Xota̱ Ebreoo̱ 12

Bi̱ tsꞌén tjibóko nga Néná tsꞌénchjíni̱e̱ xota̱ xi tjoó

1Achichí má xota̱ xi síndo nga ngo foaꞌatjiyajonná, xí chistiko̱ nga bokóná xikótsꞌèn kisꞌijii̱n Néná, kuíni nga ñá, xín kꞌuijñá ni xi tsꞌenníꞌínná ko̱jo kui jé xí mejeén kꞌo̱jmingíná, kó si̱ꞌanngaꞌniú nga kjuínrá nínga ndyi̱mongín. 2Ta̱ ngo tsí Kjisoo̱ xi si̱ꞌansée̱n, kui xi ítsꞌi̱yanii̱ nga kisꞌijña, ko̱jo nga kamá xi chjiéngá nga ka̱ma kjo̱a̱sꞌijii̱n, ko̱jo jaꞌatio kjo̱a̱ni̱ma̱ tꞌa kroo̱, kó ndasénjín kamaá kjo̱a̱soboaá nga bo̱a̱ tsꞌén kꞌien, ta̱ngatꞌanii̱ nga askoyá, nga sa̱ko̱ó kjo̱a̱tsjaa̱. Kó ngotꞌe̱ ꞌne̱, ki̱a̱ tikón nga fojnií Néná xí botixómaá.

3Tsitsíjen chi̱bo̱a̱yajnúu̱ Kjisoo̱, kui xi achichí kjo̱a̱ni̱ma̱ jaꞌatio nga xota̱jeé kondra̱ kisꞌińdoo̱ kui, tsi̱ꞌe̱ nga jún ꞌniú ku̱i̱ndyiajnú, kó ngata̱ niꞌánkjiejínjnúkjo̱a̱. 4Jún ndyi̱bixkánjo̱jnú jeé, ta̱nga kji̱e̱ ngo xi sakoó kjo̱a̱bo̱yaa̱ nga bo̱a̱ tjítsꞌén. 5Kó jè kiniꞌánchíyájnú kui kjo̱a̱botíxoma xi Néná tsjaá ndí xí tsi̱ꞌe̱, kui xi bi̱ tsoó:

Ji ndí tsa̱ꞌa̱n, ngata̱ tonjín yetakín kjo̱a̱chji̱ni̱e̱e̱ Ndi̱a̱ná,

ti̱nde ngata̱ ꞌmeyajín ji, kjiꞌanga ꞌniú ku̱i̱chji̱a̱joo Kui.

6Ngatꞌa̱ Ndi̱a̱ná tsꞌénchjíni̱e̱ boá xota̱ xi tjoó Kui,

kó moꞌon ngayeje xi ndií tsꞌén.

7Tsi si̱ꞌanchíkjo̱a̱jnú kui kjo̱a̱niꞌánchji̱ni̱e̱e̱, Néná xikónií ngo ndí xí tsi̱ꞌe̱ tjítsꞌénjo̱jnú, ngatꞌa̱ ꞌyá na̱ꞌmii̱ bo̱a̱ xi sa̱ꞌínchji̱ni̱e̱jín ndií. 8Ta̱nga tsi Néná tsja̱ajínjnú kjo̱a̱chji̱ni̱e̱, xikó tsꞌén tsꞌénchjíni̱e̱ ngayeje xi ndií, ja̱ ndí xi ta̱xkiyajnú boá jún, kó jmí tsi ja̱koxi̱ nga ndií Ndi̱a̱ná jún tsobo̱a̱. 9Kui nga̱sondiee̱ kjiꞌanga jákjíndí kamá ñá, xi xcháná boá xi katsꞌénchji̱ni̱e̱ná, kó kamáyàndikón kuí. Kó kótsꞌèn nga ndajín ngase ko̱nda̱ꞌyáꞌée̱n kui Na̱ꞌminá xi tsi̱ꞌe̱ a̱si̱énni̱xtjii̱n, tsi̱ꞌe̱ nga tsja̱aná kjo̱a̱mindyion. 10Xi xcháná, ta̱ ngotjón tsí nga katsꞌénchji̱ni̱e̱ná xikótsꞌèn kamákjiín kui, ta̱nga Néná tsꞌénchji̱ni̱e̱ná kjo̱a̱nda tsa̱ñá, tsi̱ꞌe̱ nga xota̱ tsjie kamá ñá xikoó Kui. 11Ja̱koxi̱ boá nga nde ngojín kjo̱a̱chji̱ni̱e̱ xi boeꞌéná xi tsja máná, ta̱sá on tsꞌénná, ta̱nga tsi ko̱nda̱ꞌyáꞌén nga si̱ꞌankjatjosón, jaskan kji̱ndi̱bájo̱ná kjo̱a̱kixi̱ ko̱jo kjo̱a̱xió.

