1 Xo̱jo̱o̱n Peé 2
2
1Kuíni nga chjiéngá chja̱ꞌáxínjnúu̱ yojojnú ngayeje to̱ko̱ya ni xi ndajín, ngayeje kjo̱a̱maña, ko̱jo kjo̱a̱jókje̱n, ko̱jo kjo̱a̱ꞌontakón, ko̱jo ngayeje to̱ko̱ya ényà. 2Ngatamajnú xikoó ngo ndí xi sꞌe̱ katsen má, xi ma mejeén ndáchíkií na̱aa̱n, bo̱a̱ tsꞌén ngatamamejénjnú eén Néná, xikoó xi mejeén kꞌuí ntsjén xí kuí soboá soboaá, tsi̱ꞌe̱ nga nda tsꞌén ka̱maxchájnú, kó kjo̱tjoꞌa kjin kjinjnú, 3ngatꞌa̱ jè kichitꞌajnú kótsꞌèn nga nda tsꞌénjo̱ná Ndi̱a̱ná.
Bi̱ tsꞌén íni̱jmì Peé nga Jesukristoo̱ xí xikoó ngo ndi̱jo̱ xi ꞌniú chjínií kamá
4Kristoo̱ boá xi xikoó ngo ndi̱jo̱ xi tikón xi katsꞌénchꞌó xotaa̱, ta̱nga Néná xikoó ngo ndi̱jo̱ xi je katjoꞌójin xi achichí chjínií máa kui, kó nga ndyi̱niꞌántiñatꞌajnúu̱ yojojnú Kristoo̱, 5ko̱jo jún kjimajnú xikoó ndi̱jo̱ xi síndo tikón, kó Néná boá xi iskjininkꞌajnú xikoó ngo na̱ngo̱xi̱ xi jmí tsi kui nga̱sondiee̱ chji̱a̱ni, bo̱a̱ tsꞌén nga jún boá xi kiniꞌánjnú xikoó chináꞌmi tsjiee̱ Néná, xi tsꞌenkꞌásꞌieén kjo̱a̱tjó xi tsja maa̱ Néná ngatꞌaa̱ Jesukristoo̱. 6Ngatꞌa̱ bi̱ tsó xo̱jo̱n eén Néná:
Jéꞌe̱n kꞌi̱e̱ kꞌuijñá an na̱xi̱ńdáꞌniú Sioo̱n ngo ndi̱jo̱ xi jaꞌajin an xi ꞌniú chjínií,
kuí ndi̱jo̱o̱ xi sꞌi̱tjatsꞌennii̱ ndiꞌaa̱,
kó xi sa̱ꞌínsꞌijin kui ndi̱jo̱o̱, jmí kjo̱a̱soboá ko̱e̱ꞌéjiín.
7Jún xi je sꞌijinjnú Ndi̱a̱ná, achichí chjínií májnú jún, ta̱nga xota̱ xi sꞌijinjiín kui, ki̱a̱ boá nga fotjosón ni xi tsó xo̱jo̱n eén Néná:
Kui ndi̱jo̱ xi katsꞌénchꞌó já chji̱ni̱e̱xo̱ó,
kuí boá xi ndi̱jo̱ xi sꞌi̱tjatsꞌennii̱ ndiꞌaa̱ kamá.
8Ko̱jo ti̱ bi̱ ti̱ tsó nga:
Kuí boá kui ndi̱jo̱o̱, ngo ndi̱jo̱ xi stingí xotaa̱.
Kó kꞌo̱jmi nga sti̱ngí xotaa̱, ngatꞌa̱ tsintꞌiéꞌénjín kui eén, ngatꞌa̱ je bo̱a̱ tsꞌén tikón nga bo̱a̱ ka̱ma.
