Xo̱jo̱n Salmoo̱ 18
18
Ndokꞌóchji̱ì Ne
Só xi katsꞌénda Ndabii̱, nda̱ xi nda katsꞌénxájo̱ Néná. Ndabii̱ katsꞌéndaa̱ Néná kui soó, kjiꞌanga tsꞌaxiéꞌá ngi̱ya tsja Sauu̱l ko̱jo kondra̱a̱.
1¡Ji Ne, achichí tjóna Ji,
ngatꞌa̱ Jí boá xi boeꞌéní ngaꞌniú!
2¡Ji Ne, Jí boá xi xikoó ngo ndi̱jo̱je xi tsa̱ꞌa̱n,
ko̱jo xi xikoó ngo ndiꞌaa̱ ngo nda̱ re, ko̱jo Jí boá xi ꞌbíjñindéní!
Ji Ne xi tsa̱ꞌa̱n, Jí boá xi boeꞌéní ngaꞌniú, ko̱jo xi chínní,
Jí boá xi xikoó ngo ni xi ꞌbíchjaá ni xi ndajín, ko̱jo xi ngaꞌniúna,
ko̱jo Jí boá xi xikoó ngo tarié xi nkꞌa nínga botíjña̱ ꞌma an.
3Néná boá xi kuichjiáa̱, ngatꞌa̱ Kuí boá xi tsoboaá nga si̱ꞌantsjaa̱,
kó kjo̱tjoꞌa an ngi̱ya tsja kondra̱na.
4Ngo ndi̱yà, kjo̱a̱bo̱yaa̱ jaꞌatjiyajonna,
kó ni xi ta̱nisién ndajiín xindajín Beliaa̱l indyiándikónna.
5Jaꞌatjiyajonna chja̱ya̱a̱ nga̱tsjo̱ó,
kó chja̱yaa̱ kjo̱a̱bo̱yaa̱ kisꞌijña kje̱n án.
6Kjiꞌanga nda̱ kamána, tsíchji̱a̱a̱ Néná, ꞌniú tsíchji̱a̱a̱,
kó kuí tsintꞌiéna ndeskande na̱ngo̱xi̱i̱,
kó ni xi ni̱ma̱ kixian an ngindyi̱ko̱n, askayánijon kui.
7Ngo kjo̱a̱ndi̱ko̱n jaꞌa, kó jatsié tꞌanangii̱,
kó na̱xi̱i̱ kamátíyaá ndeskande ngindiee̱,
kamátíyaá, ngatꞌa̱ Néná katsꞌénxchán.
8Tsꞌaxié má ṉdi̱ ṉtjo̱n,
tsꞌaxié má ndiꞌí tsꞌoa,
kó katsꞌénkixó má xꞌué xí tjítíngá.
9Néná íjñatꞌién nkꞌajmii̱, kósꞌe̱ jatjajen,
kó jmá má kamá ṉdi̱ xi kisꞌijña ngindie se.
10Ngo keruu̱b kisꞌijñasón, kó kijítji̱e̱n ki̱a̱ nga̱soón tjo̱o̱.
11Ngo ṉdi̱ jmá íjñá nínga kisꞌijñajin,
xi xikoó tsi ngo ńjño kortina̱ kamá nga ngo foaꞌatjiyajoo̱n,
jñó kamá ndáfoaa̱, ko̱jo ṉdi̱i̱ nkꞌajmii̱.
12Kó nda̱a̱ ndiꞌií kjo̱a̱jee̱ Néná jaꞌajin kui ṉdi̱ jñoó,
kó ki̱a̱ jatjoni ndókoá, ko̱jo xꞌué xí tjítíngá.
13Néná katsꞌéntsen nkꞌajmii̱ ngo cho̱ꞌo̱n,
kó kandaꞌyá nda̱a̱ Néná xí tikón ndiꞌakꞌajmii̱ ngi̱jii̱n ndókoá ko̱jo xꞌueé.
14Asién yáyojoó, kó katsꞌéntsojoboa,
ꞌniú katsꞌénkjaꞌatꞌe, kó katsꞌéntsobéjii̱n.
15Kó kjiꞌanga kiniꞌínxchín Jí, Ji Ne,
kjiꞌanga kaxó má ńtjen Ji, kamáyà ngindiee̱ ndáchíkoón,
kó ti̱ kamáyà ngindie tꞌanangii̱ nga.
