1 Xo̱jo̱o̱n Juaa̱ 5

Bi̱ tsꞌén akóyá Juaa̱ ni xi tsꞌén xi ndií Néná

1Ngayeje xota̱ xi sꞌijii̱n nga Kjisoo̱ xi Kristoo̱, Néná je katsjaá nga ndií kui ka̱ma. Ngayeje xota̱ xi tjoó Néná xí Na̱ꞌmii̱, ti̱ tjoó ngayeje ndií kui Na̱ꞌmii̱ nga. 2Kjiꞌanga tjóná Néná ko̱jo kjiꞌanga niꞌánkjatjosón kjo̱a̱botíxomaa̱, kuí nii̱ xi bokó nga tjóná xota̱ xi je ndií Néná. 3Ngatꞌa̱ kuí nii̱ xi bokó nga tjóná Néná, kjiꞌanga si̱ꞌankjatjosón kjo̱a̱botíxomaa̱. Niꞌínjín niꞌánkjatjosón kjo̱a̱botíxomaa̱ kui. 4Ngatꞌa̱ ngayeje xota̱ xi Néná je katsjaá nga ndií kui ka̱ma, tsꞌénrií nga tsꞌénchájá kui nga̱sondiee̱, kó kjo̱a̱sꞌijinná boá xi tsꞌeén nga tsꞌénchájá kui nga̱sondiee̱. 5Xi sꞌijii̱n nga Kjisoo̱ xi ndií Néná, kuí boá xi tsꞌeén nga tsꞌénchájá kui nga̱sondiee̱.

Bi̱ tsꞌén akóyá Juaa̱ kjo̱a̱a̱ xikótsꞌèn Néná akó Kjisoo̱

6Ndáfoa ko̱jo jín akakoni Jesukristoo̱, kó jmí tsi ta̱ ndáfoa tsi, ndáfoa ko̱jo jín boá. Kó A̱si̱énni̱xtjii̱n Néná boá xi chistiko̱, ngatꞌa̱ ja̱koxi̱ boá kui A̱si̱énni̱xtjii̱n. 7Ján má xi chistikoo̱, 8kó nga jaán nga ndse̱je̱n ma. A̱si̱énni̱xtjii̱n, ndáfoaa̱, ko̱jo jiín. 9Tsi niꞌánjo̱ꞌó ngo én xí chji̱a̱ ngo xota̱ xi chistiko̱, ja̱ chjí ngasenii̱ ni xi chji̱a̱ Néná, ngatꞌa̱ kuí nii̱ xi tsꞌénchji̱a̱ Néná, nga chistiko̱ kjima nga chji̱a̱ kjo̱a̱a̱ ndií. 10Xi sꞌijii̱n ndií Néná, ngi̱jin ini̱ma̱a̱ be nga ja̱koxi̱ boá kui nii̱. Xi sꞌijinjiín Néná, ndiso tjítsꞌén Néná, ngatꞌa̱ kji̱e̱ sꞌijinjiín ni xi katsó Néná kjo̱a̱a̱ ndií. 11Néná katsjáná kjo̱a̱mindyion ngatsjéni̱xtjii̱n, kó ngatꞌaa̱ ndií kuí nga sa̱kóná kuí kjo̱a̱mindyioo̱n. Kuí bí ni xi katsó Néná nga tsíchji̱a̱. 12Xi tikónjii̱n ndií Néná, ti̱ tikoón kui kjo̱a̱mindyioo̱n nga, ta̱nga xi tikónjinjiín ndií Néná, ti̱ jmíjiín kui kjo̱a̱mindyioo̱n nga.

Juaa̱ bi̱ tsꞌén katsꞌénkjietꞌa xo̱jo̱o̱n

13Jún xi sꞌijinjnú ndií Néná, jún xí tjítsꞌenꞌindójnúꞌun kui xo̱jo̱o̱n, tsi̱ꞌe̱ nga xcha̱jnú nga tikónjnú kui kjo̱a̱mindyion ngatsjéni̱xtjii̱n.

14Kó kuí bí kjo̱a̱ꞌniátakón xi tikónná nga niꞌántiñáa̱ yojoná Néná, ngatꞌa̱ ntꞌiéná kjiꞌanga chjiáꞌáa̱ ngo ni xikótsꞌèn mejeén kui nga chji̱a̱ꞌáa̱. 15Kó tsi ya nga kui ntꞌié ta̱ ni xi ndyi̱chjiáꞌáñáa̱, ja̱ jè ya nga je katsjáná ni xi kichjiáꞌáa̱.

16Tsi tjín xi be nga ngo ntsꞌi̱e̱ tjítsꞌén ngo jé xi tsꞌenkꞌiénjínná ngindyi̱ko̱n Néná, chjiéngá ku̱i̱chji̱a̱a̱ Néná nga ku̱i̱chji̱a̱tjé, kó bo̱a̱ tsꞌén nga Néná tsja̱á kjo̱a̱mindyion kui ntsꞌiee̱. Kjo̱a̱a̱ ngo jé xi tsꞌenkꞌiénjínná ngindyi̱ko̱n Néná xí tꞌíxián an. Ti̱ tjín jé xi tsꞌenkꞌiénná ngindyi̱ko̱n Néná, kó kjo̱a̱a̱ kui jeé xiánjín an nga ko̱ndókjo̱a̱jnúu̱ Néná nga chji̱a̱ꞌatjejnú xota̱ xi sa̱ꞌín kui jeé. 17Ngayeje ni xi kixi̱jín jé boá, ta̱nga tjín jeé xi tsꞌenkꞌiénjínná ngindyi̱ko̱n Néná.

18Jè ya ñá nga ngayeje xota̱ xi Néná je katsjaá nga ndií kui ka̱ma, ngájiín nga tsꞌénjé, ngatꞌa̱ ndií kui Na̱ꞌmii̱ tsꞌénkoón kui xota̱ xi̱ꞌba̱, kó xindajín tsꞌénjo̱jín.

19Jè ya nga Néná ndokjo̱a̱ ñá, kó nga xota̱ xi ngasee̱ xindajín boá xi tsꞌénbotixómaá.

20Ta̱nga ti̱ jè ya nga ndií Néná jè jeꞌe, kó katsjáná kjo̱a̱kjíntakón tsi̱ꞌe̱ nga xcha̱ kui Néná xí ja̱koxi̱i̱, kó jè tindyionjo̱ kui xi ja̱koxi̱i̱, ndií Néná xi ꞌmí Jesukristoo̱. Kuí bí xi̱ꞌbi̱ xi Néná xí ja̱koxi̱i̱, ko̱jo xi tsjá kjo̱a̱mindyion ngatsjéni̱xtjii̱n. 21Jún ndí ndí tsa̱ꞌa̱n, chja̱ꞌáxínjnúu̱ ngi̱jin ini̱ma̱jnú ngayeje ni xi kjo̱a̱ꞌáxiín ngi̱ndie xi tsi̱ꞌe̱ Néná. Bo̱a̱ kjiꞌi.

Currently Selected:

1 Xo̱jo̱o̱n Juaa̱ 5: MAIX

Highlight

Compare

Copy