Éksondo̱ 34

Néná ti̱ katsꞌénꞌindó nginí kjo̱a̱kitii̱

1Kó Néná bi̱ katsoó Moisee̱:

Ndibéje̱ní jó tie ndi̱jo̱, xikoó xi tjón katsjaa. Ki̱a̱ ka̱maa̱ nga ki̱a̱ sa̱ꞌinꞌindó an ti̱kuii kjo̱a̱kiti xi kjitꞌa kui tie ndi̱jo̱ xi akakjen ji. 2Tꞌínde yojòo̱, ngatꞌa̱ ndyiojón ta̱jñó kꞌuínnijíngí ji na̱xi̱ Sinaii̱, ki̱a̱ skoyaa nínga ꞌniú nkꞌaá kui na̱xi̱i̱. 3Ngata̱ ꞌyàjín xi fíjoo̱, mejénjínna nga skuie an xota̱, ko̱jo cho̱tsa̱nga̱, ko̱jo cho̱yojo ki̱a̱a̱.

4Kósꞌe̱ Moisee̱ íjñanda jó tie ndi̱jo̱ xikoó xi tjoón, kó nga kamángindyiojón nga ꞌniú ta̱jño̱ó jastjíe̱n kó kijínijíngí na̱xi̱i̱. 5Kó Néná ngo ṉdi̱ jatjajenni, kó ki̱a̱ kisꞌijñatꞌaa̱ Moisee̱, sꞌe̱ katsóyaà jaꞌén xí tsi̱ꞌe̱. 6Tji̱e̱nga tsꞌénfoaꞌa kje̱n Moisee̱, Néná ꞌniú tsíchji̱a̱ nga bi̱ katsó:

¡Án boá xi Nee̱ xota̱ Israee̱l! ¡ÁN XÍ ÁN, kó kuí boá kuí jaꞌeén xí kamábenina xotaa̱! Án boá ngo Ne xi nda ini̱ma̱a̱ ko̱jo xi ndaxota̱. Jmí tsi tsá tsꞌenxchán án, kó achichí ꞌniú tjóna xota̱ na̱xi̱ńdána. 7Kjo̱a̱tjóna ti̱kuíní bo̱a̱, kó ngatsjéni̱xtjin tikónda an nga sa̱ꞌinjetakóo̱n xota̱ xi ndajín ndyi̱tsꞌèn. Ta̱nga ti̱ mána tsꞌenjée̱ xota̱ xi tjiín jé ko̱jo ndií, ko̱jo ndíndee̱, ko̱jo ndínde xi ma joó, ko̱jo ndínde xi ma jaán.

8Ti̱ kjiꞌa kisꞌijñaxtien Moisee̱ ngaskande nga kisitꞌaa̱ kje̱n tꞌanangii̱ nga katsꞌéntsjaà Néná, 9kó bi̱ katsoó: ¡Ne tsa̱ꞌa̱n! ¡Ne tsa̱ꞌa̱n! Tsi ja̱koxi̱ nga tjoó án, tꞌenje̱jne̱ nínga ndyi̱mongínjne̱. Ja̱koxi̱ boá nga achichí kitikjo̱a̱jne̱, ta̱nga ti̱ꞌinjetakínjne̱ jéjne̱, kó ti̱ꞌinjo̱ꞌojne̱ xikoó xota̱ na̱xi̱ńdá xí tse̱.

Ngo kjo̱a̱ꞌbínda katsꞌén Néná

10Néná bi̱ katsoó Moisee̱:

Nda má tasínijìnní, ngatꞌa̱ ngo ni kꞌuindajo̱ an ngayeje xota̱ na̱xi̱ńdáa̱. Ta̱nisién yiꞌi ni xi fíndikónná xí sa̱ꞌin an, kui xi kji̱e̱ ngo ndi̱yà yá ngayeje na̱xi̱ńdá xí tjín nga̱sondiee̱. Ngayeje na̱xi̱ńdá xí tjín nínga tindyiónjnú, sku̱i̱e̱ ni xi sa̱ꞌin an, nga an xi Nee̱ xota̱ Israee̱l.

11Tsi jún ko̱nda̱ꞌyáꞌénjnúꞌun ngayeje ni xi je atixomájnúꞌun ngotꞌe̱, an kꞌoxié an ngi̱ndie nínga síndo ngayeje xota̱ na̱xi̱ńdá xi ntꞌiéꞌénjínna, kó an tsjajnúꞌun tꞌanangi nínga síndo.

