Lebitiko̱ 20
20
Jé xí ꞌniú ta̱nisién ndajín
1Néná tsíchji̱a̱jo Moisee̱, 2-3tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱:
Tsi ngo xota̱ Israee̱l ko̱jo tsi ngo xota̱ xi xín nangi xi tikón kui na̱xi̱ńdaá, xi ndií sa̱ꞌínkjién nga sa̱ꞌínkꞌasꞌiee̱n ngo kjo̱a̱tjó ne Moloo̱k, chꞌo ka̱mana kui nii̱, kó xi bo̱a̱ katsꞌeén chjiéngá an skjánjo̱na, ngatꞌa̱ jè ngiti̱ kamábendikónjín ndiꞌandikónna. Chjiéngá ko̱yà xí bo̱a̱ katsꞌeén, kó sa̱ꞌinkjiéni an ngi̱jii̱n xota̱ na̱xi̱ńdána. 4Tsi ndi̱jo̱jín si̱ꞌankꞌienni, 5án má xi sa̱ꞌinjée̱ kui, ko̱jo xota̱ ndiꞌaa̱, kó sa̱ꞌinkjiéni an ngi̱jii̱n xota̱ na̱xi̱ńdána Israee̱l. Kó jmí tsi ta̱kuítsí xi bo̱a̱ ka̱maa̱, ti̱ bo̱a̱ ti̱ ka̱maa̱ ngayeje xota̱ xi ne Moloo̱k ndyi̱tsꞌéndíkón.
6Tsi tjín xí ko̱e̱je̱koo̱n xota̱ xi chji̱a̱jo xota̱ xi je jesoón nga skótꞌasoón yojoo̱, ka̱maxtína, kó án boá xi sa̱ꞌinkꞌién an kui xi bo̱a̱ katsꞌeén.
7-8Ti̱ndyiónjnú ta̱nga ta̱ tsi̱ꞌe̱ nga ta̱ án tsí xi si̱ꞌandikónjnúꞌun, kje̱ꞌe kón ngatamajnú, kó ti̱ꞌankjatjosónjnú kjo̱a̱botíxomana. Án boá xi Nee̱ xota̱ Israee̱l, tsa̱ꞌa̱n boá jún.
9Tsi tjín xí chꞌo ka̱tso̱o̱ na̱ꞌmii̱ ko̱jo tsi na̱aa̱n, chjiéngá ko̱yà.
10Tsi tjín xí kjojñájo̱ chjo̱ón kje̱ꞌe nda̱, chjiéngá ko̱yà kui xi bo̱a̱ katsꞌeén ko̱jo kui naa̱ nga.
11Tsi tjín xí kjojñájo̱ chjo̱ón na̱ꞌmii̱, chjiéngá ko̱yà kui xi bo̱a̱ katsꞌeén ko̱jo kui naa̱ nga, ngatꞌa̱ kui ni xi kamaá xikónií tsi na̱ꞌmii̱ má xi kisꞌiejo̱.
12Tsi tjín xí kjojñájo̱ kja̱ndaa̱, chjiéngá ko̱yà kui xi bo̱a̱ katsꞌeén ko̱jo kui naa̱ nga, ngatꞌa̱ ta̱nisién ꞌniú ndajín kui jé xí katsꞌeén.
13Tsi ngo nda̱ xi kjojñájo̱ kje̱ꞌe nda̱, chjiéngá ko̱yà nga joó.
14Tsi tjín xí chjo̱ón nijan sa̱ꞌín ngo xota̱chjo̱on ko̱jo tsa̱kji̱ín, ta̱nisién ꞌniú ndajín kui jé xí tjítsꞌeén. Kó nga jaán nga chjiéngá kꞌuití nga ko̱yà. Bo̱a̱ tsí tsꞌén nga ingojín xi bo̱a̱ sa̱ꞌín ngijee̱.
