Ndeuteronomio̱ 32

1Ndiꞌakꞌajmi ko̱jo tꞌanangi,

¡tasiénijónjnúu̱ énna!

2Ni xí chjiéngá xiyà an

achichí nda xikó maá stseé,

kui stsé xí nda tsꞌeén xka̱a̱

ko̱jo kꞌijñá xí tjín nínga jno̱o̱.

3Mejénna sa̱ꞌintsjáa̱ Néná,

kó jún, ¡cha̱ndikónjnú ngaꞌniuú!

4Kuí boá xi tsꞌénkónná kjo̱a̱a̱ ni xi ndajiín.

Kuí boá xi ngo Néná xi kixi̱ ko̱jo xi maꞌniátakón,

ngatsjéni̱xtjin nga kixi̱ tsꞌensénná.

5-6Jún xota̱ Israee̱l,

Néná boá xi katsꞌéndajnú,

kuí boá xi xikoó tsi na̱ꞌmijnú.

Ta̱nga jún ndajínjnú xota̱,

kó chꞌo kiꞌmíjnúu̱.

Kitikjo̱a̱ ko̱jo chi̱ni je kamájnú,

kó nde tsoboájínjnú nga ndií kui ka̱majnú.

¡Xota̱ xi nde tsjájiín ndokꞌóchji̱ì boá jún!

7Ti̱ꞌankjójnú kótsꞌèn

kjindibáni xota̱ nangijnú.

Na̱ꞌmijnú ko̱jo ngito̱ko̱jnú

ka̱tso̱yàjnú ni xi kamá ngasꞌe̱.

8Kjiꞌanga Néná xí tikón ndiꞌakꞌajmii̱ akjángá xota̱ nga̱sondiee̱,

kó kjín nangi ko̱jo na̱xi̱ńdá katsꞌén,

katsjaá nga ngo nga ngo tꞌanangi xi tsoboaá,

ta̱nga jún xi xota̱ Israee̱l,

nda ngase katsꞌénjo̱jnú jún:

9Jún boá xi Néná jaꞌájinjnú

tsi̱ꞌe̱ nga jún xi ka̱majnú xota̱ na̱xi̱ńdaá kui.

10Kjiꞌanga Néná kasakoo̱ jún,

ki̱a̱ kisꞌiṉtso̱majnú nangi kixií,

ki̱a̱ nangi xi tjo̱o̱ atíchajon,

ta̱nga Néná iskjíbengíjnú,

kó askonjnú xikoó tsi ndyi̱ko̱n kui tsꞌénkoón.

11Néná tsꞌénkónjnú jún

xikó má tsꞌén koón ndií ngo ja̱.

Néná ngatsjéni̱xtjin nga tiña tikóntꞌajnú

tsi̱ꞌe̱ nga ko̱síko̱jójnú nga ku̱i̱ndyionjnú nga̱sondie.

12Néná boá xi kistsoꞌbátjoón xota̱ na̱xi̱ńdaá,

kó jmí tsi kje̱ꞌe ne xi kamáchjieén tsi̱ꞌe̱ nga asíko̱jo.

13Néná boá xi kijíjo̱jnú nga kiniꞌánjnú,

ki̱a̱ na̱xi̱ nkꞌaa̱ na̱xi̱ńdaá.

Kó katsjájnú nga kichiniejnú to xi maxchá nínga jno̱o̱,

ngo ndi̱jo̱ tsꞌaxiéni ntsjién

tsi̱ꞌe̱ nga ka̱ma ixi ndso̱ꞌbájnú,

kó ngo ndi̱jo̱ xi tajá

tsꞌaxiéni isti̱ xi kamáchjiénjnú.

14Cho̱yojojnú, ko̱jo tindso̱ ínchjínjnú, ko̱jo cho̱tsa̱nga̱jnú

kaꞌnaxiéjnúu̱ ntsjén ko̱jo ni xi tsꞌéntájání kjixoo̱,

nga̱són yámíxa̱jnú

ikꞌíjñanda yojo xi nda ngasee̱ cho̱ xi maxchájnú.

