Éksondo̱ 35

Kjo̱a̱kiti tsi̱ꞌe̱ ni̱xtjin xotoo̱

1Kó Moisee̱ kamátikójo̱ xota̱ Israee̱l, tsi̱ꞌe̱ nga ka̱tso̱yaa̱ kjo̱a̱botíxoma xi Néná katsjaá, kó bi̱ katsoó:

2Jun ni̱xtjin tikoón nga ngo xomanaa̱ nga ka̱ma si̱ꞌanxájnú, ta̱nga ni̱xtjin xi ma yitoo̱ chjiéngá ni̱xtjin ndikón ka̱majnú. Kui ni̱xtjii̱n chjiéngá si̱ꞌankjaꞌyájnú, tsi̱ꞌe̱ nga Néná si̱ꞌandikónjnú. Xi sa̱ꞌínkjatjosónjín kui kjo̱a̱botíxomaa̱, ko̱yà. 3Jmí ndasénjín, ta̱ nínga tindyiónjnú, ta̱nga ni̱xtjin xi ma yitoo̱ nde ka̱májín ndiꞌí kꞌuitsiéjnú ndiꞌajnú.

Ni xi kiniꞌánkixó tsi̱ꞌe̱ nga kamánda ndiꞌandikoón Néná

4Moisee̱ ti̱ tsíchji̱a̱jo nginí xota̱ Israee̱l, kó katsóyaà kjo̱a̱botíxomaa̱ Néná, kó bi̱ katsoó:

5Mejénna nga jún ngayeje ini̱ma̱jnú nga si̱ꞌankixójnú ni xi ka̱machjiénná tsi̱ꞌe̱ ndiꞌandikoón Néná. Ndibájo̱jnú to̱nsinié, ko̱jo to̱ntiboa, ko̱jo ki̱cha̱ bronse̱, 6ko̱jo ńjño xi koán, ko̱jo ńjño xi aso, ko̱jo ńjño xi iní, ko̱jo ńjño lino̱ xi nda, ko̱jo tsja̱a̱ tindso̱ chjo̱on, 7ko̱jo tji̱xi̱ín cho̱tsa̱nga̱ xi iní kiniꞌánkꞌi, ko̱jo tji̱xin xí nda, ko̱jo yáꞌakasia̱, 8ko̱jo isti̱ xi mindyiaa̱ ndiꞌí xí tsꞌentsíjenná, ko̱jo ndásíje̱n xi mindyiaa̱ isti̱ xi nanginjon xotaa̱ nga boeꞌéxaá, ko̱jo nisije̱n xi ꞌbítií Néná, 9ko̱jo ndi̱jo̱ ónise̱ xi kjín a̱si̱én, ko̱jo ndi̱jo̱ xi tsjakon xi kjótꞌa ńjñondioo̱ chináꞌmii̱, ko̱jo ńjño xi fotꞌa ni̱se̱e̱n chináꞌmi ngito̱ko̱o̱.

Ni xi niꞌánkjién ndiꞌandikoón Néná

10-19Ngayeje xota̱ Israee̱l xi chji̱ni̱e̱, xi maa̱ niꞌánda ni tsjakon, ngatjandibá tsi̱ꞌe̱ nga sa̱ꞌínda ndiꞌandikoón Néná ko̱jo ngayeje ni xi machjieén ngi̱yaa̱, xikoó: Koxa̱a̱ kjo̱a̱ꞌbíndaa̱, ko̱jo ni xi ꞌbítíyá ndiꞌí xí tsꞌentsíjee̱n, ko̱jo yámíxa̱ nínga ꞌbíjñasón paa̱n ko̱jo ni xi machjieén. Ti̱ chjiéngá sa̱ꞌínda nchꞌoá xí ku̱i̱ꞌíchjáꞌyá nga ngo foaꞌatjiyajoo̱n ndi̱tsee̱n nga, ko̱jo ngayeje ni xi tjín ngi̱yaa̱, xikoó: Ṉchandikón nínga ꞌbítí kjo̱a̱tjoó, ko̱jo ndástsié xí ki̱cha̱ bronsee̱, ko̱jo ni xi machjieén nga jó kui nii̱. Ti̱ chjiéngá sa̱ꞌínda ṉchandikón nínga ꞌbítí nisijee̱n, ko̱jo ni xi machjieén, ko̱jo ńjño xi ko̱a̱ja̱ chináꞌmii̱, ko̱jo nisijee̱n, ko̱jo isti̱ xi nanginjon nga boeꞌéxaá ngo xota̱. Kuí bí kui nii̱ xi atíxoma Néná nga si̱ꞌanda.

