Xota̱ Ebreoo̱ 7

Bi̱ tsꞌén tjibóko xaá chináꞌmi Melkisendee̱k

1Melkisendee̱k, nda̱ ree̱ nangi Salee̱n, ko̱jo chináꞌmii̱ kui Néná xi tikón ndiꞌakꞌajmi jàn, kuí boá xi kijíkjaꞌáyíndi̱yà Abraa̱n, ngije kjindibáni ngi̱jii̱n kjo̱a̱xchán nínga ja̱bo̱a̱ je katsꞌeén já ree̱, kó Melkisendee̱k, tsíꞌá tsi̱ꞌe̱ nga Néná sa̱ꞌínchikonñé, 2kó Abraa̱n katsꞌénkꞌasꞌiee̱n kui nda̱ ree̱, tie nga úchán ngayeje ni xi kasakoo̱ xi katsꞌén kui kjo̱a̱xcha̱án. Jaꞌeén Melkisendee̱k, “nda̱ Re xi kixi̱” tsó, ko̱jo Ree̱ nangi Salee̱n, kó kui jaꞌeén “Re xi tjiín kjo̱a̱xió” tsó. 3Melkisendee̱k, kisꞌiejiín na̱ꞌmi ko̱jo na̱an ko̱jo xota̱ xi xchá, ti̱nde katsenjín, ti̱nde kꞌienjín, yàjín ñá kjindibáni, kó xá chináꞌmii̱ tikón ngatsjéni̱xtjin, xikoó kui xi tsi̱ꞌe̱ ndií Néná.

4Tsitsíjenjnúu̱ kókjiꞌi nkꞌa kamá xaá Melkisendee̱k, nga ti̱kuii xota̱ tji̱e̱ xcháná xi ꞌmí Abraa̱n, katsjaá tie nga úchán ni xi katsꞌeén já ree̱ ngi̱jii̱n kjo̱a̱xcha̱án. 5Kó ja̱koxi̱ boá nga bi̱ tsó kjo̱a̱kitii̱, nga chináꞌmi xi xota̱ tji̱e̱e̱ nda̱ xi ꞌmí Lebii̱, tjiín ngo kjo̱a̱ꞌniú nga skjíbé tie nga úchaán ngayeje ni xi tsꞌén xota̱ na̱xi̱ńdaá, ndatsi xkjín má, ngatꞌa̱ ti̱ xota̱ tji̱e̱e̱ Abraa̱n chji̱a̱ni. 6Ta̱nga Abraa̱n, tie nga úchaán ni xi katsꞌén, katsꞌénkꞌasꞌiee̱n Melkisendee̱k, ndatsi kui nda̱a̱ xota̱ tji̱e̱e̱ Lebii̱jín chji̱a̱ni, kó Melkisendee̱k tsíchji̱a̱a̱ Néná, tsi̱ꞌe̱ nga katsꞌénchikonñé kui xi ja̱bo̱a̱ je kasakoo̱ ni xi katsóyàtjón Néná nga tsja̱á. 7Kó je yá cha̱n cha̱n ñá, nga nkꞌa ngase xaá xi chji̱a̱a̱ Néná, tsi̱ꞌe̱ nga Néná sa̱ꞌínchikonñé ngo xi ngindie ngase xaá. 8Chináꞌmi xi chji̱a̱ni xota̱ tji̱e̱e̱ Lebii̱ xi ngotꞌe̱ niꞌánkꞌasꞌiee̱n tie nga úchaán ni xi niꞌaán, xota̱ xi fesón boá, ta̱nga Melkisendee̱k, ta̱kó tikón, ngatꞌa̱ xo̱jo̱n eén Néná chji̱a̱jín tsi kꞌien kui nda̱a̱. 9Kó ngaskande ka̱ma bi̱ kꞌuin, nga kui chináꞌmi xi chji̱a̱ni xota̱ tji̱e̱e̱ Lebii̱, ti̱ je katsꞌénkꞌasꞌiee̱n Melkisendee̱k tie nga úchaán nii̱ nga, ngatꞌa̱ Abraa̱n boá xi katsꞌénkꞌasꞌien kui nii̱ ngajoo̱ xota̱ tji̱e̱e̱, 10ngatꞌa̱ kjiꞌanga Melkisendee̱k kijíkjaꞌáyíndi̱yà Abraa̱n, Abraa̱n ja̱bo̱a̱ jè yaꞌa ngi̱jin yojoo̱ kui xi xota̱ tji̱e̱e̱ ka̱ma, xi kji̱e̱ tsenjín kui ni̱xtjin jàn.