Bi̱ tsꞌén íni̱jmì Peé kjo̱a̱a̱ xota̱ xi je xota̱ na̱xi̱ńdaá Néná je kamá
9Ta̱nga jún boá xi xota̱ tji̱e̱ xi je kachjaꞌájii̱n, jún boá xi chináꞌmi xi ndyi̱tsꞌènseén kui Ree̱ xi botixómá ndiꞌakꞌajmi jàn, jún boá xi xota̱ na̱xi̱ńdá tsjie, jún boá xi xota̱ na̱xi̱ńdá xí je tsi̱ꞌe̱ Néná, tsi̱ꞌe̱ nga jún xi ko̱ndókjo̱a̱jnú ni nda xi katsꞌén Néná, kui Néná xi tsíchji̱a̱jnú tsi̱ꞌe̱ nga jatjojnú nínga jñoó, kó ikitjasꞌi̱e̱njnú nínga tsꞌentsíjen kjo̱a̱jee̱ ndiꞌií. 10Jún xi kje̱ꞌe ni̱xtjin nde ngo xota̱ na̱xi̱ńdá kamájínjnú, ta̱nga ngotꞌe̱ ꞌne̱, xota̱ na̱xi̱ńdaá Néná boá jún. Néná ni̱ma̱jín kamaá jún ngasꞌe̱, ta̱nga ngotꞌe̱ ꞌne̱ Néná ni̱ma̱ máa jún.
Bi̱ tsꞌén íni̱jmì Peé tsi̱ꞌe̱ nga ku̱i̱ndyionjnú xikoó xota̱ xi mosoo̱ Néná
11Jún ndí ntsꞌie xi tjóna, ꞌniú míꞌájnúꞌun xikoó xota̱ xi xín nangi, ko̱jo xikoó xota̱ xi ndyi̱foaꞌa kui nga̱sondiee̱, nga ngata̱ boeꞌéjínjnúu̱ ngi̱ndie ni nga̱sondie xi mejeén ini̱ma̱jnú, ngatꞌa̱ kuí nii̱ xi sa̱ꞌínchajajnú, 12nda ti̱ꞌánjnú xikótsꞌèn tindyiónjnú ngi̱jii̱n xota̱ xi bejín Néná, bo̱a̱ ti̱ꞌánjnú ndatsi kui xotaa̱ ngotꞌe̱ ndajín tsꞌén chji̱a̱ kjo̱a̱a̱ jún, ta̱nga nga sku̱i̱e̱ ni nda xi ndyi̱niꞌánjnú, sa̱ꞌíntsjaà Néná ni̱xtjin nga Néná sa̱ꞌínjo̱ xki̱ ngayeje xotaa̱.
13Ta̱ngatꞌanii̱ nga Ndi̱a̱ná ndokjo̱a̱nijnú, cha̱ndikónjnú ngayeje xota̱xá xí chji̱a̱ni kui nga̱sondiee̱, xikoó nda̱ ree̱ xi ꞌniú nkꞌa xaá, 14ko̱jo xtitjón xi tsangiya kui ree̱ xi tsꞌénjeé xota̱ xi ndajín tsꞌeén, kó nda tsꞌén chji̱a̱ kjo̱a̱a̱ xota̱ xi nda tsꞌeén. 15Ngatꞌa̱ kuí nii̱ xi mejeén Néná: Kjiꞌanga nda si̱ꞌánjnú, kjiꞌá boá nga kjókjojnú tsꞌoa xota̱ xi bejín Néná, kó makjínjiín ni xi tsi̱ꞌe̱.
16Xota̱ ndéjnú ngindyi̱ko̱n Néná, ta̱nga ngata̱ kuijín kjo̱a̱ndeé niꞌánkjiénjnú tsi̱ꞌe̱ nga si̱ꞌánjnú ngo ni xi ndajínkjiꞌi, ta̱sá ti̱ndyiónjnú xikoó xota̱ xi mosoo̱ Néná. 17Cha̱ndikónjnú ngayeje xota̱. Ti̱ꞌantjójnú ngayeje ntsꞌié, ko̱jo ndichjá. Ngatamandikónjnú Néná. Cha̱ndikónjnú nda̱ Ree̱.
