Xo̱jo̱n Salmoo̱ 89
89
Néná ngo ni índajo̱ Ndabii̱
Só xi katsꞌénda Etaa̱n.
1Ngatsjéni̱xtjin nga sie an kjo̱a̱ni̱ma̱takoón Néná.
Kó ta̱kjiꞌání nga xiyà an kjo̱a̱ꞌniátakón xi tjiín Ji Ne,
2ngatꞌa̱ jè bi̱ kixian an: Ngatsjéni̱xtjin nga sa̱kóngaꞌniuú kjo̱a̱ni̱ma̱takoón Néná,
kó ngaskande ti̱ ki̱a̱a̱ ndiꞌakꞌajmii̱ ꞌniú kꞌuijñí Ji ni xi ja̱koxi̱i̱.
3Kó bi̱ kase Ji: Ngo ni indajo̱ An kui xi jaꞌajin An,
kó katsjáa̱ ndso̱ꞌba Án Ndabii̱, kui xi moso̱na nga bi̱ kixiáa̱n:
4Ngatsjéni̱xtjin nga ꞌniú kꞌuijñá An xota̱ tji̱e̱e̱,
tsi̱ꞌe̱ nga ta̱kjiꞌání nga skjininkꞌa An ngi̱ndie nínga ko̱ti̱xome ji.
5Ji Ne, nkꞌajmii̱ ka̱tso̱ya ni xi fíndikónná xí niꞌín Ji,
kó ti̱ kꞌuiyá kjo̱a̱ꞌniátakóo̱n ngi̱jii̱n ngayeje xota̱ tsjiée̱,
6ngatꞌa̱, ꞌyání xi tjín ki̱a̱ nkꞌajmii̱ xi bo̱a̱ kon xikoó Ji Ne.
ꞌYá ne xi tjiín xi xikoó Jí.
7Achichí yandikón Néná kjiꞌanga matikó ndítsjiee̱,
ngayeje xi síndo nga ngo foaꞌatjiyajoo̱n xi bendikón.
8Ji Ndi̱a̱, Ji xi Ne tsi̱ꞌe̱ ngayeje jájuún,
ꞌyání xi xikó Jí, xi ta̱nisién tjiín ngaꞌniú.
Achichí kjo̱a̱ꞌniátakóo̱n tjiín.
9Jí boá xi botíxomée̱ nga tsꞌénxchán ndáchíkoón,
kjiꞌanga tjoninkꞌa ngaꞌniuú, Jí boá xi niꞌínkꞌíxí Ji.
10Jí boá xi kiniꞌínꞌíi̱n ko̱jo xi kiniꞌínkjiékjo̱a̱ Ji nangi Ejiptoo̱,
kó ngaꞌniuú ndse̱ boá xi kiniꞌínkjín Jí nga kiniꞌíntsojoboe Ji kondra̱a̱.
11Jí tse̱ ndiꞌakꞌajmii̱, ko̱jo ti̱ Jí tse̱ tꞌanangii̱ nga,
Jí boá xi kiniꞌínde Ji nga̱sondiee̱, ko̱jo ngayeje ni xi tjiín.
12Jí boá xi ikꞌíjñí Ji nínga ta̱ꞌii̱n, ko̱jo nínga nangii̱.
Na̱xi̱ Taboo̱r, ko̱jo na̱xi̱ Ermoo̱n tsja maa̱ kjo̱a̱a̱ Jaꞌée̱n.
13Jí tse̱ kui tjia ko̱jo kui ndsa̱ xi tjiín ngaꞌniuú,
ndse̱ kixi̱ Ji, kuí boá xi bokó nga je kiniꞌín Ji.
14Kjo̱a̱kixi̱i̱ ko̱jo ni xi kixi̱i̱ boá xi kamándani ngi̱ndie nínga botíxome Ji.
Kjo̱a̱ni̱ma̱takoón ko̱jo ni xi ja̱koxi̱i̱ boá xi fotsoꞌbátjoón Jí.
15¡Achichíra̱ tsjaa̱ xota̱ na̱xi̱ńdá xí maa̱ chaꞌayátsjaà!
Kui xi kꞌuimá ki̱a̱ nínga sa̱ꞌíntsijee̱n ndiꞌií kje̱n Ji, Ji Ne.
16Nga ngo ni̱xtjii̱n nga tsja ka̱maa̱ kjo̱a̱a̱ Jaꞌée̱n,
kó ta̱ngatꞌanii̱ kjo̱a̱kixi̱i̱ nga xchjanínkꞌá.
