2 Xota̱ Korinto̱ 5

Bi̱ tsꞌén akóyá Pabloo̱ nga yojo tja̱tsi̱e̱ kꞌuiéná

1Ngatꞌa̱ ñá jè ya nga yojoná xikónií tsi ngo ndiꞌańjño xi tindyionyá kuí nga̱sondiee̱. Kó nga kjo̱tsòn kuí ndiꞌańjñoo̱, ya nga ndiꞌakꞌajmi jàn tikónna ngo ndiꞌa xi tikón ngatsjéni̱xtjin xi tsjáná Néná, ngo ndiꞌa xi jmí tsi tsja xota̱ kamándani. 2Kuíni nga on kjimáná nga tindyión kꞌi̱e̱e̱, ngatꞌa̱ mejénná nga tsá ko̱e̱ꞌéná kui ndiꞌa xi tikón ndiꞌakꞌajmii̱, kui xi xikoó tsi ngo ńjño tja̱tsi̱e̱ xi xcha̱já. 3Ngatꞌa̱ bo̱a̱ tsꞌén, ndatsi xchja̱ꞌáxínná kui ńjño xi tikónná ngotꞌe̱, xcha̱ kjiꞌixtíjínná. 4Ngatꞌa̱ tji̱e̱nga xikoó tsi kui ndiꞌańjñoo̱ tindyionyá nga kui xi yojoná, kjifoeꞌetsꞌiꞌónná nga je jenda ñá. Ngatꞌa̱ nga ka̱mamejénná chja̱ꞌáxín kuí yojo xcháná, jmí tsi ndyi̱ꞌmì nga mejénjínná nga kꞌuiéná ngo yojo, ta̱sá mejénná nga ngo yojo tja̱tsi̱e̱ kꞌuiéná, tsi̱ꞌe̱ nga kjo̱a̱mindyioo̱n kꞌuijñá ngajoo̱ ni xi ꞌmee̱. 5Néná boá xi íjñandaná kjo̱a̱a̱ kui nii̱, kó katsjáná A̱si̱énni̱xtjii̱n, xikoó tsi ngo ni xi tikónngí, tsi̱ꞌe̱ nga xcha̱ nga sa̱ꞌínkjatjosón ni xi katsóyàtjón nga tsja̱aná.

6Kó kuíni nga kjimaꞌniátakón ngatsjéni̱xtjin, ngatꞌa̱ jè ya nga tji̱e̱nga kui yojo xchaá tindyionjin, kjin tindyionñáa Ndi̱a̱ná. 7Ngatꞌa̱ ta̱ngatꞌanií kjo̱a̱sꞌijii̱n nga tindyión, jmí tsi kjo̱a̱a̱ ni xi ndyi̱yà. 8Kjimaꞌniátakón ñá kó mejénná nga kꞌuijñámasien kui yojo xchaá, tsi̱ꞌe̱ nga nínga tikón Ndi̱a̱ná konginkíndyión. 9Kó kuíni nga niꞌán ngo kjo̱a̱ꞌniú nga niꞌán ni xi tsja maa̱ Ndi̱a̱ná, ndatsi kꞌi̱e̱ tindyión ngi̱jii̱n kui yojoo̱, ko̱jo tsi je akayà. 10Ngatꞌa̱ chjiéngá ngayeje ñá ki̱a̱ konginkíndyiá ngindyi̱ko̱n Kristoo̱, tsi̱ꞌe̱ nga sku̱i̱e̱ ni xi kiniꞌán, kó nga ngo nga ngo ñá sa̱kóná ni xi tsoboáná, tsi nda ko̱jo tsi ndajín kjiꞌi ni xi kiniꞌán, tji̱e̱nga kixindyión ngi̱jii̱n kui yojoo̱.

