2 Samuel 1
1
David noma'a da'me yeleu di'me Saúl
1Da'me joote yeleu ñe'me Saúl, ñe'me David 'viyelaĝague di'me Siclag da'me joote noma't jogaa'me Amalec laje', qama'le ue'ta jodi'me jaa'me dos noloqo'ote. 2Qalaĝaja yenoĝodegue jaa'me tres noloqo'ote ca'li novi' ñe'me jiyaĝaua, chiyoĝogue ga'me lomachaqa' ñe'me Saúl, jo'ne yecolaĝata'aguelo gaa'me leuo lael nataq'aen ga'me laqaic najaĝaye ga'me aleua qa'a en yelo'teguet da'me 'uo da'me layaliaĝac. Ca'li yovita ñe'me David, naĝañi chayovida'a yeda'aguet jena'me aleua qa'a en yelo'teguet da'me 'uo da'me lauategaĝa. 3David yenat joñe'me:
«¿Jach'e ga'me auachiyoĝogue?»
Ñe'me jiyaĝaua 'yateguet ca'li:
«Jachiyoĝogue ga'me lomachaqa't gaa'me Israel laje', jachiyaqa'ña da'me jajoye.»
4Ñe'me David yenatetalegue ca'li:
«Qama'le ¿jach'e ga'me 'uo joga'me? ¡'Noota ta'le jayem a'uaĝatem!»
Joñe'me jiyaĝaua 'yateguet:
«Ga'me nalada't lo'olpi jo'ne Israel laje' chiyoqodaue ga'me nalada't da'me dajodegue, nataq'aen jalcote dia'me yele'u. ¡Nataq'aen yele'u dia'me Saúl nataq'aen di'me c'oĝot Jonatán!»
5Ñe'me David yitaĝa yachimaĝata joñe'me:
«¿Qama'le toqoch'e auayaten da'me yeleu ñe'me Saúl nataq'aen di'me Jonatán?»
6Joñe'me jiyaĝaua 'yateguet:
«Naloja'a da'me joue'ta ga'me qajoĝonaĝa di'me Guilboa, qama'le jauana ñe'me Saúl uajelta'añgui jaga'me nemiyoĝo, nataq'aen gaa'me laute'upi jo'ne netañguilo gaa'me cadeetal nataq'aen gaa'me netalo'te gaa'me pe'ga naditedapega joñe'me. 7Qama'le ua'a da'me nejelec joñe'me, qama'le da'me jayem yauana, jayem yiyaĝana. Qama'le ja'uo ga'me jayem yamaĝalegue. 8Qama'le jayem yachimaĝata jach'e ga'me jachiyoĝogue, qama'le ja'aĝatem da'me jayem Amalec le'ec. 9Qama'le jayem dojapegue' qaedi jepaca'a qama'le jalat, qa'a joote yataqachiñe ja 'noota, qalaĝaja, maliaĝa nec'aletaye. 10Chane'eja jepaca'a joñe'me qama'le jalat, qa'a jayaten da'me ja nec'alegue jouaĝat da'me joote 'uo ga'me yédiñe. Yem qama'le ñaqat jaga'me noqop'a nataq'aen ga'me louaĝajec, qaedi am ñeda'alo, am yejaliaĝanec.»
11Qama'le David choqogaa'me quetedapegue' yecolaĝata'aguelo gaa'me leuo lael qa'a e'n yelo'teguet da'me 'uo da'me layaliaĝa'j, 12qama'le noye'tape nataq'aen lichiguilo naa'me lai'li, jouaĝat da'me yele'u di'me Saúl choqodi'me c'oĝot Jonatán, nataq'aen da'me qonomachichidiñe gaa'me nalada't lo'olpi jo'ne Israel laje', mach'e lec'oqo'tepi joñe'me Jaliaĝanec, qama'le cha'li noqouaqatela'ajalo chayovida'a jo'me javit. 13Yem qama'le David yachimaĝata ñe'me coico le'ec jo'ne novidaĝat da'me dojo' 'naqataĝanaĝac:
«¿Da'me am, jach'e ga'me auachiyoĝogue?»
Joñe'me 'yateguet:
«Jayem Amalec le'ec, ja 'yachaqa'ena.»
14Nachoĝodenaĝac ñe'me David:
«¿Toqoch'e qaya'te adoqolanaĝa da'me aualat di'me jaliaĝanec jo'ne Dios liquiyac?»
15Qama'le onolec ga'me yiyaĝana gaa'me lalemaĝaje'te, qaedi yamaĝalegue:
«¡Am e'tegue, aualat!»