12Jún ku̱i̱tjásꞌi̱e̱njnú tꞌanangi xi kixianjnúꞌun nga ku̱i̱tjásꞌi̱e̱njnú. Ka̱májín ngo ni kꞌuíndajo̱jnú xota̱ xi síndo kui ngi̱ndiee̱, tsi̱ꞌe̱ nga ki̱a̱jín chja̱ꞌángíjnúu̱ ni xi ndajín xi ndyi̱tsꞌèn. 13Ta̱sá jún ti̱ꞌankjatsón yejejnú ṉchandikoón ne xi tsꞌéndíkón kuí xotaa̱.

14Ngata̱ niꞌándikónjínjnú kje̱ꞌe ne, ngatꞌa̱ an boá ngo Ne xi achichí chi̱ni̱.

15Ngata̱ ngojín ni ꞌbíndajo̱jnú xota̱ xi chji̱a̱ni kui ngi̱ndiee̱, ngatꞌa̱ kui xotaa̱ ka̱tso̱yàjnú tsi̱ꞌe̱ nga ki̱a̱ nijan si̱ꞌantsjajo̱jnú nee̱, kósꞌe̱ jaskan jún si̱ꞌandikónjnú kui ne xi jmí tsi ja̱koxi̱ nga nee̱. 16Ndara̱ ka̱majnú kjiꞌanga ndí xíꞌínjnú ku̱i̱xanjo̱ ndí ínchjiín kui xotaa̱, ta̱nga ngije kui ínchjiín sa̱ꞌínjé nga sa̱ꞌíndikón kui ne xi jmí tsi ne xi ja̱koxi̱i̱, kui nii̱ xi sa̱ꞌín nga ko̱jo ndíjnú sa̱ꞌínjé nga.

17Ngata̱ niꞌándajínjnú ngo ne xi ki̱cha̱ tsi̱ꞌe̱ nga si̱ꞌandikónjnú.

Sꞌué xí má xki̱ nó

18Ti̱ꞌánjnú sꞌueé pan xi jmí nisan mindyiajiín. Yito ni̱xtjin chi̱ni̱e̱jnú pan xi jmí nisanjiín, ki̱a̱ tangíntji̱ngíjnú kjo̱a̱botíxoma xi je katsjajnúꞌun. Sá xí ꞌmí Abii̱b boá nga si̱ꞌánjnú kui sꞌueé, ngatꞌa̱ kuí boá kui saá nga jatjojnú nangi Ejipto̱.

19Ndí tjón xi kꞌuiéjnú tsa̱ꞌa̱n ka̱ma, ko̱jo ngayeje ndí xíꞌín xi kꞌuieé cho̱yojojnú, ko̱jo cho̱tsa̱nga̱jnú. 20Kjiꞌanga ko̱e̱ꞌéjnú ngo kjo̱a̱tjó kjo̱a̱a̱ ndí tjón xi xi̱ꞌii̱n bórró chjo̱on, ka̱ma si̱ꞌankꞌasꞌienjnúꞌun ngo ndií cho̱tsa̱nga̱, ko̱jo tsi ngo ndií tindso̱. Ta̱nga tsi si̱ꞌankꞌasꞌienjínjnúꞌun kui cho̱o̱, chjiéngá chjátꞌósénjnú to̱ko̱ ndí bórró xíꞌiín. Ti̱ bo̱a̱ ti̱ tsꞌén kjo̱a̱a̱ ndí tjónjnú ka̱ma si̱ꞌankꞌasꞌienjnúꞌun ngo kjo̱a̱tjó. Ngojín xi ka̱ma kjo̱e̱ꞌétsꞌendíkónna tsi jmí ni yaꞌajín.

21Jun ni̱xtjin nga ngo xomanaa̱ si̱ꞌanxájnú, ta̱nga xi ma yito ni̱xtjii̱n, chjiéngá si̱ꞌankjaꞌyájnú, ndatsi ni̱xtjin nga sitji̱e̱ ni ko̱jo tsi ni̱xtjin nga chja̱ꞌátikó ni xi je kamáxchaá.

22Ti̱ bo̱a̱ ti̱ tsꞌén si̱ꞌánjnú ngo sꞌué kjiꞌanga chja̱ꞌátikójnú ni xi tjón kamáxchaá, nga cho̱ndoboaá, ko̱jo ngo sꞌué kjiꞌanga chja̱ꞌátikójnú ngayeje ni xi kamáxchaá, nga kjife noó.

23Ngayeje jáxíꞌiín, chjiéngá ján ndi̱yà nga ngo noó kjo̱e̱ꞌétsꞌendíkónna. Án boá xi Nee̱ xota̱ Israee̱l. 24Án boá xi kꞌoxié kjo̱a̱ꞌniú án xota̱ na̱xi̱ńdá xí ngasee̱, tsi̱ꞌe̱ nga jún tsie ngase ngi̱ndie kꞌuiéjnú. Bo̱a̱ tsꞌén nga ngojín xi ka̱ma kjo̱a̱ꞌáxínjnú ngi̱ndiejnú kjiꞌanga kji̱ndi̱bá niꞌándikónjnúꞌun.

