Xo̱jo̱n Salmoo̱ 62
62
Tsi Néná tikónjo̱na jmíni̱xtjin si̱ꞌanchajana
Só xi katsꞌénda Ndabii̱, xi kiniꞌándaa̱ Jendutuu̱n.
1¡Ta̱kuítsí Néná xí tsjaá kjo̱a̱xió ini̱ma̱na!
¡Ta̱kuítsí bo̱a̱ xi maa̱ ꞌboxiéꞌána!
2Ta̱kuítsí Néná xi ndi̱jo̱ jena ko̱jo xi ꞌboxiéꞌána,
Kuí boá xi konna, kó ko̱ngajonjín an.
3Ngayeje jún, ngaskande kjiꞌání nga to̱kó ku̱i̱xkánjo̱rajnú ngo nda̱,
tsi̱ꞌe̱ nga ku̱i̱chíjmijnú xikoó ngo xó,
ko̱jo tsi xikoó ngo nchꞌoá xí je kjifítikjá.
4Ta̱soboá ndyi̱niꞌánkjójnú nga mejénjnú ku̱i̱chíjmingíjnú ki̱a̱ ngi̱ndie nínga tikón,
achichí tsjá májnú nga ꞌbíndisójnú,
ndso̱ꞌbájnú tsꞌénchíkonñé, ta̱nga ngi̱jii̱n ini̱ma̱jnú, ni xi ꞌniú ndajín chji̱a̱.
5Ta̱kuítsí Néná xí tsjaá kjo̱a̱xió ini̱ma̱na,
ngatꞌa̱ ta̱kuítsí bo̱a̱ xi tsjána kjo̱a̱chiyá.
6Ta̱kuítsí Néná xí ndi̱jo̱ jena, ko̱jo xi maa̱ ꞌboxiéꞌána,
Kuí boá xi konna, kó ko̱ngajonjín an.
7Néná boá xi ꞌboxiéꞌána, kó Kuí boá xi kjo̱a̱jena,
Néná boá kui Ndi̱jo̱je nínga botíjña̱ ꞌma an, Néná boá xi konna.
8Jún xota̱ na̱xi̱ńdá, ¡ngatsjéni̱xtjin ngatamaꞌniátakónjnú Néná!
Tꞌíyájnú ngindyi̱ko̱n Kui ngayeje ni xi tjíjii̱n ini̱ma̱jnú.
Néná boá xi kónná.
9Ta̱kjo̱a̱ndaní bo̱a̱ xota̱ nga̱sondie xi ta̱chiboaa̱,
kó kjo̱a̱ndiso boá xota̱ xi ngito̱ko̱o̱,
tsi ngo nisochi̱bo̱a̱ xꞌi̱chi̱bo̱a̱ni nga joó, é ka̱ma,
ta̱nga nga ja̱koxi̱ xtja̱ ngase, ta̱bo̱a̱jiín ngo tjo̱.
10Ngata̱ ki̱a̱jín maꞌniátakónjnú ni xi ꞌniú ndajiín,
ti̱nde ngata̱ ꞌbejínjnú kjo̱a̱chiyá kjo̱a̱a̱ kjo̱a̱chejeé,
ndatsi ka̱matsie ngase kjo̱a̱cho̱njnú, nga ki̱a̱jín ꞌbíjñajnú ini̱ma̱jnú.
11Ngo ndi̱yà je tsíchji̱a̱ Néná, kó jó ndi̱yà jè tsintꞌie an kui nii̱:
Néná boá xi tikoón ngaꞌniuú.
12Ji Ne, Jí boá xi tjiín kjo̱a̱ni̱ma̱takón,
ngatꞌa̱ Jí boá xi boeꞌée̱ chjí xí tsoboaá nga ngo nga ngo xotaa̱, kjo̱a̱a̱ ni xi katsꞌén.
Currently Selected:
Xo̱jo̱n Salmoo̱ 62: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
