Oseaa̱ 4
4
Jé xí katsꞌén xota̱ Israee̱l
1¡Jún xota̱ Israee̱l, ndaꞌyájnú eén Néná! Xí bi̱ tsoó:
Ngatꞌa̱ Néná tjítsꞌénxchánjo̱ xota̱a̱ kui na̱xi̱ńdaá,
ngatꞌa̱ jmíjiín kjo̱a̱ꞌniátakón ko̱jo kjo̱a̱ni̱ma̱takón,
ti̱nde bejín Néná.
2Kó ta̱sá ni xi bo̱a̱jín kjiꞌi, ko̱jo éndísó ndyi̱tsꞌentsójó,
kó ndyi̱tsꞌènkꞌién xkjín, ko̱jo ndyi̱tsꞌènchéjé,
kó ti̱ ki̱a̱ ti̱ maa̱ satíkjo jiín xota̱ xi tsꞌénkjiesoón.
3Kuíni nga sꞌi̱jña xa̱ꞌya̱ni tꞌanangii̱,
kó ngayeje xota̱ xi ki̱a̱ síndoo̱ kju̱i̱e̱sónyà,
ko̱jo cho̱ tamá xí tjín ngi̱jin kꞌijñaá, ko̱jo ni̱sie xi tjín nkꞌa jàn.
Kó ngaskande tji̱o̱ xi tjín ndáchíkoón kju̱i̱e̱són nga.
4Ta̱nga nga ngojín xi ngatamaxtii̱, ko̱jo tsi sa̱ꞌínxchánjo̱ xota̱ na̱xi̱ńdaá,
kjiꞌanga sa̱ꞌinxchánjo̱ chináꞌmii̱.
5Ngatꞌa̱ ni̱xtjin ni̱xtjin nga sti̱ngí ji chináꞌmi,
kó nijan sti̱ngí ji nda̱chji̱ni̱e̱ꞌe̱én nga jñoó nga.
6Ngatꞌa̱ xota̱ na̱xi̱ńdána je kiniꞌánkjié,
kjo̱a̱a̱ nga jmí kjo̱a̱kjíntakón kisꞌiejiín.
Kó ta̱ngatꞌanii̱ nga kiniꞌínchꞌí ji kjo̱a̱kjíntakoón,
nga Án boá xi kjoaꞌaxiín xá chináꞌmíi̱,
ko̱jo kjo̱a̱a̱ nga kiniꞌínchíyé ji kjo̱a̱kitii̱ Nèe̱,
ti̱ bo̱a̱ ti̱ tsꞌén sa̱ꞌinchíyá An ndíi̱ nga.
7Kui xi xikótsꞌèn nga kjimakjín ngase,
ti̱ bo̱a̱ ti̱ tsꞌén ꞌniú ngase ndyi̱tsꞌénjé kondra̱na,
kuíni nga kosikjo kjo̱a̱jee̱, kó kjo̱a̱soboá sa̱ꞌin An.
8Jé xí tsꞌén xota̱ na̱xi̱ńdána boá xi nichiniejnú,
kuíni nga tsja májnú nga ni xi ꞌniú ndajiín tsꞌén.
9Ta̱nga ni xi ka̱maa̱ xota̱ na̱xi̱ńdána,
ti̱ bo̱a̱ ti̱ ka̱maa̱ chináꞌmii̱ nga,
kó sa̱ꞌinjée̱ kjo̱a̱a̱ ndi̱yà xí ndajín xi tjimá, ko̱jo ni xi katsꞌén,
kó An tsjáa̱ chjií kjo̱a̱a̱ ni xi ndajín xi katsꞌén.
10Skji̱ni̱e̱ nichinie, kó stsi̱e̱jiín,
sa̱ꞌínmasien yojoo̱, ta̱nga jmí xota̱ tji̱e̱ kꞌuiéjiín, ngatꞌa̱ íjñámasien Néná,
11tsi̱ꞌe̱ nga ki̱a̱ katsꞌénseén kjo̱a̱masiee̱n, ko̱jo binoo̱,
ko̱jo kui xán xí tsꞌénchájá to̱ko̱.
