Xo̱jo̱n Salmoo̱ 88
88
Ji Ne, ngata̱ ꞌbíjñísoboéjínní
Só xi nda na̱xko̱yá tsi̱ꞌe̱ soó Koree̱, xi katsꞌénda Emaa̱n.
1Ji Ne, Jí boá xi ꞌnaxiéꞌéní,
kó ni̱xtjin ni̱xtji̱e̱n ni̱ma̱ tꞌíxián an ngindyikin Ji.
2Te̱ꞌéndiè Ji nga nínga tindyin Ji, ko̱nda̱ꞌyá nga tsꞌénchji̱a̱a̱,
tasínijìnní kjiꞌanga ni̱ma̱ xian án nga kuichjiaá.
3Ngatꞌa̱ ini̱ma̱na jè tsꞌajoo̱n ni xi ndajín xi tsꞌénfoaꞌatio an,
nga ngaskande je mejeén ma kjáchó an nga̱tsjo̱ó.
4Jè tjixki̱ an xikoó xota̱ xi je kjo̱chó ngi̱ya ti̱xa̱ nga̱tsjo̱ó,
jè ngiti̱ jmíjín ngasena ngaꞌniú.
5Jè ki̱a̱ tikónjin an ngi̱jii̱n xota̱ xi je jesoón,
xikó maá xota̱ xi kiniꞌánkjiesón xi je ki̱a̱ síndo nga̱tsjo̱ó,
kui xi ngiti̱ foaꞌátsjienjiín Jí, kui xi ngi̱ya ndse̱ kachjeꞌéxínnii.
6Ki̱a̱ ikꞌíjñíní ki̱a̱ ti̱xa̱ xi ꞌniú na̱nga̱a̱,
kui ngi̱ndie na̱nga̱ xi ta̱nisién ꞌniú jñoó.
7Ngaꞌniuú kjo̱a̱xcháa̱n jè tikónniéna,
jè kiniꞌín ndasenní, xikó maá tsi ngaꞌniuú ndáchíkoón xi katsꞌénkjígindiona.
8Jè kiniꞌínkjìnní ngayeje xota̱ xi nda yaꞌana,
jè kiniꞌín Ji nga je ꞌniú kamáchꞌoó an.
Jè tikónꞌya an, kó jmíjín kótsꞌèn kjo̱tjo an.
9Ji Ne, ngaskande ndibajén má ndándyíkón án kjo̱a̱a̱ kui kjo̱a̱ndasee̱n.
Ndyiojón ndyiojón chjiáa̱ Ji, kó mejen an ndsa̱ án nínga tindyin Ji.
10A si̱ꞌin Jí ngo kjo̱a̱ndikón ngi̱jii̱n xota̱ xi je jesoón.
A kjo̱stjíe̱n a̱si̱énni̱xtjii̱n xota̱ xi je jesoón, tsi̱ꞌe̱ nga tsja̱á ndokꞌóchji̱ì.
11Ki̱a̱ ngi̱ya nga̱tsjo̱ó a tjín xí ku̱i̱chji̱a̱ kjo̱a̱a̱ kjo̱a̱ni̱ma̱takóo̱n,
kó ki̱a̱ ngi̱jii̱n xota̱ xi je jesoón, a tjín xí ku̱i̱chji̱a̱ kjo̱a̱a̱ kjo̱a̱ꞌniátakóo̱n.
12A tjín xí sku̱i̱e̱ndikón kjo̱a̱ndikón xí niꞌín Ji, ki̱a̱ nínga ꞌniú jñoó,
axa̱ tjín xi sku̱i̱e̱ndikón kjo̱a̱kixi̱ xi niꞌín Ji, ki̱a̱ ngi̱ndie nínga je kiniꞌánchíyaá.
13Ta̱nga an, Ji Ne, Jí boá xi tsꞌénmíꞌaá nga ko̱si̱ke̱jení,
kuíni nga xki̱ ta̱jñó, xki̱ ta̱jñó ngindyikin Ji kjo̱chó kjo̱a̱ndokjo̱a̱na.
14Ngatꞌa̱ Ji Ne, míkjo̱a̱a̱ nga an niꞌínchꞌí Ji ini̱ma̱na, kó tiꞌbíꞌmíní kje̱n Ji.
15Ndeskande koó nga kjindí an, nga achichí tsie kjo̱a̱ni̱ma̱ tsꞌénfoaꞌatio an,
kó jè mejeén kꞌien an katsaki.
Jé katsꞌenchíkjo̱a̱ an ni xi mindyiandíkónná,
kó jè ngiti̱ chikjo̱a̱jínna ngase.
16Kjo̱a̱xchán ꞌniúu̱, an je tsꞌákaniéna,
kó ni xi mindyiandíkónná, jè katsꞌénna,
17ngatꞌa̱ xikoó tsi ndáfoaa̱ nga je íchjáꞌyána nga ngo ni̱xtjii̱n,
kó je jaꞌatjiyajon yejena.
18Jí boá xi kiniꞌínkjìnní xota̱ xi nda yaꞌana, ko̱jo xi nijan ma an,
kó ngotꞌe̱ ꞌne̱, ta̱kuítsí kui ngi̱ndie xi jñoó xi nijan ma an.
Currently Selected:
Xo̱jo̱n Salmoo̱ 88: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
