1 Samuel 31
31
Saúl choqogaa'me c'oqo'te yele'u
(1 Crónicas 10:1-12)
1Male nalada't ca'li jogaa'me filisteo laje' choqogaa'me Israel laje' nach'egaua dajodegue ca'li, qama'le jalcote dia'me yele'u gaa'me Israel laje' ueda'a ga'me qajoĝonaĝa di'me Guilboa. 2Gaa'me filisteo laje' yecadac ñe'me Saúl choqogaa'me c'oqo'te, qama'le yala't di'me Jonatán, di'me Abinadab nataq'aen di'me Malquisúa. 3Male nejoĝona't da'me yecadac ñe'me Saúl, qama'le gaa'me chiquenec lo'olpi ch'e yiloĝotegue ñe'me. Chane'eja joñe'me Saúl jaqachigui da'me loqolanaĝa, 4qama'le dojapegue' ñe'me necochoqo't, enaac:
«Anaqat na'me adedaĝanaĝat qama'le jayem aualat, qaedi ja jayem 'te yala't jonaa'me naajo' laute'u joñe'me Jaliaĝanec, qa'a natequena qaedi jayem ye'ue'n.»
Qalaĝaja joga'me necochoqo't ja ya'uo da'me dojo', jouaĝat da'me yataqachiñe jaqachigui da'me loqolanaĝa. Qama'le ñe'me Saúl mach'e naqat ga'me ledaĝanaĝat, qama'le naqapaĝa'añiguet. 5Ca'li ñe'me necochoqo't yauana queda'me yeleu ñe'me Saúl, qama'le nach'e ena'am naqapaĝa'añiguet ga'me mach'e ledaĝanaĝat qama'le nach'e ena'am yeleu. 6Qama'le naq'aeta jo'me nolo' ca'li yele'u ñe'me Saúl choqogaa'me c'oqo'te, choqoga'me necochoqo't nataq'aen ena'uaque jogaa'me coicopi. 7Ca'li jogaa'me Israel laje' jo'ne neteda'ague ga'me p'aita lataĝaua ga'me c'ama'ague, nataq'aen lajego di'me ñache Jordán, yauata ga'me nalada't lo'olpi jo'ne Israel laje' queda'me dajodegue, nataq'aen queda'me Saúl choqodia'me c'oqo'te da'me joote yele'u, male ca'ae jonaa'me noyaqa jo'ne 'lachaqa'ate qama'le dajodegue. Chane'eja jogaa'me filisteo laje' yovitalo jogaa'me, male na'ñalo. 8Ga'me nete' laqaya ca'li, gaa'me filisteo laje' yovideta ga'me ueda'a jodia'me yele'u qaedi neje't, qama'le yacota ga'me jo'ne 'uo da'me lajo'viyaĝac. Qama'le yejomedalegue di'me Saúl choqodia'me c'oqo'te jo'ne tres ueteda'añdi, ueda'a ga'me qajoĝonaĝa di'me Guilboa. 9Qama'le yaconalo gaa'me le'uoĝonaqa'te di'me Saúl nataq'aen yichaĝadegue ga'me laqaic, nataq'aen yamaĝategue ga'me 'laqataĝanaĝa'j ena'uac di'me 'naleua' jogaa'me, qaedi yanomaĝadayi ga'me jiyaĝadipi nataq'aen ga'me tamenaĝaiqui joga'me mach'e p'iyapegalo. 10Nataq'aen yachedaue gaa'me le'uoĝonaqa'te di'me Saúl ga'me netamenaĝaiqui ñe'me Astarté, nataq'aen netaĝatañe q'aen ga'me lapat, yaneda'ña ga'me nequepaĝanaĝat jo'ne ua'a di'me Bet-sán.
11Ca'li jogaa'me 'lachaqa't di'me Jabés, 'naleua di'me Galaad, nomeda'a ga'me jo'ne 'yedetec di'me Saúl jogaa'me filisteo laje', 12ena'uaque jogaa'me yataqachiñe 'uañaĝayaqa dajotegue jo'me pi'yaq, chayovida'a yovideta ga'me nequepaĝanaĝat jo'ne ua'a di'me Bet-sán, qama'le yacota ga'me lapat ñe'me Saúl choqogaa'me c'oqo'te, qama'le yedotegue di'me Jabés; ua'a da'me yegouelo. 13Nach'e ena'am yacheda'ña jogaa'me p'inaqa da'me yejediñe yachedo'ot jaga'me epaq. Yem qama'le noqouaqatela'ajalo jaa'me siete noloqo'ote.
Currently Selected:
1 Samuel 31: TDO
Highlight
Share
Compare
Copy
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
