Xo̱jo̱n Salmoo̱ 77
77
Ni xi fíndikónná xi tsꞌén Néná
Só xi katsꞌénda Asaa̱f.
1Nda̱na katsꞌénkjién án nga tsíchji̱a̱a̱ Néná,
Néná tsíchji̱a̱a̱, kó Kuí tsintꞌiéna.
2Kjiꞌanga tsie kjo̱a̱ni̱ma̱ jaꞌatio an, tsangase an Ndi̱a̱ná,
kó Kuí iskjininkꞌa ndsa̱ án nga ni̱xtji̱e̱e̱n, kó nde katsꞌénkjaꞌyájín,
ndatsi ini̱ma̱na tsangase kjo̱a̱niꞌándajoo̱n.
3Kjiꞌanga foaꞌátsjienna Néná,
achichí ni xi maa̱ ini̱ma̱na,
kjandá an, kó ꞌmeya má an.
4Jí boá xi mindyieńjñínní,
nde bejín an ni xi sa̱ꞌin an,
kó nde bejín an kó xián án.
5Jè katsꞌenkjó án ni̱xtjin xi kisꞌie ndeskande koó ngasꞌe̱,
ko̱jo nó xí je jaꞌaa̱.
6Foaꞌátsjienna só xi kisie an nga jñoó,
tsꞌenkjó án ngi̱jin ini̱ma̱na, kó a̱si̱én ni̱xtjinna bosíyá kui nii̱:
7A ngatsjéni̱xtjin tjítsꞌénchꞌóná Néná tsobo̱a̱,
kó a jè ngiti̱ tjójiín ñá.
8A je jè yeje kjo̱a̱ni̱ma̱takoón,
a je kichajá kjin kjin ni xi katsóyàtjón nga sa̱ꞌín.
9A kichíyárií Néná nga kꞌuieé kjo̱a̱ni̱ma̱takón tsobo̱a̱,
a kjo̱a̱tamaá boá xi asíkjoni kjo̱a̱ni̱ma̱takoón tsobo̱a̱.
10Kósꞌe̱ ti̱ aa̱n bi̱ xian an:
Kósꞌe̱ bi̱ kixian an: Chiꞌinna boá kui nii̱,
nga Néná xí tikón ndiꞌakꞌajmii̱ jè asíkjo ngaꞌniú xí tjiín.
11Jaꞌátsjienna ni xi je katsꞌén Néná.
¡Jo̱o̱n, jaꞌátsjienna ni xi fíndikónná xí katsꞌén ngasꞌe̱!
12Sa̱ꞌinkjó án kjo̱a̱a̱ ngayeje ni xi je kiniꞌín Ji,
Sa̱ꞌinkjó án kjo̱a̱a̱ ngayeje ni xi fíndikónná xí je kiniꞌín Ji.
13¡Ji Ne, tsjie boá ndi̱yàa̱!
ꞌYá ne xi bo̱a̱ tsꞌén tjiín kjo̱a̱je xikoó Néná.
14Jí boá kui Ne xi tsꞌén ni xi fíndikónná,
Jí boá akake Ji ngaꞌniúu̱ ngi̱jii̱n xota̱ na̱xi̱ńdaá.
15Ngaꞌniúu̱ boá xi kiniꞌínkjìn Jí xota̱ na̱xi̱ńdáa̱,
kui xi xota̱ tji̱e̱e̱ Jakoo̱b, ko̱jo xota̱ tji̱e̱e̱ Kosiee̱.
16Kamábee̱ ndáfoaa̱ Ji Ne,
nga kamábee̱ ndáfoa, katsakjónní,
ngaskande kui ndáfoa xi ꞌniú na̱nga̱a̱, achichí ꞌniú janingí.
17Ṉdi̱i̱ achichí ndáfoa iskjitjón,
kó nkꞌa jàn kandaꞌyá nga janie cho̱ꞌo̱o̱n,
kó yáyojóo̱ kijí kꞌi̱e̱ kijí jàn nga jatjo.
18Nda̱a̱ cho̱ꞌo̱o̱n ki̱a̱ kisꞌijña ngi̱jii̱n tjo̱ꞌniuú,
kó ndiꞌií nga foaꞌatꞌèe̱ katsꞌéntsijen nga̱sondiee̱,
nga janie, kjiꞌá boá nga jaꞌa ngo kjo̱a̱ndi̱ko̱n tꞌanangii̱.
19Ngo ndi̱yà nínga ma bitja kiniꞌínde Ji ngi̱jin ndáchíkoón,
kó kachjéxꞌé Jí ngo ndi̱yà ngi̱jii̱n ndáfoaa̱ xi ꞌniuú,
ta̱nga nde ngojín xi kamábe chi̱bo̱a̱ ndsa̱ki Ji.
20Xikó má tsꞌén nda̱ xi kondaa̱ fotsoꞌbátjoón cho̱tsa̱nga̱a̱,
bo̱a̱ má kiniꞌínje̱ Ji xota̱ na̱xi̱ńdáa̱,
nga Moisee̱ ko̱jo Aaroo̱n kiniꞌínkjìn Jí.
Currently Selected:
Xo̱jo̱n Salmoo̱ 77: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
