Lebitiko̱ 21
21
Kjo̱a̱botíxoma xi chjiéngá sa̱ꞌínkjatjosón já chináꞌmii̱
1Néná tsíchji̱a̱jo Moisee̱, tsi̱ꞌe̱ nga bi̱ tsꞌén ko̱tíxomaa̱ jaá Aaroo̱n:
Jún boá xi chináꞌmijnú, kuíni nga chjiénjín nga ngo ini̱ma̱ si̱ꞌanjo̱jnú, ngatꞌa̱ jè ngiti̱ tsjiejín ka̱majnú tsi bo̱a̱ si̱ꞌánjnú. 2-4Ta̱kuítsí ini̱ma̱ xi ka̱ma si̱ꞌanjo̱jnú tsi tsi̱ꞌe̱ ngo xota̱ xi xingi̱jnú xi ꞌniú tiñanii̱ jún. Ka̱má si̱ꞌanjo̱jnú ini̱ma̱a̱ ngo ndichjajnú xi ixánjín, kó tsi ki̱a̱ nijan kisꞌijñajo̱jnú ndiꞌajnú. Ta̱nga tsi ixán, ka̱májín si̱ꞌanjo̱jnú.
5Ka̱májín kꞌuijón taka takaa̱ tokojnú, ti̱nde ka̱májín kꞌuijónjnúu̱ tsja̱ ngiꞌboajnú, ti̱nde ka̱májín si̱ꞌanꞌonjnúu̱ yojojnú, xikó tsꞌén xotaa̱ kjiꞌanga xa̱ꞌya̱ síndo. 6Jún jè ta̱ xá tsa̱ꞌa̱n tsí xi si̱ꞌánjnú, kó chjiéngá ko̱nda̱ꞌyáꞌénjnúꞌun ngatsjéni̱xtjin. Chjiéngá kje̱ꞌe kón ka̱majnú, ngatꞌa̱ jún boá xi si̱ꞌankꞌasꞌienjnú paa̱n ko̱jo kjo̱a̱tjó xi ꞌbítí nganda tsa̱ꞌa̱n.
7Ka̱májín ku̱i̱xanjo̱jnú ngo na̱masien, ti̱nde ka̱májín tsi ngo na̱ xi je íjñá xi̱ꞌii̱n, ko̱jo tsi ngo na̱ xi chꞌo kiniꞌánjo̱ kjo̱a̱ꞌniú. Ngatjaꞌátsjienjnú nga jún jè ta̱ xá tsa̱ꞌa̱n tsí xi si̱ꞌánjnú.
8Chjiéngá ku̱i̱ndyiontꞌaxínjnúu̱ ngayeje ni xi ndajín, ngatꞌa̱ jún boá xi niꞌánkꞌasꞌiénjnú paa̱n nganda tsa̱ꞌa̱n. Chjiéngá kje̱ꞌe kón ka̱majnú, ngatꞌa̱ an bo̱a̱jín kón an xikoó ne xi ngasee̱. Án boá xi Nee̱ xota̱ Israee̱l, kó kje̱ꞌe kón katsꞌenjnúꞌun jún.
9Tsi ngo tsa̱kji̱ín ngo kui chináꞌmii̱ xi na̱masien sa̱ꞌín yojoo̱ nganda tsi̱ꞌe̱ kje̱ꞌe ne, kjo̱a̱soboá tsꞌéntsjaá na̱ꞌmii̱, kó chjiéngá kꞌuití nga si̱ꞌankꞌien.