Bi̱ tsꞌén tjibóko nga ka̱májín si̱ꞌanchꞌo kjo̱a̱ndaa̱ Néná

12Ja̱ bo̱a̱ tsꞌén te̱ꞌéngaꞌniújnúu̱ ndsa̱jnú xi je jendaa̱, ko̱jo tikójnú xi je ngiti̱ jmí ngaꞌniújiín, 13kó ti̱ndyi̱séjnúu̱ ndsa̱kojnú ndi̱yà xi kixi̱, tsi̱ꞌe̱ nga ka̱mandaya ndsa̱ko xi fí katsꞌoo̱, kó jmí tsi ꞌniú ngase ka̱maꞌoo̱n.

14Ti̱ndyi̱séjnú nga kꞌuiéjnú kjo̱a̱xió ngayejejnú, kó tsjietsꞌén ti̱ndyiónjnú ngindyi̱ko̱n Néná. Ngatꞌa̱ xi tsjiejín síndo ngindyi̱ko̱n Néná, sku̱i̱e̱jín Ndi̱a̱ná. 15Chindajnú nga ngojín xi sa̱ꞌínchꞌó kjo̱a̱ndaa̱ Néná, nga tsi ngo xi ndajín tjíjin ini̱ma̱a̱ tsja̱á kjo̱a̱xti, kuí nii̱ xi sa̱ꞌínniꞌii̱n xotaa̱, kó ka̱ma tsie kui ni xi ndajiín, 16ko̱jo tsi kꞌuié ngo xota̱ xi tondo̱ ka̱ma, ko̱jo tsi ngo xi sku̱i̱e̱ndikónjín nii̱ Néná xikó katsꞌén Esauu̱, kui xi ta̱ngatꞌanii̱ ngo chií ti̱bo̱a̱ nichinie xi atíñáni kjo̱a̱nda xi katsoboaá, nga kui xi ndí xi tjón kamá katsaki. 17Ngatꞌa̱ jún jè yàjnú nga jaskan Esauu̱, kjiꞌanga kamámejeén kasakoo̱ kjo̱a̱niꞌánchikonñeé na̱ꞌmii̱, kiniꞌánchꞌó, kó ndatsi achichí askjandá nga katsꞌénkꞌoyá yojoo̱, ngiti̱ jmí nijín xi kamá kiniꞌán ngase kjo̱a̱a̱ ni xi je kamaá.

18Jún, jmí tsi bo̱a̱ kamátaꞌinjnú xikoó xota̱ Israee̱l, kui xi kijíkóntiñaa̱ ngo tji̱ngi̱ kꞌi̱e̱ kui nga̱sondiee̱, kui xi kití xo xoo̱, ti̱nde jmí tsi je tsangínchon tiñajnúu̱ ni̱xtji̱e̱e̱n, ko̱jo jñoó, ko̱jo tjo̱ꞌniuú, 19ti̱nde kandaꞌyájínjnúu̱ nda̱a̱ tjioo̱, ti̱nde kandaꞌyájínjnúu̱ nda̱a̱ Néná nga katsjá kjo̱a̱botíxomaa̱, ngatꞌa̱ xota̱ xi tsintꞌieé kui nda̱a̱ ki̱a̱ kꞌijñá Sinaii̱, tsíꞌá tsi̱ꞌe̱ nga ngiti̱ tsíchji̱a̱jojín ngase kui, 20ngatꞌa̱ kichikjo̱a̱jiín ni xi akatíxomaa̱ nga bi̱ kiꞌmií: “Ngaskande tsi ngo cho̱ sa̱ꞌínjo̱ kui tji̱ngi̱i̱, chjiéngá ndi̱jo̱ si̱ꞌankꞌienni”. 21Kó achichí ndikón kjiꞌi ni xi kamáyaà, nga ngaskande ti̱kuii Moisee̱, bi̱ katsó: “Kjifotsiéndíkón má an.”