Bi̱ tsꞌén katsóyà Pabloo̱ kjo̱a̱a̱ nga nganda tsa̱ñá boá ni xi katsꞌén Kristoo̱

11Kó kuíni nga, nga yandikónjne̱ Ndi̱a̱ná ndyi̱ꞌmìyá cha̱n cha̱njne̱ xotaa̱ nga ti̱ sꞌi̱jii̱n nga. Néná be kókón ji̱n, kó mejénna nga ko̱jo jún xi nda ini̱ma̱jnú xcha̱jnú kókón ji̱n nga. 12Jmí tsi ti̱ ji̱i̱n ingo ndi̱yà nda ndyi̱ndokjo̱a̱ nginíjne̱ kjo̱a̱a̱ ji̱n ngindyikónjnú, ta̱sá ndyi̱boeꞌéjne̱ ji̱n ngo ngi̱ndie jún tsi̱ꞌe̱ nga tsja ka̱majnú kjo̱a̱a̱ ji̱n, tsi̱ꞌe̱ nga ka̱majnú ko̱ndókjo̱a̱ꞌajnú xota̱ xi je kjimaa̱ yojoo̱ kjo̱a̱a̱ xikótsꞌèn ndyi̱be xotaa̱, kó jmí tsi xikó kon kui. 13Ngatꞌa̱ tsi tsobéjne̱ tsó xotaa̱, tsobéjne̱ kjo̱a̱a̱ nga xaá Néná boá xi ndyi̱niꞌánjne̱, kó tsi nda tsꞌén tikón kjo̱a̱kjíntakónjne̱, nganda tsa̱jún boá. 14Ngatꞌa̱ kjo̱a̱tjoó Kristoo̱ tsꞌénjne̱ kjo̱a̱ꞌniú nga bi̱ tsꞌén niꞌánkjójne̱: Nga tsi ngo xi kꞌien kjo̱a̱a̱ ngayeje xotaa̱, kó kuíni nga ngayeje xotaa̱ jesón. 15Kó ta̱ngatꞌanii̱ ngayeje xotaa̱ nga kꞌien Kristoo̱, tsi̱ꞌe̱ nga kui xota̱ xi síndoo̱, jmí tsi kjo̱a̱a̱ kui nga kꞌuíndo ngase, kꞌuíndo tsi̱ꞌe̱ nga sa̱ꞌín ni xi tsjaa̱ Kristoo̱, kui xi kꞌien ko̱jo jaꞌáꞌyaá ngandaa̱ kui xotaa̱. 16Kó kuíni nga ji̱n, jè ngiti̱ bo̱a̱jín tsꞌén tsitsijenjne̱ xotaa̱ xikótsꞌèn kotsijee̱n xkjín xotaa̱ kui nga̱sondiee̱, kó ndatsi ngasꞌe̱ bo̱a̱ tsꞌén kitsitsijenjne̱ Kristoo̱, ta̱nga ngotꞌe̱, jè ngiti̱ bo̱a̱jín tsꞌén ndyi̱tsitsijenjne̱. 17Kó kuíni nga kui xota̱ xi je katsꞌéngojo̱ yojoo̱ Kristoo̱, ngo xota̱ xi tja̱tsi̱e̱ je kamá, ni xi xchaá jè jaꞌa, kó ni xi tja̱tsi̱e̱e̱ jè jeꞌe.

18Kó ngayeje kui nii̱, Néná boá xi tjítsꞌén. Néná katsꞌénkjién Kristoo̱ nga yíndaná ñá ko̱jo kui, kó katsjáná ngo xá nga ko̱ndókjo̱a̱ kjoaá nga kongínchon tiña ngiñáa̱ Néná. 19Néná katsꞌénkjién Kristoo̱ tsi̱ꞌe̱ nga xota̱ nga̱sondiee̱ sa̱ꞌíntiñaa̱ yojoo̱ Néná, kó katsꞌénxki̱jín jeé kui xotaa̱. Ji̱n katsjájne̱ nga kꞌuiníjmi̱jne̱ kui eén, tsi̱ꞌe̱ xotaa̱ sa̱ꞌíntiñaa̱ yojoo̱ Néná. 20Kó kuíni nga ji̱n, xota̱xcha̱à Kristoo̱ boá ji̱n. Xikónií tsi ti̱ kui Néná xí tsꞌénchji̱a̱ kjiꞌanga ndyi̱ndokjo̱a̱jojne̱ jún, kuíni nga ngi̱yaa̱ jaꞌeén Kristoo̱ chjiáꞌájne̱ jún nga tjandajo̱jnú Néná. 21Kristoo̱ nde ngo jé kisꞌiejiín, nganda tsa̱ñá boá nga Néná xikoó tsi xota̱ jé katsꞌén, tsi̱ꞌe̱ nga ñá xota̱ kixi̱ ka̱ma ngindyi̱ko̱n Néná, ta̱ngatꞌanii̱ ni xi katsꞌén Kristoo̱.

Currently Selected:

2 Xota̱ Korinto̱ 5: MAIX

Highlight

Compare

Copy