Xo̱jo̱n Salmoo̱ 55
55
Ngatsjéni̱xtjin nga Néná ꞌniáko̱n an
Só xi katsꞌénda Ndabii̱.
1Ji Ne, ndaꞌyéní nga kuichjiaá,
kó ngata̱ mindyinꞌmíjínní nga ni̱ma̱ xiaán.
2Ti̱ꞌinsénní, kó ndokjo̱e̱jení,
achichí ni̱ma̱ xian an nga tsꞌenkjó án, kó achichí ni xi mana,
3ta̱ngatꞌanii̱ nda̱a̱ kondraa̱,
ko̱jo ta̱ngatꞌanii̱ kjo̱a̱ꞌniú xí tsꞌén xota̱ xi ndajiín,
ngatꞌa̱ ni xi ndajín ꞌbíniéna,
kó achichí ꞌniú mongatji̱ngina ngijee̱.
4Achichí on kjimaa̱ ini̱ma̱na,
kó ndikoón kjo̱a̱bo̱yaa̱ je tikónniéna.
5Kjifotsié ndikón má an nga tsꞌéntsakjon an,
achichí ndikón jè ndyi̱a̱ an.
6Kósꞌe̱ bi̱ xian an: ¡ꞌYá xí ka̱maa̱ tsja̱ana tsja̱nga̱a̱ tójoo̱ katsaki!
Tsi̱ꞌe̱ nga kjuíntji̱e̱n an, kó sa̱kóna ngo ngi̱ndie nínga sa̱ꞌinkjaꞌyá an.
7Ja̱koxi̱ boá nga achichíra̱ kjin kjuín án,
kó ki̱a̱ra̱ kotíjña̱ an ki̱a̱ nangi kixií.
8Achichíra̱ tsá kongase an ngo ngindie nínga kotíjña̱ an,
nínga jmí ni sa̱ꞌínjo̱jínna tjo̱o̱ ko̱jo stséꞌniuú.
9¡Ti̱ꞌinkjie Ji Ne, kó ti̱ꞌintsobéjìi̱n eén,
ngatꞌa̱ jè kamábe an kjo̱a̱bixkán ko̱jo ni xi ndajiín nga ki̱a̱ ngi̱jii̱n na̱xi̱ńdáꞌniuú!
10Ni̱xtjin ni̱xtji̱e̱n nga ki̱a̱ ndyi̱foaꞌatjiyajoo̱n xó xí tjíchjáꞌyáni na̱xi̱ńdáꞌniúu̱,
kó ni xi ndajiín ko̱jo ni xi jmíjiín kjo̱a̱kixi̱i̱,
ngi̱yaa̱ na̱xi̱ńdáꞌniuú boá nínga tjín,
11kó ngi̱yaa̱ ti̱ tjín kjo̱a̱maña nga, kó ndi̱tse̱e̱n,
ki̱a̱ boá nínga tjín kjo̱a̱chꞌáṉcha̱ ko̱jo kjo̱a̱ndiso.
12Ta̱nga jmí tsi ngo ma kondra̱ xi tsꞌénkjánjo̱na,
ngatꞌa̱ xchíkjo̱a̱na tsi ta̱ ngo tsí má,
ti̱nde askjanjo̱jínna kui xi chꞌoo̱ an,
ngatꞌa̱ tsi bo̱a̱ kamá, kisꞌijñaꞌmaraa̱,
13ta̱nga jí boá, ngo nda̱ ji xikoó án,
xi nda yaꞌana, xi amingo̱ xi tjóna,
14xi nijan kandokjo̱a̱ni̱jmì ngayeje ni xi ya,
ko̱jo xi nijan tsangín Ndiꞌaa̱ Néná.
15¡Ta̱niján má ngatjandibánié kjo̱a̱bo̱yaa̱,
kó nga síndo ngase nga kjo̱tjajenni nga̱tsjo̱ó!
Ngatꞌa̱ ni xi ndajín síndojii̱n, ko̱jo ti̱ tjín kuí nii̱ ki̱a̱ ngi̱ya ndiꞌaa̱ nga.
16Ta̱nga an ki, Néná boá xi kuichjiáa̱,
kó Kuí boá xi kꞌo̱xiéꞌána.
17Nga ta̱jño̱ó, nga ka̱mangixoón, ko̱jo nga ka̱majñoó ni̱ma̱ xián án nga kuichjiáa̱,
kó Kuí ku̱i̱ntꞌiè nda̱na.
18Kui boá xi tsja̱á kjo̱a̱xió ini̱ma̱na nga kꞌo̱xiéꞌána,
nda tsi kjín má xota̱ xi ndyi̱kjánjo̱na.
19Néná, kui xi tikón ndeskande koó ngasꞌe̱, ku̱i̱ntꞌièna,
kó ni̱ma̱kjo̱a̱ ku̱i̱ꞌíndo kondra̱na,
ngatꞌa̱ kui xotaa̱ jmíni̱xtjin bosíkjoyá yojoo̱,
ti̱nde tsakjónjiín Néná.
20Kui xota̱ xi ndajiín, iskjininkꞌaa̱ tsja xota̱ xi nijan kisꞌiee̱ kjo̱a̱xió katsaki,
katsꞌénkjatjosónjín ni xi índa.
21Én xí katsꞌénkjién inda ngase kamá ta̱bo̱a̱jiín mantekiyaa̱,
ta̱nga ngi̱jin ini̱ma̱a̱ kjo̱a̱xchán boá xi kisꞌiee̱,
én xí tsíchji̱a̱ inda ngase kamá ta̱bo̱a̱jiín istii̱,
ta̱nga kui boá xi ki̱cha̱ xi yojó ngajó ngaboaá kamá.
22Ti̱ꞌinkꞌasꞌíi̱n Néná chꞌià é xí kichꞌé ji, kó kuí boá tsja̱angaꞌniuú.
Néná sa̱ꞌínkjastjíe̱n nginí xota̱ xi kixi̱i̱ xi je tsꞌákaa̱.
23Ji Ne, Jí boá xi si̱ꞌinkjatjajin Ji kui xotaa̱
ki̱a̱ ti̱xa̱ nínga xcha̱ja ngatsjéni̱xtjii̱n.
Xota̱ xi ꞌniú ndajiín ko̱jo xi ꞌboṉcha̱a̱,
nde masiee̱n kjo̱chójín ni̱xtjii̱n nga kꞌuíndo,
ta̱nga an ki, ngatsjéni̱xtjin nga Ji xi ꞌniákoo̱n.
Currently Selected:
Xo̱jo̱n Salmoo̱ 55: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
