Xota̱ Ebreoo̱ 6

1Kó kuíni nga ta̱kó kongínra xtji̱e̱e̱n kje̱n, ngaskande nga ka̱maxchá, kó ngiti̱ kuijín ni xi tjón akakoyána kjo̱a̱a̱ Kristoo̱, xi ko̱ndókjo̱a̱ nginí ñá, xikoó nga chjiéngá si̱ꞌankꞌoyá yojoná, ko̱jo nga kꞌuijñámasien ni xi niꞌán xi fíjo̱ná kjo̱a̱bo̱yaa̱, ko̱jo nga chjiéngá si̱ꞌansꞌijin Néná, 2ko̱jo kjo̱a̱a̱ kjo̱a̱bokoyá xi chji̱a̱ni nga botíndaá, ko̱jo kjo̱a̱a̱ nga ꞌbíjñasoón ndsa̱ xota̱ xi sꞌijii̱n Néná, ko̱jo kjo̱a̱a̱ kjo̱a̱foaꞌáꞌyaá xota̱ xi je jesoón, ko̱jo kjo̱a̱a̱ kjo̱a̱botíjé xí jmíni̱xtjin kju̱i̱e̱e̱. 3Kó kuí nii̱ xi si̱ꞌán tsi ta̱ꞌa Néná xí ja̱koxi̱ nga tsja̱aná ngi̱ndie.

4Xota̱ xi je kiniꞌántsijee̱n, ko̱jo xi je askotꞌa kjo̱a̱ndaa̱ Néná, ko̱jo xi je katseꞌeé A̱si̱énni̱xtjii̱n Néná, 5ko̱jo xi je askotꞌa én ndaa̱ Néná, ko̱jo xi je askotꞌa ngaꞌniuú Néná xi xcha̱ ni̱xtjin xi jaskan ndibaá, 6tsi kui xota̱ xi je kasakoo̱ kui nii̱, kó tsi ku̱i̱ꞌíjñámasien ni xi tsi̱ꞌe̱ Néná, ngiti̱ ka̱májín nga ingo ndi̱yà ka̱matja̱tsi̱e̱ya nginí, tsi̱ꞌe̱ nga sa̱ꞌínkꞌoyà yojoo̱, ngatꞌa̱ kui xotaa̱, kuí boá xi ndyi̱bótꞌa nginí kro ndií Néná, kó ndyi̱tsjà ngindie nga ngayeje xotaa̱ ko̱jno̱kie.

7Xota̱ xi tjimátji̱ngi ni xi tsi̱ꞌe̱ Néná, bo̱a̱ maá xikoó tꞌanangi xi ꞌbi ndáfoaa̱ stsé xí achichí kjín ndi̱yà bixónieé, kó nda xka̱, ko̱jo nda cha̱n sakoó xi tsꞌénxájin kui tꞌanangii̱, kó Néná tsꞌénchíkonñé. 8Ta̱nga xota̱ xi íjñámasien ni xi tsi̱ꞌe̱ Néná, bo̱a̱ maá xikoó tꞌanangi xi tsjá ndaꞌyá, ko̱jo yá xí ꞌbeé ndaꞌyá, kuí boá xi jmí ni chjíjiín, kó ndajín ka̱ma ngindyi̱ko̱n Néná, sꞌe̱ nga fetꞌa ꞌbítí.

