Kjo̱a̱chaꞌándaseén 2
2
Nda̱ chji̱ni̱e̱ꞌe̱én Néná
1¡Achichí ꞌniú katsꞌénxchán Néná, nga íjña jñó na̱xi̱ńdáꞌniú Sioo̱n!
Ndeskande nkꞌa jàn katsꞌénkjatsónní kjo̱a̱tsjakjiꞌii̱ nangi Israee̱l,
kó nga katsꞌénxchán, nde ngiti̱ jaꞌátsjienjiín
ngi̱ndie nínga bosiénsón sé.
2Néná nde ni̱ma̱jín kamaá nga katsꞌénkjatsón ngayeje ndiꞌaa̱ xota̱ tji̱e̱e̱ Jakoo̱b.
Katsꞌénkixóndó ngi̱ndie ꞌniú nínga síndo xota̱ tji̱e̱e̱ Jundáa̱,
jè yíjñá tꞌanangi ko̱jo ni̱ma̱kjo̱a̱ íjñá ree̱, ko̱jo xota̱ xi botixómaá.
3Achichí ꞌniú katsꞌénxchán Néná,
nga ta̱ ngo ndi̱yà jaꞌáxiín ngaꞌniú xí kisꞌiee̱ na̱xi̱ńdá Israee̱l.
Ngiti̱ asíko̱jojín ngase kjiꞌanga kondra̱a̱ jachókjánjo̱,
kó xikó maá tsi ngo ndiꞌí kamá xi katsꞌénchjaán tꞌanangii̱ Jakoo̱b,
kó kui ndiꞌií katsꞌénkjié ngayeje nii̱.
4Néná xikoó tsi ngo kondra̱ nga iskjienꞌniuú yáchjonyaá nga íjñanda,
kó xikó maá tsi ngo kondra̱ nga katsꞌénkjié ngayeje xi xo̱ngò xí sꞌe̱ kjimaxchá.
Ki̱a̱ nínga síndo ndiꞌaa̱ xota̱ Sioo̱n,
tsꞌajminié kjo̱a̱xcha̱án xikó maá tsi ndiꞌí.
5Néná xikoó tsi ngo kondra̱ kamá, kó katsꞌénkjié nangi Israee̱l.
Katsꞌénkjié ngayeje ndo̱bo̱a̱xa̱á,
katsꞌénkjié ngayeje ngi̱ndie nínga síndo ngaꞌniuú,
kó katsꞌén tsie ngase kjo̱a̱xa̱ꞌya̱a̱, ko̱jo kjo̱a̱chaꞌaá nangi Jundáa̱ tsjakjiꞌii̱.
6Katsꞌénkjatsón ndiꞌandikoón, xikó maá tsi ngo ndiꞌa ti̱ki̱e̱n nínga tjitjíe̱ nii̱,
katsꞌénkjatsón ngi̱ndie nínga kamátikó xotaa̱.
Néná boá xi katsꞌén nga ki̱a̱ na̱xi̱ńdáꞌniú Jerusalee̱n
kiniꞌánchíyá sꞌué xí maa̱, ko̱jo ni̱xtjin ndikoón.
Kó nga ꞌniú katsꞌénxchán, katsꞌénchꞌó nda̱ ree̱ ko̱jo chináꞌmii̱.
7Néná jè katsꞌénchꞌó ṉchandikoón, ko̱jo ndiꞌandikoón,
jè katsꞌénkꞌasꞌien ngi̱ya tsja kondraa̱ xó xí tjíchjáꞌyáni, ko̱jo ndo̱bo̱a̱xa̱á na̱xi̱ńdáꞌniuú.
¡Achichí ni xi ndyi̱tsó xotaa̱ nga ndyi̱kjandayà, xikó maá kjiꞌanga ma sꞌué!
8Néná je bo̱a̱ katsó nga kꞌo̱jmi xoó na̱xi̱ńdáꞌniú tsjákjiꞌi Sioo̱n.