Bi̱ tsꞌén íni̱jmì Peé ni xi chjiéngá sa̱ꞌín moso̱ xi kastiñaá
18Jún xi moso̱ xi kastiñájnú, cha̱ndikónjnú xota̱ xi ndi̱a̱jnú, kó ndaꞌyáꞌénjnúu̱, jmí tsi ta̱kuítsí xi ndaxotaa̱ ko̱jo xi makjiín, bo̱a̱ ti̱ ti̱ꞌanjo̱jnú kui ndi̱a̱ xi ndajín tsꞌénjo̱jnú nga. 19Ngatꞌa̱ nda tsꞌén tikón ngindyi̱ko̱n Néná nga tsꞌenchíkjo̱a̱ kjo̱a̱ni̱ma̱ xi foaꞌajin kui moso̱ xi kastiñaá, ndatsi chjiénjín nga kui nii̱ kjo̱a̱ꞌajin, ta̱nga chikjo̱a̱rií ngatꞌa̱ jè be nga Néná chji̱a̱ni. 20Ngatꞌa̱ mí ni xi ꞌniú je kjimajnú, tsi kjiꞌanga ndajín si̱ꞌánjnú, ndi̱a̱jnú sa̱ꞌínjéjnú, kó xchíkjo̱a̱jnú. Ta̱nga tsi ni xi nda ndyi̱niꞌánjnú, kó ku̱i̱tja̱tiójnú kjo̱a̱ni̱ma̱, kó tsi xchíkjo̱a̱jnú, ja̱koxi̱ nga kui nii̱ xi nda ngindyi̱ko̱n Néná. 21Ngatꞌa̱ ta̱ngatꞌanii̱ kui nii̱ nga Néná tsíchji̱a̱nijnú, ngatꞌa̱ bo̱a̱ ti̱ tsꞌén Kristoo̱ jaꞌatio kjo̱a̱ni̱ma̱ ta̱ngatꞌanii̱ jún, kó íjñájnú ngo chi̱bo̱a̱ tsi̱ꞌe̱ nga kongintjingíjnú chi̱bo̱a̱ se. 22Kristoo̱ ngojín jé katsꞌén, ti̱nde jmíni̱xtjin tjín xí tsꞌenṉcha̱jo nga tsíchji̱a̱, 23kui xi kjiꞌanga chꞌo kiꞌmií, jmí ni chꞌo katsójín, kó kjiꞌanga kiniꞌánkjaꞌatio kjo̱a̱ni̱ma̱, indyiándikónjín, ta̱sá ngi̱ya tsja Néná kisꞌijñaya, kui Néná xí kixi̱ tsóyà tsi nda ko̱jo tsi ndajín ndyi̱tsꞌèn xotaa̱. 24Kuí Kristoo̱ xi kijíjo̱ jéná ngi̱jin yojoo̱ ki̱a̱ tꞌa kroo̱, tsi̱ꞌe̱ nga ñá ko̱yà kjo̱a̱a̱ jé xí kiniꞌán, kó ku̱i̱ndyión kjo̱a̱a̱ kjo̱a̱kixi̱i̱. Kó ta̱ngatꞌanii̱ nga kiniꞌánꞌoón Kristoo̱ nga jún je kamándayajnú. 25Ngatꞌa̱ jún ngasꞌe̱ kisꞌiṉtso̱majnú xikoó cho̱tsa̱nga̱ xi kichajá, ta̱nga ngotꞌe̱ ꞌne̱ jè jéꞌe̱chon nginíjnúu̱ Kristoo̱, nda̱ xi kondajnú kui xi xikoó nda̱ xi konda cho̱tsa̱nga̱a̱.
Currently Selected:
1 Xo̱jo̱o̱n Peé 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