Bi̱ tsꞌén tjibóko ánní nga ngo chináꞌmi xi tja̱tsi̱e̱ kamáchjién

11Néná katsjaá kjo̱a̱kitii̱ xota̱ na̱xi̱ńdá Israee̱l. Kui kjo̱a̱kitii̱ kamánda ta̱ngatꞌanii̱ nga kui chináꞌmi xi chji̱a̱ni Lebii̱ ko̱síko̱jo, tsi̱ꞌe̱ nga kui xotaa̱, kixi̱ kꞌuíndo ngindyi̱ko̱n Néná. Ta̱nga nga kui chináꞌmii̱ kamájiín katsꞌén kui xaá, kuíni nga jatjokjà ngo chináꞌmi xi kje̱ꞌe: Ngo xi jmí tsi chináꞌmi xi chji̱a̱ni Aaroo̱n, ta̱sá ngo xi xikoó Melkisendee̱k. 12Ngatꞌa̱ kjiꞌanga sa̱síkjo xá chináꞌmii̱, kjo̱a̱ꞌniútjínnií nga ti̱ sa̱síkjo kjo̱a̱kitii̱ nga. 13Ngatꞌa̱ kui chináꞌmi xi kje̱ꞌeé, kui xi tjindókjo̱a̱a̱, kuí boá xi Kjisoo̱, kó kje̱ꞌe xota̱ tji̱e̱e̱ xota̱ Israee̱l chji̱a̱ni, nínga kji̱e̱ ngo chináꞌmi fotjojin. 14Ngatꞌa̱ je ya cha̱n cha̱n nga Ndi̱a̱ná Jesukristoo̱, ki̱a̱ kjindibáni xota̱ tji̱e̱e̱ Jundáa̱, kó Moisee̱ jmí ni katsójín nga kui xota̱ tji̱e̱e̱ ki̱a̱ kjo̱tjojinni chináꞌmi.

15Kó ꞌniú ngase nda ka̱makjínná ni xi ndyi̱ndokjo̱a̱ kꞌi̱e̱e̱, ngatꞌa̱ kui chináꞌmi tja̱tsi̱e̱ xi jeꞌee̱, bo̱a̱ kjíꞌí xaá xikoó xá chináꞌmii̱ Melkisendee̱k. 16Kui xi jmí tsi katseꞌeé kui xá chináꞌmii̱, ta̱ngatꞌanii̱ ngo kjo̱a̱botíxoma xi tsóyà ñá xota̱ tji̱e̱ ndibání já chináꞌmii̱, ta̱sá katseꞌéxaá ngatꞌa̱ tjiín ngaꞌniú nga kꞌuijñá ngatsjéni̱xtjin, májín ꞌme. 17Ngatꞌa̱ jè bi̱ tsꞌén kjitꞌa nínga ndokjo̱a̱ kjo̱a̱a̱ kui:

Jí xí chináꞌmi Ji ngatsjéni̱xtjin,

bo̱a̱ kjiꞌi xáa̱ xikoó xá xí tsi̱ꞌe̱ chináꞌmi Melkisendee̱k.

18Ja̱ bo̱a̱ tsꞌén nga kui kjo̱a̱kiti xchaá, jè ngiti̱ jmí ni chjíjiín, ngatꞌa̱ kisꞌiejiín ngaꞌniú ko̱jo asíko̱jojínná, 19ngatꞌa̱ kjo̱a̱kitii̱ kamájiín katsꞌén xotaa̱ xi chjiéngá ka̱ma, ta̱nga ngotꞌe̱ ꞌne̱, tikónná ngo kjo̱a̱chiyá xi nda ngase, kuí kjo̱a̱a̱ nga ndyi̱niꞌántiñáa̱ yojoná Néná.