16Ndeskande nínga nkꞌaa̱ nkꞌajmii̱ katsjána tsja,
kó tsꞌaxiéjinna ngi̱jii̱n kui ndáfoa tsiee̱.
17Katsꞌéndéna ngi̱ya tsja kui kondra̱ xi ꞌniuú,
ko̱jo kui xota̱ xi chꞌoo̱ an,
ngatꞌa̱ ꞌniú ngase kamá ta̱bo̱a̱jiín an.
18Kjiꞌa má askjanjo̱na nga jaꞌa an kjo̱a̱ni̱ma̱,
ta̱nga Néná boá xi asíko̱jona.
19Ngo ngi̱ndie xi tiyá kijíjo̱na,
kó tsꞌaxiéꞌána, ngatꞌa̱ tjó kamaá an.
20Néná katsjána ngo ni nda xi tsoboána kjo̱a̱a̱ nga kixi̱ an,
kó achichí nda katsꞌénjo̱na, ngatꞌa̱ tsjie ndsa̱ án.
21Ngatꞌa̱ ki̱a̱ tsꞌénfítji̱ngi an ndi̱ya̱à Néná,
kó jmí ni xi ndajín tjítsꞌenjín an, ti̱nde tjítsꞌenkjinjáa̱n yojona Kui.
22Ngatꞌa̱ jè kamábe an ngayeje kjo̱a̱botíxomaa̱,
kó tsꞌénꞌbijñámasiénjín an kjo̱a̱kitii̱.
23Achichí tsjie tikón an ngindyi̱ko̱n Kui,
kó jmí ni xi ꞌniú ndajín tjítsꞌenjín an.
24Néná katsjána ngo ni nda xi tsoboána kjo̱a̱a̱ nga kixi̱ an,
ko̱jo nga tsjie ndsa̱ án ngindyi̱ko̱n Kui.
25Ni̱ma̱ ka̱maa̱ xota̱ xi ni̱ma̱ maa̱,
kó kixi̱ si̱ꞌinje̱ ji xota̱ xi kixi̱i̱.
26Tsjie tsꞌén ko̱kée̱ yojòo̱ xota̱ xi tsjiee̱,
ta̱nga xota̱ xi mañaa̱, ko̱kéríi̱ nga kjínkón ngase Ji.
27Nga ja̱koxi̱, Jí boá xi ꞌna̱xiéꞌé Ji xota̱ na̱xi̱ńdá xí ni̱ma̱kjo̱a̱ síndoo̱,
kó ni̱ma̱kjo̱a̱ niꞌínje̱ Ji xota̱ xi nkꞌakoo̱n.
28Nga ja̱koxi̱, Jí boá xi niꞌíntsijinní nga tikón an,
Ji Ne, Jí boá xi niꞌíntsijíi̱n ndi̱yà jñóna.
29Nga ja̱koxi̱, sa̱ꞌinñáa̱ kjín xtín jájún tsi Ji xi ko̱si̱ke̱jení,
tsi Ji tindyinje̱ní, ka̱mana sa̱ꞌìi̱n na̱xi̱ńdáꞌniuú nga skjanjo̱ an.
30Ndi̱ya̱à Néná achichí nda, kó eén jè kichitꞌa,
kuí boá xi xikoó ngo ni xi ꞌbíchjaá ni xi ndajín,
tsi̱ꞌe̱ xota̱ xi Kui mongase nga skoón.
31Ngatꞌa̱ ꞌyání xi Néná tsi kuijín xi ndi̱a̱ná,
kó ꞌyání bo̱a̱ kui ndi̱jo̱jee̱ tsi kuijín xi Néná.
32Néná boá xi tsjána ngaꞌniú,
kó kuí boá xi tsꞌénkixi̱ ndi̱yàna.
33Kuí boá xi tsjá ngaꞌniuú ndsa̱ko án, xikó maá ngo ndi̱kꞌijñá chjo̱on.
Kuí boá xi ꞌniú tsꞌénkꞌijñána, tsi̱ꞌe̱ nga kꞌo̱kajín an nínga nkꞌaa̱.
