Lebitiko̱ 15
15
Kje̱ꞌe ngase ni xi tsjiejín
1Néná tsíchji̱a̱jo Moisee̱ ko̱jo Aaroo̱n, 2tsi̱ꞌe̱ nga ka̱tso̱yaa̱ xota̱ Israee̱l kui kjo̱a̱botíxomaa̱:
Ngayeje jáxíꞌín xi ngo chiꞌin kꞌuieé yojo ndikoón, chjiéngá xota̱ xi tsjiejín kꞌuiín, 3tsi kjo̱tjoo̱ ko̱jo tsi kjo̱tjojiín ndátjítsi̱é.
4-7Ti̱ chjiéngá tsjiejín ka̱ma ṉchan nínga fojñasón kui nda̱a̱ nga, ko̱jo yáxíríe̱ nínga ꞌbíjñasón. Tsi tjín xí sa̱ꞌínjo̱ kui nda̱a̱, ko̱jo tsi ṉchaa̱n ko̱jo tsi yáxíríee̱, tsjiejín ka̱ma xi bo̱a̱ sa̱ꞌiín ngaskande nga ka̱majñoó, kó chjiéngá ko̱nié ńjñoo̱ ko̱jo ngatangóyá.
8Tsi kui nda̱ xi tjiín kui chiꞌii̱n, ko̱títiajón ngo nda̱ xi tsjie, kui xi akatítiajoón tsjiejín ka̱ma ngaskande nga ka̱majñoó, kó chjiéngá ko̱nié ńjñoo̱ ko̱jo ngatangóyá.
9Tsi kui nda̱ xi tjiín kui chiꞌii̱n ngo xiri̱e̱ sa̱ꞌínkjién, tsjiejín ka̱ma kui xiri̱e̱e̱ nga. 10Tsi tjín xí sa̱ꞌínjo̱ ngo ni xi katsꞌénkjién kui nda̱ xi tjiín kui chiꞌii̱n, tsjiejín ka̱ma ngaskande nga ka̱majñoó, kó chjiéngá ko̱nié ńjñoo̱ ko̱jo ngatangóyá. 11Ti̱ kui nii̱ xi sa̱ꞌín tsi ngo nda̱ katsꞌénjo̱ kui nda̱a̱, tsi aniéjónjín tsja. 12Ngayeje ti̱jì nda xi sa̱ꞌínjo̱ kui nda̱ xi tjiín chiꞌii̱n, chjiéngá ko̱kjan, kó ngayeje ni xi yá xí sa̱ꞌínjo̱, chjiéngá ko̱niéjón.
13Tsi ka̱mandaya kui nda̱a̱, chjiéngá yito ni̱xtjin skoyákjo̱a̱, ngije jaꞌa kui ni̱xtjii̱n, chjiéngá ko̱nié ńjñoo̱, kó ndáfoaa̱ ndáńchꞌi̱ ngatangóyáni. Ta̱ bo̱a̱ tsí tsꞌén nga ka̱matsjie ngijee̱. 14Xi ma jin ni̱xtjin chjiéngá ko̱e̱je̱ nínga bitjasꞌi̱e̱nnii̱ ndiꞌandikoón ki̱a̱ ngindyi̱ko̱n Néná. Kó ngatjíjo̱ jó tójo ko̱jo tsi jó toṉña̱ xi ngatsꞌénkꞌásꞌieén chináꞌmii̱. 15Kósꞌe̱ chináꞌmii̱ nga kjíbé kuí cho̱o̱, kó ngo nga tsꞌenkꞌásꞌién kjo̱a̱tjó tsi̱ꞌe̱ nga sa̱ꞌinjetakóo̱n jeé, kó xi ingoo̱ nganda tsa̱ꞌa̱n ngatꞌítí. Kó bo̱a̱ tsí tsꞌén nga kui xi tjiín kui chiꞌii̱n, xota̱ xi je kamátsjie kꞌuiín.