17Ngatꞌa̱ Jí boá xi kjo̱a̱jee̱ ngaꞌniuú,
kó ta̱ngatꞌanii̱ kjo̱a̱ndàa̱ nga sakó ngaꞌniú ngasejne̱.
18Ngatꞌa̱ Néná boá xi ꞌbíchjaá ni xi ndajiín,
kó rejne̱, Kuí boá xi xota̱ tsjiee̱ na̱xi̱ńdá Israee̱l.
19Ni̱xtjin xchá jàn kandokjo̱e̱je Ji xota̱ tsjiée̱ nga akakèe̱ ngo ni, kó bi̱ kasèe̱:
Jè tsꞌénbosiko̱jo An ngo nda̱ xi tjiín ngaꞌniú,
jè tsꞌénkjininkꞌa An ngo nda̱ xi jaꞌajin An ngi̱jii̱n xota̱ nangina.
20Ndabii̱ boá xi kasakona, kui xi moso̱na ma,
kó jè katsangijon An isti̱ ndikónná.
21Ngatsjéni̱xtjin nga ndsa̱ Án boá xi ko̱síko̱jo,
kó ko̱jo tjiana boá xi tsjangaꞌniúu̱.
22Kondra̱a̱ ka̱májiín kꞌo̱ṉchajo,
ti̱nde xota̱ xi ꞌniú ndajiín, kuijín xi ko̱tíxomaa̱.
23Ngatꞌa̱ Án boá xí sa̱ꞌinkjítie An kondra̱a̱ ngindyi̱ko̱n kui,
kó sa̱ꞌinꞌóo̱n ngayeje xi tsꞌenchꞌó kuí.
24Kjo̱a̱ꞌniátakónna ko̱jo kjo̱a̱ni̱ma̱takónna, ki̱a̱ kꞌuijñájo̱ kui,
kó ngi̱yaa̱ Jaꞌénna boá nga xtjonínkꞌá ngase ngaꞌniuú kuí.
25Kó ti̱ bo̱a̱ ti̱ tsꞌén kꞌuijñásón An tsja skón nga̱soón ndáchíkoón,
tsi̱ꞌe̱ nga kui ko̱tíxomaa̱,
ko̱jo tsja kixi̱ nga̱soón ndejeèꞌ,
tsi̱ꞌe̱ nga kui ko̱tíxomaa̱ nga.
26Kó kuí ni̱ma̱ ka̱tso̱ nga bi̱ ka̱tso̱na:
¡Jí boá xi na̱ꞌmina ma Ji, Jí boá xi Néna ma Ji,
ko̱jo Jí boá kui ndi̱jo̱je xí ꞌboxiéꞌána!
27Án boá xí tsjàa̱ kjo̱a̱nda xi tsoboaá, nga kui xi ndí xí tjón,
kó nkꞌa ngase kꞌuijñá An, ta̱bo̱a̱jiín ngayeje re xi tjín nga̱sondiee̱.
28Ngatsjéni̱xtjin nga tsjáa̱ kjo̱a̱ni̱ma̱takónna,
kó ni xi je índajo̱ An kui, ꞌniú kꞌuíjñá.
29Kó bo̱a̱ tsꞌén nga kju̱i̱e̱jín xota̱ tji̱e̱e̱ ngatsjéni̱xtjin,
kó ngi̱ndie nínga botixómá kꞌuijñá, tji̱e̱nga kꞌuijñá ndiꞌakꞌajmii̱.
30Ta̱nga tsi ndií sa̱ꞌínkjatjosónjín kjo̱a̱kitina,
kó tsi ki̱a̱jín ko̱e̱je̱tji̱ngi kjo̱a̱botíxomana,
31kó tsi ta̱sá tsja̱nié tsja̱fe kjo̱a̱kitina,
ko̱jo tsi sa̱ꞌínkjatjosónjín kjo̱a̱botíxomana,
32ja̱ ki̱a̱ boá nga kjuinkóo̱n, kó sa̱ꞌinjée̱ kjo̱a̱a̱ jeé,
kó koꞌon An, kjo̱a̱a̱ ni xi ꞌniú ndajín xi ndyi̱tsꞌèn.
33Ta̱nga kjo̱a̱ꞌaxínjáa̱n kjo̱a̱ni̱ma̱takón xi tjínna kjo̱a̱a̱ kui,
ti̱nde kꞌuindisojo̱jín An kjo̱a̱a̱ kjo̱a̱ꞌniátakón xi tjínna kjo̱a̱a̱ kui.