20Kjiꞌanga kamá kui nii̱, Néná katsjá tsꞌoa nga bo̱a̱ ka̱ma. 21Ta̱nga nga katsjáxaá chináꞌmi xi chji̱a̱ni xota̱ tji̱e̱e̱ Lebii̱, bo̱a̱jín katsꞌén. Kó kjo̱a̱a̱ kui chináꞌmi xi̱ꞌbi̱, Néná xí katsjá tsꞌoa nga kui xi ka̱ma chináꞌmi, kó bi̱ tsꞌén tjítꞌa xo̱jo̱n eén Néná:

Néná katsjá tsꞌoa nga bo̱a̱ ka̱ma,

kó ko̱síkjojín ni xi je bi̱ katsó:

Jí xí chináꞌmi Ji ngatsjéni̱xtjin,

bo̱a̱ kjiꞌi xáa̱ xikoó xá xi tsi̱ꞌe̱ chináꞌmi Melkisendee̱k.

22Kuíni nga Kjisoo̱ boá xi bokóná, nga Néná katsꞌén ngo kjo̱a̱ꞌbínda tja̱tsi̱e̱ xi nda ngase. 23Kó chináꞌmi xi ngasee̱ kjín kamá, ngatꞌa̱ kjo̱a̱bo̱yaa̱ katsjandièjiín nga ta̱kó sa̱ꞌínra kui xaá, 24ta̱nga kꞌienjín Kjisoo̱, ngatꞌa̱ ngatsjéni̱xtjin nga tikón xá chináꞌmii̱, kó jmí tsi kje̱ꞌe xí sa̱ko̱ó. 25Kó kuíni nga Kristoo̱ maa̱ ꞌboxiéꞌá ngatsjéni̱xtjin ngayeje xota̱ xi ngatꞌaa̱ kui nga tsꞌéntíñaa̱ yojoo̱ Néná, ngatꞌa̱ ngatsjéni̱xtjin tikón, tsi̱ꞌe̱ nga ku̱i̱ꞌatjé nga ku̱i̱chji̱a̱a̱ Néná kjo̱a̱a̱ kui xotaa̱.

26Kjisoo̱, kuí boá kui chináꞌmi xi ꞌniú nkꞌa xaá xi machjiénná ñá: Kuí xí tsjie, kuí xí jmíjiín ni xi ndajín, kuí xí jmíjiín ni xi ndándí, kuí xí xín tikónnii̱ xota̱jeé, kuí xí ꞌniú niꞌándikón ki̱a̱ ndiꞌakꞌajmii̱, 27kuí xí chjiénjiín nga sa̱ꞌínkꞌasꞌien kjo̱a̱tjó ndyiojón ndyiojón, xikoó chináꞌmi xi ꞌniú nkꞌa xaá xi chjiéngá tjón mára sa̱ꞌínkꞌasꞌien ngo kjo̱a̱tjó kjo̱a̱a̱ jeé, sꞌe̱ jaskan kjo̱a̱a̱ jeé xota̱ na̱xi̱ńdaá. Ngatꞌa̱ Kjisoo̱ ta̱ ngo tsí ndi̱yà ko̱jo ngatsjéni̱xtjin nga katsꞌénkꞌasꞌien yojoo̱. 28Kjo̱a̱kitii̱ katsjáxaá chináꞌmi xi ꞌniú nkꞌa xaá, xi niꞌin kamaá nga katsꞌénkjatjosón ni xi katsꞌénkjó Néná. Jaskan ngije katseꞌé kjo̱a̱kitii̱, Néná katsjá tsꞌoa nga tsja̱á ngo chináꞌmi xi ꞌniú nkꞌa xaá, kó kuí boá xi ndií, kui xi ngatsjéni̱xtjin kamá xi chjiéngá ka̱ma.

Currently Selected:

Xota̱ Ebreoo̱ 7: MAIX

Highlight

Compare

Copy