1 Xota̱ Tesalónika̱ 5
5
Bi̱ tsꞌén íni̱jmì Pabloo̱ kjo̱a̱a̱ xikótsꞌèn xchiyaá Ndi̱a̱ná
1Jún ntsꞌie, nde chjiénjín nga xo̱jo̱n kuitꞌajnúꞌun kjo̱a̱a̱ ni̱xtjin xi ndibá ko̱jo nga kjo̱tjosón nii̱. 2Ngatꞌa̱ ti̱ juún jè ya nda ndajnú nga ni̱xtjin nga kjo̱e̱ꞌe Ndi̱a̱ná, ta̱niján má kjo̱e̱ꞌe, xikó maá ngo chejé xí fochó nga jñoó. 3Kjiꞌanga bi̱ ka̱tso̱ xotaa̱: “Tjínná kjo̱a̱xió, ko̱jo jè jmí ni ka̱májínná”, kjiꞌá boá nga ta̱niján ma kji̱ndi̱bá nga kju̱i̱e̱ kui xotaa̱, xikó ma má nga je ndibaá tsi̱ndi̱o̱o̱ ngo xota̱chjo̱on xí yaꞌa ndí. Ngiti̱ jmíjín kótsꞌèn ka̱ma ku̱i̱yòjnú. 4Ta̱nga jún já ntsꞌie, ngata̱ nínga jñójín mindyiónjnú, ki̱a̱ ka̱maa̱, kjiꞌanga kjo̱chó ni̱xtjin nga kjo̱e̱ꞌe Ndi̱a̱ná, ta̱niján ma kji̱ndi̱bá, kó kjo̱e̱ꞌe xikoó tsi ngo chejé. 5Ngayejejnú nínga tsijee̱n, ko̱jo nínga ni̱xtjii̱n tindyiónjnú. Jmí tsi nínga ni̱xtji̱e̱e̱n ko̱jo tsi nínga jñoó tindyión ñá. 6Kuíni nga chjiénjín nga tsjayójofé xikoó xota̱ xi ngasee̱, ta̱sá tsjayójoféján ko̱jo nda tsꞌén ku̱i̱ndyión. 7Ngatꞌa̱ kui xi ndyi̱foyojofeé, nga jñoó boá nga ndyi̱foyojofé. Kó kui xi ma chꞌi̱i̱, nga jñoó boá nga ma chꞌi̱. 8Ta̱nga ñá xí nga ni̱xtjii̱n ndokjo̱a̱ ñá, chjiéngá nda tsꞌén ku̱i̱ndyión ngatsjéni̱xtjin. Si̱ꞌansꞌijin Néná, kó kui nii̱ xi ngatamaná ngo ńjño ki̱cha̱ xi boꞌmá ni̱se̱e̱n ngo nda̱jun. Ngasꞌiená kjo̱a̱tjó. Xchiyàa̱ nga kjo̱tjoꞌa ñá, kó kui nii̱ xi ngatamaná xikoó ngo ki̱cha̱ xi ꞌbijñaá to̱ko̱ ngo nda̱jun. 9Ngatꞌa̱ Néná jmí tsi bo̱a̱ tsꞌén índa nga sa̱kóná kjo̱a̱botíjeé, jaꞌájinná tsi̱ꞌe̱ nga sa̱kóná kjo̱a̱ꞌnaxiéꞌaá ngatꞌaa̱ Ndi̱a̱ná Jesukristoo̱, 10kui xi kꞌien ta̱ngatꞌanii̱ ñá, tsi̱ꞌe̱ nga tsi tindyión ko̱jo tsi je akayà, ki̱a̱ nijan ku̱i̱ndyionjo̱ kuí. 11Kó kuíni nga ja̱kꞌi̱e̱ ja̱ngaján te̱ꞌéngaꞌniújnúu̱ xingi̱jnú, kó tasíko̱jojnú xingi̱jnú tsi̱ꞌe̱ nga ꞌniú ku̱i̱ndyiajnú ngi̱yaa̱ kjo̱a̱sꞌijinjnú, xikó je ndyi̱niꞌánjnú.
