Ni xi kamá 26

Bi̱ tsꞌén tsꞌaxiéꞌá yojoo̱ Pabloo̱ ngindyi̱ko̱n nda̱ re Angripaa̱

1Kó nda̱ re Angripaa̱, bi̱ katsoó Pabloo̱:

–Ka̱ma ko̱ndókjo̱e̱ ji kótsꞌèn ko̱ꞌna̱xiéꞌé yojòo̱.

Kósꞌe̱ Pabloo̱ iskjininkꞌa tsja, kó bi̱ katsó nga tsíchji̱a̱:

2–Kjén nga ta̱ tsjakjiꞌina nga ka̱ma kuichjiá an ngotꞌe̱ ngindyikin ji nda̱ re Angripa̱, tsi̱ꞌe̱ nga kꞌoxiéꞌá an yojona kjo̱a̱a̱ ngayeje ni xi ndyi̱bongítaꞌinna xota̱ jundíoo̱, 3ngatꞌa̱ jè yé yeje ji, nda̱ re, kjo̱a̱a̱ kjo̱a̱xchá xí tjiín xota̱ jundíoo̱, ko̱jo kjo̱a̱a̱ ni niꞌin xi chji̱a̱jo xkjín, ja̱ kuíni nga míꞌáꞌñaa̱ nga nda nda má ndaꞌyéní ni xi kuichjiá an.

Bi̱ tsꞌén kisꞌijña Pabloo̱ ngasꞌe̱

4Ngayeje xota̱ jundíoo̱ be kótsꞌèn kisꞌijña an ki̱a̱ nangina ko̱jo na̱xi̱ńdáꞌniú Jerusale̱n ndeskande koó nga kjindí án. 5Kó ti̱ be, kó ka̱ma ka̱tso̱yà tsi mejeén, nga ndeskande koó ngasꞌe̱ nga xikótsꞌèn ꞌniú kjo̱a̱kiti xi tjiín na̱ngo̱xi̱i̱ nga kisꞌijña an xikoó ngo nda̱ fariseo̱. 6Kó ngotꞌe̱ ꞌne̱, kꞌi̱e̱ tikòn an, tsi̱ꞌe̱ nga si̱ꞌanjéna, ta̱ngatꞌanii̱ nga tsꞌénkoyàa̱ kjo̱a̱a̱ ni xi Néná katsóyàtjón nga tsja̱á xota̱ tji̱e̱ xcháná, 7kó nga tiejó tji̱e̱e̱ xota̱ xi chji̱a̱ni Israee̱l ndyi̱koya nga Néná sa̱ꞌínkjatjosón kui nii̱, kó kuíni nga ndyi̱bendikón Néná, kó ndyi̱tsꞌènseén Néná nga ni̱xtjin ko̱jo nga ni̱xtji̱e̱n. Ta̱ngatꞌanii̱ kui kjo̱a̱chiyaá, ji nda̱ re Angripa̱, nga xota̱ jundíoo̱ ndyi̱bongítaꞌinna ngotꞌe̱. 8¡Mí ni! Ánní nga sꞌijinjínjnú nga Néná tsꞌénkjaꞌáꞌyaá xota̱ xi je jesoón.

9Ti̱ an bo̱a̱ tsꞌén katsꞌenkjó án ngasꞌe̱ nga chjiéngá tsie ni sa̱ꞌin an, tsi̱ꞌe̱ nga si̱ꞌankjie ngayeje xota̱ xi sꞌijii̱n jaꞌeén Kjiso̱ xi chji̱a̱ni na̱xi̱ńdáꞌniú Nasaree̱t, 10kó bo̱a̱ katsꞌen an ki̱a̱ na̱xi̱ńdáꞌniú Jerusale̱n, kó já ngito̱ko̱o̱ chináꞌmii̱ katsjánakjo̱a̱ nga kjín xota̱ tsjiee̱ Néná xí katsangisꞌien an ndo̱bo̱a̱yà, kó nda kasasienna nga kiniꞌánkꞌién kui xotaa̱. 11Kó kjín ndi̱yà katsꞌenjée̱ nga katsꞌée̱n kjo̱a̱ꞌniú tsi̱ꞌe̱ nga chꞌo ka̱tso̱ kjo̱a̱a̱ kjo̱a̱sꞌijii̱n, kó kui nii̱ katsꞌen an ngayeje ngi̱ya ndiꞌa nínga ndokjo̱a̱ eén Néná, kó achichí kamáxtína kondra̱ tsi̱ꞌe̱ kui jaá ngatꞌa̱ ngaskande na̱xi̱ńdá xi xín tsangatji̱ngíi̱.