34Kuí boá xi bokoyána xikótsꞌèn skjan an kjo̱a̱xcha̱án,
kó tsjá ngaꞌniuú tjiana, tsi̱ꞌe̱ nga sa̱ꞌinxájo̱ yáchjonyá xi ki̱cha̱ bronsee̱.
35Jí boá xi katseꞌéní ni xi ꞌbíchjaá ni xi ndajín nga kaꞌnaxiéꞌéní,
ndse̱ kixi̱ boá xi tsꞌéntsjá ngaꞌniúna,
kó kjo̱a̱ndaxota̱a̱ boá xi tsꞌénbosikójona.
36Jí boá xi kiniꞌíntiyé Ji ndi̱yà nínga fi an,
kó ńdatoꞌoo̱ ndsa̱ko án katsꞌénchi̱nijín.
37Tsangatji̱ngíi̱ kondra̱na, kó jachótji̱ngìi̱,
kó kjindibáꞌoyájín an ngaskande nga katsꞌenkjié an ngayejee̱.
38Katsjachjíi̱, kó ngiti̱ jastjíe̱njín ngase,
ki̱a̱ ixó ngindie ndsa̱ko án.
39Jí boá xi katseꞌéní ngaꞌniú, tsi̱ꞌe̱ nga kijí án kjo̱a̱xcha̱án,
Jí boá xi kiniꞌínkindi Ji kui xi askjanjo̱na.
40Jí boá xi kiniꞌín Ji nga tsanga kondra̱na,
kó bo̱a̱ tsꞌén nga katsꞌenkjié an kui xi katsꞌénchꞌóna.
41Ata̱ ni̱ma̱ katsó nga tsíchji̱a̱, ta̱nga nde ngojín xi tsꞌaxiéꞌá,
ngaskande Néná tsíchji̱a̱a̱, ta̱nga nde katsꞌénsénjiín.
42Katsꞌenxi̱ ndso̱ko̱a̱n ndso̱ko̱a̱n an xikoó xa̱ xi fíjo̱ tjo̱o̱,
kó xikoó tsi ndáse nga atitsojo an ngi̱ya ndi̱yàtieé.
43Jí boá xi kaꞌnaxiéꞌéní kjo̱a̱a̱ kui xota̱ xi ndyi̱mongase nga skjánjo̱na,
kó ngito̱ko̱o̱ na̱xi̱ńdaá kiniꞌínní,
sꞌe̱ xota̱ xi nde bejín an boá xi katsꞌénsénna.
44Ta̱niꞌin ntꞌié kjo̱a̱a̱ an, kó ja̱kamá ntꞌiéꞌénna,
xota̱ xi xín nangii̱, án boá xi atixomáa̱.
45Xota̱ xi xín nangii̱, je kamá inda,
kó ngaskande fotsié má nga fotjoxie nínga tjíndo ꞌmá.
46¡Tsie ngatamaa̱ Néná! ¡Ngatamachikonñé ndi̱jo̱jena!
Nganiꞌántsjaà kui Ne xi tsꞌaxiéꞌána.
47Kui Ne xi tsꞌéngojo ni xi niꞌánjo̱na.
Kui Ne xi ꞌbíndo ngindie ndsa̱ko án nangii̱.
48Jí boá xi kaꞌnaxiéꞌéní kjo̱a̱a̱ kondra̱na.
Jo̱o̱n, Jí boá xi nkꞌa ngase ikꞌíjñíní ta̱bo̱a̱jiín kui xi an askjanjo̱na,
kó kaꞌnaxiéꞌéní ngi̱ya tsja xota̱ xi tamaá.
49Kuíni nga án boá xi kuichjiá an kjo̱a̱a̱ Ji ngi̱jii̱n xota̱ na̱xi̱ńdaá.
¡Ji Ne, Jí boá xi siee salmo̱ nga skuiendikón án Jaꞌée̱n!
50Néná boá xi tsjaá nga tsꞌén re xi Kui tsi̱ꞌe̱,
kó jè akó kjo̱a̱ni̱ma̱takón xi tjiín, kjo̱a̱a̱ kui xi je jaꞌájin Kui,
kó kuí boá xi Ndabii̱ kui xi xota̱ tji̱e̱e̱ Kui ngatsjéni̱xtjin.
Currently Selected:
Xo̱jo̱n Salmoo̱ 18: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
