Xota̱ Ebreoo̱ 13

Bi̱ tsꞌén tjibóko xikótsꞌèn chjiéngá ku̱i̱ndyión

1Ngatsjéni̱xtjin tjó ti̱ꞌánjnú xingi̱jnú, xikoó tsi ngo ntsꞌiejnú. 2Ngata̱ niꞌánchíyájínjnú, nga nda si̱ꞌanjo̱jnú ngayeje xota̱ xi kjo̱chó ndiꞌajnú, ngatꞌa̱ ta̱ngatꞌanii̱ kui nii̱ nga tjín xi nde bejín nga ndítsjie boá xi katsꞌéntiee̱ ndiꞌaa̱.

3Ngatjaꞌátsjienjnú nga ko̱si̱ko̱jójnú xota̱ xi síndoyá ndo̱bo̱a̱ya̱à, xikó maá tsi jún nijan tindyionjo̱jnú ndo̱bo̱a̱yà, ko̱jo ti̱ ngatjaꞌátsjienjnú nga ko̱si̱ko̱jójnú xota̱ xi ndajín tjíniꞌánjo̱o̱ nga, xikó maá tsi jún xi bo̱a̱ kjimataꞌinjnú.

4Ngayeje jún, cha̱ndikónjnú kjo̱a̱bixaa̱n, kó cha̱ndikónjnú xi̱ꞌinjnú ko̱jo tsi chjo̱ónjnú, ngatꞌa̱ xota̱ xi tondoo̱, ko̱jo kui xi ndyi̱tsꞌèntꞌaa̱kjo̱a̱ xkjín, Néná boá xi ko̱tíjeé.

5Ngata̱ niꞌántjójínjnú to̱o̱n, tsjangatamajnú xikó kjiꞌi ni xi tjínjnú ngotꞌe̱, ngatꞌa̱ Néná, jè bi̱ katsó: “Jmí ni̱xtjin kꞌuijñá so̱bo̱a̱a̱, ti̱nde jmíni̱xtjin kꞌuijñámasiee̱n”. 6Kó ngaskande maꞌniátakón ñá nga ka̱ma bi̱ kꞌuín:

Ndi̱a̱ná boá xi bosikójona, kó stsakjonjín an,

ni xi ka̱maa̱ sa̱ꞌínjo̱na xota̱ nga̱sondiee̱.

7Ngatjaꞌátsjienjnú xota̱ xi síndotjónjnú, kui xi katsóyàjnú eén Néná, ti̱ꞌankjínjnúu̱ takónjnú kótsꞌèn kisꞌińdo, kó chja̱ꞌángíjnúu̱ kjo̱a̱sꞌijin xi kisꞌiee̱.

8Jesukristoo̱, ti̱kuíní bo̱a̱ ngasꞌe̱, ko̱jo ngotꞌe̱ ꞌne̱, ko̱jo ta̱ kjiꞌání. 9Ngata̱ ki̱a̱jín mongíntjíngíjnúu̱ ngo kjo̱a̱bokoyá xi kje̱ꞌe tsó, ko̱jo xi yàjín, ngatꞌa̱ ta̱sá nda ngase nga ini̱ma̱ná sa̱kó ngaꞌniuú ngi̱yaa̱ kjo̱a̱ndaa̱ Néná, ta̱bo̱a̱jiín tsi ki̱a̱ kongíntji̱ngí kjo̱a̱botíxomaa̱ nichinie xi jmíni̱xtjin asíko̱jo xota̱ xi ki̱a̱ kijítji̱ngii̱.

10Ngindyi̱ko̱n Néná tikónná ngo ṉchan nínga niꞌánkꞌasꞌien kjo̱a̱tjó, kó ya nga chináꞌmi xi tsꞌén xaá ndiꞌańjñoo̱, jmíjiín kjo̱a̱nda nga ka̱ma skji̱ni̱e̱ kjo̱a̱tjó xi niꞌánkꞌasꞌien ṉchanná. 11Ngatꞌa̱ chináꞌmi xi ꞌniú nkꞌa xaá ki̱a̱ ndiꞌańjño xi tikón kui nga̱sondiee̱, fíjo̱ ngi̱ya xi ta̱nisién tsjiee̱ jiín cho̱ xi kiniꞌánkꞌién, tsi̱ꞌe̱ nga machjítjé jeé, ta̱nga yojoo̱ kui cho̱o̱, ndi̱tsee̱n ṉdi̱a̱a̱ ꞌbítí, 12kó kuíni nga Kjisoo̱ ndi̱tsee̱n ṉdi̱a̱a̱ jaꞌatio kjo̱a̱ni̱ma̱ nga kiniꞌánkꞌién. Ki̱a̱ katsꞌénkꞌasꞌien jín tsi̱ꞌe̱ nga katsꞌéntsjie xota̱ na̱xi̱ńdaá. 13Tjianchóo̱n Kjisoo̱ tsobo̱a̱, ki̱a̱ ndi̱tsee̱n kui ṉdi̱a̱a̱, kó nijan ku̱i̱tja̱tió kuí kjo̱a̱soboá xi jaꞌatio kui. 14Ngatꞌa̱ kui nga̱sondiee̱, jmíjínná ngo na̱xi̱ńdáꞌniú xi kꞌuijñá ngatsjéni̱xtjin, ta̱sá ndyi̱mindyisé ngo na̱xi̱ńdáꞌniú xi jaskan sꞌi̱jña. 15Kuíni nga ngatsjéni̱xtjin si̱ꞌantsjàa̱ Jesukristoo̱, ngatꞌa̱ ja̱ Néná boá xi ndyi̱niꞌántsjáa̱ nga bo̱a̱ ndyi̱niꞌán, kuí nii̱ xi kjo̱a̱tjóná, ni xi ku̱i̱chji̱a̱ ndso̱ꞌbá nga ka̱tso̱yà nga Kjisoo̱ xi ndií Néná. 16Kó ngata̱ niꞌánchíyájínjnú jún, nga ni xi nda si̱ꞌánjnú, ko̱jo nga ja̱kꞌi̱e̱ ja̱ngaján ko̱si̱ko̱jójnú xingi̱jnú, ngatꞌa̱ ko̱jo kuí kjo̱a̱tjó xi̱ꞌbi̱ xi tsja maa̱ Néná nga.