22Ta̱nga jún, ta̱sá ki̱a̱ tsangínchon tiñajnú nínga tikón tji̱ngi̱ Sioo̱n, kui xi na̱xi̱ńdaá Néná xí tikoón, kui xi na̱xi̱ńdáꞌniú Jerusale̱n xi tikón ndiꞌakꞌajmi jàn, nínga kamátikó kjín mi̱ ndítsjie xi ndyi̱tsꞌéndíkón Néná. 23Ki̱a̱ jáchójnú nínga kamátikó xota̱ xi tjón kamá ndií Néná, kui xi je kjitꞌa jaꞌeén ki̱a̱ ndiꞌakꞌajmii̱. Tsangínchon tiñajnúu̱ kui Ne xi tsóyà tsi nda ko̱jo tsi ndajín tsꞌén ngayeje xotaa̱, ki̱a̱ nínga síndo a̱si̱énni̱xtjii̱n xota̱ xi ndaa̱, kui xi Néná katsꞌén xi chjiéngá ka̱ma. 24Tsangínchon tiñajnúu̱ Kjisoo̱, kui xi ngatꞌaa̱ kui, nga Néná índa ngo kjo̱a̱ꞌbínda tja̱tsi̱e̱ kjo̱a̱a̱ kui jín xí iskjitjón nga kꞌien, kui xi chjí ngasenii̱ ngatꞌa̱ bokóná ni xi nda ngase, ta̱bo̱a̱jiín jiín Abee̱.

25Chónjnú yojojnú, kó ngata̱ niꞌánchꞌójínjnú kui Néná xi tsꞌénchji̱a̱a̱, ngatꞌa̱ ni̱xtjin xchá jàn, xota̱ Israee̱l katsꞌénchꞌó Néná xí kꞌi̱e̱ tꞌanangii̱ ꞌniú atíxomaa̱ nga tsíchji̱a̱jo, kó kui xotaa̱ kamájiín jatjongii̱ yojoo̱, tsi̱ꞌe̱ nga sa̱kójiín kjo̱a̱botíjeé. Akja̱ꞌmíra̱ ñá ka̱máná ko̱ꞌna̱xiéngí yojoná, tsi̱ꞌe̱ nga sa̱kójínná kjo̱a̱botíjeé tsi si̱ꞌanchꞌo kui Néná xi tsꞌénbotixómá nga tsꞌénchji̱a̱joná ndeskande ndiꞌakꞌajmii̱. 26Kui ni̱xtjin jàn kjiꞌanga tsíchji̱a̱, nda̱a̱ katsꞌénkjatsié má tꞌanangii̱, ta̱nga bi̱ katsó nga katsóyàtjón ni xi sa̱ꞌín ngotꞌe̱: “Ingo ndi̱yà ngase nga sa̱ꞌinkjatsié Án, kó jmí tsi ta̱ tꞌanangii̱ tsí, ko̱jo ngaskande ndiꞌakꞌajmii̱ boá nga.” 27Kó nga bi̱ katsó: “Ingo ndi̱yà ngase”, makjínná nga kjo̱a̱ꞌáxín ngayeje ni xi katsꞌénda xi maa̱ matíyaá, tsi̱ꞌe̱ nga ku̱i̱ꞌíjñá ngayeje ni xi májín matíyaá. 28Kó kuíni nga, ngije Néná katsjáná ngo ngi̱ndie xi botíxoma xi májiín matíyaá, ko̱e̱ꞌée̱ ndokꞌóchjì kjo̱a̱a̱ kui nii̱, kó bo̱a̱ tsꞌén si̱ꞌansée̱n, nga tsjangatamaa̱ kui nga ꞌniú ndikóntsꞌèn si̱ꞌantsjàa̱, 29ngatꞌa̱ Néná xí tsa̱ñá xikónií ngo ndiꞌí xi tsꞌenkjié ta̱jmì niní.

Currently Selected:

Xota̱ Ebreoo̱ 12: MAIX

Highlight

Compare

Copy