Bi̱ tsꞌén akóyá Pabloo̱ ni xi chjiéngá sa̱ꞌín xota̱ na̱ngo̱xi̱i̱
12Jún ntsꞌie, ꞌniú chjiáꞌájne̱ jún, tsi̱ꞌe̱ nga ka̱makjínjnú nga kui xi ndyi̱tsꞌènxájinjnú, xaá Ndi̱a̱ná boá xi ndyi̱tsꞌèn, kó kuí xí síndotjónjnú ko̱jo xi ndyi̱bokoyájnú, bo̱a̱ ndyi̱tsꞌèn tsi̱ꞌe̱ nga nda tsꞌén ku̱i̱ndyionjnú. 13Chjiéngá xcha̱ndikónjnú ko̱jo tjó ti̱ꞌánjnú kjo̱a̱a̱ xá xí ndyi̱tsꞌèn. Ngatꞌiéjnú kjo̱a̱xió ngi̱jinjnú.
14Jún ntsꞌie, ti̱ bo̱a̱ ti̱ tsꞌén ꞌniú chjiáꞌájne̱ jún, tsi̱ꞌe̱ nga ꞌniú ko̱ndókjo̱a̱jojnú kui xota̱ xi tsiꞌeé, ko̱jo nga ko̱e̱ꞌéngaꞌniújnúu̱ kui xota̱ xi je katsꞌénkjié kjo̱a̱a̱, ko̱jo nga ko̱si̱ko̱jójnú xi ꞌniújín sꞌijii̱n, ko̱jo nga tsiekon ka̱majnú kjo̱a̱a̱ ngayeje xotaa̱.
15Chónjnú nga ngojín xota̱ xi tsi ndajín kiniꞌánjo̱, kósꞌe̱ ti̱ bo̱a̱ ti̱ tsꞌén ndajín tsꞌén ku̱i̱ꞌíchjií xi bo̱a̱ katsꞌénjoo̱ nga. Ta̱sá ti̱ꞌánjnú ngo ngaꞌniú, tsi̱ꞌe̱ nga ngatsjéni̱xtjin nda si̱ꞌanjo̱jnú xingi̱jnú, ko̱jo tsi xota̱ xi ngasee̱.
16Ngatsjéni̱xtjin nga tsjangatꞌiéjnú. 17Ngatsjéni̱xtjin ndókjo̱a̱jnúu̱ Néná. 18Te̱ꞌéjnúu̱ ndokꞌóchjì Néná kjo̱a̱a̱ ngayeje nii̱, ngatꞌa̱ kuí nii̱ xi mejeén Néná nga ko̱e̱ꞌéjnú jún xi je sꞌijinjnú Kristo̱ Kjisoo̱.
19Ngata̱ ꞌbíchjájínjnúu̱ nga sa̱ꞌínxájinjnú A̱si̱énni̱xtjii̱n Néná. 20Ngata̱ tonjín májnú én xí chji̱a̱ xota̱ xi Néná tsjaá ni xi ku̱i̱chji̱a̱. 21Chísónjnúu̱ ngayeje nii̱, kó ni xi ndaa̱ xí chjábéjnú. 22Ti̱ꞌanchꞌójnúu̱ yojojnú ngayeje ni xi ndajiín.
23Kó ti̱kuii Néná xí tsi̱ꞌe̱ kjo̱a̱xioó, ngatsꞌéntsjie ndo̱jò ndójo̱jnú ngindyi̱ko̱n kui, ngatsꞌéntsjie a̱si̱énni̱xtjinjnú, ko̱jo ini̱ma̱jnú, ko̱jo yojojnú, kó nga jmíjín xi chꞌo tsꞌén ku̱i̱chji̱a̱taꞌinjnú kjiꞌanga kjo̱e̱ꞌe nginí Ndi̱a̱ná Jesukristoo̱. 24Ka̱ma ka̱maꞌniátakón Ndi̱a̱ná xi tsíchji̱a̱jnú, kuí xí sa̱ꞌínkjatjosón kui nii̱.
Pabloo̱ bi̱ tsꞌén katsꞌénkjietꞌa xo̱jo̱o̱n
25Jún ntsꞌie, kjiꞌanga ko̱ndókjo̱a̱jnúu̱ Néná, ndókjo̱a̱tjéjnú ji̱n nga.
26Ti̱ꞌantindéjnú ngayeje ntsꞌié.
27Ngindyi̱ko̱n Ndi̱a̱ná ꞌniú míꞌájnúꞌun nga ti̱ꞌanyàjnúu̱ kui xo̱jo̱o̱n ngayeje ntsꞌié.
28Ndi̱a̱ná Jesukristoo̱ ngatsjájnú kjo̱a̱ndaa̱. Bo̱a̱ kjiꞌi.
Currently Selected:
1 Xota̱ Tesalónika̱ 5: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