25Kjiꞌanga si̱ꞌankꞌasꞌienjnúꞌun ngo kjo̱a̱tjó xi ngo cho̱, ngata̱ kjiꞌájín nijan niꞌánkꞌasꞌiénjnúꞌun jiín kui cho̱o̱ ko̱jo pan xi tjiín nisan. Ti̱nde ngata̱ chjaꞌátjójínjnú ni xi kꞌo̱ngii̱ kui cho̱ xi si̱ꞌankꞌiénjnú kjiꞌanga ka̱ma sꞌué paskuaa̱.

26Chjiéngá kui ni xi ꞌniú nda ngase xi kamáxchájnú xi kji̱ndi̱bájo̱jnú na̱ngo̱xi̱na.

Ngata̱ ki̱a̱jín ngi̱jii̱n ntsjeén na̱aa̱n ndí tindso̱ chichií niꞌánchjánjinjnú.

27Ngayeje kui kjo̱a̱kitii̱ xi yaꞌajo̱nii̱ ni xi índajo̱ Néná xota̱ na̱xi̱ńdá Israee̱l, kuíni nga Néná atíxomaa̱ Moisee̱ tsi̱ꞌe̱ nga sa̱ꞌínꞌindó. 28Kó Moisee̱ ki̱a̱ kisꞌijñajo̱ Néná ki̱a̱ na̱xi̱i̱ yichán ni̱xtjin ko̱jo yichán ni̱xtji̱e̱n nga kisꞌijña kjindiá nga jmí ni iskjiniejín, ti̱nde jmí ni katsꞌejín. Kó ki̱a̱ boá nínga kiniꞌánꞌindó nga̱són ndi̱jo̱ tiee̱ nga tie kjo̱a̱botíxomaa̱.

Nga jatjajen Moisee̱ na̱xi̱ Sinaii̱

29Kjiꞌanga jatjajenni Moisee̱ na̱xi̱ Sinaii̱, je tsꞌényaꞌa nga jó tie ndi̱jo̱ nínga kjitꞌa kjo̱a̱kitii̱. Kó kje̱n achichí ꞌna̱ kamá, ngatꞌa̱ Néná tsíchji̱a̱jo tíkje̱n, ta̱nga Moisee̱ nde kamábejín kui nii̱. 30Kjiꞌanga kamábe Aaroo̱n ko̱jo ngayeje xota̱ Israee̱l nga kje̱n Moisee̱ ꞌna̱ kamá, achichí katsakjónní kó kamámejénjiín kijíkóntiñaa̱. 31Ta̱nga Moisee̱ tsíchji̱a̱a̱ tsi̱ꞌe̱ nga ku̱i̱chji̱a̱ni̱jmìjo̱. Tjón má Aaroo̱n ko̱jo ngayeje já ngito̱ko̱ xota̱ Israee̱l xi jachó, 32sꞌe̱ jaskan jachó ngayeje xota̱ na̱xi̱ńdá xí ngasee̱. Kósꞌe̱ Moisee̱ katsóyaà ngayeje kui xotaa̱ kui kjo̱a̱botíxoma xi Néná katsjaá Moisee̱ ki̱a̱ na̱xi̱ Sinaii̱.

33Ngije kamaá Moisee̱ nga tsíchji̱a̱ni̱jmìjo xota̱ na̱xi̱ńdaá ngo ńjñoxo̱ꞌba̱ íꞌmáni kje̱n. 34-35Kui ńjñoxo̱ꞌba̱a̱ katsꞌénkjién Moisee̱ ngaskande nga jachó chi̱bo̱a̱ nga tsꞌasꞌien ngi̱ya ndiꞌandikoón tsi̱ꞌe̱ nga ku̱i̱chji̱a̱jo Néná. Kó nga tsꞌasꞌien ki̱a̱ ndiꞌandikoón jaꞌáxín kui ńjñoxo̱ꞌba̱a̱, kósꞌe̱ ngije jataxie nginí ki̱a̱ ndiꞌandikoón, katsóyaà xota̱ na̱xi̱ńdaá ngayeje ni xi Néná atíxomaa̱. Ta̱nga nga xota̱ na̱xi̱ńdaá kamábe nga to̱kó ꞌna̱ kje̱n Moisee̱, kuíni nga to̱kó íꞌmáni kje̱n kui ńjñoxo̱ꞌba̱a̱.

Currently Selected:

Éksondo̱ 34: MAIX

Highlight

Copy