Jenesii̱ 38

Bi̱ kamaá Jundáa̱ ko̱jo na̱ Tamaa̱r

1Kui ni̱xtjin jàn Jundáa̱ jatjoxíntꞌaa nínga síndo já ntsꞌi̱e̱, kó ki̱a̱ kijí nangi Andulaa̱n nínga tikón ngo nda̱ xi nda yaꞌa xi Iraa̱ kiꞌmí kó ki̱a̱ kisꞌijña. 2Kó ki̱a̱ Jundáa̱ kamábe tsa̱kji̱ín ngo nda̱ Kanaa̱n xi Súa̱ kiꞌmí, kó ixánjo̱ kui naa̱. Ngije jaꞌa ni̱xtjin, 3kui naa̱ tsaꞌa ngo ndí, kó katsen kui ndií. Kó Jundáa̱, Ee̱r ítꞌajaꞌén.

4-5Ngi̱chí sájín, chjo̱ón Jundáa̱ ngi jó ndí kisꞌiee̱, kó ngo xi Onaa̱n ítꞌajaꞌén, kó xi ingoo̱ Selaa̱ ítꞌajaꞌén, kui ndí xí jetꞌaa̱ nangi Kesii̱b katsen.

6Jaskan Jundáa̱ tsangii̱ chjo̱on ndí tjoón kui xi ꞌmí Ee̱r, kó ngo na̱ xi ꞌmí Tamaa̱r katsꞌénkixanjo̱. 7Ta̱nga Néná tsjajín kamaá ni xi katsꞌén Ee̱r, kó Néná ngiti̱ katsjandièjiín nga kisꞌijña ngase nga̱sondie.

8Kósꞌe̱ Jundáa̱ bi̱ katsoó Onaa̱n: Tsjajnije̱ ji chjo̱ón ntsꞌie, kó ti̱xenje̱, ti̱ꞌinkjatjosén ji ni xi tsoboaá nga chja̱ ji, ki̱a̱ ka̱maa̱ nga ngatꞌaa̱ ji nga kꞌuieé xota̱ tji̱e̱ ntsꞌie ji.

9Kó nga kamábe Onaa̱n nga kuijín tsi̱ꞌe̱ ka̱ma ndí xí kꞌuieé xo̱ngo̱ò, kjiꞌanga kisꞌiejo̱ kui xota̱chjo̱on, katsjandièjiín yojoo̱ nga ndí ko̱a̱ꞌa̱ kui naa̱, ngatꞌa̱ kamámejénjiín nga ngatꞌaa̱ kui nga kꞌuieé xota̱ tji̱e̱ ntsꞌi̱e̱ xi kꞌiee̱n. 10Kó tsjajín kamaá Néná ni xi katsꞌén kui nda̱a̱, kó ngiti̱ katsjandièjiín nga kisꞌijña ngase nga̱sondie.

11Kósꞌe̱ Jundáa̱, tsíchji̱a̱jo kja̱ndaa̱ nga bo̱a̱ katsoó nga kꞌuijñákꞌánra, kó nga ndiꞌaa̱ na̱ꞌmíi̱ kꞌuijñára ngaskande nga ka̱maxchá ndií Jundáa̱ xi ꞌmí Selaa̱. Bo̱a̱ kjiꞌi ni xi katsoó, ngatꞌa̱ katsꞌénkjó nga tsi ta̱ bo̱a̱ tsꞌén ko̱yà ndií xi̱ꞌba̱ nga, xikótsꞌèn jesón xi ngasee̱. Kó kuíni nga na̱ Tamaa̱r kijí ndiꞌaa̱ na̱ꞌmii̱, kó ki̱a̱ kisꞌijña.

12Ngije jaꞌa ni̱xtjin ti̱chaa̱n kꞌien chjo̱ón Jundáa̱. Kó Jundáa̱ ngije kisꞌijñaxa̱ꞌya̱a̱ chjo̱ón, kijí nangi Timnaa̱t nínga síndo já xí botie tsja̱a̱ cho̱tsa̱nga̱ xi tsi̱ꞌe̱, kó kijíjo̱ Iraa̱, nda̱ Andulaa̱n xi nda tsaꞌa.

13Kó tjín xí kijítsóyaà na̱ Tamaa̱r nga chiꞌyaá nangi Timnaa̱t tsꞌénfí nga tsa̱nga̱a̱ cho̱tsa̱nga̱a̱ tsꞌénfíkjaꞌá. 14Kósꞌe̱ jaꞌáxín ńjño xa̱ꞌya̱ xi yajá, kó ngo ńjñoxo̱ꞌba̱ íꞌmá kje̱n tsi̱ꞌe̱ nga jmíjín xi sku̱i̱e̱ ꞌyá kuí bo̱a̱, kósꞌe̱ ki̱a̱ kisꞌijña nga̱ntjo̱a̱a̱ na̱xi̱ńdá Enaii̱n, ki̱a̱ tꞌa ndi̱yà xi fí nangi Timnaa̱t, ngatꞌa̱ kamákjiín nga Selaa̱ je kamáxchá ta̱nga kiniꞌánkixanjo̱jín kuí.

15-16Nga kamábe Jundáa̱ kui naa̱, kamákjínjiín tsi kja̱ndaa̱ xi̱ꞌba̱, katsꞌénkjó nga na̱masien boá, kó kijíkóntiñaa̱, kó bi̱ katsoó:

—Ji, a ka̱ma kjojñajo̱ chií.

