Xota̱ Kolosa̱ 4

1Jún xi ndi̱a̱jnú, ta̱ són ngatamajnú ko̱jo ni xi kixi̱ ti̱ꞌanjo̱jnú moso̱jnú, ngatjaꞌátsjienjnú nga jún ti̱ tikónjnú ngo Ndi̱a̱ ndiꞌakꞌajmi jàn nga.

2Ngatsjéni̱xtjin ndókjo̱a̱jnúu̱ Néná. Ti̱ndyiondajnú, kó te̱ꞌéjnúu̱ ndokꞌóchjì Néná. 3Ndókjo̱a̱tjéjnú ji̱n, tsi̱ꞌe̱ nga Ndi̱a̱ná tsja̱ndièjne̱ nga kꞌuiyájne̱ eén, kó kꞌuiníjmi̱jne̱ ni xi kisꞌijña ꞌma ngasꞌe̱, kó je tjibóko ngotꞌe̱ ngatꞌaa̱ Kristoo̱, ngatꞌa̱ ta̱ngatꞌanii̱ kui nii̱ nga ndo̱bo̱a̱yà tikòn an. 4Chji̱a̱ꞌajnúu̱ Néná tsi̱ꞌe̱ nga an ka̱ma koko cha̱n cha̱n an kui eén, xikótsꞌèn nga chjiéngá xiyà an.

5Ti̱ndyiónjnú xikoó xota̱ xi kjínkón ngi̱jii̱n xota̱ xi sꞌijinjiín Néná, kó ni xi nda ti̱ꞌánjnú nga kꞌuiéjnú ngi̱ndie. 6Nga ko̱ndókjo̱a̱jnú chjiéngá nda nga tsó énjnú, kó tsjangatamaa̱ xotaa̱, tsi̱ꞌe̱ nga xcha̱jnú kótsꞌèn ko̱ndókjo̱a̱jongajnú nga ngo nga ngo xotaa̱.

Pabloo̱ bi̱ tsꞌén katsꞌénkjietꞌa xo̱jo̱o̱n

7Xikó tsꞌén tikòn an kꞌi̱e̱e̱, ndí nda̱ ntsꞌié xi ꞌmí Tikikoo̱ ka̱tso̱yàjnú, kui nda̱ xi tjóna ko̱jo xi nda tjítsꞌén xaá nga mosoo̱ Ndi̱a̱ná xikoó an. 8Kuí nda̱a̱ xi tsꞌéntsangiyajnúꞌun jún, tsi̱ꞌe̱ nga ka̱tso̱yàjnú kótsꞌèn tindyionjne̱, ko̱jo nga tsja ngaꞌniuú ini̱ma̱jnú. 9Ki̱a̱ nijan kjo̱jo nda̱ xi ꞌmí Onésimoo̱, ndí nda̱ ntsꞌié xi tjóna xi ꞌniátakón an, xi nda̱ nangijnú ma, kuí jaá xi ka̱tso̱yàjnú ngayeje ni xi kjima kꞌi̱e̱e̱.

10Nda̱ xi ꞌmí Aristarkoo̱, xi nijan tikónjo̱ an ndo̱bo̱a̱yà, tinde xò bo̱a̱ tsó, ko̱jo nda̱ xi ꞌmí Markoo̱, xi ntsꞌi̱e̱xtio ma Bernabee̱, jún je kandaꞌyájnú én kjo̱a̱a̱ kui nda̱a̱. Tsi ki̱a̱ kjo̱chókónjnú nda ti̱ꞌanjo̱jnú. 11Ti̱ bo̱a̱ ti̱ tsꞌén tinde xò bo̱a̱ tsó nda̱ xi ꞌmí Kjisoo̱, kui xi Justo̱ ꞌmií nga. Ta̱kuítsí kui já jundíoo̱ xi ndyi̱bosikójona kjo̱a̱a̱ xá xi tsꞌén an ngandaa̱ kjo̱a̱botíxomaa̱ Néná, kó kuí kui jaá xi tsjangaꞌniúna kjimana. 12Tinde xò bo̱a̱ tsó nda̱ xi ꞌmí Epafraa̱, xi nda̱ nangijnú ma, xi ti̱ mosoo̱ Kristoo̱ nga, kui nda̱a̱ ngatsjéni̱xtjin nga ngayeje ini̱ma̱a̱ nga tsꞌénmíꞌatjéjnú jún nga chji̱a̱a̱ Néná, tsi̱ꞌe̱ nga ꞌniú ku̱i̱ndyiajnú nga ka̱mando̱jo kjin kjinjnú nga si̱ꞌánjnú ngayeje ni xi mejeén Néná. 13An xí chistiko̱ an kjo̱a̱a̱ nga achichí nda̱ kjimaa̱ jún nda̱ xi ꞌmí Epafraa̱, ko̱jo kjo̱a̱a̱ xota̱ xi síndo na̱xi̱ńdáꞌniú Laondisea̱ ko̱jo na̱xi̱ńdáꞌniú Yerápoli̱. 14Tinde xò bo̱a̱ tsó Rkaa̱ kui nda̱ xi chji̱ni̱e̱ndiki tjoó, ko̱jo nda̱ xi ꞌmí Ndemaa̱.

15Tinde bo̱a̱ tꞌínjnú ntsꞌié xi chji̱a̱ni na̱xi̱ńdáꞌniú Laondisea̱, ti̱ꞌantindéjnú na̱ Ninfaa̱, ko̱jo xota̱ na̱ngo̱xi̱ xi matikó ndiꞌaa̱. 16Kó ngije kiniꞌányà ngi̱jinjnú kui xo̱jo̱o̱n, nangíyájnúu̱ xota̱ na̱ngo̱xi̱i̱ na̱xi̱ńdáꞌniú Laondisea̱ tsi̱ꞌe̱ nga si̱ꞌanyaa̱ nga, kó ti̱ ti̱ꞌanyàjnú ki̱a̱a̱ kui xo̱jo̱n xi kanangiyaa̱ kui xotaa̱. 17Bi̱ tꞌínjnúu̱ nda̱ xi ꞌmí Arkipoo̱: “Ti̱ꞌin ji ngo kjo̱a̱ꞌniú nga nda si̱ꞌinkjatjosén ji kui xá xi katsjaá Ndi̱a̱ná.”

18An Pabloo̱, tsꞌéntsangiyajnúꞌun ngo tinde ngi̱yaa̱ kui xo̱jo̱o̱n. Ngatjaꞌátsjienjnú nga ndo̱bo̱a̱yà tikòn an. Néná ngatsjájnú kjo̱a̱ndaa̱. Bo̱a̱ kjiꞌi.

Currently Selected:

Xota̱ Kolosa̱ 4: MAIX

Highlight

Compare

Copy