2 Xo̱jo̱o̱n Juaa̱ 1
1
Bi̱ tsꞌén katsꞌéntinde Juaa̱ xota̱ na̱ngo̱xi̱i̱
1Án boá ngo nda̱ xi xota̱ xi xchaá na̱ngo̱xi̱i̱ tsꞌentindejnúꞌun jún xi xota̱ na̱ngo̱xi̱ xi je jaꞌájinjnú Néná, kui xota̱ xi ja̱koxi̱ nga tjóna, kó jmí tsi ta̱ án tsí xi tjóna, ti̱ tjórií jún ngayeje xota̱ xi je kamábe ni xi ja̱koxi̱i̱ nga. 2Ta̱ngatꞌanii̱ kui ni ja̱koxi̱ xi tikónjin ngatsjéni̱xtjin ini̱ma̱ná, kui xi kꞌuijñájinná ta̱ kjiꞌání. 3Jún xi je tindyionjinjnú ni xi ja̱koxi̱i̱, ko̱jo kjo̱a̱tjoó Néná, ngasꞌiejnú kjo̱a̱ndaa̱, ko̱jo kjo̱a̱ni̱ma̱takoón, ko̱jo kjo̱a̱xioó Néná xí Na̱ꞌmii̱, ko̱jo xi tsi̱ꞌe̱ Ndi̱a̱ná Jesukristoo̱, kui xi ndií Na̱ꞌmii̱.
Kjo̱a̱tjó xi ja̱koxi̱i̱
4Achichí tsjá kamána nga tjín jún xi kasakona nga ndyi̱niꞌánjnú ni xi ja̱koxi̱i̱, xikó kjiꞌi kjo̱a̱botíxoma xi je katsangiyaná Néná xí Na̱ꞌmii̱. 5Kó ngotꞌe̱ ꞌne̱, já ntsꞌie, ꞌniú míꞌájnúꞌun, nga ja̱kꞌi̱e̱ ja̱ngaján si̱ꞌantjó xingi̱. Jmí tsi xikoó tsi ngo kjo̱a̱botíxoma tja̱tsi̱e̱ xi tjítsꞌenꞌindó an, ta̱sá kuí boá kui kjo̱a̱botíxoma xi tikónná ndeskande koó ngasꞌe̱. 6Chjiéngá bo̱a̱ tsꞌén ku̱i̱ndyión xikó tsó kjo̱a̱botíxomaa̱ Néná, ngatꞌa̱ kuí bí kui nii̱ xi kjo̱a̱tjoó. Ngi̱jii̱n kui kjo̱a̱tjoó ti̱ńtja̱jnú, ngatꞌa̱ kuí bí kui nii̱ xi kjo̱a̱botíxomaa̱ Néná, xikótsꞌèn je kandaꞌyájnú ndeskande koó ngasꞌe̱.
Chónjnú mostro̱ ndisoo̱
7Achichí má xota̱ ndiso xi je jatjokjà kuí nga̱sondiee̱ xi tsꞌenjóꞌojín nga Jesukristoo̱ jeꞌe nga jín nga yojo. Kuí boá kui xotaa̱ xi ndyi̱ꞌboṉcha̱, ko̱jo kuí boá xi kondraa̱ Kristoo̱. 8Chónjnú yojojnú tsi̱ꞌe̱ nga kjo̱tsònjín xá xi kiniꞌánjne̱ ngi̱jinjnú. Ta̱sá ti̱ndyi̱séjnú nga sa̱kó ndo̱jò ndójo̱jnú ni xi je tikóndaa̱ Néná nga tsja̱ajnú. 9Ta̱ꞌyaní xi kjo̱a̱ꞌatjoón ni xi akóyá Kristoo̱, kó ki̱a̱jín kꞌuijñájin kui nii̱, tikónjinjiín Néná ngi̱jin ini̱ma̱a̱. Ta̱nga kui xota̱ xi ta̱kuítsí kjo̱a̱bokoyaá Kristoo̱ xi tsꞌénbokoyá, kuí boá xi̱ꞌba̱ xi tikónjii̱n ngi̱jin ini̱ma̱a̱ Néná xí Na̱ꞌmii̱ ko̱jo Ndií. 10Tsi tjín xí kjo̱chókónjnú jún, kó kuijín kjo̱a̱bokoyaá Kristoo̱ xi ko̱kóyájnú, ngata̱ niꞌánkꞌasꞌiénjínjnú ndiꞌajnú, ti̱nde “¡A ta̱ bo̱a̱ nda jéꞌe̱jnú!” Ngata̱ ꞌmíjínjnúu̱. 11Ngatꞌa̱ kui xota̱ xi “¡A ta̱ bo̱a̱ nda jéꞌe̱jnú!” Ka̱tso̱o̱, ko̱jo kuí nijan kjima kjo̱a̱a̱ ni xi ndajín xi ndyi̱tsꞌèn kuí xotaa̱.
Bi̱ tsꞌén katsꞌénkixotꞌa Juaa̱ xota̱ na̱ngo̱xi̱i̱
12Achichí ni xi tikónna xi kuichjiájojnúꞌun katsaki, ta̱nga mejénjínna nga xo̱jo̱n ko̱jo tinta̱ sa̱ꞌinkjièn án. Ngatꞌa̱ ta̱sá skoyáa̱ nga tsi ta̱ꞌa ka̱ma kjuínkátsijenjnúꞌun nga án má, tsi̱ꞌe̱ nga ka̱ma tíkje̱n tíkje̱n xchi̱boáni̱jmì, kó bo̱a̱ tsꞌén ka̱mando̱jo kjo̱a̱tsjaná. 13Tinde xò bo̱a̱ tsó xota̱ na̱ngo̱xi̱ xi je kisꞌijii̱n xikoó jún, xi síndo kꞌi̱e̱e̱, kui xi Néná ti̱ je jaꞌájin nga. Bo̱a̱ kjiꞌi.
Currently Selected:
2 Xo̱jo̱o̱n Juaa̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