12Xota̱ na̱xi̱ńdána kotꞌasón yojoo̱ nga bosíyaá ngo a̱si̱én xí chikín kamándani,
kó kui yaá chji̱a̱jo, ngatꞌa̱ ngo a̱siénni̱xtjin xi masien je katsꞌéntsobéjii̱n,
kó íjñámasien Nee̱, ta̱ngatꞌanii̱ nga katsꞌénmasien yojoo̱.
13Ki̱a̱ nga̱soón na̱xi̱i̱ ndyi̱tsꞌènkꞌásꞌién kjo̱a̱tjó,
kó ki̱a̱ tji̱ngi̱i̱ ndyi̱ꞌbítí nisije̱n,
ki̱a̱ ngindiee̱ yáꞌensinoo̱, ko̱jo yáꞌálamoo̱,
ko̱jo yáꞌáxka̱a̱, ngatꞌa̱ achichí nda tji̱nkꞌi̱én xí tjiín,
kuíni nga ndí ínchjínjnú sa̱ꞌínmasien yojoo̱ nga,
ko̱jo kja̱ndajnú sa̱ꞌíntꞌaa̱kjo̱a̱ xi̱ꞌii̱n.
14Kó Án sa̱ꞌinjéjáa̱n ndí ínchjínjnú kjiꞌanga sa̱ꞌínmasien yojoo̱,
ti̱nde kotijéjáa̱n kja̱ndajnú kjiꞌanga sa̱ꞌíntꞌaa̱kjo̱a̱ xi̱ꞌii̱n,
ngatꞌa̱ xi xi̱ꞌii̱n boá xi fíkoón ínchjínmasién,
kó nijan ndyi̱tsꞌènkꞌásꞌién kjo̱a̱tjó
ko̱jo kui ínchjínmasién xi síndo ki̱a̱ na̱ngo̱xi̱i̱.
Kuíni nga xota̱ na̱xi̱ńdaá chajani,
ngatꞌa̱ jmíjiín kjo̱a̱kjíntakón.
15Tsi xota̱ na̱xi̱ńdá Israee̱l sa̱ꞌínmasien yojoo̱,
ngata̱ xota̱ tji̱e̱e̱ Jundáa̱jín xi ꞌbíchjí kuí nii̱.
Ngata̱ bitjasꞌi̱e̱njínjnú ki̱a̱ Ngilngaa̱l,
ti̱nde nga mongín nijíngíjínjnú ki̱a̱ Bee̱t-Abee̱n,
ti̱nde nga boeꞌéjínjnú ndso̱ꞌbájnú nga: ¡Tsie ngatamaa̱ Néná! Tsí kꞌuínjnú.
16Tsi xota̱ Israee̱l katsꞌénkitikjo̱a̱ yojoo̱
xikoó ngo cho̱yojo xi kji̱e̱ machji̱ni̱e̱jín,
a Néná boá xi skoón xikoó ngo cho̱tsa̱nga̱ xi tsoꞌbá ngi̱jin kꞌijñaá.
17Xota̱ tji̱e̱e̱ Efraii̱n, jè ni xi nénájín je katsꞌénkꞌasꞌiee̱n yojoo̱.
¡Xióchíi̱n, bo̱a̱ ngatsꞌénrá ngase!
18Kjo̱a̱chꞌi̱i̱ jè kamá, kó to̱kó ndyi̱tsꞌèn masiénra ngase yojoo̱,
kó xota̱ xi botixómaá, achichí tsjá maá ni xi tsjáná kjo̱a̱soboá,
19ngo tjo̱ꞌniú skjíbéní nga̱a̱ nga kjo̱jo,
kó sa̱ko̱ó kjo̱a̱soboá ta̱ngatꞌanii̱ kjo̱a̱tjó xi katsꞌénkꞌasꞌien.
Currently Selected:
Oseaa̱ 4: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
