota̱ na̱xi̱ńdáa̱,
ti̱nde ku̱i̱ꞌíjñá soboájín xota̱ xi je tsi̱ꞌe̱ Kui.
15Kꞌuié nginí kjo̱a̱kixi̱ kjiꞌanga si̱ꞌansee̱n ni xi katsꞌén xotaa̱,
kó ngayeje xota̱ xi kixi̱ síndo ini̱ma̱a̱, ki̱a̱ ko̱e̱je̱tji̱ngi kui nii̱.
16ꞌYá xí kꞌo̱xiéꞌána kjiꞌanga xota̱ xi ndajiín skjánjo̱na.
ꞌYá xí an ko̱síko̱jona nga sa̱ꞌínkjastjíe̱nna kjiꞌanga xota̱ xi tsꞌén ni xi ꞌniú ndajiín skjánjo̱na.
17Tsi Nénájín xi ko̱síko̱jona,
jè tsá kꞌuijñá ini̱ma̱na ngi̱ya nínga xió kjiꞌii̱ kjo̱a̱bo̱yaa̱.
18Ta̱nga kjiꞌanga bi̱ xian an: ¡Kjimongajón ndsa̱ko án!
Kjo̱a̱ni̱ma̱takóo̱n boá xi tsjangaꞌniúna Ji Ne.
19Kjiꞌanga ꞌniú nda̱ kamána,
kjo̱a̱niꞌándajòo̱n boá xi katsjaá kjo̱a̱tsja ini̱ma̱na.
20A Jí boá xi sa̱ꞌínkamajoo̱ kui xota̱ xí botixómá xi ndajiín,
kui xi kjo̱a̱kiti tsoó ni xi tsꞌénkjién,
nga ni xi ndajín tsꞌeén xota̱ xi ngasee̱.
21ꞌBítíkó xtín yojoo̱ kondra̱a̱ xota̱ xi kixi̱i̱,
kó tsjákjo̱a̱ nga niꞌánkꞌién xota̱ xi jmí jéjiín.
22Ta̱nga Néná boá xi xikoó ngi̱ndie nínga botíjña an,
Néna, kuí boá xi Ndi̱jo̱je xi ma ꞌniáko̱n an.
23Néná boá xi sa̱ꞌínkjindibánié ni xi ꞌniú ndajín xi katsꞌén,
kó sa̱ꞌínkjié nga ti̱kuii ni xi ndajín xi katsꞌén xi sa̱ꞌínkjién,
Néná, kui xi Néna boá xi sa̱ꞌínkjié kjin.
Currently Selected:
Xo̱jo̱n Salmoo̱ 94: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
