Kjo̱a̱chaꞌándaseén 1
1
Kjo̱a̱xa̱ꞌya̱ ta̱ngatꞌanii̱ na̱xi̱ńdáꞌniú Jerusalee̱n
Nda̱ chji̱ni̱e̱ꞌe̱én Néná
1¡Je kisꞌijña soboá kui na̱xi̱ńdáꞌniú xí achichí ꞌniú kamáyàndikoón!
¡Kui na̱xi̱ńdá xi achichí je kamá ngi̱jii̱n ngayeje na̱xi̱ńdaá,
ngotꞌe̱ ꞌne̱, xikó maá ngo xota̱chjo̱on kꞌán xi je kꞌien xi̱ꞌii̱n je kamá!
¡Kui na̱xi̱ńdáꞌniú xí kamá na̱ ree̱ ngayeje na̱xi̱ńdáꞌniuú, ngotꞌe̱ ꞌne̱, je moso̱ xi kastiñá je kamá!
2Achichí ndasen kjandá nga jñoó,
kó ndándyíko̱n ngaskande tꞌanijon tsꞌénkꞌándyi̱.
Nde ngojín xi̱ńꞌniú xí kamámejeén ngasꞌe̱ xi mejeén tsꞌéndájoón ngotꞌe̱.
Ngayeje xota̱ amingoo̱ je ngiti̱ ꞌniátakónjín, kó je kondra̱ síndonii̱.
3Xota̱ na̱xi̱ńdá Jundáa̱ je tsangínjo̱ꞌniú,
kó tsie kjo̱a̱ni̱ma̱ ndyi̱foaꞌatio ko̱jo xá ꞌniú je ikꞌínieé.
Ngi̱jii̱n kje̱ꞌe xota̱ na̱xi̱ńdá síndojin, kó nde sakóndièjiín nga ka̱ma sa̱ꞌínkjaꞌyá.
Ngayeje xota̱ xi tsangatji̱ngii̱, je jachótji̱ngii̱ ki̱a̱ nínga xkjoó ndi̱ya̱à.
4Ndi̱yàtieé na̱xi̱ńdáꞌniú Sioo̱n jè ndyi̱a̱xa̱ꞌya̱,
ngatꞌa̱ nde ngiti̱ jmíjín xi fí nga ma sꞌué.
Jè ngiti̱ jmí xota̱ fochójín nínga tikón nga̱ntjo̱a̱a̱ na̱xi̱ńdáꞌniuú,
kó chináꞌmii̱ ata̱ ni̱ma̱ ndyi̱tsó nga ndyi̱kjandà,
jè síndo ndasen ínchjín xo̱ngo̱ò,
kó na̱xi̱ńdáꞌniuú jè xikoó tsi tikón xtinda.
5Kondraa̱ na̱xi̱ńdáꞌniú Sioo̱n jè kuí ndyi̱botixómá ngotꞌe̱ ꞌne̱, kó achichí tsjá maá,
ngatꞌa̱ Néná boá xi katsꞌéndasee̱n,
ta̱ngatꞌanii̱ nga achichí jé xí katsꞌén.
Kó ndí jákjíndií je tsangínjo̱ ꞌniú nga kiniꞌánkjítjoón xota̱ xi kondraa̱.
6Ngayeje kjo̱a̱tsjakjiꞌii̱ na̱xi̱ńdáꞌniú Sioo̱n je kichajá.
Xota̱ ngito̱ko̱o̱ tjimá ngotꞌe̱ xikó maá ndi̱kꞌijñá xí jmí ndi̱xcho̱ sakójiín.
Ngiti̱ jmí ngaꞌniújiín nga ndyi̱monga
xtji̱e̱e̱n kje̱n nínga tjimá xota̱ xi ndyi̱mongatji̱ngii̱.
7Na̱xi̱ńdáꞌniú Jerusalee̱n kjiꞌanga ndasen ko̱jo nga nda̱ kamaá,
jaꞌátsjiee̱n ngayeje ni tsjakon xi kisꞌiee̱ ndeskande ni̱xtjin xchá jàn.