Bi̱ tsꞌén íni̱jmì Pabloo̱ xikótsꞌèn kisꞌijii̱n Néná

(Nxk 9:1-19; 22:6-16)

12Kó kui xá tsꞌénfí an na̱xi̱ńdáꞌniú Ndamasko̱, nga katsjánakjo̱a̱ nga katsangiyana já ngito̱ko̱o̱ chináꞌmii̱, 13ta̱nga ki̱a̱ ngi̱ya ndi̱yà boá, nda̱ re Angripa̱, nga ndisꞌueé, kamábe an ngo ndiꞌí xí kjindibáni ndiꞌakꞌajmi jàn, ngo ndiꞌí xí ꞌniú ngase ta̱bo̱a̱jiín ndiꞌií tsꞌueé, xi kitíniéna an ko̱jo já xí nijan tjimájo̱na, 14kó ngayejejne̱ nga tsꞌákajne̱ tꞌanangii̱, sꞌe̱ tsintꞌie an ngo nda̱ xi chji̱a̱ én ebreo̱ xi bi̱ katsóna: “Saulo̱, Saulo̱, míkjo̱a̱a̱ nga timiyitji̱nginí. ¡Ti̱ jíní xi tiꞌniꞌínꞌíi̱n yojòo̱, xikoó tsi ti̱ jii tiꞌbée̱ ngo ndaꞌyáńtsꞌén yojòo̱!” 15Kó an bi̱ kixiáa̱n: “ꞌYá jií bo̱a̱ Ndi̱a̱.” Sꞌe̱ Ndi̱a̱a̱, bi̱ katsóna: “Án boá xi Kjisoo̱, kó án boá xi timiyitji̱nginí. 16Ta̱nga ti̱sítji̱n, kó ta̱si̱nkixi̱, ngatꞌa̱ kꞌi̱e̱ akoo yojona tsi̱ꞌe̱ nga tsjaxaá, kó moso̱na ka̱ma ji ko̱jo chistikoo̱ ni xi je kamáyè ngotꞌe̱ ko̱jo ni xi sꞌe̱ xche̱ nga kokòo̱ yojona, 17kꞌoxiéꞌañaá ngi̱ya tsja xota̱ xi jundío̱ ko̱jo xota̱ xi jundío̱jín, kui xi tsꞌéntsangiyàa̱ ji ngotꞌe̱, 18tsi̱ꞌe̱ nga chjáxꞌé jí ndyi̱ko̱n, kó ngiti̱ nínga jñójín kꞌuitsómá ngase, ta̱sá nínga tsijen ngatꞌítso̱ma, tsi̱ꞌe̱ nga ngiti̱ kuijín ngaꞌniuú xindajín Satanaa̱ kꞌuitsómátji̱ngii̱, nga ta̱sá Néná ngatꞌítso̱matji̱ngii̱, tsi̱ꞌe̱ nga sꞌijii̱n an, kó sa̱ko̱ó kjo̱a̱niꞌánjetakoón jeé, ko̱jo kui ngi̱ndie xi katsó Néná nga tsja̱á xota̱ xi je katsꞌéntsjie yojoo̱.”

Bi̱ tsꞌén tsintꞌiéꞌeén Pabloo̱ ni xi akakoo̱

19Kó bo̱a̱ kjiꞌi kui nii̱, nda̱ re Angripa̱, kó bo̱a̱ tsꞌén katsꞌenkjatjosón an ni xi akóna Néná xi kjindibáni ndiꞌakꞌajmi jàn, 20kó kuíni nga tjón má xota̱ xi chji̱a̱ni na̱xi̱ńdáꞌniú Ndamasko̱ katsóyàa̱ eén Néná, sꞌe̱ jaskan xota̱ xi chji̱a̱ni na̱xi̱ńdáꞌniú Jerusale̱n, ko̱jo ngayeje xota̱ xi chji̱a̱ni nangi Jundea̱, kó ti̱ katsóyàa̱ xota̱ xi jundío̱jín nga, katsóyàa̱ tsi̱ꞌe̱ nga sa̱ꞌínkꞌoyà yojoo̱ jé xí ndyi̱tsꞌèn, kó nga ta̱sá Néná ko̱ngase ko̱jo nga sa̱ꞌín ni xi ndakjiꞌi, kósꞌe̱ bo̱a̱ tsꞌén ko̱kó yojoo̱ nga ja̱koxi̱ nga je ndi̱ya̱à Néná tjimá. 21Ta̱ngatꞌanii̱ kui nii̱ nga xota̱ jundíoo̱ katsoboána ndi̱tsee̱n na̱ngo̱xi̱i̱, kó ngaskande kamámejeén nga katsꞌénkꞌiénna. 22Ta̱nga ta̱ngatꞌanii̱ nga Néná asíko̱jona kuíni nga kixi̱ tikòn an ngotꞌe̱, nga tsꞌénchji̱a̱jo an kjo̱a̱a̱ ndi̱ya̱à Néná ngayeje xota̱, xi xchá xí kjindí, jmíni̱xtjin nga kje̱ꞌe ni xi tsꞌénchji̱a̱jo an kjo̱a̱a̱ ni xi tsíchji̱a̱ jáchji̱ni̱e̱ꞌe̱én Néná, ko̱jo Moisee̱ nga tsíchji̱a̱ kjo̱a̱a̱ ni xi ka̱ma: 23Nga Kristoo̱ chjiéngá ko̱yà, ta̱nga jaskan ngije kꞌien, kuí xí tjón ka̱ma nga kjo̱a̱ꞌáꞌyaá, kó nga kuí xí ku̱i̱ꞌíni̱jmì kjo̱a̱a̱ ndiꞌií, tsi̱ꞌe̱ nga kjo̱tjoꞌaa̱ yojoo̱ xota̱ na̱xi̱ńdaá ko̱jo xota̱ xi jundío̱jiín.