Kósꞌe̱ kui naa̱ bi̱ katsó:

—Tsi jo̱o̱n xiaán, mí ni xi ko̱e̱ꞌéní tsi̱ꞌe̱ nga tsjandiè an nga tsjajníje̱ní.

17—Ngo ndií ndí tindso̱ xi síndona sangiyaa —katsó kui nda̱a̱.

—Ka̱ma —katsó kui naa̱—, ta̱nga ngo ni xi tse̱ tꞌíjñingíní tsi̱ꞌe̱ nga skuie an nga kꞌuíchjíní.

18—Kó, mí ni xi mejeén kꞌuijñaá —katsó Jundáa̱.

—Mejénna kꞌuijñíní seyoo̱ ko̱jo ńchjón xí tjítꞌa, ko̱jo yánísié xi titsjayindse̱ —katsó kui naa̱.

Kó Jundáa̱ jo̱ꞌo katsó ni xi kiꞌmií, kósꞌe̱ kisꞌiejo̱ kui naa̱, kó kui naa̱ tsaꞌa ndí. 19Jaskan ngije kijí Jundáa̱ jastjíe̱n na̱ Tamaa̱r kósꞌe̱ kijí, kó jaꞌáxín ńjñoxo̱ꞌba̱ xi kjiꞌma kje̱n kó tsajá nginí ńjño xa̱ꞌya̱a̱.

20Ngi̱chí sájín Jundáa̱ katsangiyajo̱ kui ndí tindsoo̱ kui nda̱ xi ꞌmí Iraa̱, nda̱ xi nda tsaꞌa, tsi̱ꞌe̱ nga sa̱ꞌínkꞌasꞌiee̱n kui naa̱ ni xi íjñangi, ta̱nga kui nda̱a̱ ngiti̱ kasakojiín kui naa̱ nínga kisꞌijñamára. 21Kósꞌe̱ asíyaá já xí chji̱a̱ni kui ngi̱ndiee̱ nga bi̱ katsoó:

—Ñá tikón kui na̱masien xi ꞌbíjñá tꞌa ndi̱ya̱à nangi Enaii̱n.

Kó bi̱ katsó kui jaá:

—Kji̱e̱ ngojín na̱masien xi ꞌbé kꞌi̱e̱e̱.

22Kósꞌe̱ kui nda̱a̱ kijí nginí nínga tikón Jundáa̱, kó bi̱ katsoó:

—Kasakojínna kui naa̱, kó já xí chji̱a̱ni ki̱a̱a̱ katsóyàna nga ngojín xò ínchjínmasién kui ngi̱ndiee̱.

23Kó Jundáa̱ bi̱ katsó:

—¡Ja̱ nga kjíbé ngayeje kui nii̱! Ta̱nga nga jmíjín xi bo̱a̱ ka̱tso̱ nga tsꞌenkjátjosónjín an ni xi chjiá an. Jè katsangiyaa ji nga kꞌuínje̱ ji kui ndí tindsoo̱, ta̱nga ngiti̱ kasakojiín kui naa̱.

24Ngije jaꞌa mara̱ ján sá, tjín xí bi̱ katsoó Jundáa̱:

—Na̱ Tamaa̱r tjínrá xi kisꞌiejo̱ ngatꞌa̱ ndí jè yaꞌa.

Kó Jundáa̱ bi̱ katsó:

—¡ꞌNa̱xiéjnú kui ngi̱ndiee̱ kó tꞌítí tikónjnú!

25Ta̱nga ngije tjíꞌnaxié kui naa̱, ngo én katsangiyaa̱ chiꞌyaá nga bi̱ katsoó: Kui xota̱ xi tsi̱ꞌe̱ kui nii̱, kuí boá xi tsi̱ꞌe̱ ndí xí yaꞌa an. Kó bi̱ katsó ngase: Nda tsitsíjìi̱n ꞌyá xí tsi̱ꞌe̱ kui seyoo̱ ko̱jo kui ńchjón xí tjítꞌa ko̱jo kui yánísieé.

26Ngije kamábe Jundáa̱ nga kui tsi̱ꞌe̱ ngayeje kuí nii̱, bi̱ katsó:

—Án boá xi konna kjo̱a̱a̱ kui ni xi kamaá, jmí tsi na̱ Tamaa̱r, ngatꞌa̱ án boá xi katsjandièjín an nga ndína Selaa̱ kisꞌijñajo̱.

Kó Jundáa̱ nginijánjín kisꞌiejo̱ ngase kui naa̱.

27Jaskan ngije jaꞌa ni̱xtjin katsen ndií na̱ Tamaa̱r, kó ndí ꞌni̱o̱ kisꞌiee̱. 28Nga tjítsen ndií, ngo xi tjón tsꞌaxié tsja, kó kui xota̱chjo̱on xí tsꞌénꞌboje̱n ndií ngo ńchjón iní ítꞌa tsja kui ndí xí tjón tsꞌaxié tsjaa, kó bi̱ katsó: Kuí bí xi̱ꞌbi̱ xi tjón katsen. 29Ta̱nga kui ndií, ti̱ katsangisꞌien nginí tsja, kó xi ingoo̱ boá xi tjón katsen, kósꞌe̱ kui xota̱chjo̱on xí tsꞌénꞌboje̱n ndií bi̱ katsó: ¡Ndi̱yà xí kachjéxꞌé jí! Kó Faree̱ ikítꞌa jaꞌén. 30Jaskan katsen ndí xí ingoo̱ kuí xi ikítꞌa ńchjón iní tsjaa, kó Seraa̱ ikítꞌa jaꞌén.

Currently Selected:

Jenesii̱ 38: MAIX

Highlight

Copy