Ndeuteronomio̱ 33
33
Moisee̱ katsꞌénchikonñé xota̱ Israee̱l
1Moisee̱ boá xi kamá ngo nda̱chji̱ni̱e̱ꞌén xí katsꞌénxátꞌaa̱ Néná. Ngindiee̱ nga ko̱yà, katsꞌénchikonñé xota̱ Israee̱l, 2nga bi̱ katsoó:
Néná ki̱a̱ tsꞌéndibání na̱xi̱ Sinaii̱,
kó ndiꞌií ki̱a̱ ndibánií ndeskande nangi Endoo̱n.
Ndeskande na̱xi̱i̱ Paraa̱n ya
ꞌna̱ ꞌna̱ nga je ndibá,
kó ngaskande Meribaa̱ fochó, ki̱a̱ nangi Kandee̱.
Ndiꞌí boá xi tjiyátsjà xi kixi̱i̱,
kó achichí kjín mi̱ ma já tamá xí kján xi tsꞌéndibájo̱.
3Néná tjoó xota̱ na̱xi̱ńdaá,
Néná tsꞌénkoón xota̱ xi tsi̱ꞌe̱,
ngatꞌa̱ ngatsjéni̱xtjin nga ndyi̱ntꞌièꞌeén,
kó tsjatsꞌèn ndyi̱tsꞌènkjátjosón kjo̱a̱botíxomaa̱.
4An, Moisee̱ katsjajnúꞌun kjo̱a̱kitii̱ Néná,
kó kuí boá kui nii̱ xi ꞌniú chjí ngasenii̱ májnú jún.
5Kó jún ko̱jo xi ngito̱ko̱jnú,
kamáyàndikónjnú Néná nga kui xi ree̱jnú.
6Sꞌe̱ jaskan, Moisee̱ bi̱ katsoó xota̱ tji̱e̱e̱ Rubee̱n:
Jún boá ngo xtín xota̱ tji̱e̱ xi chiboa ma,
ta̱nga ngatsjéni̱xtjin nga ku̱i̱ndyionjnú.
7Sꞌe̱ bi̱ katsoó xota̱ tji̱e̱e̱ Jundáa̱:
Néná ku̱i̱ntꞌièjnú nga ko̱ndókjo̱a̱jnúu̱,
kó kuí boá xi sa̱ꞌín nga si̱ꞌánjnúu̱ kondra̱jnú,
kó tsja̱ndiè nga ka̱matikójo̱jnú
xota̱ tji̱e̱ xi ngasee̱ xota̱ Israee̱l.
8-9Sꞌe̱ bi̱ katsoó xota̱ tji̱e̱e̱ Lebii̱:
Néná askjotíjo̱ xota̱ Israee̱l,
kó ki̱a̱ nangi Masaa̱ askotꞌayákón,
ki̱a̱ tꞌa ndáńchꞌi̱ xi tjitjó ndáfoaa̱ ki̱a̱ Meribaa̱.
Ta̱nga kui kjimaꞌniátakónjnú jún,
ngatꞌa̱ kandaꞌyáꞌénjnúu̱,
ngatꞌa̱ ꞌniú ngase ndikón kamájnú
nga ꞌniú kixindyiajnú nga ka̱maꞌniátakónjnú kui kjo̱a̱ꞌbíndaa̱,
ta̱bo̱a̱jiín nga ka̱maꞌniátakónjnú xi xchájnú,
ko̱jo tsi ntsꞌiejnú, ko̱jo tsi ndíjnú.
Kuíni nga Néná katsjájnú
Urii̱n ko̱jo Tumii̱n,
kó chináꞌmii̱ kui katsꞌénjnú.
10Jún boá xi ndyi̱bokoyájnúu̱ xota̱ na̱xi̱ńdaá
nga sa̱ꞌínkjatjosón kjo̱a̱botíxomaa̱ Néná,
kó nga ki̱a̱ nga̱són ṉchandikoón Néná
si̱ꞌankꞌasꞌienjnú ngayeje to̱ko̱ya kjo̱a̱tjó.
11Míꞌáa̱ Néná nga sa̱ꞌínchikonñéjnú,
kó nga tsja ka̱maa̱ nga skjíbé
ni xi niꞌánjnú kjo̱a̱a̱ kui,
Kó ti̱ míꞌáa̱ tsi̱ꞌe̱ nga sa̱ꞌínkjié
ngayeje kondra̱jnú,
tsi̱ꞌe̱ nga nginijánjín
kjo̱stjíe̱n kondra̱ tsa̱jún.
12Sꞌe̱ bi̱ katsoó xota̱ tji̱e̱e̱ Benjaa̱:
Néná tjoó jún, kó tsꞌénkónjnú,
¡Néná ngatsjéni̱xtjin nga ki̱a̱ kꞌuijñá ki̱a̱ na̱xi̱ xi tsa̱jún!
13Sꞌe̱ bi̱ katsoó xota̱ tji̱e̱e̱ Kosiee̱:
Néná sa̱ꞌínchikonñé kꞌijñájnú,
kó jmíni̱xtjin xcha̱jaa̱ stsé,
ti̱nde jmíni̱xtjin xcha̱jaa̱ ndáfoaa̱ ndáńchꞌi̱ xi na̱nga̱a̱.
14-15Ngaskande nínga síndo na̱xi̱ xi nkꞌaa̱,
Néná tsja̱ajnú nga ngo noó
tsie ni xi ka̱maxchá.
