Joo̱b 41
41
1A ka̱maári ko̱ndo̱bo̱e̱ ji cho̱ chꞌokjiꞌi lebiataa̱n
nga ta̱ ngo tsí tsitin kjuíi̱n,
axa̱ a ka̱maári tsi ngo ńꞌniú kuítꞌe ji na̱je̱n.
2A ka̱maári ko̱sii̱n ti̱xa̱ ńdatꞌanijon nga ko̱nángíi̱ ngo ki̱cha̱ntꞌi̱u̱a̱,
axa̱ a ka̱maári tsi ngo ńꞌniú kuítꞌe ji ńdatꞌanijon.
3¡A beriítakín ji nga kui cho̱o̱ ni̱ma̱ ka̱tso̱o̱,
axa̱ a beriítakín nga én ixi sa̱ꞌínkjién tsi̱ꞌe̱ nga kꞌuíjñindé.
4A sꞌijiínri nga ku̱i̱ꞌíndajoo̱,
tsi̱ꞌe̱ nga mosòo̱ ka̱ma ngayeje ni̱xtjin nga kꞌuijñá!
5A ka̱maári ko̱óńtenje̱ xikoó tsi ngo ni̱siee̱,
axa̱ a ka̱maári tsi ngo ńꞌniú kuítꞌe ji se, tsi̱ꞌe̱ nga sa̱ꞌíntsobejo̱ ndí ínchjíi̱n.
6A ka̱má nichinie si̱ꞌánjnú tsi̱ꞌe̱ nga xi̱ni̱e̱jójnú já amingo̱jnú.
A ka̱márií xota̱ xi tsꞌenkꞌién cho̱o̱ nga kui ko̱tiya, ko̱jo nga ki̱a̱ ko̱tíñá ndi̱tse̱e̱n yojoo̱.
7A ka̱maári kichiro̱ ku̱i̱chéje̱ni ji tji̱xi̱ín,
ko̱jo tsi ngo choso̱ ko̱na̱ngísꞌíi̱n to̱ko̱.
8Tsi mejeén nga ku̱i̱xkénje̱ ji,
jmíni̱xtjin xchi̱yaa̱ kui nii̱,
kó ngiti̱ ka̱mamejénjiín ku̱i̱xkénje̱ nginí ngijee̱.
9Nde jmí chjíjiín nga si̱ꞌinkjé jí nga si̱ꞌìi̱n,
¡ndeta̱ stsitsíjinríi̱, kó ko̱yayà má ji!
10Tsi jmíjín xi ka̱maa̱ nga sa̱ꞌiín kui nga ndyi̱a̱ ndyi̱ko̱n,
ja̱ ꞌyá xi ka̱maa̱ nga an sa̱ꞌínna.
11¡ꞌYá xí an tjón katsjána ngo ni, tsi̱ꞌe̱ nga an tsjaꞌoyá ngiñáa̱,
Án tsa̱ꞌa̱n ngayeje ni xi tjín ngindiee̱ nkꞌajmii̱!
12Xiójín kotíjña̱ an, chjiéngá xiyà an
kjo̱a̱a̱ xi kókón ni xi yaꞌanii̱ yojoo̱ kui cho̱o̱,
ko̱jo kjo̱a̱a̱ ngaꞌniú xí tjiín, ko̱jo kjo̱a̱a̱ nga ndikón tsꞌén fochó.
13ꞌYá xí ka̱maa̱ kjo̱a̱ꞌáxiín tji̱xi̱ín,
ꞌyá xí ka̱maa̱ nga ku̱i̱ꞌíjñaá ngo ki̱cha̱ xi chjenꞌniúnií tsꞌoa.
14ꞌYá xí ka̱maa̱ skjíxkjá ńdatꞌanijon
xi yajá ndi̱yà ndi̱yà ńꞌni̱u̱ nga mindyiandíkón máná.
