Ndeuteronomio̱ 5
5
1Moisee̱ ítikó ngayeje xota̱ na̱xi̱ńdá Israee̱l, kó bi̱ katsoó:
Jún xota̱ Israee̱l tasiénijónjnúꞌun ngotjón, ngatꞌa̱ kꞌi̱e̱ tsjajnúꞌun kjo̱a̱kiti ko̱jo kjo̱a̱botíxoma xi chjiéngá nda ka̱majnú ko̱jo xi chjiéngá si̱ꞌankjatjosónjnú xikó tsó. 2Ndi̱a̱ná kui xi Néná ngo ni índajo̱ná ki̱a̱ na̱xi̱ Oree̱b. 3Jmí tsi ta̱ xota̱ xi xcháná tsí xi índajo̱ kui nii̱, ko̱jo ñá boá, xi tindyiontikó kꞌi̱e̱e̱. 4Ndi̱a̱ná tsíchji̱a̱jo tíkje̱n tíkje̱njnú ngi̱jii̱n ndiꞌií. 5Án boá xi kamá an chji̱ni̱e̱ꞌe̱én Néná, kó an kixiyajnúꞌun ni xi katsó Néná, ngatꞌa̱ jún kandakonnijnú ndiꞌií, kuíni nga tsangínjínjnú ki̱a̱ na̱xi̱i̱, kó ki̱a̱ boá nínga Néná bi̱ katsó:
6Án boá xi Nejnú án, kó án boá xi tsꞌaxiéjnúꞌun ki̱a̱ nangi Ejipto̱, nínga moso̱ kamájnú. 7Ngata̱ ꞌbejínjnú kje̱ꞌe Ne tsi ánjín. 8Ngata̱ niꞌándajínjnú ngo ne ko̱jo tsi ngo a̱sie̱én ngo ni xi bo̱a̱ má kjiꞌi xikoó ni xi síndo nkꞌa jàn, ko̱jo tsi xikoó ni xi síndo tꞌanangii̱, ko̱jo tsi xikoó ni xi síndo nínga ꞌniú na̱nga̱a̱ ndáchíkoón. 9Ngata̱ bosiéntꞌajínjnúu̱ tikójnú kui nii̱, ti̱nde ngata̱ niꞌándikónjínjnú. Án boá xi Nejnú an, kó chi̱ni̱ án. Án boá xi tsꞌenjée̱ ndií, ko̱jo ndíndee̱, ko̱jo ndínde xi ma joó tsi̱ꞌe̱ xota̱ xi tsꞌenchꞌóna, 10ta̱nga achichí nda tsꞌenjo̱ an ngayeje xota̱ tji̱e̱e̱ xota̱ xi tsꞌéntjóna, ko̱jo xi ndyi̱tsꞌènkjátjosón kjo̱a̱botíxomana.
11Ka̱májín ta̱xkiya si̱ꞌankjiénjnú jaꞌénna, chjiéngá xcha̱ndikónjnú, xi ta̱xkiya sa̱ꞌínkjién, sa̱ꞌinjéñáa̱.
12Ngatjaꞌátsjienjnú nga ni̱xtjin xotoo̱, ni̱xtjin ndikón boá, tsi̱ꞌe̱ nga an si̱ꞌandikónna. 13Nga jun ni̱xtjin xi tjoón xomanaa̱, ka̱ma si̱ꞌánjnú ngayeje xá xí mejénjnú si̱ꞌánjnú, 14ta̱nga ni̱xtjin xotoo̱, ni̱xtjin xi niꞌánkjaꞌyá boá, ni̱xtjin nga an si̱ꞌandikónna. Kui ni̱xtjii̱n ngojín xi chjiéngá sa̱ꞌín ngo xá: ti̱nde jún, ti̱nde ndí xí xi̱ꞌinjnú, ti̱nde ndí xí ínchjínjnú, ti̱nde moso̱jnú, ti̱nde chji̱ni̱e̱ꞌbojnú, ti̱nde cho̱yojo xi bokján tꞌanangii̱, ti̱nde bórrójnú, ti̱nde ngojín cho̱ xi tjínjnú, ti̱nde xota̱ xi xín nangi xi síndo ngi̱ya ndiꞌajnú xi tsꞌénxájo̱jnú. 15Chjiéngá kjo̱a̱ꞌátsjienjnú nga moso̱ kamájnú ki̱a̱ nangi Ejipto̱, kó nga án boá xi tsꞌaxiéjnúꞌun ki̱a̱a̱ nga katsꞌénkjién án ngaꞌniú jena. Kuíni nga tsꞌénbotixomájnúꞌun nga ni̱xtjin xi ma yitoo̱ si̱ꞌankjaꞌyájnú.
16Ndaꞌyáꞌénjnúu̱ ko̱jo chónjnúu̱ na̱ꞌmijnú ko̱jo na̱anjnú. Kó bo̱a̱ tsꞌén nga nda ku̱i̱ndyionjnú, kó kjín nó ka̱majnú nga ku̱i̱ndyionjnú kui na̱xi̱ńdá xí an tsjajnúꞌun.