Kó ngotꞌe̱ ꞌne̱ nga xota̱ na̱xi̱ńdaá je tsꞌáka ngi̱ya tsja kondraa̱, nde ngojín xi bosikójo.
Kó kondraa̱ nga be kui ni xi kjimaa̱ nga fetꞌani, mojnókie.
8Achichí ꞌniú jé xí katsꞌén na̱xi̱ńdáꞌniú Jerusalee̱n,
kuíni nga ngiti̱ tsjiejín je kamá.
Nga jè xikoó tsi kjiꞌixtí ngotꞌe̱ ꞌne̱, xota̱ xi kamábendikón ngasꞌe̱, je katsꞌénchꞌó,
ngatꞌa̱ je kamábe kjo̱a̱soboaá.
Ngaskande kui soboá maá, kó ngiti̱ tsja̱ajín kje̱n.
9Xtjímasienkjaá boá xi je ndándí,
kó katsꞌénkjójín ni xi ka̱maa̱ nga kju̱i̱e̱tꞌani.
Achichí fíndikónna nga ni̱ma̱kjo̱a̱ ikꞌíjñá,
kó nde jmíjín xi katsꞌéndajoo̱n.
Ngotꞌe̱ ꞌne̱, bi̱ tsó: Ji Ne, tsitsíjìi̱n kjo̱a̱ni̱ma̱na,
ngatꞌa̱ achichí ngaꞌniú kisꞌie ngasee̱ kondraa̱.
10Kondra̱a̱ je iskjíbé ngayeje kjo̱a̱cho̱o̱n,
na̱xi̱ńdáꞌniú Jerusalee̱n jè kamábe nga xota̱ na̱xi̱ńdá xi bejín Néná,
je tsꞌasꞌien ki̱a̱ ndiꞌandikoón Néná,
Ndatsi jí boá xi bo̱a̱ kase ji Ne, nga ka̱májín kꞌo̱sꞌien nínga matikó xota̱a̱.
11Ngayeje xota̱ na̱xi̱ńdaá achichí ni̱ma̱ ndyi̱tsó nga ndyi̱mongase nichinie.
Kó nichinie ndyi̱bosíkjoni ni xi ꞌniú chjí ngase xi tjiín, tsi̱ꞌe̱ nga kꞌuíndora ngase nga̱sondie.
¡Tsitsíjinní Ne, kó chꞌi̱e̱xki̱ ji kjo̱a̱ni̱ma̱ xi tsꞌénfoaꞌatio an!
Na̱xi̱ńdáꞌniú Jerusalee̱n
12Jún xi bitja ndojó ndojójnú kui ndi̱ya̱à, a ndasénjín májnú kui nii̱.
Tsitsíjenjnúu̱ tsi tjín xí bo̱a̱ kjiꞌi kjo̱a̱ni̱ma̱ ndyi̱foaꞌatio xikoó an nga,
kui kjo̱a̱ni̱ma̱a̱ xi kjindibániéna,
kui xi katsangiyana Néná kjiꞌanga katsꞌénxchán.
13Ndeskande nkꞌa jàn katsangiyana ngo ndiꞌí xí ngaskande ńdana jachótꞌaa̱.
Ngo chja̱ya̱ íjñá ndi̱yàna, kó kijíꞌoyá ngiñá an.
Jè íjñámasien kjin kjinna,
kó jmíni̱xtjin kjife kjo̱a̱ni̱ma̱ xi tsꞌénfoaꞌatio an.
14Kui yá xí fongi ngasen, Néná má xi xikoó tsi ki̱a̱ ítꞌa jé xí katsꞌen an,
kósꞌe̱ ki̱a̱ yíngí ngasen án, kó kui nii̱ xi je tjítsꞌénkjié ngaꞌniúna.
Néná jè katsꞌénkꞌasꞌienna ngi̱ya tsja kondra̱ xi ka̱májínna sa̱ꞌìi̱n.
15Néná kjin índona ngayeje xota̱ xi tjingáꞌniuú.