34Jmí ni̱xtjin xchi̱yana ni xi je indajo̱ An,
ti̱nde kjoaꞌaxínjín An ni xi je jatjoo̱ ndso̱ꞌba Án xi kixiáa̱n kui.
35Ngo ndi̱yà katsjáa̱ ndso̱ꞌba Án ta̱ngatꞌanii̱ kjo̱a̱tsjiena,
kó kꞌuindisojo̱jín An Ndabii̱.
36Ngatsjéni̱xtjin nga kꞌuíndo xota̱ tji̱e̱e̱,
kó ngi̱ndie nínga botíxomaa̱, kꞌuijñá xikó maá tsꞌueé, xtji̱e̱e̱n kje̱n Án.
37Ngatsjéni̱xtjin nga kꞌuijñá xikoó saá,
kui xi tikón xikoó ngo chistiko̱ xi ꞌniátakón ki̱a̱ nkꞌajmii̱.
38Ta̱nga ngotꞌe̱ ꞌne̱, kiniꞌínchꞌí Ji mosòo̱,
kó ikꞌíjñímasin Ji kui nda̱ xi ji kachjeꞌéjin Ji,
kó kiniꞌínxchínje̱ Ji kui.
39Kiniꞌínkjié Ji kjo̱a̱ ni xi ikꞌíndeje̱ Ji mosòo̱,
kó tꞌanangii̱ akjajmi Ji koronaa̱.
40Jè akakjen Ji ngayeje xó xí tjíchjáꞌyánii̱,
kó kiniꞌínkixóndé Jí tarié xi síndoo̱.
41Ngayeje xota̱ xi foaꞌa kui ndi̱ya̱à, tsꞌénchéjeé ni xi tjiín,
kó xota̱ xi síndotꞌa tiñaa̱ ndyi̱mojnókie ngotꞌe̱ ꞌne̱,
42Jí boá xi katseꞌéngaꞌníi̱ xota̱ xi kondra̱a̱,
Jí boá xi kiniꞌín Ji nga ngayeje kui kondra̱a̱, ndyi̱mojnó ngotꞌe̱ ꞌne̱.
43Jé kiniꞌíntjaꞌe Ji ki̱cha̱ndojoó,
kó ngiti̱ akasíke̱jejín Ji nga kijíkján.
44Jè kiniꞌínkjié Ji kjo̱a̱jee̱,
kó ngiti̱ katseꞌéndièjín Ji nga kui xi ko̱tíxoma ngase.
45Jè kiniꞌín chiboa ngase Ji ni̱xtjin nga kꞌuijñá xo̱ngò,
kó tsie kjo̱a̱soboá je katseꞌée̱.
46Ngaskande kjiꞌání, Ji Ne.
A ngatsjéni̱xtjin ku̱i̱ndyinꞌmí Ji.
Ngaskande kjiꞌání nga si̱ꞌinxchín Jí, xikó maá ndiꞌí xí tjítíngá.
47Ngatjaꞌátsjiee̱n nga achichí chiboa má ni̱xtjii̱n.
A ta̱kjo̱a̱ndaní nga kiniꞌínde Ji xota̱ nga̱sondiee̱.
48ꞌYá xota̱ nga̱sondie xi kꞌuijñá nga sku̱i̱e̱jín kjo̱a̱bo̱yaa̱.
ꞌYá xi ka̱maa̱ kꞌo̱xiéngí yojoo̱ ngi̱yaa̱ nga̱tsjo̱ó.
49Ji Ne, ñá tikón kui kjo̱a̱ni̱ma̱takón xi kisꞌiee̱ ngasꞌe̱,
kui xi kjo̱a̱ꞌniátakóo̱n kiniꞌínkjín Jí nga kaseyetjée̱n Ndabii̱ nga ko̱e̱ꞌée̱.
50¡Ji Ne, ngatjaꞌátsjiee̱n nga tjímojnóchá mosòo̱,
kui kjo̱a̱mojnóchá xi tjíjin ni̱se̱nna xi tjíniꞌánjo̱ kjín xota̱ na̱xi̱ńdaá!
51Ji Ne, ngatjaꞌátsjiee̱n nga kondra̱a̱ chꞌo ndyi̱tsójne̱,
kó ti̱ chꞌo ndyi̱tsoó chi̱bo̱a̱se xota̱ xi Ji kachjeꞌéjin Ji.
52¡Ngatsjéni̱xtjin nga ngatamachikonñé Néná!
Bo̱a̱ kjiꞌi, bo̱a̱ kjiꞌi.
Currently Selected:
Xo̱jo̱n Salmoo̱ 89: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
