2 Xota̱ Korinto̱ 6
6
1Kó kuíni nga ji̱n xi xaá Néná ndyi̱niꞌánjne̱, ꞌniú chjiáꞌájne̱ jún tsi̱ꞌe̱ nga ngata̱ tonjín májnú kjo̱a̱ndaa̱ Néná. 2Ngatꞌa̱ bi̱ tsó xo̱jo̱n eén Néná:
Ni̱xtjin xi ndaa̱ an tsintꞌiee,
kó ni̱xtjin nga tsꞌaxiéꞌá an xotaa̱ an asiko̱joo̱ ji.
Bo̱a̱ tꞌíxiánjnúꞌun nga ngotꞌe̱ boá ni̱xtjin xi ndaa̱, kó ngotꞌe̱ boá ni̱xtjin nga Néná ꞌboxiéꞌá xotaa̱.
Bi̱ tsꞌén katsóyà Pabloo̱ ni xi jaꞌajin ta̱ngatꞌanii̱ xá xí katsꞌén
3Nde ngojín ni xi ndajín niꞌánjne̱, xi sa̱ꞌínkjién xotaa̱ tsi̱ꞌe̱ nga chꞌo tsꞌén skjo̱yá xájne̱. 4Ta̱sá ngayeje ni xi niꞌánjne̱, bokó nga xaá Néná boá xi ndyi̱niꞌánjne̱, nga ꞌniú ndyi̱niꞌánchíkjo̱a̱jne̱, ko̱jo nga ndyi̱bitjatiójne̱ kjo̱a̱ni̱ma̱, ko̱jo nga chjiénjne̱ ngo ni, ko̱jo nga nda̱ kjimajne̱. 5Ko̱jo nga tjifoájne̱, ko̱jo nga ndyi̱niꞌánchíkjo̱a̱jne̱ tsi tjín xi ndyi̱fíjo̱jne̱ ndo̱bo̱a̱yà, ko̱jo nga tjíbixkánjo̱jne̱, ko̱jo nga xá ꞌniú ndyi̱niꞌánjne̱, ko̱jo nga ńjñá, ko̱jo tsi kjindiá ndyi̱bitjatiójne̱. 6Tsjietsꞌén ndyi̱mongínjo̱jne̱ yojojne̱. Makjínjne̱ ni xi ndokjo̱a̱jne̱. Niꞌánchíkjo̱a̱jne̱. Tjínjne̱ kjo̱a̱nda. Tikónjinjne̱ A̱si̱énni̱xtjii̱n Néná. Tjínjne̱ ngo kjo̱a̱tjó xi nda. 7Ndyi̱ꞌmìyájne̱ én xí ja̱koxi̱i̱, kó ngaꞌniuú Néná tikónjinjne̱. Kjo̱a̱kixi̱i̱ xikónií tsi ni xi niꞌánkjién nga bixkán ndyi̱niꞌánjne̱. 8Tjín ni̱xtjin nga yandikónjne̱, kó tjín ni̱xtjin nga chꞌo ꞌmíjne̱. Tjín ni̱xtjin nga nda ndokjo̱a̱ kjo̱a̱a̱ ji̱n, kó tjín ni̱xtjin nga chꞌo tsꞌén ndokjo̱a̱. Tjín ni̱xtjin nga xota̱ ndiso tjíꞌmíjne̱, ndatsi ni xi ja̱koxi̱ boá xi ndokjo̱a̱jne̱. 9Ndatsi ngayeje xotaa̱ bejne̱, ta̱nga xikoó tsi bejínjne̱. Xota̱ xi je kjifesón kjimajne̱, ta̱nga ti̱ kuí xí kꞌi̱e̱ tindyionjne̱. Tjíniꞌánkꞌatiojne̱ kjo̱a̱ni̱ma̱, ta̱nga jmí tsi je jesónjne̱. 10Tindyionjne̱ xikoó xota̱ xi ndasen síndo, ta̱nga ngatsjéni̱xtjin nga tsjatjínjne̱. Tindyionjne̱ xikoó xota̱ ni̱ma̱, ta̱nga achichí xota̱ xi niꞌáncho̱njne̱. Tindyionjne̱ xikoó xota̱ jmí nijiín, ta̱nga ngayeje nii̱ xi tjínjne̱.
11Jún xota̱ Korinto̱, jè kandokjo̱a̱jo kixi̱ kixi̱jne̱ ji̱n, kó jè kiꞌmíyàjne̱ ni xi tikónjin ini̱ma̱jne̱. 12Ji̱n achichí tjójne̱ jún, ta̱nga jún bo̱a̱jín ndyi̱niꞌánjnú. 13Kuíni nga ꞌniú míꞌájnúꞌun xikoó tsi ndína májnú, tsi̱ꞌe̱ bo̱a̱ si̱ꞌánjnú jún, nga ko̱kójnú jún ni xi tikónjii̱n ini̱ma̱jnú.
Bi̱ tsꞌén katsóyà Pabloo̱ nga ka̱májín sa̱ꞌíngojo̱ yojoo̱ xkjín xota̱ xi sꞌijii̱n Néná ko̱jo xi sꞌijinjiín
14Ngata̱ ki̱a̱jín nijan niꞌánngojo̱jnú yojojnú xota̱ xi sꞌijinjiín Néná. Ngatꞌa̱, mí ni xi nijan mani xkjín ni xi kixi̱i̱, ko̱jo ni xi kixi̱jiín. Axa̱ kótsꞌèn nga nijan kꞌuíndo ndiꞌií, ko̱jo jñoó. 15Kó kótsꞌèn nga nijan ka̱majo̱ xkjín Kristoo̱, ko̱jo xindajín Beliaa̱l. Axa̱ kótsꞌèn nga nda ko̱a̱ꞌa̱ xkjín ngo xota̱ xi sꞌijii̱n Néná, ko̱jo ngo xi sꞌijinjiín. 16Kó kótsꞌèn ka̱mangojo̱ xkjín na̱ngo̱xi̱i̱ Néná, ko̱jo a̱sie̱én ngo ne xi tsꞌénda xotaa̱. Ngatꞌa̱ ñá boá xi na̱ngo̱xi̱i̱ Néná xí tikoón, xikó katsó ti̱kuii Néná:
Ki̱a̱ kotíjña̱jìi̱n, kó ki̱a̱ kjótsoꞌbájìi̱n,
kó an xí Nee̱ ka̱ma an,
kó kui xotaa̱, xi xota̱ na̱xi̱ńdána ka̱ma.
17Kó kuíni nga bi̱ katsó ngase Néná:
Tji̱taxínjinjnú ngamasiee̱n kui xotaa̱,
kó tji̱taxínboaꞌájnú, tsó Ndi̱a̱ná.
Ngata̱chiíjín niꞌánjo̱jnú ni xi ndándí ngindyikón an.
Kó án skjíbéjnúꞌun.
18Kó án xí Na̱ꞌmijnú ka̱ma an,
kó jún xí ndína ka̱majnú,
bo̱a̱ tsó Ndi̱a̱ná xi tjiín ngaꞌniuú.
Currently Selected:
2 Xota̱ Korinto̱ 6: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