Joñe'me lalemaĝajet ñe'me David yalat joñe'me Amalec le'ec, 16qaale maliaĝa dojetapelegue ñe'me David eetac:
«Da'me dojo' adeleuaĝa mach'e anejouaĝatela't, qa'a mach'e am da'me a'naĝatapela't da'me mach'e aualat di'me jaliaĝanec jo'ne Dios liquiyac.»
Nachoĝodenaĝac ñe'me David
17David ya'uo jenjo' lalac jo'ne nachoĝodenaĝac yeloĝonaĝa'teguet da'me leleuaĝa ñe'me Saúl choqodi'me c'oĝot Jonatán. 18Nataq'aen damajoĝolegue qaedi qoyapaĝagueneque gaa'me jiyaĝadipi jo'ne 'lachaqa't di'me Judá jenjo' nalac,#1:18 Jenjo' nalac: uotaĝa naq'aeta da'me yelo'teguet ga'me hebreo 'laqatac ca'li: qaedi yema napaĝaguena da'me deloiquiaĝana ga'me chiquenec. Jenjo' nalac male uetalegue jaga'me nede jo'ne lenaĝat «Lede ga'me Yataqatelegue».#1:18 Lede ga'me Yataqatelegue: nede jo'ne cop'a da'me ja qoyayaten. Uetalo'te jooga jogaa'me nalaco jo'ne 'yañaqate't ga'me jiyaĝadipi nale 'uo ga'me nalada't. Eetac:
19«¡Degueja, am Israel!
¡Nimichidiñe dia'me yataqachiñe 'uañaĝayaqa,
ua'a gaa'me qajoĝona'a,
qama'le nayi male qaya da'me at'onaĝa!
20Ena'te a'uaqataĝañiyem gaa'me 'lachaqa't di'me Gat
nataq'aen ena'te aueñi nomedaye jogaa'me ua'alo
gaa'me noqoigaĝaco di'me Ascalón,
qaedi qaya'te netonaĝa'j gaa'me yauodipi
jo'ne filisteo lajel,
nataq'aen qaedi ja dajote'tape,
jouaĝat da'me 'uo ga'me lamai'j
jogaa'me ja Israel laje'.
21»¡'Noota qom ja yitaĝa ami ñetelo'te
ga'me uotep uotaĝa ga'me nichaĝa,
ami qajoĝona'a di'me Guilboa,
qa'a nach'e ami ua'alo ga'me neleuaĝa!
Naqaedi ua'a da'me qopelo'te
gaa'me letoguijel jo'ne lequepaĝanaqatel gaa'me 'uañaĝayaqa.
Naqaedi ua'a da'me om da'me laqajelgaĝac
jaga'me letoguije ñe'me Saúl.
22»Saúl nataq'aen di'me Jonatán ja ch'e yauata ta'le 'niyelaĝa't
gaa'me ledaĝanaqa'te nataq'aen gaa'me lechiquenal
qom ja uetayelo jaga'me letauo' jogaa'me laute'u
nataq'aen gaa'me lecheta'
gaa'me nalada't lo'ol jo'ne yataqachiñe 'uañaĝayaqa.
23»Saúl nataq'aen Jonatán, jo'ne yataqachiñe ami qanauotaĝa'u,
da'me cha'li 'uo da'me anejiyaĝauayaĝaqui
nataq'aen da'me adelevi,
ja ch'e ta'le ami colaĝayelo.
¡Yataqachiñe ja ami 'te lauayaqa,
aueñiya'ama gaa'me mayodi jo'ne uole!
¡Yataqachiñe ami 'uañaĝayaqa,
aueñiya'ama gaa'me jauaĝayaqa!
24»¡Ami Israel c'oqotel,
anoyeñitapelegue di'me Saúl,
jo'ne nach'edi e'n auaeñiñe
gaa'me yataqachiñe onaĝael aneuoĝoildi'
nataq'aen yauo'oe gaa'me adi'yoĝodaqa'chidi' jo'ne oro!
25¡Jodia'me yataqachiñe 'uañaĝayaqa male nimichidiñe,
da'me uedaue ga'me nalada't!
¡Di'me Jonatán yeleu
ua'alo gaa'me yataqachiñe qayaje'meque qajoĝona'a!
26»¡Yataqachiñe lichigui jena'me yeuel,
jouaĝat am Jonatán, jo'ne mach'e am yaqaya!
¡Yataqachiñe onaĝaic da'me jayem a'uetec ca'li!
Da'me adoqopich'i napacalegue
ga'me loqopich'i' jogaa'me yauodipi.
27»¡Jodia'me yataqachiñe 'uañaĝayaqa male nimichidiñe!
¡Gaa'me le'uoĝonaqa'te qa'a qoyolaĝachiguilo!»
Currently Selected:
2 Samuel 1: TDO
Highlight
Share
Compare
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
