Xo̱jo̱n Salmoo̱ 109
109
¡Ji Ne, tasíke̱jení!
Só xi katsꞌénda Ndabii̱.
1¡Ji Ne, ji xi tsꞌéntsjaà,
ngata̱ xiójín mindyin ji!
2Ngatꞌa̱ ngo ndso̱ꞌba xi ndajín ko̱jo xi ndiso je katjoxꞌá kondra̱ tsa̱ꞌa̱n,
kó an ndyi̱chji̱a̱taꞌinna nga ndyi̱tsꞌènkjién na̱je̱n ndiso.
3Achichí én on je katsꞌénkjaꞌatjiyajonna,
kó ngaskande nde jmí kjo̱a̱jiín nga an askjanjo̱na.
4Ta̱ngatꞌanii̱ nga tjóna, bi̱ tsꞌén íchjína nga kondra̱na ma,
ndatsi tsíchji̱a̱tjé an kui.
5Ni xi ndajín ꞌbíchjína kjo̱a̱a̱ ni xi nda xi tsꞌénjo̱ an,
kó kjo̱a̱niꞌánchꞌó tsjána kjo̱a̱a̱ nga tsꞌentjó an, kó bi̱ tsó:
6¡Ngo xota̱ xi ꞌniú ndajín tꞌíjñí Ji, nga kui xi ka̱ma kondra̱a̱,
kó xindajín Satanaa̱ ngatꞌíjñá nga fojnií!
7¡Ti̱ꞌin Ji nga nendiꞌamasiee̱n nga tsó nga tjiín jé, kó nga tsꞌénjeé,
kó jé ti̱ꞌin Ji nga Ji ku̱i̱chji̱a̱a̱!
8¡Ti̱ꞌin Ji nga chiboa ka̱ma ni̱xtjii̱n,
kó kje̱ꞌe xí ngatsꞌén xaá!
9¡Ngatꞌíndo xꞌi̱a̱n ndií, ngatama kꞌán chjo̱ón!
10¡Ti̱ꞌin Ji nga kꞌuitsómasón ko̱jo nga chji̱e̱ ku̱i̱ꞌa ndií,
kó ngatangase nichinie ki̱a̱ ngi̱ndie xi je ixóndó nínga tjíndo!
11¡Kui xota̱ xi to̱n katsꞌénkíyaá ngasꞌe̱, ngakjíbé ngayeje ni xi tjiín,
kó xota̱ xi nde yajín ꞌyá kuií bo̱a̱, ngakjíbé ni xi katsꞌén nga katsꞌénxá!
12Ngata̱ ꞌbéjín xota̱ xi ni̱ma̱ ka̱maa̱,
ti̱nde nga jmíjín xi ni̱ma̱ ngatamaa̱ xota̱ xi xꞌi̱a̱a̱n.
13¡Ngatjie kjin kjin xota̱ tji̱e̱ xi jaskan kꞌuieé!
¡Nganiꞌánkjié jaꞌeén xi ma joó xota̱ tji̱e̱e̱!
14Nganiꞌánkjaꞌátsjien ngindyi̱ko̱n Néná, ni xi ndajín xi katsꞌén xota̱ xi xchaá,
kó nganiꞌánkjiéjín jé xí katsꞌén na̱aa̱n,
15ngatsjéni̱xtjin nganiꞌánkjaꞌátsjien kui nii̱ ngindyi̱ko̱n Néná,
tsi̱ꞌe̱ nga Néná sa̱ꞌín nga jmíjín xi kjo̱a̱ꞌátsjiee̱n nga kisꞌińdo nga̱sondie,
16ngatꞌa̱ jaꞌátsjienjiín nga kisꞌiee̱ kjo̱a̱ni̱ma̱takón,
kó ta̱sá ki̱a̱ tsangatji̱ngii̱ xota̱ xi ndasen ko̱jo xi ni̱ma̱kjo̱a̱ kisꞌińdoo̱,
ko̱jo xi kjo̱a̱ni̱ma̱ jaꞌatioo̱, tsi̱ꞌe̱ nga katsꞌénkꞌién.
