Lebitiko̱ 14
14
Xi kótsꞌèn niꞌántsjie xota̱ xi tjiín chiꞌin xi tsꞌénkjátsón tji̱xin yojoná
1Néná bi̱ katsoó Moisee̱:
2Kjiꞌanga kꞌuiyá nga je tsjie ngo xota̱ xi tjiín chiꞌin xi tsꞌénkjátsón tji̱xin yojoná, chjiéngá kui nii̱ xi si̱ꞌan:
Kui xi tjiín kui chiꞌii̱n chjiéngá ko̱e̱je̱ ngindyi̱ko̱n chináꞌmii̱. 3-4Kui chináꞌmii̱ ndi̱tsee̱n nínga síndo ndiꞌaa̱ xotaa̱ ki̱a̱ skotsíjee̱n kui xi oo̱n. Tsi je kamándaya, chináꞌmii̱ ku̱i̱ꞌa jó cho̱ xi tjiín tsja̱nga̱, ko̱jo ngo chikjan yákón, ko̱jo rixtó xi iní, ko̱jo ngo chꞌo̱ xka̱ isopo̱. 5Jaskan ku̱i̱ndyiá ndáfoa ndáńchꞌi̱ ngo ti̱jì nda, kó nga̱soón kui ti̱ji̱í sa̱ꞌínkꞌién ngo kui cho̱ xi tjiín tsja̱nga̱a̱. 6Kósꞌe̱ tji̱e̱nmá skjíbé cho̱ xi ingoo̱, ko̱jo kui chikjan yákoón, ko̱jo kui rixtó inií, ko̱jo kui chꞌo̱ xka̱ isopoo̱, kó jiín kui cho̱ xi je kꞌiee̱n sa̱ꞌínkꞌandyi̱ni ngayeje kui nii̱, ki̱a̱ nga̱soón kui ndáfoa ndáńchꞌií. 7Ngije kamá kui nii̱, jiín kui cho̱o̱ yito ndi̱yà skjitjónjón kui xi oo̱n tsi̱ꞌe̱ nga ka̱matsjie, sꞌe̱ jaskan ngije bo̱a̱ ka̱tso̱ nga jè kamátsjie kui xi oo̱n, sa̱ꞌínkjíndé cho̱ xi ingoo̱.
8Jaskan kui xi oo̱n ko̱nié ńjñoo̱, sꞌe̱ ko̱ngóyá, kó ku̱i̱ꞌíjoón ngayeje yojoo̱. Bo̱a̱ tsꞌén nga je ka̱matsjie, kó je ka̱ma kꞌo̱sꞌien nginí nínga síndo ndiꞌaa̱ xotaa̱, ndatsi chjiéngá ngi yito ni̱xtjin kꞌuijñá ndi̱tsee̱n ndiꞌa nínga ꞌbíjñá. 9Xi ma yitoo̱ ni̱xtjii̱n ti̱ ngataniè nginí ńjñoo̱, kó ngatangóyá nginí, sꞌe̱ ngatꞌijón nginií ngayeje yojoo̱. Kósꞌe̱ kjiꞌá boá nga ka̱matsjie yeje yojoo̱.
10Xi ma jii̱n ni̱xtjin, kui xota̱ xi je kamátsjiee̱, chjiéngá sa̱ꞌínkꞌasꞌiee̱n Néná ngo kjo̱a̱tjó xi ján cho̱tsa̱nga̱, ko̱jo jun kilo̱ masien ndso̱ko̱a̱n ṉño̱pan xi isti̱ kiniꞌánda̱ꞌyo̱ni, ko̱jo ngo kuarto̱ litro̱ isti̱. Chjiéngá jó cho̱tsa̱nga̱a̱ xi xi̱ꞌin ka̱ma, sꞌe̱ ngo xi chjo̱on, nga jaán nga cho̱ xi nda ko̱jo xi ngo noó ngatama. 11Chináꞌmii̱ boá xi kjo̱jo kui xotaa̱ ko̱jo kjo̱a̱tjó xi sa̱ꞌínkꞌasꞌien, kó ki̱a̱ ku̱i̱ꞌíndo nínga bitjasꞌi̱e̱nnii̱ ndiꞌandikoón. 12Kó ki̱a̱ skjíbé ngo cho̱tsa̱nga̱a̱, ko̱jo istii̱, kó ki̱a̱ sa̱ꞌín ni xi niꞌán nga niꞌánkꞌasꞌien kjo̱a̱tjoó. Kui kjo̱a̱tjoó kuí boá xi niꞌánkꞌasꞌien tsi̱ꞌe̱ nga nda koaꞌa ngiñá an xotaa̱.