Xota̱ na̱xi̱ńdaá jachójo̱ ni xi ngayeje kon nga katsꞌénkixó

20Kó ngayeje xota̱ na̱xi̱ńdaá katsꞌénkixotꞌa Moisee̱, sꞌe̱ xín kijí kui xotaa̱ ngijee̱. 21-26Sꞌe̱ jaskan kui xotaa̱ jachójo̱ ni xi ngayeje kon nga kamámejeén nga tsja̱á Néná, tsi̱ꞌe̱ nga kamánda ndiꞌandikoón ko̱jo tsi̱ꞌe̱ nga ka̱manda ńjño xi ko̱a̱ja̱ chináꞌmii̱. Xi chjo̱on xí xi̱ꞌin ndikóntsꞌèn jachójo̱ kjo̱a̱tjoó, kó ndyi̱yaꞌa ngayeje to̱ko̱ya ni to̱nsinié xi bóndani yojoo̱, ko̱jo ńjño koán, ko̱jo ńjño aso, ko̱jo ńjño iní, ko̱jo ńjño lino̱ xi nda, ko̱jo tji̱xi̱ín tindso̱ chjo̱on, ko̱jo tji̱xi̱ín cho̱tsa̱nga̱ xi jaꞌatji ndi̱ja̱a̱, ko̱jo kje̱ꞌe ngase tji̱xin xí nda. Kje̱ꞌe xota̱ xí jachójo̱ to̱ntiboa, ko̱jo ki̱cha̱ bronse̱, ko̱jo yáꞌakasia̱, kó tjín ínchjiín xi jachójo̱ ńjño xi chji̱ni̱e̱ kamáni ko̱jo ńjño xi tsja̱a̱ tindso̱ chjo̱on kiniꞌándani.

27Já ngito̱ko̱o̱ xota̱ Israee̱l jachójo̱ ndi̱jo̱ ónise̱ ko̱jo kje̱ꞌe to̱ko̱ya ndi̱jo̱ tsjakon, tsi̱ꞌe̱ nga kiniꞌánda ńjñondioo̱ chináꞌmii̱ ko̱jo ńjño xi fotꞌa ni̱se̱e̱n. 28Ti̱ jachójo̱ ndásíje̱n ko̱jo isti̱ xi mindyiaa̱ ndiꞌí xí tsꞌentsíjee̱n, ko̱jo isti̱ xi nanginjon xotaa̱ nga boeꞌéxaá ko̱jo nisije̱n xi ꞌbítií.

29Ngayeje xota̱ Israee̱l xi chjo̱on xí xi̱ꞌin, jachójo̱ kjo̱a̱tjó xi ngayeje kon nga katsjá, kó Moisee̱ katsꞌénkꞌasꞌiee̱n, tsi̱ꞌe̱ nga kamánda ngayeje ni xi atíxoma Néná nga ka̱manda.

Xota̱ xi kjínkón xi maa̱ niꞌánda ni tsjakon xi kachjeꞌéjii̱n

30-35Kó Moisee̱ bi̱ katsoó xota̱ Israee̱l:

Tasiénnijónjnú kui nii̱. Néná je jaꞌájin jó já chji̱ni̱e̱ xi maa̱ niꞌánda ni tsjakon, tsi̱ꞌe̱ nga kui xi sa̱ꞌínxá nga si̱ꞌanda ndiꞌandikoón. Besalee̱l boá xi jaꞌájin xi chji̱a̱ni xota̱ tji̱e̱e̱ Jundáa̱, kó Ooliaa̱b boá xi jaꞌájin xi chji̱a̱ni xota̱ tji̱e̱e̱ Ndaa̱n. Kui jaá, Néná boá xi je katsjaá kjo̱a̱kjínkón tsi̱ꞌe̱ nga ka̱maa̱ sa̱ꞌínda ni tsjakon xi yá niꞌándajo̱ni, ko̱jo nga ka̱maa̱ chji̱ni̱e̱ xi niꞌándani ńjño xi koán, ko̱jo ńjño xi aso, ko̱jo ńjño xi iní, ko̱jo ńjño lino̱ xi nda, ko̱jo tsi̱ꞌe̱ nga ka̱maa̱ sa̱ꞌínda ngayeje to̱ko̱ya ni xi tsjakon. Kó ti̱ je katsjaá kjo̱a̱kjínkón tsi̱ꞌe̱ nga ka̱maa̱ ko̱kóyaá kje̱ꞌe xota̱ kui xaá.

Kó Néná je katsjaá Besalee̱l A̱si̱énni̱xtjii̱n ko̱jo katsjaá kjo̱a̱kjínkón ko̱jo kjo̱a̱kjíntakón tsi̱ꞌe̱ nga ka̱maa̱ sa̱ꞌínda ni xi to̱nsinié, ko̱jo ni xi to̱ntiboa, ko̱jo ni xi ki̱cha̱ bronse̱, ko̱jo tsi̱ꞌe̱ nga ka̱maa̱ sa̱ꞌínxájo̱ ndi̱jo̱ tsjakon, ko̱jo nga ka̱maa̱ ko̱ótꞌa ndi̱jo̱ tsjakon, ko̱jo nga sa̱ꞌínxájo̱ ni xi yá mandani.

Currently Selected:

Éksondo̱ 35: MAIX

Highlight

Copy