Ni xi kamá 25

Nga tsꞌaxiéꞌá yojoo̱ Pabloo̱ ngindyi̱ko̱n nda̱ xtitjón xi ꞌmí Festoo̱

1Ngije jachókꞌíjñá xtitjón nda̱ xi ꞌmí Festoo̱, xi ma ján ni̱xtjin jatjoni na̱xi̱ńdáꞌniú Sesarea̱ kui nda̱a̱, sꞌe̱ kijí na̱xi̱ńdáꞌniú Jerusale̱n. 2Ki̱a̱ na̱xi̱ńdáꞌniú Jerusale̱n já ngito̱ko̱o̱ chináꞌmii̱, ko̱jo já jundíoo̱ xi ꞌniú yandikoón atíjétáꞌín Pabloo̱, 3kó ngo kjo̱a̱nda xi ꞌniú tsíꞌáa̱ xtitjoón, tsi̱ꞌe̱ nga sa̱ngíyá Pabloo̱ na̱xi̱ńdáꞌniú Jerusale̱n, kó kui jaá índa nga ngi̱ya ndi̱ya̱à sa̱ꞌínkꞌién Pabloo̱. 4Kuíni nga Festoo̱, bi̱ katsoó kui jaá nga Pabloo̱ ta̱kó kꞌuijñáꞌniúrá ndo̱bo̱a̱yà ki̱a̱ na̱xi̱ńdáꞌniú Sesarea̱, ngatꞌa̱ ti̱kuii Festoo̱ tjítsꞌénkjó nga jaskan ko̱e̱je̱ ki̱a̱a̱. 5Kó bi̱ katsoó:

–Xi tjín ngasee̱ xá ngi̱jinjnú ngatjandibátjingína, kó tsi tjín ni xi ndajínkjiꞌi katsꞌén kui nda̱a̱, ki̱a̱ ngatatíjétaꞌín.

6Festoo̱ kamáraa̱ tsi jin ko̱jo tsi tie ni̱xtjin ki̱a̱ na̱xi̱ńdáꞌniú Jerusale̱n, sꞌe̱ jaskan kijí nginí na̱xi̱ńdáꞌniú Sesarea̱, kó nga kamángindyiojón jachókꞌíjñasón yáxíríe̱ ndikoón, kó katsjákjo̱a̱ nga tsangínjoo̱ Pabloo̱. 7Kó ngije tsꞌasꞌien Pabloo̱ kui ngi̱ndiee̱, já jundío̱ xi kjindibáni na̱xi̱ńdáꞌniú Jerusale̱n, achichí ni xi ndikón yíngítaꞌin Pabloo̱, ta̱nga ngaskande ngojín kui jeé xi kasakoo̱ ngakixi̱, 8tji̱e̱nga Pabloo̱ bi̱ katsó nga tsꞌaxiéꞌá yojoo̱:

–An, nde ngojín jé tjítsꞌen an kondraa̱ kjo̱a̱kitii̱ já jundíoo̱, ti̱nde kondraa̱ na̱ngo̱xi̱i̱, ti̱nde kondraa̱ xtitjoón na̱xi̱ńdá Roma̱.

9Ta̱nga Festoo̱ kamámejeén nga nda kisꞌijñajo̱ já jundíoo̱, sꞌe̱ bi̱ katsó nga asíyaá Pabloo̱:

A mejeén kꞌuin jí na̱xi̱ńdáꞌniú Jerusale̱n, tsi̱ꞌe̱ nga ki̱a̱ sa̱ꞌindajin an kjo̱a̱xtìi̱.

10Kó Pabloo̱ bi̱ katsó:

–Kꞌi̱e̱ tikòn an kje̱n ngi̱ndie nínga botíjeé, kó kꞌi̱e̱ bí nínga chjiéngá ka̱majéna. Xikó tsꞌén je nda ye ji nga ngojín ni xi ndajínkjiꞌi tjítsꞌen an kondraa̱ já jundíoo̱. 11Tsi ngo jé katsꞌen an, kó tsi ta̱ngatꞌanii̱ kui nii̱ nga si̱ꞌankꞌienna, tsakjonjín an nga ko̱yà án, ta̱nga tsi ja̱koxi̱jín ni xi tjíbotíjétáꞌínna, ngojín xota̱ xi tjiín ngakixi̱ xi sa̱ꞌínkꞌasꞌienna ngi̱ya tsja kui jaá. Míꞌá an nga ti̱kuii nda̱ xtitjón Sesaa̱ xi ngatsꞌénjéna.

12Kósꞌe̱ Festoo̱ askjoyáni ko̱jo já xí tsóyaà ni xi tsꞌén, sꞌe̱ bi̱ katsó:

–Tji̱e̱nga je kichjiéꞌé ji nga nda̱ xtitjoón sa̱ꞌínjeé, ja̱ nda̱ xtitjoón kꞌuíchíi̱n tsobo̱a̱.

