Jenesii̱ 37

Bi̱ tsꞌén kjindibáni Kosiee̱

1-2Kuí bí xi̱ꞌbi̱ ni xi kamaá Jakoo̱b nga kisꞌijña ki̱a̱ nangi Kanaa̱n, nínga kisꞌijña na̱ꞌmii̱ ngasꞌe̱ xikoó ngo xota̱ xi xín nangi.

Bi̱ tsꞌén tseꞌéchi̱nii̱ Kosiee̱

Kjiꞌanga kisꞌiee̱ tjiꞌún jó nó Kosiee̱ asíko̱jo já ntsꞌi̱e̱ nga askoo̱n cho̱tsa̱nga̱a̱, kui jaá kuí boá xi ndií na̱ Bilaa̱ ko̱jo na̱ Silpaa̱, ínchjiín na̱ꞌmii̱, kó Kosiee̱ katsóyaà na̱ꞌmii̱ ngayeje ni xi ndajín xi katsꞌén já ntsꞌi̱e̱ jun.

3Jakoo̱b tjó ngase kamaá Kosiee̱ ta̱bo̱a̱jiín ngayeje ndií xi ngasee̱, ngatꞌa̱ jè ꞌniú xchá nga katsen Kosiee̱, kó ngo ńjño xi fotꞌa nga̱xtón xi kjín a̱si̱én katsꞌéndaa̱. 4Ta̱nga já ntsꞌi̱e̱ Kosiee̱ achichí chꞌo kamaá, kó nde kamámejénjiín nda tsíchji̱a̱jo, ngatꞌa̱ kamábe nga na̱ꞌmii̱ kui jaá tjó ngase katsꞌén Kosiee̱ ta̱bo̱a̱jiín kuí.

5Ngo ndi̱yà tseꞌeé ngo chi̱ni Kosiee̱, kó nga katsóyaà já ntsꞌi̱e̱, ꞌniú ngase chꞌo kamaá kui jaá, 6ngatꞌa̱ bi̱ katsó Kosiee̱:

—Ngoye jñó tseꞌéna ngo chi̱ni, 7nínga kamábe an nga ki̱a̱ tindyión ñá ngamasiee̱n kꞌijñá nínga sitji̱e̱ nii̱, kó chꞌo̱ xka̱a̱ to ndso̱ko̱a̱n ṉño̱pan ndyi̱ꞌbíꞌniú, kó ta̱niján má chꞌo̱ xi tsa̱ꞌa̱n jastjíe̱n kó kisꞌijña kixi̱ kixi̱, tji̱e̱nga tsa̱jún tsindiyá xtji̱e̱e̱n nínga tikón xi tsa̱ꞌa̱n.

8Kó já ntsꞌi̱e̱ bi̱ katsó:

—¡Kó, a jí xí ko̱ti̱xomejne̱ ko̱jo a jí xí ka̱ma ji ngito̱ko̱jne̱!

Kó ta̱ngatꞌanii̱ kui chi̱nii̱ ko̱jo ni xi tsíchji̱a̱ Kosiee̱ nga já ntsꞌi̱e̱ ta̱sá má ꞌniú ngase chꞌo kamaá.

9Ingo chi̱ni katseꞌé nginií Kosiee̱ kó katsóyaà já ntsꞌi̱e̱, nga bi̱ katsoó:

—Ingo chi̱ni tseꞌéna, nínga kamábe an nga tsꞌueé ko̱jo saá ko̱jo tiengo ńño kixindyiańña xtji̱e̱e̱n nínga tikòn an.

10Nga katsóyaà na̱ꞌmii̱ ko̱jo já ntsꞌi̱e̱ kui chi̱nii̱, na̱ꞌmii̱ katsꞌénxchánjo̱, kó bi̱ katsoó:

—Mí ńjñaá xi tseꞌéchi̱nii̱ ji. A nga na̱áa̱n ko̱jo já ntsꞌie ko̱jo an xi ka̱majne̱ moso̱ tse̱.

11Kó já ntsꞌi̱e̱ Kosiee̱ kamáꞌonkon, ta̱nga na̱ꞌmii̱ katsꞌénkjó mí xí mejeén tsó ni xi tseꞌéchi̱nii̱ Kosiee̱.