13Chináꞌmii̱ xí sa̱ꞌínkꞌién kui cho̱tsa̱nga̱a̱ ki̱a̱ nínga niꞌánkꞌasꞌien kui kjo̱a̱tjoó tsi̱ꞌe̱ nga nda koaꞌa ngiñá an xotaa̱, kó kuí boá xi ku̱i̱ꞌítí kui kjo̱a̱tjoó nganda tsa̱ꞌa̱n. Ki̱a̱ sa̱ꞌínkꞌién ngi̱ndie xi xá tikónni tsi̱ꞌe̱ nga si̱ꞌan kui nii̱. Kui cho̱ xi niꞌánkꞌasꞌien tsi̱ꞌe̱ nga nda xꞌi̱a̱ nginína, tsi̱ꞌe̱ chináꞌmii̱ ka̱ma, ko̱jo kui cho̱ xi niꞌánkꞌasꞌien tsi̱ꞌe̱ nga sa̱ꞌinjetakón an jeé. Nga jó kui kjo̱a̱tjoó, kjo̱a̱tjó xi ndikón boá.
14Chináꞌmii̱ sa̱ꞌínkꞌandyi̱ni xtín tsja jiín kui cho̱ xi kiniꞌánkꞌasꞌiee̱n, kó nga tsanginjon tji̱bo̱a̱nijon kixi̱, ko̱jo xtiín tsja je xi kixi̱i̱, ko̱jo xtiín se je xi kixi̱i̱ xota̱ xi si̱ꞌantsjiee̱. 15-16Jaskan ku̱i̱ndyia isti̱ ngi̱ya tsja xi skoón, kó xtín xí ma joó tsja xi kixi̱i̱ sa̱ꞌínkꞌandyi̱ni kui istii̱, kósꞌe̱ yito ndi̱yà skjitjónjón kui istii̱ xtji̱e̱e̱n nínga tikón ṉchandikónna. 17Kó chináꞌmii̱ ti̱ ku̱i̱ndyiá chií kui istii̱ tji̱bo̱a̱nijon kixi̱, ko̱jo xtín xí jee̱ tsja xi kixi̱i̱, ko̱jo xtín xí jee̱ se xi kixi̱i̱ kui xota̱ xi si̱ꞌantsjiee̱. 18-20Kó nga fetꞌani, chináꞌmii̱ skjitjónjón isti̱ xi kꞌo̱ngii̱ to̱ko̱ kui xota̱ xi tjíniꞌántsjiee̱. Sꞌe̱ jaskan sa̱ꞌínkꞌasꞌien kjo̱a̱tjó xi niꞌánkꞌasꞌien nga machjítjé jeé, kósꞌe̱ ingo kjo̱a̱tjó kꞌuití nganda tsi̱ꞌe̱ Néná, ki̱a̱ nijan ngatꞌítí kjo̱a̱tjó xi ni xi kamáxchá jno̱o̱. Bo̱a̱ tsí tsꞌén nga ka̱matsjie yeje kui xotaa̱.
21Tsi kui xi ka̱matsjiee̱ ni̱ma̱ nga jmí to̱njiín, tsi̱ꞌe̱ nga ka̱matsjie ka̱má sa̱ꞌínkꞌasꞌien ngo tsí cho̱tsa̱nga̱, jó kilo̱ ndso̱ko̱a̱n ṉño̱pan, ko̱jo ngo kuarto̱ litro̱ isti̱. 22Kó ti̱ ka̱ma sa̱ꞌínkꞌasꞌien tsi ka̱maa̱ jó tójo ko̱jo tsi jó toṉña̱, ngo kui cho̱o̱ tsi̱ꞌe̱ nga si̱ꞌanjetakoón jeé, sꞌe̱ xi ingoo̱ tsi̱ꞌe̱ nga kꞌuití nganda tsa̱ꞌa̱n. 23Ngayeje kui nii̱ xi sa̱ꞌínkꞌasꞌien chináꞌmii̱ xi ma jin ni̱xtjin, ki̱a̱ nínga bitjasꞌi̱e̱nni ndiꞌandikoón. 24Ki̱a̱ chináꞌmii̱ skjíbé cho̱tsa̱nga̱a̱ ko̱jo istii̱, kó sa̱ꞌín ni xi niꞌán nga niꞌánkꞌasꞌienna kjo̱a̱tjoó.