Festoo̱ ko̱jo Angripaa̱ bi̱ tsꞌén askjoyá kjo̱a̱a̱ Pabloo̱

13Ngije jaꞌa chiboa ni̱xtjin, nda̱ re Angripaa̱ ko̱jo chjo̱ón, xi ꞌmí na̱ Berenisee̱ kijí na̱xi̱ńdáꞌniú Sesarea̱ nga kijítsꞌentínde Festoo̱. 14Kó nga kjín ni̱xtjin nga ki̱a̱ kisꞌińdojo̱, Festoo̱ íni̱jmi̱ì nda̱ re Angripaa̱ kjo̱a̱a̱ Pabloo̱, kó bi̱ katsoó:

–Kꞌi̱e̱ tikón ngo nda̱ xi Firii̱ íjñá ndo̱bo̱a̱yà, 15kui xi nga kisꞌijña an na̱xi̱ńdáꞌniú Jerusale̱n, já ngito̱ko̱o̱ chináꞌmii̱ ko̱jo xota̱ xi xchá jundíoo̱ atíjétáꞌín, kó tsíꞌána nga an tsja an kjo̱a̱ nga ka̱majeé nga si̱ꞌankꞌien, 16ta̱nga an bi̱ kixiáa̱n nga jáxaá na̱xi̱ńdá Roma̱, ngájiín nga tsꞌénjeé nga sa̱ꞌínkꞌién ngo xota̱ tsi tjónjín skjo̱ ndo̱bo̱a̱xa̱á xi tjíbotíjétáꞌiín ko̱jo xi ndyi̱botíjeé, tsi̱ꞌe̱ nga kꞌo̱xiéꞌá yojoo̱ kjo̱a̱a̱ ni xi tjíbotíjétáꞌínni. 17Kó kuíni nga, nga jeꞌe kui jaá kꞌi̱e̱e̱, nde askoyájáa̱n, ngatꞌa̱ nga kamángindyiojón nga jachókatíjñasón an yáxíríee̱ ngi̱ndie nínga botíjeé kijíchjaꞌána kui nda̱a̱, 18ta̱nga kui já xí jachó xi ko̱tíjétáꞌín, jmí ni tsíchji̱a̱jín kjo̱a̱a̱ jé xí katsꞌenkjó án nga katsꞌén Pabloo̱, 19ta̱kuítsí ni xi tsíchji̱a̱, kjo̱a̱a̱ na̱ngo̱xi̱ xi tsoꞌbá, ko̱jo kjo̱a̱a̱ ngo xò nda̱ xi ꞌmí Kjiso̱, xi je kꞌien, kó tikón xò tjítsó. 20Kó nga an nde bejín an mí ni xi sa̱ꞌìi̱n kui kjo̱a̱a̱, sꞌe̱ asíyáa̱ Pabloo̱ tsi mejeén nga ko̱e̱je̱ na̱xi̱ńdáꞌniú Jerusale̱n, tsi̱ꞌe̱ nga ki̱a̱ ka̱majeé kjo̱a̱a̱ kui ni xi tjíbotíjétáꞌínni. 21Ta̱nga kjo̱a̱a̱ nga Pabloo̱ tsíꞌá nga nda̱ xtitjoón Sesaa̱ sa̱ꞌíndajii̱n kjo̱a̱xtii̱, kó kuíni nga je katsja an kjo̱a̱ nga ta̱kó ngatꞌíjñára ndo̱bo̱a̱yà ngaskande nga ka̱ma sangiyakóo̱n xtitjón Sesaa̱.

22Sꞌe̱ nda̱ Angripaa̱, bi̱ katsoó nda̱ xi ꞌmí Festoo̱:

–Ko̱jo an mejénna kuintꞌièe̱ kui nda̱a̱ kó ka̱tso̱ nga.

Kósꞌe̱ Festoo̱, bi̱ katsoó:

–Ti̱ ndyiojoón ka̱ma ko̱nda̱ꞌyée̱.

23Kó bo̱a̱ tsꞌén nga kamángindyiojón, Angripaa̱ ko̱jo na̱ Berenisee̱ jachó ndikón ndikón ki̱a̱ ngi̱ndie nínga botíjeé, kó nijan jachójo̱ já ngito̱ko̱o̱ jájún ko̱jo xota̱ xi ꞌniú yandikón kuí na̱xi̱ńdaá, kó Festoo̱ tsíꞌá nga kijíchjaꞌá Pabloo̱. 24Kósꞌe̱ Festoo̱, bi̱ katsó:

–Nda̱ Re Angripa̱, ko̱jo já xí nijan síndojinná kꞌi̱e̱e̱, kꞌi̱e̱ tikónjnú kui nda̱a̱, kjo̱a̱a̱ nga kjín má xota̱ jundío̱ xi ndyi̱bongítaꞌin, ki̱a̱ na̱xi̱ńdáꞌniú Jerusale̱n ko̱jo kꞌi̱e̱ na̱xi̱ńdáꞌniú Sesarea̱, kó ꞌniú ndyi̱míꞌá nga si̱ꞌankꞌien. 25Ta̱nga bejiínko̱n an nga ngo jé xí ꞌniú katsꞌén nga si̱ꞌankꞌien má, ta̱nga nga ti̱kuii tsꞌénmíꞌá nga kui nda̱ xtitjón xi tikón Roma̱ ngatsꞌénjeé, kuíni nga ki̱a̱ tsꞌén tsangiyakonñaa̱. 26Ta̱nga nga jmíjínna ni xi xian an kjo̱a̱a̱ kui, nda̱ xtitjón, ta̱sá kꞌi̱e̱ jéꞌe̱jo an ngindyikin, nda̱ re Angripa̱, tsi̱ꞌe̱ nga ngije ikindyisé ndi̱ya̱à skuie an kótsꞌèn kuitꞌa an xo̱jo̱n xi sangiyáa nda̱ xtitjoón. 27Ngatꞌa̱ ndajínkjiꞌi mana nga ngo nda̱ xi tjiꞌyá ndo̱bo̱a̱yà ta̱xkiya sangiya an, kó xiyàjín an míkjo̱a̱a̱ xi tjíbotíjétáꞌínni.

Currently Selected:

Ni xi kamá 25: MAIX

Highlight

Copy