15Tji̱xin xi kjijon yojoo̱ xikó maá
ni xi ꞌbíchjaá ni xi ndajín,
achichí ꞌniú síndotꞌaꞌniuú xkjín,
16ti̱ ki̱a̱ ti̱ maa̱ síndotꞌaa̱ xkjín,
nga ngaskande tjo̱o̱ foaꞌandyiójín
17tjíkjojo̱ má xkjín
nga ngaskande nde jmíjín xi ka̱maa̱ kꞌo̱xiékjo.
18Kjiꞌanga tsꞌéntjiesén, ꞌboxié má ndiꞌí,
kó ndyi̱ko̱n bo̱a̱ má kón xikoó ndiꞌií nga ndibáꞌásie̱én,
19ndiꞌí fotjoni tsꞌoa,
ndiꞌí xi ngaskande kjí má nga kjínkꞌá,
20ṉdi̱ fotjoni ṉtjo̱n,
¡xikó maá ngo ti̱ji̱í xí tjixó xi tjíjin ngi̱jin ndiꞌií!
21Nga botsié nda̱a̱ ꞌbítí má ndiꞌií,
ngatꞌa̱ ndiꞌí ꞌboxiéni tsꞌoa.
22Achichí ngaꞌniú xí tjiín kjásén,
kó nga ta̱ tsitsíjenrií ndakon má má,
23nínga inda ngasee̱ yojoo̱
nde ngo ni ꞌbosꞌiénjiín,
ꞌniú síndo, kó nde tsꞌéntíyàjín,
24ini̱ma̱a̱ tikón chikín chikín xikoó ngo ndi̱jo̱,
tikón tajá tajá xikoó ngo ndi̱jo̱o̱ molino̱.
25Kjiꞌanga ꞌbítsanie yojoo̱ kui cho̱o̱,
ngaskande xota̱ xi chꞌokon tsoó yojoo̱
fotsié má, kó monga.
26Tsi tjín xí kjo̱chótji̱ngii̱,
nde ka̱májiín tsi ngo ki̱cha̱ sa̱ꞌínꞌónnii̱,
kó ni xi ꞌbíchjánii̱ yáyojoó, ko̱jo yáyojoó nde ko̱síko̱jojín.
27Ngatꞌa̱ tsꞌénxi̱ ki̱cha̱a̱ xikoó ngo xtjié,
kó tsꞌénxi̱ ki̱cha̱ bronsee̱ xikoó ngo yá xí kjifondo,
28ꞌbosꞌiénjiín yáyojoó, kó ndi̱jo̱ndayojoo̱
ta̱ xikónií tsi xtjié maá,
29ngayeje ni xi niꞌánkjién nga má kjo̱a̱xcha̱án,
ta̱ xikónií tsi xka̱ kixí maá,
kó ta̱ mojnókie tsí nga fonie yáyojoó.
30Ni̱se̱e̱n ja̱kon tji̱bo̱a̱tsjie má kón ni xi tjiín,
kó kjiꞌanga ꞌbifé yojoo̱ ngi̱jin ndásee̱ mején má ndi̱yà,
31ngaskande tsꞌenxò má ndáfoaa̱ ndáchíkoón kjiꞌanga ꞌbojmijin yojoo̱,
kó ndáfoaa̱ xikó maá ngo ramita̱ ndásíje̱n maa̱ kui,
32ndi̱yà xí ꞌna̱ má mején nínga foaꞌa nga fí,
xikó maá ngo ndiꞌí tiboa ki̱a̱ nga̱són ndáfoaa̱.
33Jmíjín kui nga̱sondiee̱ ngo xi xikoó kuí,
kuí boá xi ngo cho̱ chꞌokjiꞌi xi ta̱nisién ndakon.
34Chꞌórií xota̱ xi nkꞌakoo̱n,
kó kui boá xi ree̱ ngayeje xi nkꞌakoo̱n.
Currently Selected:
Joo̱b 41: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
