Xo̱jo̱n Salmoo̱ 86
86
Jí boá xi Néna
Ndabii̱ bi̱ tsꞌén tsíchji̱a̱a̱ Néná.
1¡Ji Ne, tasínijin chiíní, kó ti̱ꞌinsénní!
Ngatꞌa̱ achichí ndasen ko̱jo ni̱ma̱ tikón an.
2Chíi̱n ini̱ma̱na, ngatꞌa̱ jè yé Ji nga tjínna kjo̱a̱ni̱ma̱takón.
Jí Ne, ꞌna̱xiéꞌé chií Ji kui mosòo̱, xi Ji kjimaꞌniátakoón.
3Ji Ne, ngatamani̱ma̱a̱ an,
ngatꞌa̱ Jí boá xi tsꞌénchji̱a̱a̱ nga ngo ni̱xtjii̱n.
4Ji Ne, te̱ꞌéndiè ji nga tsjatsꞌèn kꞌuijñá ini̱ma̱a̱ kui mosòo̱ xi̱ꞌbi̱,
ngatꞌa̱ Jí boá xi ꞌniú tsꞌénchji̱a̱a̱ ini̱ma̱na.
5Ngatꞌa̱ Ji Ne, nda Jí xota̱, kó maá niꞌínjetakín Ji,
kó achichí kjo̱a̱ni̱ma̱takón tjiín kjo̱a̱a̱ xota̱ xi tsꞌénkáxoma Jaꞌée̱n.
6Ji Ne, ndaꞌyé chií Ji nga kuichjiaá,
kó ti̱ꞌinsée̱n nda̱na nga ni̱ma̱ xiaán nga kuichjiáa̱.
7Ni̱xtjin nga ꞌniú nda̱ ka̱mana Ji kuichjiaá,
ngatꞌa̱ be án nga Ji si̱ꞌinsénní.
8Ji Ne, jmíjín ngo Ne xi xikoó Jí, ngi̱jii̱n ngayeje ne xi ngasee̱,
ti̱nde jmíjín ngo ni, xi xikoó xi Ji kiniꞌínde Ji.
9Ji Ne, ngayeje xota̱ na̱xi̱ńdá xí Jí kiniꞌínde Ji,
kji̱ndi̱bá, kó Ji kjo̱e̱ꞌétsꞌendíkoón, ko̱jo tsja̱à kjo̱a̱tsja Jaꞌée̱n.
10Ngatꞌa̱ Jí boá xi tjiín kjo̱a̱je, kó maá niꞌán ni xi fíndikónná.
¡Ta̱ Jí tsí bo̱a̱ xi Néná Jí!
11Ji Ne, takéní ndi̱yàa̱, kó ki̱a̱ kjuintjingí an ni xi ja̱koxi̱i̱,
ꞌniú ti̱ꞌinkꞌijñí Ji ini̱ma̱na, tsi̱ꞌe̱ nga sku̱i̱e̱ndikón Jaꞌée̱n.
12¡Ji Ne, Ji xi Ndi̱a̱na Ji, ngayejeni ini̱ma̱na nga Ji sa̱ꞌintsjaà,
kó ngatsjéni̱xtjin nga tsjáa̱ kjo̱a̱je Jaꞌée̱n!
13Ngatꞌa̱ achichí kjo̱a̱ni̱ma̱takón tjiín kjo̱a̱a̱ an,
Jí boá xi kaꞌnaxiéꞌé Ji ini̱ma̱na, tsi̱ꞌe̱ nga ki̱a̱jín kijí an ki̱a̱ ti̱xa̱na̱nga̱a̱ tꞌanangii̱.
14¡Ji Ne! Xota̱ xi nkꞌakoo̱n an ndyi̱kjánjo̱na,
kó ngo xtín xota̱ xi ꞌniú ndajiín ndyi̱mongase nga an sa̱ꞌínkꞌiénna,
kó kui xotaa̱ jmí xki̱ boaꞌájín Jí.
15Ta̱nga Ji Ne, Jí boá ngo Ne xi tjiín kjo̱a̱tsiekon ko̱jo kjo̱a̱ni̱ma̱takón,
tsájín niꞌínxchín Jí, kó tsie kjo̱a̱ni̱ma̱takón ko̱jo kjo̱a̱kixi̱ tjiín.
16An tsitsíjinní, kó ngatama ni̱ma̱a̱ an,
Te̱ꞌéngaꞌníi̱ kui mosòo̱,
kó ꞌnaxiéꞌé ji ndií na̱ mosoo̱ xi̱ꞌbi̱.
17Takéní ngo chi̱bo̱a̱a̱ kjo̱a̱nda xi niꞌín Ji,
kó ngatamabe xota̱ xi chꞌoo̱ an, kó soboá ngatamaa̱,
ngatꞌa̱ Ji Ne, Jí boá xi tibosíke̱jení, ko̱jo xi tiniꞌíndajìnní.
Currently Selected:
Xo̱jo̱n Salmoo̱ 86: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