Kichiniejnú pan xi to ndso̱ko̱a̱n ṉño̱ xi nda ngasee̱ kiniꞌándajo̱,

kó kiꞌyójnú binoo̱ tostsi̱je̱è xí nda ngasee̱.

15Ta̱nga xota̱ Israee̱l ngije achichí nda kisꞌińdo,

katsꞌénchíyà Néná,

¡katsꞌénchíyà kui xi katsꞌénda!

Kamáchꞌoó nga Néná askoo̱n,

kui Néná xi ja̱bo̱a̱ je tsꞌaxiéꞌá.

16-17Katsꞌénxtií Néná,

kó Néná kamáchi̱ni̱,

nga katsꞌéntsjaà ne xi kuijín,

¡ne xi tsꞌénda xotaa̱, xi ata̱ chꞌokoón,

kui xi nde xota̱ xi xchaá kamábejín ꞌyání bo̱a̱!

Kó ti̱ kuí xí katsꞌénkꞌasꞌiennii̱ kjo̱a̱tjó

kui nee̱ ko̱jo kui xindajiín.

18Xota̱ Israee̱l katsꞌénchíyà Néná,

kui Néná xí katsjaá kjo̱a̱mindyion.

Íjñá masien kui xi katsꞌénda,

kó katsꞌénchíyà kui xi askoo̱n.

19Kuíni nga Néná katsꞌénxchán,

kó índotꞌaxín kui xotaa̱.

20Sꞌe̱ jaskan bi̱ katsoó xota̱ na̱xi̱ńdaá:

Sa̱ꞌinkꞌijñá so̱bo̱a̱jnúꞌun,

kó ki̱a̱ xcha̱jnú ni xi ka̱majnú.

Nga ja̱koxi̱, ndajínjnú xota̱,

májín maꞌniátakónjnú jún.

21Niꞌándajnú ngo ne xi kuijín,

tsi̱ꞌe̱ nga ka̱machi̱ni̱ an,

ta̱nga jún boá xi ka̱machi̱ni̱jnú,

ngatꞌa̱ kje̱ꞌe na̱xi̱ńdá kosikjonijnúꞌun,

xota̱ xi nde jmí ni bejín xi kosikjonijnúꞌun,

xota̱ xi nde ngo na̱xi̱ńdá májín.

22Achichí je kiniꞌánxtíjnúꞌun

nga kjo̱a̱xchánna je xikó maá ndiꞌí,

kó kuí ndiꞌií xi sa̱ꞌinkjié an

ngindie xi ꞌniú na̱nga̱

ko̱jo ngindie se na̱xi̱i̱.

23Sa̱ꞌinkꞌatio mára an kjo̱a̱ni̱ma̱,

sa̱ꞌinꞌón máráa̱ nga sa̱ꞌinkjièn án yáyojóna.

24Kjindiaá ko̱jo chiꞌii̱n,

kuí boá xi sa̱ꞌínkjié kjo̱a̱mindyioo̱n.

Ki̱a̱ sangiyaniéjnúꞌun

cho̱ tamá ko̱jo ye̱ xi tsꞌenkꞌiénná.

25Ngi̱ya ndi̱yàtié si̱ꞌankꞌien ndíjnú,

kó ngayeje xtín xota̱ xi sku̱i̱e̱ kui ni chꞌokjiꞌii̱,

nga ko̱yà xota̱ xi xchaá,

já xo̱ngo̱ò ko̱jo jákjíndií.#32:25 Já xo̱ngò ko̱jo ínchjín xo̱ngò, ndí jákjíndí ínchjín ko̱jo ndí jákjíndí xíꞌín boá xi chji̱a̱ xo̱jo̱o̱n kꞌi̱e̱e̱.

26Ngaskande katsꞌenkjó án

nga sa̱ꞌintsojoboa an

nga kjín na̱xi̱ńdá sa̱ꞌinkjí an,

kó nga nde ngojín xi sa̱ꞌínkjaꞌátsjien ngase.

