Xo̱jo̱n Salmoo̱ 19
19
Ni xi katsꞌénda Néná ko̱jo eén
Só xi katsꞌénda Ndabii̱.
1Ndiꞌakꞌajmii̱ ꞌbiníjmì kjo̱a̱jee̱ Néná,
kó ngi̱jinꞌa̱sie̱èn tsóyà ngayeje ni xi je katsꞌénda.
2Ndyiojón ndyiojón tsóyaà eén,
kó xki̱ ni̱xtji̱e̱n xki̱ ni̱xtji̱e̱n tsóyà kjo̱a̱kjínkoón.
3Ndatsi nde chji̱a̱jín, ti̱nde jmí ni tsójín,
ti̱nde ngo nda̱ ndaꞌyájiín,
4ta̱nga eén ndaꞌyá ngayeje tꞌanangii̱,
kó fochó ngaskande nínga fetꞌanii̱ nga̱sondiee̱.
Ki̱a̱ ndiꞌakꞌajmii̱, Néná katsꞌéndaa̱ ngo ndiꞌandikón tsꞌueé.
5Kó tsꞌueé fotjoni ndiꞌaa̱ xikó maá ngo nda̱ xi ku̱i̱xan,
tsjatjiín xikó maá ngo nda̱ xi xá mongani,
xi je tikónda nga ko̱nga ndi̱yà xí ko̱e̱je̱.
6Ngo ndieè ndiꞌakꞌajmii̱ fotjoni,
kó fí ngaskande xi ingo ndieè nínga ꞌbosꞌienni,
kó nde jmíjín xi ka̱maa̱ kꞌuijñáꞌmaá sibeé.
7Ta̱nisién ꞌniú nda kjo̱a̱kitii̱ Néná,
kó kuí boá xi tsꞌendáyà ini̱ma̱a̱.
ꞌNiú ma ꞌniátakón kjo̱a̱kitii̱,
ngatꞌa̱ kuí boá xi tsjaá kjo̱a̱kjíntakón xota̱ xi nkꞌajín ꞌboxié yojoo̱.
8Kixi̱ boá kjo̱a̱botíxomaa̱ Néná,
kó kuí boá xi tsjaá kjo̱a̱tsja ini̱ma̱a̱.
Kui soboá soboá boá kjo̱a̱kitii̱ Néná,
kó kuí boá xi tsꞌentsíjee̱n ndyikón.
9Tsjie boá kjo̱a̱yandikoón Néná,
kó ngatsjéni̱xtjin nga ꞌniú tikón.
Kixi̱ ko̱jo ja̱koxi̱ boá kjo̱a̱botíjé xí tsjá Néná.
10ꞌNiú ngase niꞌánmején ta̱bo̱a̱jiín to̱nsinieé, ta̱bo̱a̱jiín to̱nsinié xi ndaa̱,
kó ixi ngase ta̱bo̱a̱jiín ntsjieén, kui tín ntsjién xí fotjoo̱ ndo̱bo̱a̱a̱ cho̱ndo̱ꞌo̱sieèn.
11Kuí boá kui nii̱ xi niꞌínkjìn nga niꞌínxchínje̱ Ji mosòo̱,
kó tsi sa̱ꞌínkjatjosón kui kjo̱a̱botíxomaa̱, achichí ni xi nda sakoó.
12ꞌYá xí ka̱maa̱ nga ti̱kuii sku̱i̱e̱ soboá ni xi ndajín xi tsꞌén.
Ti̱ꞌinjetakínní Ji Ne, kjo̱a̱a̱ kui jé xí tjiꞌmá xi tsꞌen an.
13Chje̱ꞌéxíi̱n kui mosòo̱ kjo̱a̱nkꞌakoo̱n nga.
Ngata̱ boeꞌéndièjín Ji nga kui sa̱ꞌínna.
Kósꞌe̱ kjiꞌá boá nga ngiti̱ sa̱ꞌinjéjín an,
ko̱jo nga ngiti̱ jmí jé kꞌuiéjínna kjo̱a̱a̱ nga ta̱nisién ndajín katsꞌen an.
14Ti̱ꞌinjo̱ꞌo Ji nga kjo̱chó ngindyikin Ji ni xi chji̱a̱ ndso̱ꞌba án,
ko̱jo ni xi tsꞌénkjó ini̱ma̱na.
Ji Ne, Ji xi ndi̱jo̱ jena Ji, Jí boá xi kaꞌnaxiéꞌéní.
Currently Selected:
Xo̱jo̱n Salmoo̱ 19: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
