1 Xota̱ Tesalónika̱ 1
1
Bi̱ tsꞌén katsꞌéntinde Pabloo̱ xota̱ na̱ngo̱xi̱ xi chji̱a̱ni Tesalónika̱
1An Pabloo̱, ko̱jo Silbanoo̱, ko̱jo Timoo̱ niꞌántindejne̱ jún xi xota̱ na̱ngo̱xi̱i̱ Néná xí Na̱ꞌminá, ko̱jo Ndi̱a̱ná Jesukristoo̱, xi tindyiónjnú na̱xi̱ńdáꞌniú Tesalónika̱. Néná xí Na̱ꞌminá, ko̱jo Ndi̱a̱ná Jesukristoo̱ ngatsjájnú kjo̱a̱ndaa̱, ko̱jo kjo̱a̱xioó.
Bi̱ tsꞌén íni̱jmì Pabloo̱ kjo̱a̱a̱ chi̱bo̱a̱ xi katsꞌén xota̱ xi chji̱a̱ni Tesalónika̱
2Ngatsjéni̱xtjin boeꞌéjne̱ ndokꞌóchjì Néná, kjo̱a̱a̱ ngayeje jún, kó foaꞌátsjienjne̱ jún nga ndokjo̱a̱jne̱ Néná. 3Ngindyi̱ko̱n Néná xí na̱ꞌminá nga ngatsjéni̱xtjin foaꞌátsjienjne̱ jún, xikótsꞌèn sꞌijinjnú Néná, kó niꞌánjnú ni xi mejeén kui, ko̱jo xikótsꞌèn tjójnú, kó bosíko̱jojnú xingi̱jnú, ko̱jo kjo̱a̱a̱ nga ndyi̱niꞌánchíkjo̱a̱jnú kjo̱a̱ni̱ma̱ xi ndyi̱bitjatiójnú nga ndyi̱chiyájnúu̱ nga kꞌo̱xiéꞌájnú Ndi̱a̱ná Jesukristoo̱. 4Jún ntsꞌie, Néná tjoó jún, kó jè yàjne̱ nga kui xi jaꞌájinjnú jún. 5Ngatꞌa̱ kui éntjatsi̱e̱e̱ Jesukristoo̱ xi ikꞌíni̱jmìjne̱ jún, jmí tsi ta̱ én tsi nga ikꞌíni̱jmìjne̱, ngaꞌniuú Néná boá, kó A̱si̱énni̱xtjii̱n Néná katsꞌénxá, kó nde jó nde jánjín kamájne̱ nga ikꞌíni̱jmìjne̱. Kó ti̱ yàjnú jún, kótsꞌèn kixindyionjne̱ ngi̱jinjnú, ta̱ngatꞌanii̱ nganda tsa̱jún.
6Kó jún kachjaꞌángijnú ji̱n, kó ti̱ kachjaꞌángijnúu̱ Ndi̱a̱ná nga kixindyionjnú, ngatꞌa̱ ndatsi tsie kjo̱a̱ni̱ma̱ ikitjatiójnú nga kachjábéjnú eén Néná, ta̱nga A̱si̱énni̱xtjii̱n Néná katsjájnú kjo̱a̱tsja. 7Kó bo̱a̱ tsꞌén nga jún boá kui chi̱bo̱a̱ xi kijítji̱ngi ngayeje xota̱ xi sꞌijii̱n Néná xí chji̱a̱ni na̱xi̱ńdáꞌniú Masendonia̱, ko̱jo na̱xi̱ńdáꞌniú Akaya̱. 8Ngatꞌa̱ jún boá xi tjón kachjábéjnú eén Ndi̱a̱ná, kó kjimatsie ngase, jmí tsi ta̱ na̱xi̱ńdáꞌniú Masendonia̱ ko̱jo na̱xi̱ńdáꞌniú Akaya̱ tsí, mején ngayeje ngi̱ndie tjiyá xikótsꞌèn sꞌijinjnú Néná, kó ngaskande ngiti̱ chjiénjín nga tjín ni xi ko̱ndókjo̱a̱jne̱ ji̱n kjo̱a̱a̱ kui nii̱. 9Ngatꞌa̱ ti̱kuii kui xotaa̱ xi ndyi̱chji̱a̱ kjo̱a̱a̱ nga jún, nda tsꞌén kiniꞌánsénjne̱ nga jáchochonjne̱ ko̱jo xikótsꞌèn ikꞌíndomasienjnú a̱sie̱én ne xi tsꞌénda xotaa̱, tsi̱ꞌe̱ nga kiniꞌánjo̱ꞌojnú kui Néná xí tikoón, ko̱jo xi ja̱koxi̱i̱, 10kó ndyi̱chiyájnúu̱ nga ndiꞌakꞌajmii̱ kji̱ndi̱báni ndií Néná, kui xi Néná katsꞌénkjaꞌáꞌyaá ngi̱jii̱n xota̱ xi je jesoón, kui xi Kjisoo̱, kui xi kꞌo̱xiéꞌáná ni̱xtjin nga kjo̱a̱xcha̱án Néná kji̱ndi̱bánié kui nga̱sondiee̱.
Currently Selected:
1 Xota̱ Tesalónika̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