27Ta̱nga kamámejénjínna bo̱a̱ katsꞌen an

ta̱ngatꞌanii̱ xota̱ xi kondra̱na,

ngatꞌa̱ be an nga ko̱jno̱kiena,

kó ngaskande sa̱ꞌínkjó nga ánjín

xi atijée̱ xota̱ Israee̱l,

kó sa̱ꞌínsꞌijin nga kuí boá xi bo̱a̱ katsꞌén,

¡kui ko̱jo ngaꞌniú je xi tjiín!

28Jún xota̱ Israee̱l,

achichí chi̱nijnú nga makjínjínjnú.

29Tsi ngi̱chíra xi̱ꞌinkjo̱a̱jnú katsaki,

xcha̱ra̱jnú kjo̱a̱botíjé xi sa̱kójnú.

30Kótsꞌèn makjínjnú jún

nga ta̱ ngo tsí xota̱ Israee̱l

xi ngo mi̱ jájún tsangatji̱ngii̱.

Kótsꞌèn makjínjnú jún nga jó jájún

xi tie mi̱ xota̱ tsangatji̱ngii̱.

¡Tsi ánjín xi tsꞌénkónjnúꞌun

nde katsjandièjín an nga jún xi si̱ꞌánjnú tsobo̱a̱,

kó jún nde kamájínjnú kiniꞌánjnúu̱ kui xotaa̱ tsobo̱a̱!

31Be nda nda xota̱ xi kondra̱ná

nga ni xi ne ndyi̱tsoó, jmí ngaꞌniújiín,

¡ngaꞌniuú tsi̱ꞌe̱ Néná boá!

32Kui xotaa̱ kuí boá xi xikoó xota̱

xi chji̱a̱ni Sondoma̱ ko̱jo Ngomorra̱.

Kuí boá xi xikoó yaá tostsi̱je̱è xi ndajín,

kui xi ta̱ tostsi̱je̱è xi sá tsí xi tsjá.

33¡Ngaskande bino̱ xi tsꞌénda

xi bo̱a̱ kon xikó maá xaán ye̱!

34-35Néná jè bi̱ katsó:

Jè tsá kotijée̱,

¡jè tsá sa̱ꞌinkjié an!

¡Jè ta̱ tsꞌénkoya an kóchon nga bo̱a̱ sa̱ꞌin an,

tsi̱ꞌe̱ nga tsjachjíi̱ ni xi tsoboaá!

36Kjiꞌanga je ngiti̱ jmíjínná ngaꞌniú,

Néná boá xi kꞌo̱xiéꞌáná,

ngije sku̱i̱e̱ná nga je mejeén tjiniꞌánchajaná,

ni̱ma̱ ka̱maa̱ ñá,

37kó bi̱ ka̱tso̱o̱ kondra̱ná:

Ñá síndo kui ne

xi achichí kamáꞌniátakónjnú.

38Ñá síndo kui nee̱,

kui xi kiniꞌánkꞌasꞌienjnúu̱ kjo̱a̱tjó.

¡Chji̱a̱ꞌajnúu̱ ngotꞌe̱ ꞌne̱, tsi̱ꞌe̱ nga kji̱ndi̱bákasikójojnú!

39¡Ngatamakjínjnú ngotꞌe̱ ꞌne̱,

nga an ta̱ ngo tsi má an xi Nejnú!

Ta̱ an tsí xi tsꞌendaya an nínga oo̱n,

¡ta̱ an tsí xi tsja an kjo̱a̱mindyion,

kó ta̱ an tsí xi ka̱ma kjoaꞌaxín an!

¡Ngojín xi ka̱maa̱ kjo̱tjongii̱ yojoo̱!

40Kjininkꞌá an ndsa̱ án ndiꞌakꞌajmii̱,

kó ꞌbijñángí an kjo̱a̱mindyion ngatsjéna,

41nga sa̱ꞌinyojó an ki̱cha̱ndojóna

tsi̱ꞌe̱ nga sa̱ꞌingojo an kjo̱a̱a̱ kondra̱na.

¡Tsjá máráa̱ ni xi tsoboaá

kui xota̱ xi chꞌoo̱ an!

42¡Sa̱ꞌinkꞌandyi̱ mára an yáyojóna

jiín kui xota̱ xi kꞌuíndo ꞌniuú!