16Tsi ngo nda̱ xi nde bejín nga xtjón ndáxójmaá yojo ndikoón, chjiéngá tsjiejín ka̱ma ngaskande nga ka̱majñoó, kó chjiéngá ngatangóyá. 17Tsi ndáxójmaá kui nda̱a̱ xtjonjón ngo ńjño, ko̱jo tsi ngo ni xi tji̱xin, kui nii̱ tsjiejín ka̱ma ngaskande nga ka̱majñoó, kó chjiéngá ko̱nié.
18Tsi ngo nda̱ ko̱jo ngo na̱ sa̱ꞌíntsjajo̱ yojoo̱, chjiéngá tsjiejín ka̱ma ngaskande nga ka̱majñoó, kó chjiéngá ko̱ngóyá ngijee̱.
Ni xi tsꞌéndándí ngo na̱
19Tsi ngo na̱ xi kjimaa̱ saá, chjiéngá tsjiejín ka̱ma yito ni̱xtjin. Tsi tjín xí sa̱ꞌínjo̱ kui naa̱, 20-23ko̱jo tsi ṉchaa̱n, ko̱jo tsi kje̱ꞌe ni xi tsꞌénkjién, tsjiejín ka̱ma ngaskande nga ka̱majñoó, kó chjiéngá ko̱nié ńjño ko̱jo ngatangóyá. 24Tsi tjín xí sa̱ꞌíntsjajo̱ kui na̱ xi kjimaa̱ saá, yito ni̱xtjin tsjiejín ka̱ma, ngatꞌa̱ kui kjo̱a̱tsjiejiín kui naa̱, jè katsꞌénkakiín kui nda̱a̱ nga. Ṉchan nínga kjoyójosón nga sa̱ꞌíntsjajo̱ yojoo̱ ti̱ tsjiejín ka̱ma nga.
25Tsi ngo na̱ xi kjimaa̱ chi̱xójín kjín ni̱xtjin, kó nga jmí tsi kjiꞌanga kjimaa̱ saá, chjiéngá tsjiejín ka̱ma. 26Ti̱ chjiéngá tsjiejín ka̱ma ṉchan nínga fojñasón ko̱jo yáxíríe̱ xi tsꞌénkjién nínga ꞌbíjñasón nga. 27Ngayeje xota̱ xi sa̱ꞌínjo̱ kui ni xi katsꞌénkjién kuí naa̱, ti̱ chjiéngá tsjiejín ka̱ma kui nga, ngaskande nga ka̱majñoó, kó chjiéngá ko̱nié ńjñoo̱ ko̱jo ngatangóyá.
28Tsi̱ꞌe̱ nga ka̱matsjie nginí kui naa̱, chjiéngá yito ni̱xtjin skoyá ndeskande nga ngije kixixió kui chi̱xójiín. 29Xi ma jin ni̱xtjii̱n, nga kjíbé jó tójo ko̱jo tsi jó toṉña̱, ngatjíjo̱ kó ngatsꞌénkꞌásꞌieén chináꞌmii̱ ki̱a̱ nínga bitjasꞌi̱e̱nnii̱ ndiꞌandikoón. 30Chináꞌmii̱ nga kjíbé kuí cho̱o̱, kósꞌe̱ ngo nga tsꞌenkꞌásꞌién kjo̱a̱tjó tsi̱ꞌe̱ nga sa̱ꞌinjetakón an jé, kó xi ingoo̱ nganda tsa̱ꞌa̱n ngatꞌítí. Kó bo̱a̱ tsí tsꞌén nga kui naa̱, ka̱matsjie nginí ngijee̱.
31Jún Moise̱ ko̱jo Aaro̱n, chjiéngá jún tatíxomájnúu̱ ni xi sa̱ꞌín xota̱ Israee̱l kjo̱a̱a̱ ni xi tsjiejín. Ngatꞌa̱ tsi bo̱a̱jín si̱ꞌánjnú, ko̱yà kuí xotaa̱ ta̱ngatꞌanii̱ nga ni xi tsjiejín ku̱i̱ꞌíkitsieni ndiꞌandikónna.
32-33Kuí bí kui kjo̱a̱botíxomaa̱ xi chji̱a̱ kjo̱a̱a̱ xi tsjiejín yojoo̱, xi chjo̱on xí xi̱ꞌin.
Currently Selected:
Lebitiko̱ 15: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