Bi̱ tsꞌén akatíñá Kosiee̱ xikoó ngo moso̱

12Já ntsꞌi̱e̱ Kosiee̱ kijítsꞌénkjién cho̱tsa̱nga̱a̱ na̱ꞌmii̱ ki̱a̱ nangi Sikee̱n. 13-14Jaskan ngije jaꞌa ni̱xtjin, Jakoo̱b bi̱ katsoó Kosiee̱:

—Jè yé ji nga já ntsꞌie ndyi̱koo̱n cho̱tsa̱nga̱na ki̱a̱ nangi Sikee̱n, kó mejénna nga kꞌuin jí nínga síndo já ntsꞌie, kó tsitsíjìi̱n tsi nda síndo, sꞌe̱ ndibékꞌíyé nginí ngijee̱.

—Ndakjíꞌí na̱ꞌmi, ngotꞌe̱ má kjuín án —katsó Kosiee̱.

Kó Kosiee̱ jatjoni ngi̱ndie nínga soón nangi Ebroo̱n, kó jachó nangi Sikee̱n, 15ta̱nga ta̱jñàjínni kasakoo̱ já ntsꞌi̱e̱. Jaskan kasakoo̱ ngo nda̱, kó bi̱ katsoó nga asíyaá:

—Mí xí timindyisé ji.

16Kó bi̱ katsó Kosiee̱:

—Já ntsꞌié án tsꞌénmongase an, ngo kjo̱a̱nda míꞌaá, tꞌíyéchiíni nínga síndo nga ndyi̱koo̱n cho̱tsa̱nga̱ ye.

17Kó kuí nda̱a̱ bi̱ katsoó:

—Kꞌi̱e̱mára kisꞌińdo, ta̱nga jè kjín ni̱xtjinnii̱ nga kijí, tsintꞌie an nga nangi Ndotaa̱n xó ndyi̱fí katsó.

Kó Kosiee̱ kijíngasera já ntsꞌi̱e̱, kó ki̱a̱ kasakoo̱ kui ngi̱ndiee̱. 18Nga kamábe já ntsꞌi̱e̱ nga ta̱ kjin tsꞌéndibá Kosiee̱, ngindiee̱ nga kjo̱chó tiña ngase, índajo̱ xkjín nga sa̱ꞌínkꞌién. 19Kó ja̱kꞌi̱e̱ ja̱ngaján, bi̱ katsoó xkjín:

¡Jànꞌa̱n! ¡Ki̱a̱ tsꞌéndibá ki̱a̱a̱ kui nda̱ xi boeꞌeé chi̱nii̱! 20Ta̱sá si̱ꞌankꞌién, kósꞌe̱ ngo ti̱xa̱ ndáńchꞌi̱ kjójmíyá, kósꞌe̱ bo̱a̱ kꞌuin nga ngo cho̱ tamá iskjinie. ¡Ki̱a̱ ka̱maa̱ nga xcha̱ a kjo̱tjosónra̱ chi̱ni xi tseꞌeé!

21-22Nga tsintꞌié Rubee̱n kui nii̱ kamámejeén xín kijíjo̱ Kosiee̱, kjinnii̱ nínga síndo já ntsꞌi̱e̱, sꞌe̱ jaskan ko̱e̱je̱joo̱ na̱ꞌmii̱. Kuíni nga bi̱ katsoó já ntsꞌi̱e̱: Ndajínkjiꞌi nga si̱ꞌankꞌién. Mítsjà si̱ꞌankꞌién. Tsi mejénjnú ta̱sá ki̱a̱ tjajmiyájnú ti̱xa̱ ndáńchꞌi̱ xi tikón nangi kixií, ¡ta̱nga nga niꞌánꞌónjínjnúu̱!

23Kó nga jachó Kosiee̱ nínga síndo já ntsꞌi̱e̱, kuí jaá jaꞌáxiín ńjño xi fotꞌa nga̱xtón xi kjín a̱si̱én xí yajaá kui xi katsꞌénda na̱ꞌmii̱, 24sꞌe̱ ki̱a̱ tsꞌajmiyá ngo ti̱xa̱ ndáńchꞌi̱ xi tiya xi jmí ndáfoajiín. Kó Rubee̱n xín kijí.