17Ngata̱ xota̱jín niꞌánkꞌiénjnú, 18ti̱nde ngata̱ niꞌántꞌajínjnúu̱kjo̱a̱ chjo̱ónjnú ko̱jo tsi xi̱ꞌinjnú, 19ti̱nde ngata̱ jmí chejé niꞌánjínjnú, 20ti̱nde ngata̱ chꞌójíntsꞌèn ndokjo̱a̱taꞌínjnú ngo xota̱, ti̱nde ngata̱ ꞌbíndisotaꞌínjínjnú, 21ti̱nde ngata̱ niꞌánmejénjínjnú ni xi tjiín kje̱ꞌe xota̱, tsi chjo̱ón, tsi mosoo̱ xi xi̱ꞌin, tsi mosoo̱ xi chjo̱on, tsi cho̱yojo xi tsꞌénxaá, tsi bórróo̱, ko̱jo tsi ta̱jmì niní xi tjiín.
Ndaꞌyáꞌénjnú
22Kuí bí kui kjo̱a̱botíxoma xi ꞌniú tsíchji̱a̱jojnú nga katsóyàjnú Néná kjiꞌanga kixindyionjnú ngindiee̱ na̱xi̱i̱. Nda̱a̱ Néná ki̱a̱ jatjoni ngi̱jii̱n ngo ndiꞌí ko̱jo ngo ṉdi̱ xi achichí jñó. Néná jó tie ndi̱jo̱ ítꞌa kjo̱a̱botíxomaa̱, kósꞌe̱ an katsꞌénkꞌasꞌienna, kó jmí ni yísónjín ngasee̱.
23Kjiꞌanga kandaꞌyájnú nda̱a̱ Néná kui xi jatjoni nínga jñoó, kó nga kamáyàjnú nga ndiꞌí jatjoni ki̱a̱ na̱xi̱i̱, kandakonnijnú. Kósꞌe̱ kjiꞌá boá nga ngito̱ko̱o̱ xota̱ tji̱e̱e̱, ko̱jo jáxaá na̱xi̱ńdaá jachókónna tsi̱ꞌe̱ nga ku̱i̱chji̱a̱jona, 24kó bi̱ katsóna: Ja̱koxi̱ nga Néná jè akóná ngaꞌniuú ko̱jo kjo̱a̱jee̱. Je kandaꞌyáa̱ nda̱a̱ xi jatjoni ngi̱jin ndiꞌií. Ngotꞌe̱ jè kamáyà nga Néná tsíchji̱a̱joná, kó jesónjín ñá. 25Ta̱nga, míkjo̱a̱a̱ nga ka̱mamejénná ko̱yà nga ku̱i̱ꞌítíná kuí ndiꞌí xí ta̱nisién ꞌniuú. ¡Tsi ko̱nda̱ꞌyá ngiñáa̱ nda̱a̱ Néná, ko̱yàrá ñá! 26Ngayeje xota̱ xi be nga májín ndaꞌyaá nda̱a̱ Néná, xikótsꞌèn je kandaꞌyáa̱ ñá, kó to̱kó tindyión nga̱sondie. 27Ta̱sá nda ji Moise̱, tsi ji kꞌuin jí, kó ji ndaꞌyée̱ ngayeje ni xi Néná mejeén ka̱tso̱yàjne̱, kósꞌe̱ ji tꞌíyéjne̱ kui nii̱ ngijee̱. Kó ji̱n ko̱nda̱ꞌyáꞌénjne̱ ngayeje ni xi ka̱tso̱jne̱ kui.
28Néná tsintꞌié ni xi kichjiáꞌájnúꞌun, kósꞌe̱ kui bi̱ katsóna: Ndakjíꞌí ni xi ndyi̱tsꞌènkjó. 29Achichíra̱ ndakjiꞌi tsi jmíni̱xtjin ko̱síkjo ni xi ndyi̱tsó, kó nga ngatsjéni̱xtjin nga ngatsꞌéndíkónna ko̱jo ngatsꞌénkjátjosón kjo̱a̱botíxomana. Kó bo̱a̱ tsꞌén nga kui ko̱jo xota̱ tji̱e̱e̱ nda kꞌuíndo. 30Ngotꞌe̱ ꞌne̱, tꞌenchíi̱n, kó bo̱a̱ tꞌíi̱n nga ngatjí nginí ndiꞌaa̱, 31ta̱nga ji ndibé nginí, kó kꞌi̱e̱ nijan ti̱ndyi̱nje̱ní. Án boá xi sa̱ꞌinkꞌasꞌiee̱n kjo̱a̱botíxoma xi chjiéngá ko̱ko̱yée̱, tsi̱ꞌe̱ nga ngayejee̱ nga sa̱ꞌínkjatjosón nga kꞌuíndo ngi̱ndie nínga tsjàa̱.
32Kuíni nga jún xota̱ Israee̱l, ti̱ꞌankjatjosónjnú ngayeje kui kjo̱a̱botíxomaa̱ Nejnú xi tjítsꞌenkꞌasꞌiénjnúꞌun. 33Nda tangíntji̱ngíjnú nga ngo nga ngo kui kjo̱a̱botíxomaa̱, kó nda ku̱i̱ndyionjnú, kó kjín nó ka̱majnú nga ku̱i̱ndyionjnú kui tꞌanangi xi kui tsja̱ajnú.
Currently Selected:
Ndeuteronomio̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