Pabloo̱ bi̱ tsꞌén ꞌniú tsíꞌaá nda̱ re Angripaa̱ tsi̱ꞌe̱ nga sꞌijii̱n

24Kó tji̱e̱nga Pabloo̱, bi̱ tjítsó kjo̱a̱a̱ nga tsꞌénꞌboxiéꞌá yojoo̱, nda̱ xi ꞌmí Festoo̱ ngaskande ꞌniú má tsíchji̱a̱ nga bi̱ katsó:

–¡Tsobeéri, Pabloo̱! Kjo̱a̱a̱ nga ta̱ jaꞌatio nga tichjatꞌayé ji xo̱jo̱n, kuíni nga je kjimatsobé maá.

25Ta̱nga Pabloo̱ bi̱ katsó:

–Tsobéjínna, ji nda̱ Festo̱, ta̱sá ni xi tsꞌénchji̱a̱ an xi tjiín ngakixi̱, kó ja̱koxi̱ nga bo̱a̱ kjiꞌi. 26Ja̱ ki̱a̱ tikón ki̱a̱a̱ nda̱ re Angripaa̱ xi be nda nda kui nii̱, kó kuíni nga tsakjonjín an nga tsꞌénchji̱a̱ an ngindyi̱ko̱n kui, ngatꞌa̱ beriíko̱n an nga ja̱koxi̱ nga ko̱jo kui be ngayeje kui nii̱, ngatꞌa̱ jmí tsi ngo ngi̱ndyióngi̱nijon ꞌma nínga kamá kui nii̱. 27A sꞌijii̱n ji nda̱ re Angripa̱ ni xi katsꞌénꞌindó jáchji̱ni̱e̱ꞌe̱én Néná. Jè be an nga sꞌijii̱n ji.

28Kó nda̱ re Angripaa̱ bi̱ katsoó:

–A tiniꞌínkjé nga xotaa̱ Kristoo̱ tji̱e̱nmá ka̱ma an nga.

29Kó bi̱ katsó Pabloo̱ ngijee̱:

–Tsi tsie ko̱jo tsi chiboa ni̱xtjin, achichíra̱ ndakjiꞌi tsi Néná xí bo̱a̱ ka̱tso̱ nga jmí tsi ta̱ jí tsí xi sꞌijii̱n nda̱ re, ko̱jo ngayeje xota̱ xi ndyi̱ntꞌièna ngotꞌe̱ xi nga sꞌijii̱n nga, tsi̱ꞌe̱ nga bo̱a̱ sa̱ꞌín xikó tjítsꞌen an, ta̱nga nga kuijín ńꞌniúki̱cha̱a̱ si̱tꞌa.

30Sꞌe̱ ngije tsintꞌié kuí eén, nda̱ re Angripaa̱, nda̱ xtitjoón, na̱ Berenisee̱ ko̱jo ngayeje xota̱ xi síndo ki̱a̱a̱ jastjíe̱n yeje, 31sꞌe̱ kijíjo̱tꞌaxín xkjín nínga kijíchji̱a̱ kjo̱a̱a̱ kui nii̱, bi̱ katsó nga tsíchji̱a̱jo xkjín:

–Kui nda̱a̱ jmí ni katsꞌénjín tsi̱ꞌe̱ nga si̱ꞌankꞌien má, ti̱nde jmí kjo̱a̱jín nga ndo̱bo̱a̱yà má kꞌuijñá.

32Kó nda̱ re Angripaa̱, bi̱ katsoó Festoo̱:

–Kamá kiniꞌánkjíndé kui nda̱a̱, tsi kuijín xi tsíꞌá nga nda̱ xtitjoón xi sa̱ꞌínjeé.

Currently Selected:

Ni xi kamá 26: MAIX

Highlight

Copy