Iskjíbé chi̱bo̱a̱ nga yején ńchjón,
kó katsꞌénkjatjosón ni xi je tjíndaa̱ nga sa̱ꞌínkjatsón.
Kuí boá xi katsꞌén nga ngajó xó xí tjíchjáꞌyáni na̱xi̱ńdáꞌniuú nijan kiniꞌánkjatsón.
9Jè tsꞌatójó tꞌanangi nga̱ntjo̱a̱a̱,
jè katsꞌénkjatsón nínga kjitꞌani.
Ree̱ ko̱jo xota̱ xi botixómaá je ki̱a̱ síndojin
ki̱a̱ na̱xi̱ńdá xí jmí kjo̱a̱kitijiín.
Néná jè ngiti̱ chji̱a̱jojín ko̱jo ngiti̱ jmí ni bokójiín jáchji̱ni̱e̱ꞌe̱én.
10Xota̱ xi xchaá na̱xi̱ńdáꞌniú Sioo̱n, je yíxioó tsꞌoa nga síndotie tꞌanangii̱.
Je iskjitjónjón ndiso to̱ko̱, kó tsajá ńjño tokjuie.
¡Kó ínchjín xo̱ngo̱ò na̱xi̱ńdáꞌniú Jerusalee̱n, ngaskande ꞌbíndoxtien má nga soboá maá!
11Ndyikón án, kjifotjoo̱ ndándyíkon xikoó ndejèꞌ,
¡kó achichí ni xi kjimaa̱ ngi̱jin yojona!
Ini̱ma̱na, xikoó tsi kjima tsobeé,
ta̱ngatꞌanii̱ nga je kiniꞌánkjié xota̱ na̱xi̱ńdáꞌniuú,
ngayeje jákjíndií ko̱jo ndíndaa̱ je kjifesón bojó ki̱a̱ ndi̱yàtieé.
12Ni̱ma̱ xò kuí jákjíndií nga bi̱ katsoó na̱aa̱n:
Ñá tikón paa̱n ko̱jo binoo̱ ꞌne̱.
Kó ngi̱ya ndi̱yàtieé kui na̱xi̱ńdáꞌniuú kjibixó xikoó xi oo̱n,
kó nga̱són tjiaa̱ na̱aa̱n kjifesón kjin.
13ꞌYání xi bo̱a̱ má kjiꞌi xikoó jí na̱xi̱ńdáꞌniú Jerusalee̱n,
ꞌyání xi bo̱a̱ má kjimaa̱ xikoó jí na̱xi̱ńdáꞌniú Sioo̱n.
ꞌYání xi kꞌuijñá ndsa̱ji̱i̱n, tsi̱ꞌe̱ nga sa̱ꞌíndajoo̱n katsaki,
ji na̱xi̱ńdá Sioo̱n tsjakjiꞌi xi tikón xikoó ngo na̱ xo̱ngo̱ò.
Ngatꞌa̱ ni ndajín xi kjimaa̱, ta̱nisién je xikó maá ndáchíkoón. Kó ꞌyá xí sa̱ꞌíndayaa̱.
14Kui xi xota̱ chji̱ni̱e̱ꞌée̱n kiniꞌín ji,
ni ndiso ko̱jo ni chi̱ni boá xi katsóyaà.
Katsóyàjiín jé xí kiniꞌín ji, tsi̱ꞌe̱ nga kꞌuijñáꞌniújiín.
Ta̱sá ni xi jmí ni chjíjiín xi katsóyaà, kó kiniꞌínsꞌijin ji.
15Ngayeje xota̱ xi jaꞌa kui ndi̱ya̱à, katsꞌéntsen má tsja nga tsajnókiee̱,
ꞌbíxo̱bí má, ko̱jo tsꞌéntíyà maá to̱ko̱ nga mojnókiee̱,
nga bi̱ tsó kjo̱a̱a̱ kui na̱xi̱ńdáꞌniú Jerusale̱n tsjakjiꞌii̱:
A kuí bí kui na̱xi̱ńdáꞌniú xí achichí tsjákjiꞌi xi kjo̱a̱tsjaa̱ tꞌanangii̱, kiꞌmií.