17Ndaꞌyáꞌénjnúu̱ xota̱ xi síndotjónjnú, kó cha̱ndikónjnú kui, ngatꞌa̱ kuí boá xi ndyi̱kondajnú jún, nga be nga sa̱ꞌínkꞌasꞌiee̱n xki̱ Néná. Bo̱a̱ ti̱ꞌánjnú tsi̱ꞌe̱ nga tsja kꞌuieé nga sa̱ꞌín xaá, kó nga éjín ka̱maa̱, ngatꞌa̱ ko̱jo nganda tsa̱jún boá tsi éjín ka̱maa̱ xaá.

18Ndókjo̱a̱jnúu̱ Néná kjo̱a̱a̱ ji̱n, ngatꞌa̱ ꞌniátakónjne̱ nga nda tsꞌén tikón kjo̱a̱kjíntakónjne̱ kjo̱a̱a̱ xá xí ndyi̱niꞌánjne̱, kó mejénjne̱ nga ta̱kó nda tsꞌén si̱ꞌanjne̱ ngayeje nii̱. 19Kó án, ngo kjo̱a̱nda míꞌájnúꞌun, ndókjo̱a̱jnúu̱ Néná, tsi̱ꞌe̱ nga tsja̱ana ngi̱ndie nga tsá kjuínkón nginíjnúꞌun.

Bi̱ tsꞌén kiniꞌánkjietꞌa xo̱jo̱n xi kanangiyaa̱ xota̱ ebreoo̱

20Néná xí tsjáná kjo̱a̱xioó, kui xi katsꞌénkjaꞌáꞌyaá Ndi̱a̱ná Jesukristoo̱, kui nda̱ xi ta̱nisién nkꞌa xaá xi tikóntjoón cho̱tsa̱nga̱a̱, kui xi ta̱ngatꞌanii̱ jiín, nga Néná katsꞌénjo̱ná ngo kjo̱a̱ꞌbínda tja̱tsi̱e̱ xi tikón ngatsjéni̱xtjii̱n, 21míꞌáa̱ kui Néná xí tsjáná kjo̱a̱xioó, nga kui xi sa̱ꞌín nga xota̱ xi nda ka̱majnú, ko̱jo nga si̱ꞌánjnú ni xi mejeén kui nga ka̱ma, kó nga ngatꞌaa̱ Jesukristoo̱ nga ko̱síko̱jójnú nga ni xi tsja maa̱ ngindyi̱ko̱n kui xi si̱ꞌánjnú. ¡Ngatꞌieé kjo̱a̱je Jesukristoo̱ ngatsjéni̱xtjin! Bo̱a̱ kjiꞌi.

22Jún ntsꞌie, tsiejín má ni xi katsꞌenꞌindójnúꞌun, kó ꞌniú míꞌájnúꞌun, tsi̱ꞌe̱ nga nda si̱ꞌansenjnúu̱ kui nii̱. 23Mejénna nga xcha̱jnú nga nda̱ ntsꞌié xi ꞌmí Timoo̱ jè tikóndé, kó tsi ta̱ꞌa nga tsá kjo̱e̱ꞌe, kjuínjo̱ an kjiꞌanga kjuínkátsijenjnúꞌun.

24Tinde bo̱a̱ tꞌínjnú ngayeje xota̱ xi síndotjónjnú, ko̱jo ngayeje xota̱ tsjiee̱ Néná. Xota̱ xi chji̱a̱ni nangi Italia̱ tinde xò bo̱a̱ tsó.

25Néná ngatsjájnú kjo̱a̱ndaa̱ ngayejejnú. Bo̱a̱ kjiꞌi.

Currently Selected:

Xota̱ Ebreoo̱ 13: MAIX

Highlight

Compare

Copy