Joo̱b 24
24
1Kó nga Néná jè be ni̱xtjin nga ka̱majeé xotaa̱,
míkjo̱a̱a̱ nga xota̱ xi tsó nga be Néná kosónjiín ni xi tsꞌén,
2kui xotaa̱ bendikónjín tsindioó tꞌanangii̱,
kó cho̱yojo ndyi̱tsꞌènchéjé, tsi̱ꞌe̱ nga tsie ngase ni kꞌuieé,
3foaꞌáxiín bórroó xota̱ xi xꞌi̱a̱a̱n,
kó kjíbé cho̱yojo xi̱ꞌin xi ꞌbijñángíni nga míyá ni
ínchjín kꞌán xi je kꞌien xi̱ꞌii̱n.
4ꞌBoxiéni ndi̱yà xí tjimá xota̱ ni̱ma̱a̱,
kó tsꞌeén kjo̱a̱ꞌniú tsi̱ꞌe̱ nga ꞌbíndoꞌmá.
5Kui xotaa̱ ja̱kon bórró xí kji̱e̱ machji̱ni̱e̱jín
ki̱a̱ nangi kixií má kón,
mongase nichinie, kó ki̱a̱ nangi kixií sakoó ni xi skji̱ni̱e̱ ndií.
6Kui xotaa̱, ki̱a̱ fí tꞌanangi xi kuijín tsi̱ꞌe̱,
kó ki̱a̱ ꞌbitíkó tostsi̱je̱è, ko̱jo ńtiín to ndso̱ko̱a̱n ṉño̱pan,
7kó xota̱ xi chiboa ńjño tjiín, foaꞌáxiín ńjñoo̱,
tsi̱ꞌe̱ nga ꞌbíndo kjiꞌixtí nga fofé,
kó jmíjiín kótsꞌèn sa̱ꞌínꞌasoo̱ yojoo̱,
8kó stsé xí boaꞌa ki̱a̱ na̱xi̱i̱ ꞌbondyi̱ni,
kósꞌe̱ ngi̱ndyió ndi̱jo̱ yiꞌii̱ ꞌbíndotji̱nkꞌi̱èn.
9Foaꞌáxiín ndíndaa̱ ínchjín kꞌán xi je kꞌien xi̱ꞌii̱n,
kó ndí xi̱xi̱i̱ xota̱ ni̱ma̱a̱ foaꞌáxiín nga tsꞌénkíyaà ni,
10xota̱ xi ni̱ma̱a̱ foaꞌáxiín ńjñoo̱, kó tsꞌénkꞌítso̱ma kjiꞌixtí,
tsꞌénkꞌánijín kjo̱a̱ꞌniú to ndso̱ko̱a̱n ṉño̱paa̱n, ndatsi bojoó xotaa̱.
11ꞌBo toꞌaseituna̱ tsi̱ꞌe̱ nga ꞌboxieé isti̱,
tsꞌéntsꞌingí tostsi̱je̱è tsi̱ꞌe̱ nga tsꞌénda bino̱,
ta̱nga ndatsi xíndaá boeꞌéndièjiín nga ꞌbi ndáfoa.
12Achichí kjo̱a̱ni̱ma̱ ndyi̱foaꞌatio, kó nga je mejeén kjifesón,
kjandayà ndeskande ki̱a̱ na̱xi̱ńdáꞌniuú,
nga míꞌaá Néná nga ko̱síko̱jo,
¡ta̱nga Néná nde tsꞌensénjiín nga chji̱a̱a̱!
13Kuí boá kui xotaa̱ xi kamáchꞌoó nínga tsijee̱n,
kó jmíni̱xtjin kamábe ndi̱ya̱à Néná,
ti̱nde ki̱a̱jín kisꞌiṉtso̱ma.
14Ta̱niꞌin si̱sién, kó kui xota̱ xi ꞌniú ndajiín,
jè ndyi̱fotaxie nga ndyi̱tsꞌènkꞌién xota̱ xi ni̱ma̱a̱ ko̱jo xota̱ xi ni chjieén,
kó ngije ma jñoó xota̱chejé má.
15Xota̱ xi tsꞌéntꞌaa̱kjo̱a̱ chjo̱ón
koyaa̱ nga je kjimajñoó,
ngatꞌa̱ tsꞌénkjó nga kjiꞌá boá nga jñoó
nga jmíjín xi sku̱i̱e̱ nga kje̱ꞌe chjo̱on kjiꞌijñajo̱.
16Xota̱ xi chejeé nga jñoó boá nga tsꞌénchéjé ndiꞌaa̱ xotaa̱,
kó nga ni̱xtjii̱n ꞌbíndoꞌyá,
mejénjiín sa̱ꞌínjo̱ꞌo ndiꞌií.
17Kui xota̱ xi ꞌniú ndajiín, nga ta̱jño̱ó xikónií tsi tji̱nkꞌi̱e̱én kjo̱a̱bo̱yaa̱ kjimaa̱,
ngatꞌa̱ jè kamángaá ni xi ndajín xi ma nga jñoó.
Sofaa̱r ta̱niján má katsꞌénxixió nga tsꞌénchji̱a̱ Joo̱b
18Xota̱ xi ꞌniú ndajiín, monga xikoó ndáfoaa̱,
kó kꞌijñaá jè ndajín kamá,
kó nde ingojín xi tsꞌénxájin nínga kjiꞌii̱ tostsi̱je̱è.
19Xikótsꞌèn nga cho̱ndoboaá ko̱jo sibeé tsꞌénńdá nchꞌaàn,
ti̱ bo̱a̱ ti̱ tsꞌén nga̱tsjo̱ó tsꞌénchájá xota̱ jeé.
20Ngaskande ti̱kuii na̱aa̱n sa̱ꞌínchíyá,
kó chi̱ndoo̱ achichí tsjá ka̱maa̱ nga skji̱ni̱e̱.
Nde ngojín xota̱ xi sa̱ꞌínkjaꞌátsjien ngase,
kó bo̱a̱ má ka̱maa̱ xikoó ngo yá xí je ikichá.
21Xota̱ xi ꞌniú ndajiín, ndajín katsꞌénjo̱
ínchjín kꞌán xi je kꞌien xi̱ꞌii̱n,
ko̱jo ínchjín xí ndi̱i̱.
22Ta̱nga kjiꞌanga Néná xí tsja̱á kon,
ngaꞌniuú sa̱ꞌínkjiéni nga sa̱ꞌínkjítie,
ngatꞌa̱ kjiꞌanga Néná xí je tsꞌén ngo ni,
nde ngojín xi ka̱maa̱ nga ꞌniú kꞌuijñá ngase.
23Ngotꞌe̱ ꞌne̱, tsjandieè nga ꞌniú síndo,
ta̱nga ngatsjéni̱xtjin nga ki̱a̱ tsꞌénkotsijee̱n.
24Xota̱ xi yandikón kiniꞌán ngotjón,
ta̱nga sꞌe̱ si̱ꞌanchajà,
kó si̱ꞌankjie xikoó xi ngasee̱.
Kó ku̱i̱chá xikó maá ńtiín to ndso̱ko̱a̱n ṉño̱paa̱n.
25Kó tsi bo̱a̱jín kjiꞌi, ꞌyá xí ka̱maa̱ nga ko̱kó
nga bo̱a̱jín kjiꞌi ni xi je kixian an,
ko̱jo tsi ko̱kó nga kamátsobéjinna.
Currently Selected:
Joo̱b 24: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
