Xo̱jo̱n Salmoo̱ 22
22
Só xi ndaa̱ Néná kjiꞌanga tjibítjatió kjo̱a̱ni̱ma̱
Só xi katsꞌénda Ndabii̱.
1¡Ji Ne tsa̱ꞌa̱n, Ji Ne tsa̱ꞌa̱n!
Míkjo̱a̱a̱ nga ikꞌíjñímasinní.
Míkjo̱a̱a̱ nga kjin tindyinní, kó ꞌnaxiéꞌéjínní,
ko̱jo nga ndaꞌyéjín Ji nga ni̱ma̱ tꞌíxiaán nga tsꞌénchji̱a̱a̱.
2Ji Ne tsa̱ꞌa̱n, nga ni̱xtjii̱n tsꞌénchji̱a̱a̱ nga ni̱ma̱ tꞌíxiaán, kó niꞌínsénjínní,
tsꞌénchji̱a̱a̱ nga ni̱xtji̱e̱e̱n, kó nde jmí kjo̱a̱xiójínna.
3Ta̱nga ngototo Ji xi tsjie Ji,
¡Ji xi ki̱a̱ tindyin Ji nínga ndyi̱tsꞌèntsjaà xota̱ Israee̱l!
4Jí boá xi kamáꞌniátakoón xota̱ xi xchájne̱,
kamáꞌniátakoón, kó kiniꞌíndé Jí.
5Ni̱ma̱ katsó nga tsíchji̱a̱a̱ Ji, kó kamándé,
kamáꞌniátakoón, kó jmí kjo̱a̱soboá kisꞌiejiín.
6Ta̱nga an, xikónií tsi ngo chi̱ndo an, kó jmí tsi xota̱ an.
Kjo̱a̱mojnóchaá xotaa̱ boá an, kó ngayeje xota̱ na̱xi̱ńdaá nga chꞌoo̱ an.
7Ngayeje xota̱ xi kotsijenna, mojnókiena,
tsꞌéntíyà maá tsꞌoa ko̱jo to̱ko̱ nga bi̱ tsó:
8Néná boá xi kamáꞌniátakón kui xi̱ꞌbi̱,
ja̱ Néná ngatsꞌéndé, ja̱ Néná ngatꞌaxiéꞌá ꞌne̱.
Ngatꞌa̱ ja̱ Kuí boá xi katsjaá kjo̱a̱tsja.
9Ngatꞌa̱ Jí boá xi kiniꞌíntsenní,
Jí boá xi katseꞌéní kjo̱a̱ꞌniátakón,
ndeskande nga kjitꞌa an chikii̱ na̱anna.
10Jí boá xi kiniꞌánkꞌasꞌienna Ji,
ndeskande nga tjiyá an ngi̱ya ndo̱bo̱a̱ndií na̱anna.
Jí boá xi Néna ma Ji.
11Ngata̱ niꞌínkjinjínní yojòo̱, ngatꞌa̱ jè tikón tiña ni̱xtjin nga nda̱ ka̱maa̱,
kó nde jmíjín xi bosikójona.
12Kondra̱na je jaꞌatjiyajonna,
xikó maá kjín cho̱yojo toro̱ tamá xi chji̱a̱ni nangi Basaa̱n.
13Xikó maá xandi̱je̱ xi tamá,
xi kjíxꞌá tsꞌoa nga mejeén skji̱ni̱e̱na.
14Xikó má maá ndáfoaa̱ nga tjon, bo̱a̱ má kjimana,
ngayeje ńdana je jatjokjo,
kó ini̱ma̱na je kjimańdá ngi̱ya jàn, xikó maá ngo sién.
15Jè ngiti̱ jmí ngaꞌniújínna, jè xikoó tsi kixíyà an,
kó najén án je kisitꞌaꞌniú ngi̱yaa̱ ndso̱ꞌba án.
¡Jè ki̱a̱ akjajñíní tꞌanangii̱, tsi̱ꞌe̱ nga ko̱ya án!
16Ngo xtín xota̱ xi ndajín, xi xikó maá ńñá tamá, je jaꞌatjiyajonna,
kó je ndyi̱kjiniejon ndsa̱ko án, ko̱jo ndsa̱ án,
17ngaskande je má má ꞌbixki̱ an ńdana.
Tji̱e̱nga kondra̱na ndyi̱kotsijenna, kó ndyi̱kondana.