17Achichí tjó kamaá ni xi ndajiín, kó kui nii̱ xi kjindibánié,
katsꞌénchꞌó kjo̱a̱niꞌánchikonñeé, kó katsꞌénkjii̱n yojoo̱.
18Kó kui ni xi ndajiín xi xikoó tsi ńjño xi tsajá katsꞌén,
kui nii̱ xi xikoó ndáfoa kamá nga tsꞌasꞌienjin ngi̱jin yojoo̱,
xikó maá isti̱ xi ꞌbosꞌienjin ńdaná kamaá.
19¡Ja̱ kui nii̱ xi ngatamaa̱ xikoó ngo ńjño xi chajá,
kó xikoó tsi ngo tji̱xin ngatama xi nga kjienꞌniuú ngatsjéni̱xtjin!
20Bo̱a̱ tsꞌén ngatjaꞌáchjií Néná kui xi an ndyi̱bongítaꞌinna,
ko̱jo kui xi kondra̱a̱ ini̱ma̱na ndyi̱chji̱a̱taꞌin nga.
21Ta̱nga Ji ki Ne, Ji xi ndi̱a̱na ma Ji,
nda̱ ti̱ꞌinje̱ní ta̱ngatꞌanii̱ kjo̱a̱tjoó Jaꞌée̱n,
ti̱ꞌindéní, ngatꞌa̱ achichí nda kjo̱a̱ni̱ma̱takóo̱n.
22Ngatꞌa̱ ndasen tikón an, kó achichí ni xi chjiénna,
ko̱jo ónrií ngi̱jin ini̱ma̱na.
23Inda inda kjife ngaꞌniúna, xikó maá ngo tji̱nkꞌi̱én,
ngaskande ꞌbítsanie mána xikoó ngo chjo̱bo̱a̱.
24Jè kamáꞌinda tikóná, ta̱ngatꞌanii̱ nga ngiti̱ jmí nichinie tsꞌénkjíni̱e̱jín an,
kó yojona je tjíxíyá nga kjima xkꞌién án.
25Án boá xi kjo̱a̱mojnóchaá kjima an,
kjiꞌanga bena xotaa̱, tsꞌéntíyà maá to̱ko̱, kó mojnókiena.
26¡Tasíke̱jení Ji Ne tsa̱ꞌa̱n!
¡ꞌNa̱xiéꞌéní ta̱ngatꞌanii̱ kjo̱a̱ni̱ma̱takóo̱n!
27Ngatamakjiín kui xotaa̱, nga ngi̱ya ndse̱ boá nínga ndibání kui nii̱,
ngatꞌa̱ Jí boá xi kiniꞌín Ji kui nii̱, Ji Ne.
28Chꞌotsꞌèn chji̱a̱taꞌinna kui, ta̱nga Ji niꞌínchikonñíní,
jè jastjíe̱n, ta̱nga Jí boá xi ko̱e̱ꞌée̱ kjo̱a̱soboá,
kó achichí tsjá ka̱maa̱ kui mosòo̱ xi̱ꞌbi̱.
29Xota̱ xi ndyi̱bongítaꞌinna, kjo̱a̱soboaá boá xi ka̱ma xikoó ngo ńjño xi chajá,
kó ka̱matsobéjii̱n, kó kuí nii̱ xi ka̱ma xikoó ńjñobichitjeé.
30Ndso̱ꞌba án boá xi sa̱ꞌinkjièn án nga tsjàa̱ ndokꞌóchjì Néná,
kó ngi̱jii̱n kjín xota̱ na̱xi̱ńdá tsꞌéntsjàa̱ Kui.
31Ngatꞌa̱ kuí boá xi asíko̱jo xota̱ xi ni̱ma̱a̱,
tsi̱ꞌe̱ nga tsꞌaxiéꞌá ini̱ma̱a̱ ngi̱ya tsja xota̱ xi botíjeé.
Currently Selected:
Xo̱jo̱n Salmoo̱ 109: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