Kó íjñanda ni̱xtjin xi kuí má, tsi̱ꞌe̱ nga si̱ꞌankjie i̱xti xo̱ngò xi tjínna.
Jè katsꞌénkjítie kui tsa̱kjìn xo̱ngo̱ò nangi Jundáa̱,
xikó má tsꞌén niꞌánkjítie tostsi̱je̱è nga ꞌnaxié ndaá.
16Ta̱ngatꞌanii̱ kui nii̱ nga kjandà an,
kó ndyikón án, ndyikón an, kjifotjoo̱ ndándyíkon xikoó ndejèꞌ,
ngatꞌa̱ je katsꞌénkjinna yojoo̱
kui xi tsꞌéndájoón ko̱jo xi tsjangaꞌniuú ini̱ma̱na.
Ndína achichí ndyi̱kjandà, ngatꞌa̱ kondraa̱ je katsꞌénjne̱.
Nda̱ chji̱ni̱e̱ꞌe̱én Néná
17Na̱xi̱ńdáꞌniú Sioo̱n tsꞌénmején tsja ta̱nga nde ngojín xi tsꞌéndájoón.
Néná boá xi katsꞌén nga xota̱ tꞌa ndiꞌaa̱ Jakoo̱b, ti̱kuii xi kondra̱a̱ ka̱ma.
Na̱xi̱ńdáꞌniú Jerusalee̱n jè xikoó tsi ngo ni xi ndándí jè kamá.
Na̱xi̱ńdáꞌniú Jerusalee̱n
18Néná kixi̱ boá, án boá xi tsintꞌieꞌénjáa̱n eén.
¡Ndaꞌyájnúꞌun ngotꞌe̱ ꞌne̱ jún xota̱ na̱xi̱ńdá!
¡Tsitsíjenjnúu̱ kjo̱a̱ni̱ma̱ xi tsꞌénfoaꞌatio an!
Ínchjín ko̱jo i̱xti xo̱ngòna, kondraa̱ je kijíjo̱ꞌniú.
19Tsíchji̱a̱a̱ xi̱ńꞌniú xi kamámejeén an ngasꞌe̱ tsi̱ꞌe̱ nga ko̱síko̱jona katsaki,
ta̱nga ta̱ tsꞌenṉcha̱jo tsína.
Chináꞌmina ko̱jo xota̱ xi xchána je jesón ki̱a̱ na̱xi̱ńdáꞌniuú
nga ndyi̱mongase nichinie tsi̱ꞌe̱ nga kꞌuíndo ngase katsaki.
20¡Tsitsíjinní ji Ne, achichí ndasen kjimana!
¡Kó achichí ni xi kjimaa̱ yojona!
¡Jè ngiti̱ ndajín tikón ini̱ma̱na, xikoó tsi kjima tsobeé, ngatꞌa̱ tsintieꞌénjaán ji!
Jàn jàn ndi̱tsén jàn, ki̱cha̱ndojó kiniꞌánkjiesónni ndína,
kó kꞌi̱e̱ ngi̱yaa̱, kjo̱a̱bo̱yaa̱ je kui tsꞌénbotixómá.
21Xotaa̱ tsintꞌié nga ni̱ma̱ tꞌíxián an,
ta̱nga nde ngojín xi katsꞌéndajonna.
Ngayeje kondra̱na je be ni xi ndajín xi kjimana,
kó achichí tsjá maá ni xi kiniꞌínje̱ní jí.
¡Jè jachó ji ni̱xtjin xi je kase ji,
kó kuí bo̱a̱ ka̱maa̱ xikó kjimana an ngotꞌe̱!
22Ti̱ꞌin ji nga ngindyikin ji
kjo̱chó ngayeje ni xi ndajín xi ndyi̱tsꞌèn.
Kó bo̱a̱ ti̱ꞌinje̱ ji xikó kiniꞌínje̱ní án kjo̱a̱a̱ ngayeje jé xí katsꞌen an.
¡Achichí ni̱ma̱ tꞌíxián an, kó je mejeén kjiꞌme ini̱ma̱na!
Currently Selected:
Kjo̱a̱chaꞌándaseén 1: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