16Tꞌanangii̱ boá xi tsja̱ajnú
ni xi nda ngase xi tsjá,
kó ngatsjéni̱xtjin nga kꞌuiéjnú
kjo̱a̱niꞌánchikonñeé Néná.
Jún boá xota̱ xi tjó ngasee̱
kui Néná xí jatjokjà ngi̱jii̱n yá sarsaa̱.
17Jájuún ndíjnú,
Efraii̱n ko̱jo Manasee̱,
kuí boá xi ꞌniú ngase
xikó maá cho̱yojo toro̱ ko̱jo cho̱ búfalo̱.
¡Yáyojójnú boá xi sa̱ꞌínkjiéni
ngaskande kondra̱ xi kjin ngase síndoo̱!
18Sꞌe̱ bi̱ katsoó xota̱ tji̱e̱e̱ Isakaa̱r ko̱jo Sabuloo̱n:
Jún boá xi nda ni ko̱ti̱ñájnú ko̱jo si̱ꞌantsiéjnú
kꞌi̱e̱ tꞌanangii̱ ko̱jo ngi̱jin ndáchíkoón.
19Ki̱a̱ ndáchíkoón ko̱jo nga̱ndee̱
ko̱ꞌna̱xiéjnú tsie kjo̱a̱cho̱n.
Kꞌuiyàjnúu̱ xota̱ na̱xi̱ńdá xí síndotꞌaa̱,
tsi̱ꞌe̱ nga kji̱ndi̱bá ki̱a̱ na̱xi̱jnú,
kó nga ki̱a̱ sa̱ꞌínkꞌasꞌiee̱n kjo̱a̱tjó Néná.
20-21Sꞌe̱ bi̱ katsoó xota̱ tji̱e̱e̱ Ngaa̱nd:
¡Ngatamachikonñé Néná,
kui xi achichí tsie tꞌanangi katsjájnú!
¡Jún boá xi xikoó ngo xandi̱je̱
xi je tikónda nga sa̱ꞌínꞌoón xi je kasakoo̱!
Jún boá xi kachjábéjnú tꞌanangi xi nda ngasee̱
ngatꞌa̱ kandaꞌyáꞌénjnúu̱ Néná kjo̱a̱a̱ ngayeje nii̱,
kó ko̱jo kjo̱a̱a̱ nga kixi̱ kamájnú
kjiꞌanga chjiéngá bo̱a̱ kiniꞌánjnú.
22Sꞌe̱ bi̱ katsoó xota̱ tji̱e̱e̱ Ndaa̱n:
Jún boá xi xikónií ngo ndií cho̱,
xi kjínkꞌá ndeskande nangi Basaa̱n.
23Sꞌe̱ bi̱ katsoó xota̱ tji̱e̱e̱ Neftalii̱:
Ngayeje ni xi niꞌánjnú
tsjá maá Néná.
Kuíni nga Néná sa̱ꞌínchikonñéjnú,
kó ngo tꞌanangi xi je tsja̱ajnú,
xi tikón ngaskande xtji̱e̱e̱n na̱ngii̱
ngi̱ndiò tsie Ngalileaa̱.
24Sꞌe̱ bi̱ katsoó xota̱ tji̱e̱e̱ Asee̱r:
¡Néná tsie ngase ngatsꞌénchíkonñéjnú
ta̱bo̱a̱jiín xi ngase xota̱ tji̱e̱e̱!
¡Ngayeje xota̱ Israee̱l
ngatakó nga tjoó jún!
Achichí tsie
istii̱ toꞌolibo̱ kꞌuiéjnú.
25Tji̱e̱nga tjínjnú kjo̱a̱mindyion,
jún boá xi ngo xota̱ na̱xi̱ńdá xi achichí ꞌniú ka̱majnú,
kó kꞌuiéjnú na̱xi̱ńdáꞌniú xi ta̱nisién nda tjíchjáꞌyá.
26Kó nga fetꞌani, Moisee̱ bi̱ katsoó ngayeje xotaa̱:
¡Jún xota̱ Israee̱l,
jmíjín ingo ne xi xikoó Néná!
Néná boá xi nda̱ ree̱ ndiꞌakꞌajmii̱,
kó ngatsjéni̱xtjin nga ko̱síko̱jójnú.
27Néná kuí boá Ne xi tikón ngatsjéni̱xtjii̱n,
kó ngatsjéni̱xtjin nga skónjnú,
kuí boá xi sa̱ꞌín nga ko̱nga kondra̱jnú,
tsi̱ꞌe̱ nga si̱ꞌankjiejnú.
28Jè ka̱ma nga ka̱maꞌniátakónjnú nga ku̱i̱ndyionjnú,
ko̱jo nga tsja ka̱majnú nga kꞌuiéjnú kjo̱a̱xioó.
Jmí ni̱xtjin xcha̱jàjnú pan ko̱jo bino̱,
ngatꞌa̱ Néná boá xi ko̱síndaá tꞌanangijnú.
29¡Achichíra̱ tsjajnú jún xota̱ Israee̱l,
ngatꞌa̱ Néná boá xi tsꞌaxiéꞌájnú!
Néná boá xi tsꞌénkónjnú, kó tsꞌénbosikójojnú.
¡Jmíjín xi bo̱a̱ tsꞌén ka̱maa̱ ko̱síko̱jójnú!
¡Jún boá xi ni̱ma̱kjo̱a̱ kꞌuijñájnú kondraa̱,
kó ngindie ndsa̱kojnú kꞌuíndojnú!
Currently Selected:
Ndeuteronomio̱ 33: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