Ni xi chjiéngá sa̱ꞌín ngito̱ko̱o̱ chináꞌmii̱
10Ngito̱ko̱o̱ chináꞌmii̱, kuí boá xi ꞌniú ndikón ngase ngi̱jii̱n ngayeje chináꞌmi xi ngasee̱, ngatꞌa̱ kjiꞌanga katseꞌéxaá nga chináꞌmina kamá, kiniꞌánkꞌasꞌiee̱n ńjño chináꞌmii̱, kó kachjatjónjón to̱ko̱ isti̱ xi boeꞌéxánií xotaa̱. Kuíni nga ngito̱ko̱o̱ chináꞌmii̱, ka̱májín kjótsoꞌbá ndso̱toko, ti̱nde ka̱májín skjíndiyá ńjñoo̱ nga ko̱kó xa̱ꞌya̱. 11-12Ka̱májín kjo̱tjoni ki̱a̱ ndiꞌandikoón, ti̱nde ka̱májín ko̱e̱je̱kon tiñaa̱ ngo ini̱ma̱, ndatsi na̱ꞌmii̱ ko̱jo ndatsi na̱aa̱n xi kꞌien, ngatꞌa̱ tsájmi̱ jè ngiti̱ tsjiejín ka̱ma, kó ngiti̱ tsjiejín sa̱ꞌín ndiꞌandikoón. Án boá xi Nee̱ an, kó jè katsjaxáa̱ nga ta̱ xá tsa̱ꞌa̱n tsí xi sa̱ꞌín, kjiꞌanga kachjatjónjón to̱ko̱ isti̱ xi nanginjon to̱ko̱ xotaa̱ nga boeꞌéxaá.
13-14Ngito̱ko̱o̱ chináꞌmii̱ chjiéngá ngo na̱ xi xkjín xí ku̱i̱xanjo̱, ngo na̱ xi kji̱e̱ jmí xi̱ꞌin fojñajo̱jín. Ka̱májín ku̱i̱xanjo̱ ngo na̱ xi chꞌo kiniꞌánjo̱ kjo̱a̱ꞌniú, ko̱jo tsi xi je tikón kꞌán nga je kꞌien xi̱ꞌii̱n, ko̱jo tsi xi je ikꞌíjñaá, ko̱jo tsi xi na̱masien. 15Bo̱a̱ tsí tsꞌén nga xota̱ tji̱e̱e̱ ka̱ma sa̱ꞌín xá xí tsa̱ꞌa̱n ngatsjéni̱xtjin. An, Nee̱ xota̱ Israee̱l, jè katsjaxáa̱ ngito̱ko̱o̱ chináꞌmii̱ tsi̱ꞌe̱ nga ta̱ xá xí tsa̱ꞌa̱n tsí xi sa̱ꞌín.
Ni xi tsjandièjín nga niꞌán xá chináꞌmii̱
16Néná tsíchji̱a̱jo Moisee̱, 17-21tsi̱ꞌe̱ nga tsja̱á Aaro̱n ntsꞌi̱e̱ kui kjo̱a̱botíxomaa̱:
Tsi ngo xota̱ tji̱e̱ tse̱ xi jmí tsi nda yojoo̱, ka̱májín ki̱a̱ kjo̱chó tiña ṉchandikónna, tsi̱ꞌe̱ nga kui xi sa̱ꞌínkꞌasꞌien ngo kjo̱a̱tjó xi tí nganda tsa̱ꞌa̱n. Ka̱májín chináꞌmina ka̱ma ngo xota̱ xi ti̱ka̱, ko̱jo tsi xi ńkjá ndyi̱ko̱n, ko̱jo tsi xi fí ni̱ma̱tꞌa, ko̱jo tsi xi ka̱tòn tsja, ko̱jo tsi xi toꞌoyitsꞌèn, ko̱jo tsi xi katojmé, ko̱jo tsi xi ndajínkjiꞌi yojoo̱, ko̱jo tsi xi tjiín ngo chiꞌin tji̱xin yojoo̱, ko̱jo tsi xi kijítie too̱. 22Kui xota̱ xi tjiín ngo kui nii̱, ka̱ma skji̱ni̱e̱ kui ni xi ꞌniú nda ngasee̱ kui kjo̱a̱tjó xi sa̱ꞌínkꞌasꞌienna xota̱ Israee̱l, 23ta̱nga ka̱májín kjo̱chókindyia ngi̱yaa̱ nínga tjitjíe̱n ńjño kortinaa̱ ndiꞌandikoón, ti̱nde ka̱májín kjo̱chó tiña nínga tikón ṉchandikónna. Tsi bo̱a̱ sa̱ꞌín, tsjiejín ka̱ma ndiꞌandikónna. An, Nee̱ xota̱ Israee̱l, án boá xi je katsjaxáa̱ nga ta̱ xána tsí xí sa̱ꞌín.
24Moisee̱ katsjaá ngayeje kui kjo̱a̱botíxomaa̱ Aaroo̱n ko̱jo ndií ko̱jo ngayeje xota̱ Israee̱l.
Currently Selected:
Lebitiko̱ 21: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