15-16Tsi ngo nda̱ ko̱jo tsi ngo na̱ xi ngo cho̱ chꞌo sa̱ꞌínjo̱, chjiéngá ko̱yà xí bo̱a̱ katsꞌeén, kó ti̱ chjiéngá si̱ꞌankꞌien kui cho̱o̱ nga.
17Tsi tjín xí kjojñájo̱ ndichja, ta̱nisién ꞌniú ndajín kui jeé, kó chjiéngá ku̱i̱ꞌíchjí kui ni xi ndajín xi katsꞌeén. Ngindyi̱ko̱n ngayeje xota̱ Israee̱l, nga nga joó nga ku̱i̱yòtjíngií ki̱a̱ na̱xi̱ńdaá.
18Tsi tjín xí kjojñájo̱ ngo na̱ xi kjimaa̱ saá, nga joó nga ku̱i̱yòtjíngií ki̱a̱ na̱xi̱ńdaá.
19Tsi tjín xí kjojñájo̱ ndyikjoaa̱n, chjiéngá nga joó nga ka̱majeé, ngatꞌa̱ ta̱ ngo xtín xota̱ má.
20Tsi tjín xí kjojñájo̱ chjo̱ón tsinii̱, ti̱nde kui nda̱a̱, ti̱nde kui naa̱ ka̱májín kꞌuieé ndí, ngatꞌa̱ kjo̱a̱soboá katsjaá tsinii̱.
21Tsi tjín xí kjojñájo̱ xo̱ngo̱ò, ta̱nisién ꞌniú ndajín kui jé xi katsꞌeén, kó ti̱nde kui nda̱a̱, ti̱nde kui naa̱ ka̱májín kꞌuieé ndí.
Ndakjiꞌi nga si̱ꞌankjatjosónjnúu̱ Néná
22Tsi si̱ꞌankjatjosónjnú kjo̱a̱botíxomana, jmíni̱xtjin kongatji̱ngijnúꞌun ki̱a̱ tꞌanangi xi an tsjajnúꞌun xi na̱xi̱ńdájnú ka̱ma. 23Ta̱nga chjiéngá nga bo̱a̱jín niꞌánjnú, xikoó xota̱ na̱xi̱ńdá xí síndo ngotꞌe̱ ki̱a̱a̱, ngatꞌa̱ ta̱ngatꞌanii̱ nga ndajínkjiꞌi ni xi katsꞌén, kuíni nga katsꞌenxchán án. 24Kuíni nga jún tsjajnúꞌun kui tꞌanangi nínga síndo kui xotaa̱ ngotꞌe̱. Achichí tsjachon kui ngi̱ndiee̱, kó achichí tsie nichinie kꞌuiéjnú ki̱a̱a̱ ngatsjéni̱xtjin.
25-26Án boá xi Nee̱ xota̱ Israee̱l. Án boá xi indotꞌaxínjnúꞌun nínga síndo xota̱ na̱xi̱ńdá xí ngasee̱, tsi̱ꞌe̱ nga jún xi ka̱majnú xota̱ na̱xi̱ńdána. Kuíni nga jún chjiéngá xcha̱ cha̱n cha̱njnú ñá cho̱ xi tsjie ko̱jo xi tsjiejín, kó nga ka̱májín si̱ꞌanjo̱jnú cho̱ xi tsjiejín, tsi̱ꞌe̱ nga ko̱jo júnjín tsjiejín ka̱majnú. Chjiéngá xota̱ xi bo̱a̱jín kón ka̱majnú. Ngatꞌa̱ án boá xi Nee̱ xota̱ Israee̱l, kó bo̱a̱jín kón an, xikoó ne xi ngasee̱.
27Tsi tjín xí chjo̱on ko̱jo tsi xi̱ꞌin xi skótꞌa yojoo̱ nga ko̱e̱je̱koo̱n tsi ngo xi je kꞌien ko̱jo tsi ngo xi kotꞌasón, chjiéngá ndi̱jo̱ nga niꞌánkꞌiénni.
Currently Selected:
Lebitiko̱ 20: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