25Chináꞌmii̱ sa̱ꞌínkꞌién cho̱tsa̱nga̱a̱ kui kjo̱a̱tjoó tsi̱ꞌe̱ nga nda koaꞌa ngiñá an xotaa̱, kó sa̱ꞌínkꞌandyi̱ni xtín tsja jiín, kósꞌe̱ ku̱i̱ndyiaá tji̱bo̱a̱nijon kixi̱, ko̱jo xtín xí jee̱ tsja xi kixi̱i̱, ko̱jo xtín xí jee̱ se xi kixi̱i̱, tsi̱ꞌe̱ kui xota̱ xi tjíniꞌántsjiee̱. 26-27Sꞌe̱ jaskan sa̱ꞌínkꞌandyi̱ni xtín xí ma joó tsja xi kixi̱i̱, kósꞌe̱ yito ndi̱yà skjitjónjón kui istii̱ xtji̱e̱e̱n nínga tikón ṉchandikoón. 28Kó nga tsanginjon chií kui istii̱ tji̱bo̱a̱nijon kixi̱, ko̱jo xtín xí jee̱ tsja xi kixi̱i̱, ko̱jo xtín xí jee̱ se xi kixi̱i̱ xota̱ xi si̱ꞌantsjiee̱. 29Jaskan ngije kamá kui nii̱, nga kjitjónjón isti̱ xi tsꞌangii̱ to̱ko̱ kui xotaa̱, 30-31kó nga fetꞌani ngo kui cho̱ xi tjiín tsja̱nga̱a̱ nga tsꞌenkꞌásꞌién tsi̱ꞌe̱ nga kui xi ka̱ma ngo kjo̱a̱tjó, tsi̱ꞌe̱ nga sa̱ꞌinjetakóo̱n jeé, kó xi ingo kui cho̱o̱ nganda tsa̱ꞌa̱n kꞌuití ko̱jo kui kjo̱a̱tjó xi ndso̱ko̱a̱n ṉño̱paa̱n ko̱jo istii̱.
32Bo̱a̱ tsꞌén nga si̱ꞌantsjie xota̱ xi tjiín chiꞌin xi tsꞌénkjátsón tji̱xin yojoná xi ni̱ma̱ nga jmíjiín to̱n.
Bi̱ tsꞌén si̱ꞌantsjie xoó ngo ndiꞌa
33Néná bi̱ katsoó Moisee̱ ko̱jo Aaroo̱n:
34Kjiꞌanga ku̱i̱tjásꞌi̱e̱njnú nangi Kanaa̱n, yà jàn tsi xtjóxa̱ ko̱jo tsi ni jmá kjo̱tjoo̱ xoó ndiꞌajnú. 35Kjiꞌanga bo̱a̱ ka̱ma, kui xi tsi̱ꞌe̱ ndiꞌaa̱ ngatjítsóyaà chináꞌmii̱, kó bi̱ nga tsoó: Ta̱ yà jàn mí ni xi kjifotjoo̱ xoó ndiꞌana.
36Kó chináꞌmii̱ ngindiee̱ nga kꞌo̱sꞌien kui ndiꞌaa̱, chjiéngá bo̱a̱ ka̱tso̱ nga kjo̱tjo ngayeje xota̱ xi síndoꞌyaá, sꞌe̱ jaskan kꞌo̱sꞌien nga skotsíjee̱n. Kó bo̱a̱ tsꞌén nga ni xi síndo ngi̱yaa̱ kui ndiꞌaa̱ jmí tsi ni xi tsjiejín ka̱ma.
37Tsi kui chináꞌmii̱ sku̱i̱e̱ nga kui ni xi kjifotjoo̱ ndiꞌaa̱ sa̱si̱e̱ ko̱jo tsi iní kjima ko̱jo tsi kjifísꞌienya xoó, 38ngatjataxie kui ndiꞌaa̱, kó bo̱a̱ nga tsó nga ngojín xi sa̱ꞌínkjién kuí ndiꞌaa̱ yito ni̱xtjin. 39Xi ma yito ni̱xtjin ti̱ skotsíjen nginí. Tsi kui ni xi kjifotjoo̱ xoó kui ndiꞌaa̱ je kijítsié ngase, 40-41chjiéngá bo̱a̱ ka̱tso̱ nga chja̱ꞌáxín ndi̱jo̱ xi je jatjoo̱ kui nii̱, kó nga chjajoón ngayeje xoó kui ndiꞌaa̱. Kui ndi̱jo̱ xi chja̱ꞌáxiín ko̱jo ngayeje ndso̱ko̱a̱a̱n kui xoó, chjiéngá ndi̱tsee̱n kui na̱xi̱ńdaá ki̱a̱ ku̱i̱chíjmi, ki̱a̱ ngi̱ndie nínga tsjiejiín. 42Jaskan ndi̱jo̱ xi tja̱tsi̱e̱ kꞌuíndoo̱ nínga kaꞌnaxié kui ndi̱jo̱ xi je kachjeꞌéxiín, kó kui xoó kjojòn nginí kje̱ꞌe ndáse xí tja̱tsi̱e̱.