¡Kotiesén mára an

ngayeje ngito̱ko̱o̱ jájuún!

43Kó jún xota̱ na̱xi̱ńdá xi tiña tindyiónjnú,

tsjatsꞌèn nijan tindyiónjnú, ko̱jo xota̱ na̱xi̱ńdaá Néná,

ngatꞌa̱ kuí boá xi sa̱ꞌíngojo

kjo̱a̱a̱ xotaa̱ xi kiniꞌánkjiesoón.

¡Néná sa̱ꞌínjetakoón xota̱ na̱xi̱ńdaá

kó sa̱ꞌíntsjiejón jeé na̱xi̱ńdaá!

44-45Kó tji̱e̱nga Moisee̱ kisie kui soó ngindyi̱ko̱n xota̱ na̱xi̱ńdaá, Josuee̱ ki̱a̱ kisꞌijñatꞌaa̱ ngatsjéni̱xtjin.

Kjo̱a̱botíxoma xi fetꞌani xi katsjá Moisee̱

46Ngi̱chií sájín Moisee̱, bi̱ katsoó xota̱ na̱xi̱ńdaá:

Nda má ti̱ꞌankjójnú kjo̱a̱a̱ ngayeje ni xi je akoyájnúꞌun, kó tatíxomájnúu̱ ndí xíꞌínjnú ko̱jo ndí ínchjínjnú, tsi̱ꞌe̱ nga ku̱i̱ntꞌiéꞌén nga ngo nga ngo kui kjo̱a̱botíxomaa̱. 47Ja̱koxi̱ boá ni xi tꞌíxiánjnúꞌun. Tsi si̱ꞌankjatjosónjnú, achichí kjín nó ka̱majnú ki̱a̱ tꞌanangi xi ngotꞌe̱ je si̱ꞌánjnú nga ku̱i̱xkántjéjnú, kui xi tikón xi ingoboaá ndejèꞌ Jorndaa̱n.

Moisee̱ kamábe tꞌanangi xi Néná katsóyàtjón nga tsja̱á

48Ti̱kuii ni̱xtjin Néná, bi̱ tsꞌén atíxomaa̱ Moisee̱:

49Mejénna nga kꞌuin jí ki̱a̱ nangi Abarii̱n xtji̱e̱e̱n nínga na̱xi̱i̱, kó tꞌenijíngí nínga nkꞌaa̱ na̱xi̱ Neboo̱, kui xi tikón ki̱a̱ nangii̱ xota̱ tji̱e̱e̱ Moaa̱b, kje̱n na̱xi̱ńdáꞌniú Jerikoo̱. Kó ndeskande ki̱a̱a̱ ka̱ma xche̱ ji nangi Kanaa̱n, kui tꞌanangi xi tsjàa̱ xota̱ Israee̱l.

50Kó ki̱a̱ na̱xi̱ Neboo̱ ko̱yà jí, kó ki̱a̱ kjónijiín, xikótsꞌèn akjanijín ntsꞌie ji Aaroo̱n kjiꞌanga kꞌien ki̱a̱ na̱xi̱ Oo̱r. 51Aaroo̱n ko̱jo ji kandaꞌyáꞌénjínjnúꞌun ki̱a̱ na̱xi̱ńdá Kandee̱, kjiꞌanga kixindyionjnú ki̱a̱ tꞌa ndáńchꞌi̱ xi tjitjó má ndáfoaa̱ ki̱a̱ Meribaa̱, kui xi tikón ki̱a̱ nangi kixií nangi Sii̱n. Kó ngindyi̱ko̱n ngayeje xota̱ Israee̱l kamáyàndikónjínjnúꞌun. 52Kuíni nga tsjandièjáa̱n nga ku̱i̱tjásꞌi̱n ji ki̱a̱ tꞌanangi xi katsóyàtjón an nga tsjajnúꞌun, kó ta̱ kjin tsí nga ka̱ma xche̱ ji.

Currently Selected:

Ndeuteronomio̱ 32: MAIX

Highlight

Compare

Copy