Xo̱jo̱n Salmoo̱ 16
16
Kjo̱a̱bokoyáa̱ boá xi bokóna ndi̱yà
Én xí katsꞌénda Ndabii̱.
1Ji Ne, chínní, ngatꞌa̱ Jí boá xi ꞌniákoo̱n nga xchínní.
2Ini̱ma̱na jè bi̱ katsoó Néná: Jí boá xi Ndi̱a̱na ma Ji,
Jí boá xi katseꞌéní ngayeje ni nda xi tjínna.
3Xota̱ tsjie ko̱jo xota̱ xi kixi̱ xi síndo nga̱sondiee̱,
kuí boá xi tsjána kjo̱a̱tsja.
4Ta̱nga achichí kjo̱a̱ni̱ma̱ kjo̱a̱ꞌatio xota̱ xi ndyi̱fítji̱ngi kje̱ꞌe ne.
¡Jmí ni̱xtjin sa̱ꞌinkꞌasꞌièe̱n kjo̱a̱tjó xi jín ni xi nénájín!
¡Jmí ni̱xtjin sa̱ꞌinkaxoma an jaꞌeén!
5Néná boá xi ngayeje ni xi tjínna,
kuí boá xi tsie kjo̱a̱niꞌánchikonñé tsjána.
Ngi̱ya ndse̱ boá nínga tikón kjo̱a̱mindyionna.
6Achichí tsjachon ngi̱ndie xi kasakona,
achichí tsjákjiꞌi kui tꞌanangi xi ji katseꞌéní.
7Nda kuichjiá an kjo̱a̱a̱ Néná,
kjo̱a̱a̱ kui kjo̱a̱botíxoma nda xi tsjána,
ngatꞌa̱ ndatsi je jñó tsꞌendáyà ngi̱jin yojona.
8Ngatsjéni̱xtjin nga Néná boá xi tjínjinkon an,
ngatꞌa̱ ki̱a̱ tikóntꞌa tjia kixi̱na, kuíni nga jmíjín ni xi kꞌo̱jmina.
9Kuíni nga achichí tsjá kamaá ini̱ma̱na,
kó tsja maa ndso̱ꞌba án nga tsjaá kjo̱a̱je Néná,
kó yojona sa̱ꞌínkjaꞌyá cha̱n cha̱n nga tjiín kjo̱a̱ꞌniátakón,
10ngatꞌa̱ ki̱a̱jín kꞌuijñí ji ini̱ma̱na ngi̱ya nga̱tsjo̱ó,
ti̱nde ko̱e̱ꞌéndièjín ji nga xota̱ tsjièe̱ sku̱i̱e̱ ni xi jatsoo̱n.
11Jí boá xi ko̱kéní ndi̱ya̱à kjo̱a̱mindyioo̱n.
Kjiꞌanga an tindyinjinní achichí tsjá ꞌbéna.
Kjiꞌanga ki̱a̱ tikóntꞌáa̱ nga kixi̱i̱, ngatsjéni̱xtjin nga tjínna kjo̱a̱tsja.
Currently Selected:
Xo̱jo̱n Salmoo̱ 16: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