9Ta̱nga kjo̱a̱a̱ jún ndí ntsꞌie xi tjóna, ndatsi kui nii̱ ꞌmíjne̱, jè yàjne̱ nga ta̱kó sꞌijinjnuú, kó nga ta̱kó maꞌniátakónjnú Néná. Kuí ni xi xi̱ꞌba̱ xi nda ngase kjiꞌi, ngatꞌa̱ bo̱a̱ tsꞌén nga kjo̱tjoꞌajnú. 10Ngatꞌa̱ kixi̱ tsꞌénjo̱ná Néná, kó jmíni̱xtjin xchi̱yaa̱ ni xi ndyi̱niꞌánjnú xikótsꞌèn tjójnú Néná, nga ndyi̱bosíko̱jojnú xota̱ na̱xi̱ńdá tsjiee̱, ko̱jo nga ta̱kó bo̱a̱ ndyi̱niꞌánjnú. 11Ta̱nga mejénjne̱ nga ngo nga ngojnú ta̱kó takorajnú kui ngaꞌniú xí ndyi̱niꞌánjnú ngaskande nga kju̱i̱e̱tꞌaa̱, tsi̱ꞌe̱ nga kui kjo̱a̱chiyaá ka̱mando̱jo, 12tsi̱ꞌe̱ nga tsiꞌéjín ka̱majnú, ta̱sá mejénjne̱ nga kongintjingíjnú, kui chi̱bo̱a̱a̱ xota̱ xi ta̱ngatꞌanii̱ kjo̱a̱sꞌijii̱n, ko̱jo kjo̱a̱tsiekoo̱n nga tjisákoó kui ni xi katsóyàtjón nga tsja̱aná Néná.

Bi̱ tsꞌén tjibóko nga Néná tsꞌénkjátjosón ni xi tsó

13Ngatꞌa̱ kjiꞌanga Néná katsóyàtjoón Abraa̱n ni xi tsja̱á, ti̱kuíní Néná xí katsjá tsꞌoa nga bo̱a̱ sa̱ꞌin an katsó, ngatꞌa̱ jmíjín ingo xi nkꞌa ngase xaá, 14kó bi̱ katsó: “Ja̱koxi̱ boá nga An xi tsie kjo̱a̱niꞌánchikonñé tsjaa, kó Án xí sa̱ꞌin An nga kjín ka̱ma xota̱ tji̱e̱e̱.” 15Kó Abraa̱n achichí kamátsiekon nga askoyá, kó kasakoo̱ ni xi katsóyàtjoón Néná nga tsja̱á. 16Ngatꞌa̱ xotaa̱ kjiꞌanga tsjá tsꞌoa nga ngiboanéná tsó, Jaꞌeén Néná tsꞌénkjién ngatꞌa̱ Néná boá xi botixómaá, kó kjiꞌanga bo̱a̱ tsó, jmíjín ingo ni xi xchi̱boátí ngase. 17Kó kuíni nga Néná kamámejeén nga akó cha̱n cha̱a̱n xota̱ xi sa̱ko̱ó kui ni katsóyàtjón nga tsja̱a, kó kuíni nga katsjá tsꞌoa nga tsja̱a ni xi katsóyàtjón nga tsja̱a. 18Kó Néná ndisojín, ngatꞌa̱ jó ni ni nga sasíkjojín kjo̱a̱a̱ ni xi katsóyàtjón nga tsja̱a, ko̱jo nga katsjá tsꞌoa. Kó bo̱a̱ tsꞌén kꞌuiéná ngo ngaꞌniú xi ꞌniú, ngatꞌa̱ ñá mejénná nga Néná skónná, kó ꞌniátakón ñá nga ndyi̱chiyá nga kui xi tsja̱aná ni xi katsóyàtjónná. 19Nga ndyi̱chiyá ni xi tsjáná Néná, ꞌniú tikón ini̱ma̱na nga ꞌniátakón kui xi tsꞌasꞌien ngi̱ndie ndikoón Néná xi tikón ndiꞌakꞌajmi jàn. 20Kjisoo̱ xí tjón tsꞌasꞌien kui ngi̱ndiee̱, nganda tsa̱ñá nga iskjíxꞌáná ndi̱yà, nga ka̱ma kjóchochóo̱n Néná, ngatꞌa̱ Kristoo̱ Kuí boá xi ngo chináꞌmi xi ꞌniú nkꞌa xaá ngatsjéni̱xtjin, xikoó xá chináꞌmi xi tsi̱ꞌe̱ Melkisendee̱k.

Currently Selected:

Xota̱ Ebreoo̱ 6: MAIX

Highlight

Compare

Copy