18Katsꞌénkjaꞌasoón xkjín ńjñona,
kó nga̱soón ńjñona katsatonni kjo̱a̱chꞌáṉcha̱.
19Ta̱nga Ji Ne, ¡ngata̱ niꞌínkjinjínní yojòo̱, ngatꞌa̱ Jí boá xi ngaꞌniúna Ji!
¡Tsá ndibékasíke̱jechiíní!
20¡ꞌNa̱xiéꞌé Ji ini̱ma̱na, kó ngata̱ boeꞌéndièjín Ji nga ki̱a̱ si̱ꞌankꞌienna
ngi̱ya tsja kui xota̱ xi ja̱kon ńñá má koón!
21¡ꞌNa̱xiéꞌéní ngi̱ya tsꞌoa kui xandi̱je̱ xi mejeén skji̱ni̱e̱na,
ko̱jo ndi̱ja̱a̱ kui cho̱yojo toro̱ tamá xí mejeén sa̱ꞌínꞌónna!
¡Jè tiniꞌínsénní!
22Kꞌuini̱jmìi̱ ntsꞌié án kjo̱a̱a̱ Jaꞌée̱n,
kó sa̱ꞌintsjaà Ji ngi̱jii̱n xota̱ xi matikó nga tsꞌéntsjaà.
23¡Jún xi yandikónjnú Néná, ti̱ꞌantsjàjnúu̱ Kui!
Jún xi xota̱ tji̱e̱e̱ Jakoo̱b, te̱ꞌéjnúu̱ kjo̱a̱je.
Kó cha̱ndikónjnú jún, ngayeje xi xota̱ tji̱e̱e̱ Israee̱l.
24Ngatꞌa̱ jmí tsi katsꞌénchꞌó xota̱ xi jaꞌatio kjo̱a̱ndasee̱n,
ti̱nde jmí tsi íjñaꞌmaa̱ kje̱n,
ta̱sá Kuí katsꞌénseén kjiꞌanga ni̱ma̱ katsó nga tsíchji̱a̱a̱.
25Jí boá xi tsꞌenkjoó kjiꞌanga tsꞌéntsjaà ki̱a̱ ngi̱jii̱n xota̱ xi matikoó.
Sa̱ꞌinkjatjosón an ni xi indajoo̱ Ji ngindyi̱ko̱n xota̱ na̱xi̱ńdá xí bendikoón.
26¡Ngakjinie ko̱jo ngatꞌi, kó ngatsie cha̱n cha̱a̱n xota̱ ni̱ma̱a̱!
¡Ngatsꞌèntsjaà Néná kui xota̱ xi mongase Kui,
kó ngatsjéni̱xtjin ngatꞌíjñá ini̱ma̱jnú!
27Ngayeje xota̱ xí tjín nga̱sondiee̱ kjo̱a̱ꞌátsjiee̱n Néná, kó Kuí ko̱e̱je̱kon nginií,
kó ngayeje xtín xota̱ xi tjín na̱xi̱ńdaá, sa̱ꞌíndikoón Jí nga ko̱sieéntikoó.
28Ngatꞌa̱ Néná boá xi botixómá,
kó Kuí boá xi ko̱tíxomaa̱ ngayeje na̱xi̱ńdaá.
29Xota̱ xi iskjinie nichinie ko̱jo xi kamáyiꞌi kui nga̱sondiee̱, ko̱siéntikoó ngindyi̱ko̱n Néná.
Xota̱ xi je jesoón, ti̱ ko̱siéntikoó ngindyi̱ko̱n Néná ndatsa kui nga,
ko̱jo kui xota̱ xi je mejeén makjisón ini̱ma̱a̱ nga.
30Ngo xtín xota̱ tji̱e̱ xi je katjoꞌójin sa̱ꞌínseén,
kó kui nii̱ xi kꞌuiníjmì kjo̱a̱a̱ Néná, ngaskande xota̱ tji̱e̱ xi jaskan kꞌuieé.
31Kji̱ndi̱bá, kó ka̱tso̱yà kjo̱a̱kixi̱ xi katsꞌén,
kó kui xota̱ na̱xi̱ńdá xí kji̱e̱ tsenjiín, kꞌuiyaá nga Kuí boá xi katsꞌén kui nii̱.
Currently Selected:
Xo̱jo̱n Salmoo̱ 22: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