16Ngayeje kondra̱a̱ ndyi̱chji̱a̱taꞌii̱n,
íxo̱bí má, ko̱jo iskjinieya má ṉꞌni̱u̱ nga tsajnókiee̱ nga bi̱ katsó:
¡Jè kiniꞌánkjié ndo̱jò ndójo̱ kuí na̱xi̱ńdáꞌniuú!
¡Kuí bí kui ni̱xtjii̱n xi kichiyáa̱!
¡Jè jachó ni̱xtjin, jè kamáyà!
17Néná jè katsꞌénkjatjosón ni xi je índa,
jè katsꞌénkjatjosón ni xi katsó ndeskande koó ngasꞌe̱:
Katsꞌénkjatsón, kó katsꞌénjetakónjín.
Kó kuí boá xi katsjandieè kondra̱a̱ nga tsajnókiee̱,
kó ta̱ngatꞌanii̱ ni xi kamaá, nga achichí nkꞌa íjñá ngaꞌniú xí kisꞌiee̱ kondra̱a̱.
18Ini̱ma̱a̱ kui xotaa̱, ni̱ma̱ ndyi̱tsó nga ndyi̱chji̱a̱a̱ Néná.
Ji na̱xi̱ńdáꞌniú Sioo̱n, te̱ꞌéndiè ji nga xóo̱ skja̱ndá
xikó maá ngo ndejèꞌ nga jñó nga ni̱xtjin.
Ngata̱ xiójín mindyin ji, nga kjandárá ngase ndyikin ji.
19Ti̱sítji̱n ji, cheꞌeyé ji nga jñoó,
kjiꞌanga ku̱i̱ꞌítsꞌi̱yanii̱ nga xchindà ni̱xtji̱e̱e̱n.
Te̱ꞌéndiè ji nga skja̱ndá ini̱màa̱ ngindyi̱ko̱n Néná,
chjanínkꞌé ndse̱ ji nga chji̱e̱ꞌetjé ji jákjíndí xi̱xi̱i̱,
kui xi kjifesón kjindiá ki̱a̱ nijon ndi̱yàtieé.
Jerusalee̱n
20Ji Ne, ti̱ꞌinkjé jí kó tsitsíjìi̱n ꞌyání bo̱a̱ xi bo̱a̱ kiniꞌínje̱ ji.
A chjiéngá ngayeje xi na̱aa̱n skji̱ni̱e̱ ndí xi̱xi̱i̱.
A chjiéngá ki̱a̱ ndiꞌandikóo̱n si̱ꞌankꞌien chináꞌmii̱, ko̱jo nda̱chji̱ni̱e̱ꞌe̱én.
21I̱xtikjíndií ko̱jo xota̱ xi xchaá je ki̱a̱ kjiyojo ngi̱ya ndi̱yàtieé,
ínchjín xo̱ngòna ko̱jo i̱xti xo̱ngòna je ki̱cha̱ kiniꞌánkjiesónni.
Katseꞌéndiè ji nga jesón kjiꞌanga ꞌniú kiniꞌínxchín jí,
kiniꞌínkꞌín ji, kó kiniꞌínjetakínjíi̱n.
22Ngayeje xi tsakjon an kiꞌmíyée̱ tsi̱ꞌe̱ nga kji̱ndi̱bá, xikó maá tsi ngo sꞌué kamá.
Ni̱xtjin nga ꞌniú katsꞌénxchán Néná, nde ngojín xi jatjongii̱ yojoo̱ xi kisꞌińdo ngase.
Kui ndí xí nde kisꞌifejín an nga askoo̱n, ko̱jo nga katsꞌénxchá án, kondra̱na je katsꞌénkjié.
Currently Selected:
Kjo̱a̱chaꞌándaseén 2: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