43Kó tsi ndatsi je bo̱a̱ kiniꞌaán kui ndiꞌaa̱, kó tsi ti̱ xtjó nginí ngasee̱ kui nii̱, 44-45chináꞌmii̱ ti̱ kꞌo̱sꞌien nginí kui ndiꞌaa̱, kó ti̱ skotsíjen nginií ingo ndi̱yà. Tsi je kamátsié nginí kui nii̱, kui ndiꞌaa̱ chjiéngá ndiꞌa xi tsjiejín kꞌuiín, kó chjiéngá ko̱kjan, ngatꞌa̱ ngo chiꞌin xi tsꞌenkjié ngo ni je tjiín. Kó kuíni nga kui ni xi kamándani kui ndiꞌaa̱ xikoó ndi̱jo̱o̱, yaá, ko̱jo ngayeje ni xi ngasee̱, chjiéngá ngo ngi̱ndie nínga tsjiejín ku̱i̱chíjmi, ki̱a̱ ndi̱tsee̱n kui na̱xi̱ńdaá.
46Tsi tjín xí kꞌo̱sꞌien kui ndiꞌaa̱ tji̱e̱nga kisichjá, chjiéngá tsjiejín ka̱ma ngaskande nga ka̱majñoó. 47Tsi tjín xí ni skji̱ni̱e̱ ngi̱yaa̱ kui ndiꞌaa̱, ko̱jo tsi ki̱a̱ kjojñá, chjiéngá ko̱nié ńjñoo̱.
48Ta̱nga tsi chináꞌmii̱ sku̱i̱e̱ nga kui ndiꞌaa̱ je kichajá kui ni xi katjoo̱ xoó, chjiéngá bo̱a̱ ka̱tso̱ nga je tsjie kui ndiꞌaa̱. 49Tsi̱ꞌe̱ nga je tsjie kui ndiꞌaa̱ ka̱tso̱, jó cho̱ xi tjiín tsja̱nga̱ nga kjíbé, ko̱jo ngo chikjan yákón, ko̱jo ngo rixtó xi iní, ko̱jo ngo chꞌo̱ xka̱ isopo̱. 50Sꞌe̱ ngatindyiá ndáfoa ndáńchꞌi̱ ngo ti̱jì nda, kó nga̱soón kui ti̱ji̱í ngatsꞌénkꞌién ngo kui cho̱ xi tjiín tsja̱nga̱a̱, 51kósꞌe̱ jaskan nga kjíbé kui chikjan yákoón, ko̱jo kui chꞌo̱ xka̱ isopoo̱, ko̱jo kui rixtó inií, ko̱jo kui cho̱ xi tikoón, kó ngatsꞌénkꞌándyi̱ni jiín ko̱jo ndáfoaa̱. Kósꞌe̱ kui ndáfoaa̱ yito ndi̱yà nga kjitjónjón kui ndiꞌaa̱, 52-53kó nga fetꞌani, chináꞌmii̱ ngatsꞌénkjíndé kuí cho̱ xi tjiín tsja̱nga̱ kui xi tikoón. Kó bo̱a̱ tsꞌén nga ka̱matsjie kui ndiꞌaa̱.
54-56Bo̱a̱ tsꞌén nga chjiéngá si̱ꞌantsjie ngayeje to̱ko̱ya chiꞌin xi tsꞌenkjié ngo ni, ko̱jo tsi ni jmá xi kjo̱tjoo̱ ńjñoo̱ xotaa̱, ko̱jo tsi xoó ndiꞌaa̱. 57Tsi si̱ꞌankjatjosónjnú kui kjo̱a̱botíxomaa̱, kjiꞌá boá nga nda xcha̱jnú ni xi tsjiee̱ ko̱jo ni xi tsjiejiín.
Currently Selected:
Lebitiko̱ 14: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