25Kósꞌe̱ kui já ntsꞌi̱e̱ Kosiee̱ iskjinie ṉño̱. Kó kjiꞌá má kamábe nga ngo xtín xota̱ xi botiñá ni ndyi̱ndibá, xota̱ tji̱e̱e̱ Ismaee̱l boá xi kjindibáni nangi Ngalaa̱nd, kui jaá tjimájo̱ cho̱toꞌoyitsꞌe̱n xi ndyi̱yaꞌa ndásíje̱n xi nda ko̱jo xka̱ xi sije̱n xi ndyi̱fíjo̱ nangi Ejipto̱.

26Kósꞌe̱ Jundáa̱ bi̱ katsoó já ntsꞌi̱e̱:

Jmí ni si̱ꞌán jàn tsi si̱ꞌankꞌién ntsꞌié, kósꞌe̱ nginijan kꞌuindísó kjo̱a̱a̱ nga je kiniꞌánkꞌién. 27Ta̱sá nda ngase ka̱máná tsi kui xotaa̱ tji̱e̱e̱ Ismaee̱l ko̱ti̱ñàa̱. ¡Ngatꞌa̱ ntsꞌié ñá boá, kó ta̱ ngo jín ñá!

Kó kuí jaá nda kasasiee̱n kui ni xi índaa̱, 28kó nga jaꞌa ki̱a̱a̱ kui já xí botiñá nii̱, já ntsꞌi̱e̱ Kosiee̱ tsꞌaxié kui ti̱xa̱ ndáńchꞌií, kó xota̱ tji̱e̱e̱ Ismaee̱l atíñaá, kan to̱ntiboa katseꞌeé. Kó tsangínjo̱ Kosiee̱ nangi Ejipto̱.

29Nga jachóꞌoyá nginí Rubee̱n nínga tikón ti̱xa̱ ndáńchꞌií, kó nga kasakojiín Kosiee̱ ki̱a̱ ngi̱yaa̱, iskjíndiyá ńjño xi yajá nga ndasen kamaá, 30sꞌe̱ kijíkoón já ntsꞌi̱e̱, kó bi̱ katsoó: ¡Ngiti̱ jmíjín Kosiee̱ ngi̱ya ti̱xa̱ ndáńchꞌií! Kó ngotꞌe̱ ꞌne̱, mí xí xiáa̱n na̱ꞌmina.

31Kósꞌe̱ ngo ndií tindso̱ katsꞌénkꞌién kó jiín kui cho̱o̱ iskjitjónjón ńjño xi fotꞌa nga̱xtón xi tsi̱ꞌe̱ Kosiee̱. 32Kósꞌe̱ kui ńjñoo̱ tsangínjoo̱ Jakoo̱b, na̱ꞌmii̱ Kosiee̱, kó bi̱ kiꞌmií:

—¡Jéꞌe̱n xi kjiꞌi ni xi kasakojne̱! Kuírá tsi̱ꞌe̱ ndíi̱ Kosiee̱.

33Kó na̱ꞌmii̱ Kosiee̱ nga kamábe nga tsi̱ꞌe̱ Kosiee̱ boá kui ńjñoo̱, bi̱ katsó nga on kamaá nga askjandáyà:

—¡Jo̱o̱n, kuí tsi̱ꞌe̱ ndína kui ńjño xi fotꞌa nga̱xtoo̱n! ¡Ngora̱ cho̱ tamá katsꞌénxi̱, kó iskjiniera̱ ndína!

34Kósꞌe̱ Jakoo̱b iskjíndiyá ńjñoo̱ nga ndasen kamaá, tsajá ńjño xa̱ꞌya̱, kó achichí kjín ni̱xtjin nga askjandátjé kui ndií. 35Kó ngayeje ndií xi xi̱ꞌin ko̱jo xi ínchjín jachókoón nga jachótsꞌéndájoón, ta̱nga kamámejénjiín nga kiniꞌándajoo̱n. Ta̱sá ta̱soboá askjandá, nga bo̱a̱ katsó nga kamámejeén ko̱yà nga, tsi̱ꞌe̱ nga ki̱a̱ kꞌuijñátꞌaa̱ Kosiee̱.

36Kó kui já xí botiñá nii̱ nga jachó nangi Ejipto̱ atíñá Kosiee̱. Kó nda̱ xi ꞌmí Potifaa̱r tsꞌatsie, kui xi ngo nda̱ xi nkꞌa kamá xaá xi ngito̱ko̱o̱ já xí koón nda̱ ree̱ kamá.

Currently Selected:

Jenesii̱ 37: MAIX

Highlight

Copy