Xo̱jo̱n Salmoo̱ 85
85
¡Te̱ꞌé ji ngi̱ndie nga ku̱i̱ndyion nginíjne̱!
Só xi nda na̱xko̱yá tsi̱ꞌe̱ soó Koree̱.
1Ji Ne, achichí nda niꞌínje̱ Ji xota̱ xi chji̱a̱ni nangìi̱,
ngatꞌa̱ kiniꞌín kjindibeꞌóyé nginí Ji xota̱ tji̱e̱e̱ Jakoo̱b xi kisꞌińdoꞌniú ngasꞌe̱.
2Jí boá xi kichꞌiénijín Ji ni xi ꞌniú ndajín xi katsꞌén xota̱ na̱xi̱ńdáa̱,
kó akjaꞌme Ji ngayeje jé xí katsꞌén.
3Ngiti̱ kiniꞌínxchínjín Ji ngase,
kó xín kiniꞌínkjeꞌe Ji kjo̱a̱xcháa̱n.
4Ji Ne xi ꞌnaxiéꞌéjne̱, ti̱ꞌintja̱tsi̱e̱ye nginíjne̱
kó ngiti̱ niꞌínxchínje̱jínjne̱ ngase.
5A ngatsjéni̱xtjin si̱ꞌinxchínje̱jne̱ ji̱n.
Kó a si̱ꞌinxchínje̱ Jí xota̱ tji̱e̱ xi sꞌe̱ kꞌuieé nga.
6A jè ngiti̱ ko̱e̱ꞌéndièjín Ji nga ku̱i̱ndyion ngasejne̱,
tsi̱ꞌe̱ nga xota̱ na̱xi̱ńdáa̱ tsja ka̱maa̱ kjo̱a̱a̱ Ji.
7¡Ji Ne, takejne̱ kjo̱a̱ni̱ma̱takóo̱n, kó ꞌnaxiéꞌéjne̱!
8Kosiennijòo̱n ni xi ka̱tso̱ Néná,
ngatꞌa̱ ku̱i̱chji̱a̱ kjo̱a̱a̱ kjo̱a̱xió xi kꞌuieé xota̱ na̱xi̱ńdaá, ko̱jo xota̱ tsjiee̱,
tsi̱ꞌe̱ nga ngiti̱ kitikjo̱a̱jín ka̱ma ngase.
9Ja̱koxi̱ boá nga je tikón tiña kjo̱a̱ꞌnaxiéꞌaá xota̱ xi bendikón Néná,
tsi̱ꞌe̱ nga kjo̱a̱jee̱ Néná, kꞌuijñá tꞌananginá.
10Kjo̱a̱ni̱ma̱takoón ko̱jo ni xi ja̱koxi̱i̱, xikoó tsi kasakoo̱ xkjín,
kó kjo̱a̱kixi̱i̱ ko̱jo kjo̱a̱xioó, ndse̱je̱n kamá, xikoó tsi atíndsoꞌá xkjín.
11Ni xi ja̱koxi̱i̱ ngi̱jin tꞌanangii̱ kjo̱tjokjaní,
kó kjo̱a̱kixi̱i̱ ndeskande nkꞌajmii̱ skotsíjenni.
12Nga ja̱koxi̱ Néná nda sa̱ꞌínkꞌijñáná,
kó tꞌananginá nda ni xi ka̱maxchaá,
13kó kjo̱a̱kixi̱i̱, ki̱a̱ ko̱e̱je̱tjoón Kui,
kó Kuí boá xi ki̱a̱ ku̱i̱ꞌíjñáná ndi̱yà nínga fotsoꞌbá Kuí.
Currently Selected:
Xo̱jo̱n Salmoo̱ 85: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
